Dihlatse Tša Jehofa —Baebangedi Ba Therešo
1 Jesu Kriste o beile boikarabelo bja go bolela ebangedi go barutiwa ba gagwe ka moka, a ba laela ka go lebanya gore ba bolele ditaba tše di lokilego tša Mmušo. (Mat. 24:14; Dit. 10:42) Barutiwa ba gagwe ba pele ba beile mohlala go se ka ge ba ile ba bolela ka Mmušo ntle le go kgaotša—e sego feela mafelong a borapedi, eupša kae le kae moo ba bego ba kopana le batho phatlalatša le ka go ya ka ntlo le ntlo. (Dit 5:42; 20:20) Bjalo ka Dihlatse tša Jehofa lehono, re itlhatsetše re le baebangedi ba therešo ba Bakriste, ka go bolela molaetša wa Mmušo dinageng tše 232 gomme ra kolobetša barutiwa ba bafsa ba fetago milione nywageng e meraro feela e fetilego! Ke ka baka la’ng modiro wa rena wa boebangedi e bilego o atlegilego gakaakaa?
2 Ditaba tše di Lokilego di a re Hlohleletša: Baebangedi ke baboledi goba batseta ba ditaba tše di lokilego. Ka go rialo, re na le tokelo e kgahlišago ya go tsebatša Mmušo wa Jehofa—ditaba di nnoši tše di lokilego tša kgonthe tšeo di ka newago batho bao ba gateletšegilego. Re ba fišegago mabapi le tsebo yeo re e hweditšego e sa le pele ya magodimo a mafsa ao a tlago go buša lefase le lefsa leo le dirilwego ka batho ba botegago Paradeiseng e tlago. (2 Pet. 3:13, 17) Ke rena feela bao re amogetšego kholofelo ye, gomme re fagahlela go e abelana le ba bangwe.
3 Lerato la Kgonthe le a re Tutuetša: Modiro wa boebangedi ke modiro o phološago bophelo. (Ba-Roma 1:16) Ke ka lebaka leo re nago le lethabo le legolo ge re phatlalatša molaetša wa Mmušo. Bjalo ka baebangedi ba therešo, re rata batho, gomme seo se re tutueletša gore re abelane ditaba tše di lokilego le bona—malapa a rena, baagišani, batho bao re tlwaelanego le bona le ba bangwe ba bantši ka mo go ka kgonegago. Go dira modiro wo ka moya ka moka ke e nngwe ya dipontšho tše botse kudu tšeo re ka di dirago tša lerato la rena la kgonthe bakeng sa ba bangwe.—1 Ba-Thes. 2:8.
4 Moya wa Modimo o a re Thekga: Lentšu la Modimo le re kgonthišetša gore ge re dira modiro wa rena wa go bjala le go nošetša peu ya Mmušo, Jehofa ke yena a ‘medišago.’ Se ke sona seo re se bonago se direga ka mokgatlong wa rena lehono. (1 Ba-Kor. 3:5-7) Ke moya wa Modimo wo o re thekgago modirong wa rena wa boebangedi le go nea katlego e kgolo.—Joele 2:28, 29.
5 Ka baka la kgothatšo e lego go 2 Timotheo 4:5, (NW) ya go ‘dira modiro wa boebangedi,’ le ka baka la lerato la rena la go rata batho ka moka, eka re ka tutueletšega go abelana le ba bangwe ditaba tše di lokilego tša Mmušo tše kgahlišago ka sebaka se sengwe le se sengwe, re kgodišegile gore Jehofa o tla tšwela pele a šegofatša modiro wa rena.