Bontšha Tlhompho Ya Go Hlompha Lefelo La Jehofa La Borapedi
1 Ge re le baeng ka ntlong ya motho yo mongwe, re bontšha tlhompho ya go hlompha thoto ya motho yoo ka go se dire selo le ge e le sefe seo se ka e senyago, gomme ga re šitišane le mokgwa o mobotse wa lapa. Se e swanetše go ba sa therešo gakaakang ge re le baeng ba Jehofa! Re swanetše go tseba kamoo re swanetšego go itshwara ka gona ka ntlong ya gagwe. (Ps. 15:1; 1 Tim. 3:15) Go sa šetšwe gore seboka sa Bakriste se swarelwa ka Holong ya Mmušo, legaeng la motho, goba lefelong la batho bohle, ba bantši ba rena ka mehla re bontšha tlhompho ya go hlompha lefelo la rena la borapedi bjalo ka ge eka ke ntlo ya Jehofa, yo ‘letago la gagwe le ukametšego lefase le magodimo.’—Ps. 148:13.
2 Ba bangwe ba banababo rena ba bontšha go hloka tlhompho dibokeng ka go hlaba lešata goba go itshwara eka tsebišo e newago e be e se bohlokwa. Batho ba sego kae ba bagolo ba swara dipoledišano tšeo di sa nyakegego seferong, ntlwaneng ya ka thoko goba ka ntle ga Holo ya Mmušo ge diboka di le gare di tšwela pele. Ge ngwana yo mogolwanyane a tlogetšwe gore a hlokomele ngwana yo monyenyane, ka dinako tše dingwe bobedi bja bona ba thoma go bapala gomme ba holega ganyenyane lenaneong. Bafsa ba bangwe ba ile ba bonwa ka ntle ga Holo ya Mmušo ka morago ga diboka, ba bapala, ba hlaba lešata ka mo go feteletšego, gaešita le go bapala karate. Dinakong tše dingwe ba ile ba tshwenya baagišani goba ba šitiša dikoloi lefelong la go emiša dikoloi goba setarateng.
3 Kamoo go ka Phengwago ka Gona go ba ba sa Hlomphego: Ka go kwešiša seriti le go kgethega ga borapedi bja rena, ka ntle le pelaelo re ka se ke ra nyaka go šitiša batho ba bangwe ka go seba, go ja, go sohla mmotu, go gwaša-gwašiša dipampiri, go dira maeto ao a sa nyakegego a go ya ntlwaneng ya ka thoko goba go tlwaela go fihla dibokeng ka morago ga nako. Batswadi ba bontšhago tlhompho le tebogo ga ba dumelele bana ba bona gore ba šilafatše khapete, ditulo goba maboto a Holo ya Mmušo goba legae leo go swarelwago thuto ya puku go lona. Le gona ga go pelaelo gore ka moka ga rena re dumela gore go tloga go se sebaka sa mohuta le ge e le ofe wa boitshwaro bjo bo lešago dihlong, dipolelo tša bošilo goba metlae e gobogilego dibokeng tša rena.—Ba-Ef. 5:4.
4 Ge e ba ka mehla re gopola morero wa diboka tša rena tša Bokriste, re tla kgonthišetša gore rena le bana ba rena re bontšha tlhompho e swanetšego ya go hlompha borapedi bja Jehofa lefelong leo re ‘kgethilego go ema go lona.’—Ps. 84:10, NW.