Go Ingwadiša Sekolong Sa Bodiredi Sa Pušo Ya Modimo
1 Sekolo sa Bodiredi sa Pušo ya Modimo se bile le mohola tlwaetšong ya Dihlatse tša Jehofa tše dimilione e le badiredi ba ditaba tše di lokilego. Ba bantši ba rena re gopola kamoo re bego re tšhoga ka gona e bile re ikwa re sa swanelege ge re be re thoma go ingwadiša sekolong se, gomme mo nakong ye re leboga ka lethabo tema yeo se e kgathilego kgolong ya rena ya moya re le diboledi le barutiši ba Lentšu la Modimo. (Bapiša le Ditiro 4:13.) Na o ingwadišitše sekolong se se se kgahlišago?
2 Ke bomang bao ba ka ingwadišago? Letlakala 73 la puku ya Go Rulaganyetšwa go Dira Bodiredi bja Rena le araba ka gore: “Bohle bao ba kopanelago ka mafolofolo le phuthego ba ka ingwadiša, go akaretša le batho ba sa thomago go ba gona dibokeng ge fela ba sa phele bophelo bjo bo fapanego le melao ya motheo ya Bokriste.” Re laletša bohle bao ba swanelegago—banna, basadi le bana—gore ba ye go molebeledi wa sekolo gomme ba kgopele go ngwadišwa.
3 Lenaneo la Sekolo la 1997: Lenaneo la Sekolo sa Bodiredi sa Pušo ya Modimo la 1997 le akaretša dikarolo tše di fapa-fapanego tša dithuto tša Beibele le baanegwa, gotee le histori ya mokgatlo. Go okeletša go godišeng bokgoni bja rena bja go bolela le bja go ruta, re ithuta go tšwa matlotlong a mantši a moya ao a hwetšwago lenaneo-thutong la sona la beke e nngwe le e nngwe. (Die. 9:9) Ge e ba re lokišetša sekolo, e lego moo go akaretšago go dira mmalo wa Beibele wa beke le beke, gomme re e ba gona ka mehla, re ka hwetša mohola o mogolo wa moya lenaneong.
4 Ka 1997 bontši bja mmalo wa Beibele wa Kabelo No. 2 ke o mokopana go feta wa nywageng e fetilego. Ge a lokišetša kabelo ye, morutwana o swanetše go hlahloba nako ya gagwe ka kelohloko gomme a dire phetho ya gore ke nako e kaakang go metsotso e mehlano yeo e abetšwego karolo ya gagwe yeo e ka dirišetšwago matseno le phetho. Se se tla dumelela morutwana go diriša nako ye ka botlalo gotee le go godiša bokgoni bja go bala gotee le bokgoni bja go bolela le semeetseng.—1 Tim. 4:13.
5 Go nea bohlatse bjo bo sa rulaganyetšwago go okeleditšwe e le thulaganyo yeo e ka dirišwago bakeng sa dithero tša Kabelo No. 3, tšeo di theilwego pukung ya Tsebo. Ka gona kgaetšedi a ka kgetha leeto la go boela, thuto ya legae ya Beibele goba go nea bohlatse bjo bo sa rulaganyetšwago e le thulaganyo ya kabelo ye. Go ba gona, selo se segolo seo se swanetšego go gatelelwa e swanetše go tšwela pele e le go ruta ka katlego e sego thulaganyo ya polelo.
6 Go sa šetšwe gore o na le tokelo ya go nea polelo ya tayo, dintlha tše dikgolo tša Beibele, goba kabelo ya morutwana, o ka bontšha tebogo ya gago ya go leboga Sekolo sa Bodiredi sa Pušo ya Modimo ka go lokišetša le go boeletša karolo ya gago gabotse, ka go e neela ka kgodišego le phišego, ka go se fetiše nako, ka go theetša keletšo ya molebeledi wa sekolo le go e diriša le ka gore ka mehla o katanele go phetha kabelo ya gago ka potego. Ka go rialo go ingwadiša ga gago sekolong go tla ipontšha e le tšhegofatšo go wena gotee le go bohle bao ba lego gona.