Thabela Go Nea Bohlatse Ka Mo Go Tletšego

1 Ka Moka Ga Rena Re Thabela Go Dira Dilo Tšeo Re Kgonago Go Di Dira Gabotse. Mareka 7:37 E Bolela Gore Mašaba A Ile A Tsebatša Mabapi Le Jesu Gore: “Tšohle Ó Di Dirile Xa-botse.” Ga Go Makatše Ge Jesu A Ile A Thabela Go Dira Thato Ya Jehofa! (Bapiša le Psalme 40:8.) Ka Go Naganišiša Ka Ditšhišinyo Tše Di Latelago, Le Rena Ka Mo Go Swanago Re Tla Hwetša Lethabo Ge Re E-kwa Taelo Ya Jesu Ya “Xo Xoêlêla Batho Le Xo Mmeêla Bohlatse.” (Dit. 10:42) Ka January Re Sepediša Puku Ya Motho Yo A Phagamego Kudu Yo A Kilego A Phela Goba Go Tsoma Ga Batho Modimo. Re Ka Diriša Bjang Dipuku Tše Go Nea Bohlatse Ka Mo Go Tletšego?

2 Ka ge batho gantši ba tshwenyega ka ditaba tša bophelo bjo bobotse o ka bolela se:

◼“Go sa šetšwe bogolo bja seo se fihleletšwego lehlakoreng la tša kalafo, go na le tlaišego e kgolo e bakwago ke bolwetši. Go ya ka pono ya gago, ke ka baka la’ng go le bjalo? [Dumelela karabo.] Jesu Kriste o boletše gore mauba a malwetši e tla ba seka sa mehla ya bofelo. [Luka 21:11] Lega go le bjalo, Beibele e bile e hlalosa nako yeo ka yona bolwetši bo tla bego bo se gona. [Bala Jesaya 33:24.] Hlokomela kamoo puku ye ya dikgakollo e tutueletšago go ba le kholofelo thutong yeo ya motheo ya Beibele.” Gatelela ditlhaloso tše di swanetše go Thuto 46 goba 57 gomme o nee puku ka moneelo wa R12,00.

3 Ge o nea bohlatse ka mo go sa rulaganyetšwago kgaufsi le mafelo a mabenkele, o ka dumediša ke moka wa botšiša gore:

◼“Na o a bona gore dilo di thoma go bitša kudu mehleng yeno mo e lego gore go thata go hwetša sa go iphediša? [Dumelela karabo.] Na o nagana gore go tla ka gwa ba le nako yeo ka yona go tlago go ba le tšhireletšego ya kgonthe ya tša boiphedišo?” Dumelela karabo. Ke moka bontšha Thuto 52 e rego “Jesu o Fepa ba Dikete ka Mohlolo,” o lebiša tlhokomelo diswantšhong le dikarolong tše swanetšego. Sepediša puku ka R12,00. O ka bolela kamoo o thabetšego poledišano ka gona, ke moka wa botšiša gore: “Na go na le tsela le ge e le efe yeo ka yona re ka tšwetšago pele poledišano ye nakong e nngwe?” Ka tsela ye o ka kgona go hwetša nomoro ya motho yo ya mogala goba aterese ya legae.

4 Mo gongwe o ka ba le sebaka sa go leka thero ye ge o bolela le motswadi goba le mofsa:

◼“Bafsa ba bantši ba nyaka mehlala yeo ba ka e ekišago, eupša go thata go hwetša e mebotse. Jesu Kriste o beetše yo mongwe le yo mongwe mohlala o phethagetšego. [Bala 1 Petro 2:21.] Bophelo bja gagwe ka moka bo be bo theilwe borapeding bja Tatagwe wa legodimong. O nagana gore go be go tla ba bjang ge e ba batho ba oketšegilego ba be ba leka go mo ekiša?” Dumelela karabo. Šupa go serapa 3 letlakaleng le le tlago pele ga la mafelelo la puku, seo se hlalosago dika tša gagwe tše kgethegilego. Hlalosa kamoo puku ya Motho yo a Phagamego Kudu e ka thušago rena ka moka go ba Bakriste ba bakaone. Sepediša puku ka R12,00 gomme o dire dithulaganyo tše tiilego tša go boela.

5 Ge o boela bakeng sa go bona bao ba bontšhago kgahlego, o ka katanela go thoma thuto ya Beibele ka go dumelelanya matseno a le maemo:

◼“Nakong e fetilego ge re be re bolela, o ile wa bolela selo se sengwe se se kgahlišago kudu. [Bolela tlhaloso yeo motho yoo a e boletšego.] Ke be ke dutše ke nagana ka seo, gomme ke rata go abelana le wena mafelelo a nyakišišo yeo ke ilego ka e dira mabapi le taba ye. [Bontšha lengwalo le le swanetšego.] Re ithapela go swara thuto e sa lefelelwego yeo e ilego ya dira gore batho ba dimilione ba nyakišiše dithuto tša motheo tša Beibele ka nako e kopana. Tlhahlobo e bjalo e ka aga kgodišego ya gago ka phethagalo e itšego ya dikholofetšo tša Modimo.” Gatelela dipotšišo tše dingwe tšeo di tlago go arabja. Ge e ba motho a gana mpho ya thuto ya Beibele, hlalosa gore re bile re na le thuto e kgethegilego e akgofago yeo e tšeago metsotso e 15 feela ka beke ka dibeke tše 16. Bontšha poroutšha ya Seo Modimo a se Nyakago, phetla go thuto 1, gomme o botšiše ge e ba o ka bontšha thuto ya pele.

⁶ Gopola go Diriša Dipampišana tša Taletšo: Di ka dirišwa ka mo go atlegilego matsenong a gago bakeng sa go tsoša kgahlego ya go kgahlegela ditaba tša moya goba di ka sepedišwa ge e ba go se na dipuku tšeo di amogetšwego. Mo go nago le kgahlego, diriša molaetša o gatišitšwego o lego letlakaleng la ka morago la pampišana ya taletšo go kgothaletša motho gore a amogele thuto ya Beibele ya legae le gore a tle dibokeng tša rena.

⁷ E-ba yo a kgonago modirong wa gago, gomme o tla o thabela. Dula o phakgamela go nea bohlatse ka mo go tletšego, gomme o thabele go dira dibopego ka moka tša bodiredi gabotse.—1 Tim. 4:16.