Bana—Le Lethabo La Rena!
1 Bašemane le banenyana ba banyenyane, na le tlwaelane le taelo ya Jehofa ya gore le akaretšwe medirong ya phuthego? (Doit. 31:12; Ps. 127:3) Re thabela go ba ga lena hleng ga rena ge re rapela Jehofa re le gotee! Le re thabiša dipelo ge le dula ka go kgosela dibokeng gomme le theetša ka kelohloko. Go re thabiša kudu ge le leka go nea ditlhaloso ka mantšu a lena. Phuthego ka moka e thabišwa ke ge le nea dikarolo tšeo le di abetšwego Sekolong sa Bodiredi sa Pušo ya Modimo, ge le fišegela go ya le rena tirelong ya tšhemo, le ge re e-kwa gore le nea bohlatse ka sebete go bao le tsenago le bona sekolo gotee le go barutiši.—Ps. 148:12, 13.
2 Re rata gore le tsebe gore re ikgantšha ka lena ge re bona mekgwa ya lena e mebotse, ponagalo ya lena ya bothakga, boitshwaro bja lena bjo bo hlwekilego le go hlompha ga lena batho ba bagolo. Lethabo la rena e ba le legolo ka mo go kgethegilego ge le bontšha gore le ‘gopola Mmopi wa lena yo Mogolo’ ka go ipeela ga lena dipakane tša pušo ya Modimo.—Mmo. 12:1, NW; Ps. 110:3.
3 Re Botšeng Dipakane tša Lena: Mofsa yo mongwe wa mošemane wa nywaga e seswai o ile a botša molebeledi wa selete gore: ‘Sa pele ke rata gore ke kolobetšwe, ke moka ke thuše ka phuthegong ka go hlankela go tša tshepedišo ya modumo le go swara dimaekrofouno, ke be mohlokomedi, ke thuše ka dipuku le go bala dithutong tša puku le Dithutong tša Morokami. Ka morago ke tla rata go ba mohlanka wa bodiredi, ke moka ke be mogolo. Gape ke tla rata gore ke be mmulamadibogo gomme ke ye sekolong sa bobulamadibogo. Ke moka ke ye Bethele, ke be molebeledi wa tikologo goba molebeledi wa selete.’ A tebogo e kaakang yeo a e bontšhitšego bakeng sa tokelo ya go hlankela Modimo!
4 Ge le dutše le gola nameng le moyeng, re thabela go le bona le fihlelela dipakane tša lena. (Bapiša le Luka 2:52.) Ngwaga o mongwe le o mongwe, ba dikete ba lena e ba bagoeledi ba sa kolobetšwago ke moka ba swanelegela go kolobetšwa e le bahlanka ba ineetšego ba Jehofa. Lethabo la rena le a gola ge re le bona le katanela go ba babulamadibogo ba go thuša gaešita le go tsenela tirelo ya nako e tletšego. Ka kgonthe, lena bana le lethabo la rena e bile le mothopo o kgahlišago wa theto go Tatago rena wa legodimong. Eka Jehofa a ka le šegofatša ka mo go humilego!—Die. 23:24, 25.