Ge E E-Ba Le Mafelelo A Mabotse, Gona E Diriše!
1 Tirelo ya Rena ya Mmušo e re nea ka mo go tšwelago pele dithero tše di fapa-fapanego tše di šišintšwego gore re di diriše bodireding. Se se re nea dikgopolo tše difsa tša kamoo re ka bopago kgahlego molaetšeng wa Mmušo. Mohlomongwe e ka ba e le gore o dira boiteko kgweding e nngwe le e nngwe go ithuta e tee goba tše oketšegilego tše. Lega go le bjalo, bagoeledi ba bangwe ba ka hwetša gore ka nako yeo ba dirišitšego e nngwe ya tšona ka makga a mantšinyana, tokollo e nngwe ya Tirelo ya Rena ya Mmušo e nea dithero tše difsa. Go molaleng gore go ka no se kgonege ka yo mongwe le yo mongwe go ithuta thero e mpsha pele a kgona ya nakong e fetilego.
2 Ke therešo gore go na le babulamadibogo ba dikete le bagoeledi ba bangwe bao ba dirišago nako e ntši tirelong ya tšhemo. Go feta moo, diphuthego tše dintši di šoma tšhemo ya tšona ka moka dibeke tše dingwe le tše dingwe tše sego kae. Maemong a, bagoeledi ba thabela go ba le matseno a mafsa le dikgopolo tše difsa bakeng sa go rola molaetša. Se se ba thuša go oketša bokgoni bja bona. Gape se dira gore bodiredi bja bona e be bjo bo kgahlišago kudu le bjo bo enywago dienywa le go ba thuša gore ba emeletšane le ditlhohlo tšeo ba lebeletšanago le tšona.
3 Boemong le ge e ka ba bofe, ge e ba o lokišeditše thero yeo e atlegago go hlagoleleng kgahlego, tšwela pele o e diriša ka ditsela tšohle! Ga go nyakege gore o kgaotše go diriša thero e atlegago ye e bago le mafelelo a mabotse. E-fo e dumelelanya le mpho ya dipuku ya kgwedi yeo. Ge o dutše o hlahloba ditšhišinyo tšeo di neilwego ka go Tirelo ya Rena ya Mmušo, lebelela dintlha tše kgahlišago tšeo o ka ratago go di logelela therong ya gago.
4 Ka gona ge o amogela tokollo e mpsha ya Tirelo ya Rena ya Mmušo, gopola gore dithero tšeo e nago le tšona e fo ba ditšhišinyo feela. Ge e ba o ka kgona go di diriša, go lokile. Eupša ge e ba o šetše o hweditše thero yeo e bago le mafelelo a mabotse tšhemong ya gabo lena, e diriše! Selo sa bohlokwa ke go “phetha bodiredi bja gago ka mo go tletšego” ka mokgwa o mobotse, re hwetša bao ba swanelegago le go ba thuša go ba barutiwa.—2 Tim. 4:5, NW.