Na O Bega Ka Mehla?
1 Ke mo go lapološago gakaakang go amogela dipego tša modiro o phethilwego tšhemong! Se se bontšha gore Jehofa o tšwela pele a mediša. (1 Ba-Kor. 3:6) Yo mongwe le yo mongwe wa rena o ikarabela ka go kgonthišetša gore pego e feletšego le e nepagetšego e romelwa ofising ya lekala.
2 Ga go na pelaelo gore ka moka ga rena re ile ra thabela go tseba gore go ile gwa fihlelelwa ditlhora tše mpsha tša bagoeledi ka August 1996 go bontši bja dinaga tšeo di okametšwego ke lekala la Afrika Borwa. Lega go le bjalo, go hlokometšwe gore diphuthego tše 111 mono Afrika Borwa ga se tša romela dipego tša tšona ka nako bakeng sa pego ya August. Se se swanago e bile sa therešo ka diphuthego tše 15 Botswana, tše 22 Lesotho, tše 5 Namibia le tše 35 Swaziland. Go feta moo, go ya ka dipalo tša Pego ya Tlhahlobo ya Phuthego (S-10) yeo e rometšwego ke mongwaledi wa phuthego e nngwe le e nngwe, go na le bagoeledi ba dikete tše sego kae ka diphuthegong bao ba sa tlišego dipego tša bona. Bothata bo ka ba bo le gabedi: Bangwaledi ba bangwe mo gongwe ba ka ba ba sa romele dipego ka nako e swanetšego gomme bagoeledi ba bangwe mo gongwe ba ka ba ba sa bege.
3 Mogoeledi yo mongwe le yo mongwe o swanetše go ipotšiša gore: ‘Na ke bega tirelo ya-ka ya tšhemo ka mehla le ka nako mafelelong a kgwedi e nngwe le e nngwe?’ Ka moka ga rena re ikarabela ka go dira gore pego ya kgwedi e nngwe le e nngwe e be e feletšego le e nepagetšego. Go dira bjalo go tla bontšha go hlompha ga rena dithulaganyo tša mokgatlo wa Jehofa le go bontšha tebogo ya go leboga karolo e nyenyane yeo re bago le yona go direng gore pego e be e nepagetšego.
4 Ka ge mongwaledi a swanelwa ke go romela pego ya phuthego ya tirelo ya tšhemo go Mokgatlo ka la tshela la kgwedi e latelago, go ka bonwa gabonolo lebaka leo ka lona go lego bohlokwa gore mogoeledi yo mongwe le yo mongwe a tliše pego ya gagwe ya tirelo ya tšhemo ka nako mafelelong a kgwedi. Na o sepedišana le thulaganyo ye ka go bega ka nako le ka mo go nepagetšego mafelelong a kgwedi e nngwe le e nngwe?
5 Mogoeledi yo mongwe le yo mongwe yo a sepedišanago ka go rata le dithulaganyo tše di boletšwego ka mo godimo a ka ba le kgotsofalo ya go tseba gore o tsentše letsogo go direng pego e nepagetšego ya kgwedi le kgwedi ya modiro wa Dihlatse tša Jehofa. (Bapiša le Hesekiele 9:11.) Eka ka moka ga rena re ka tliša dipego tša tirelo ya tšhemo tše di nepagetšego le ka nako kgwedi e nngwe le e nngwe!