Ditsela tša go Oketša Nako Yeo o e Fetšago o Hlankela Jehofa

GE GO be go fihlile nako ya gore Jesu a rome barutiwa ba gagwe go yo bolela ditaba tše dibotse tša Mmušo wa Modimo, o ile a re go bona: “Puno ke e kgolo eupša bašomi ke ba sego kae.” Go be go na le modiro o mogolo wo o bego o swanetše go dirwa, ka gona o ile a oketša ka gore: “Kgopelang Mong wa puno gore a romele bašomi punong ya gagwe.” (Mat. 9:37, 38) Jesu o ile a botša barutiwa ba gagwe kamoo ba bego ba swanetše go dira modiro woo. Mantšu ao a latelago o a boletše ka tsela yeo e bontšhago gore nako e be e se sa le gona. O itše: “Le gatee le ka se fetše tikologo ya metse ya Isiraele go fihla Morwa wa motho a goroga.”—Mat. 10:23.

² Le lehono re sa lebanwe ke mošomo o mogolo tirelong ya tšhemo. Ditaba tše tše dibotse tša Mmušo wa Modimo di swanetše go bolelwa pele bofelo bo fihla. Nako ga e sa le gona! (Mar. 13:10) Ka ge tšhemo e le lefase, re lebeletšane le boemo bjo bo nyakilego bo swana le bjoo Jesu le barutiwa ba gagwe ba ilego ba lebeletšana le bjona, ke feela gore rena re na le mošomo o mogolo kudu. Rena re ba sego kae ka palo ge re bapetšwa le batho ba dibilione mo lefaseng, eupša re ka kgodišega gore Jehofa o tla re thuša. Ditaba tše dibotse tša Mmušo di tla bolelwa lefaseng ka moka, gomme ka nako yeo Jehofa a e beilego, bofelo bo tla tla. Na re tla etiša pele Mmušo wa Modimo maphelong a rena e le gore re phethe bodiredi bja rena? Ge e ba go le bjalo, ke dilo dife tšeo re ka di dirago go bontšha gore re etiša Mmušo wa Modimo pele?

³ Ge Jesu a be a bolela ka seo Jehofa a se nyakago go bahlanka ba gagwe bao ba ineetšego, o itše: “O rate Jehofa Modimo wa gago ka pelo ya gago ka moka, ka moya wa gago ka moka, ka monagano wa gago ka moka le ka matla a gago ka moka.” (Mar. 12:30) Modimo o letetše gore re mo hlankele ka moya ka moka. Se se bolela gore re bontšhe gore re ineetše ka pelo ka moka ka go dira sohle seo re ka se kgonago bodireding. (2 Tim. 2:15) Yo mongwe le yo mongwe wa rena go na le seo a ka se dirago, go ithekgile ka maemo a rena le bokgoni bja rena. Dirapeng tša go latela, bona tše dingwe tša dilo tšeo re ka di dirago, gomme o kgethe gore ke dife tšeo wena o nyakago go di fihlelela.

GO HLANKELA O LE MOGOELEDI WA PHUTHEGO

⁴ Bohle bao ba amogelago therešo ba na le tokelo ya go bolela ditaba tše dibotse. Wo ke modiro o mogolo woo Jesu a o neilego barutiwa ba gagwe. (Mat. 24:14; 28:19, 20) Motho yo e lego morutiwa wa Jesu Kriste gantši o thoma go botša ba bangwe ditaba tše dibotse gateetee ge a thoma go di kwa. Seo ke se Andrea, Filipi, Koronelio le ba bangwe ba ilego ba se dira. (Joh. 1:40, 41, 43-45; Dit. 10:1, 2, 24; 16:14, 15, 25-34) Na se se bolela gore motho a ka botša ba bangwe ditaba tše dibotse le pele a kolobetšwa? Ee. Gateetee ge motho a swanelega go ba mogoeledi yo a sa kolobetšwago ka phuthegong, a ka thoma go tšea karolo bodireding bja ntlo le ntlo. Le gona go ithekgile ka bokgoni bja gagwe le maemo a gagwe, a ka tšea karolo mehuteng e mengwe ya tšhemo.

⁵ Ka morago ga gore mogoeledi a kolobetšwe, ga go pelaelo gore o tla leka go dira sohle seo a ka se kgonago go thuša ba bangwe go ithuta therešo. Banna le basadi ba na le tokelo ya go bolela ditaba tše dibotse. Ruri ke tokelo e kgolo go tšea karolo go tšwetšeng pele dikgahlego tša Mmušo wa Modimo. Mang le mang yo a ka oketšago nako yeo a e fetšago a hlankela Jehofa ka go tsenela mehuta e mengwe ya tirelo o tla thaba kudu.

GO HLANKELA MOO GO NYAKEGAGO BAGOELEDI BA OKETŠEGILEGO

⁶ Go ka direga gore le šoma tšhemo ya phuthego ya gabo lena gantši e bile batho ba moo ba šetše ba tseba ditaba tše dibotse. Ge e ba go le bjalo, mohlomongwe o ka nagana go oketša nako yeo o e fetšago tšhemong ka go hudugela moo go nyakegago bagoeledi ba oketšegilego. (Dit. 16:9) Ge e ba ga bjale o le mogolo goba mohlanka wa bodiredi, go ka ba go na le phuthego yeo e ka thabelago thušo ya gago. Molebeledi wa tikologo a ka go nea ditšhišinyo tša kamoo o ka thušago phuthego e nngwe tikologong yona yeo. Ge e ba o ka rata go hlankela lefelong le lengwe nageng ya geno, ofisi ya lekala e ka go botša seo o swanetšego go se dira.

⁷ Na o ka rata go hlankela nageng e šele? Ge e ba go le bjalo, o swanetše go naganišiša gabotse ka seo. Go re’ng o sa boledišane le bagolo ba phuthegong ya geno ka taba ye? Ga go pelaelo gore go huduga moo go tla kgoma wena le bao ba tlago go sepela le wena. (Luka 14:28) Eupša ge e ba o sa yo dula moo nako e telele, go ka ba kaone gore o hlankele tikologong e itšego nageng ya geno.

⁸ Dinageng tše dingwe, diphuthego di eteletšwe pele ke bana babo rena bao e sego kgale ba hweditše therešo. Bana babo rena bao ba ikokobeditšego ba diphuthegong tšeo ga ba na bothata bja go dumelela bagolo bao ba hudugetšego moo bao ba nago le phihlelo e eba bona ba etelelago pele. Ge e ba o le mogolo gomme o nagana go hudugela nageng e bjalo, dula o gopola gore morero wa gago ga se go yo ba tšeela legato. Go e na le moo ke go hlankela le bona. Ba kgothaletše gore ba katanele go fihlelela maikarabelo ka phuthegong. (1 Tim. 3:1) O se ke wa fela pelo ge dilo tše dingwe di sa dirwe go swana le nageng ya geno. Diriša phihlelo ya gago ya go ba mogolo go thuša bana babo rena bao. Ke moka, ge go ka direga gore o boele nageng ya geno, bagolo ba moo ba tla kgona go šala ba hlokomela phuthego.

⁹ Pele ofisi ya lekala e ka go romela maina a diphuthego tšeo o ka di thušago, Komiti ya Tirelo ya Phuthego ya geno e swanetše go romela lengwalo la go go bolelela ofising ya lekala. Lengwalo le le a nyakega go sa šetšwe gore o mogolo, mohlanka wa bodiredi, mmulamadibogo goba mogoeledi. Komiti ya tirelo e tla romela lengwalo la go go bolelela gotee le kgopelo ya gago ka go lebanya ofising ya lekala ya nageng yeo o nyakago go yo hlankela go yona.

GO BOLELA DITABA TŠE DIBOTSE KA LELEME LE LENGWE

¹⁰ E le gore o katološe bodiredi bja gago, o ka naganela taba ya go ithuta leleme le lengwe, go akaretša le polelo ya diatla. Ge e ba o nyaka go ithuta go bolela ditaba tše dibotse ka leleme le lengwe, boledišana le bagolo le molebeledi wa tikologo. Ba ka go nea ditšhišinyo le go go kgothatša. Ofisi ya lekala e dumeletše ditikologo tše dingwe go rulaganya diklase tša go ithuta maleme go tlwaetša bagoeledi le babulamadibogo go bolela ditaba tše dibotse ka leleme le lengwe.

TIRELO YA BOBULAMADIBOGO

¹¹ Bagoeledi ka moka ba swanetše go tseba dilo tšeo di nyakegago gore motho a tsenele tirelo ya bobulamadibogo bja go thuša, bja ka mehla le bjo bo kgethegilego gotee le mehuta e mengwe ya tirelo ya nako e tletšego. Mmulamadibogo e swanetše go ba Mokriste yo a kolobeditšwego yo a beago mohlala o mobotse, yoo maemo a gagwe a mo dumelelago gore a fihlelele diiri tšeo di beilwego a bolela ditaba tše dibotse. Komiti ya Tirelo ya Phuthego e dumelela motho go tšea bobulamadibogo bja go thuša le bja ka mehla, eupša babulamadibogo ba kgethegilego ba kgethwa ke ofisi ya lekala.

¹² Babulamadibogo ba go thuša ba ka dumelelwa go tšea bobulamadibogo ka kgwedi e tee, ka dikgwedi tše di latelanago goba ka go se kgaotše. Ba dira seo go ithekgile ka maemo a bona. Bagoeledi ba bantši ba Mmušo ba thabela go tšea bobulamadibogo bja go thuša ka dinako tše di kgethegilego, tše bjalo ka sehleng sa Segopotšo goba kgweding ya ketelo ya molebeledi wa tikologo. Ba bangwe ba kgetha dikgwedi tšeo ba lego maikhutšong. Bana ba sekolo bao ba kolobeditšwego ba ka tšea bobulamadibogo bja go thuša dikgweding tšeo ba tswaletšego dikolo. Bagoeledi ba ka kgetha go šoma diiri tše di fokoditšwego tša bobulamadibogo ka March le April le kgweding ya ketelo ya molebeledi wa tikologo. Go sa šetšwe gore maemo a gago ke afe, ge e ba o itshwere gabotse e bile o bea mohlala o mobotse ka phuthegong, gomme o ka kgona go fihlelela diiri tšeo di nyakegago, e bile o bona gore o ka fetša kgwedi goba go feta moo o le mmulamadibogo wa go thuša, bagolo ba tla thabela go hlahloba kgopelo ya gago bakeng sa tokelo ye ya tirelo.

¹³ Ge o nyaka go ba mmulamadibogo wa ka mehla, o swanetše go ba o ka kgona go fihlelela diiri tše di nyakegago ngwaga le ngwaga. Ge o šetše o le mmulamadibogo wa ka mehla, go tlo nyakega gore o dirišane kgauswi le phuthego ya geno. Babulamadibogo bao ba fišegago ke tšhegofatšo go phuthego, ba dira gore bagoeledi ba be mafolofolo tšhemong gotee le go kgothaletša ba bangwe go tšea bobulamadibogo. Lega go le bjalo, pele o ka tlatša fomo ya bobulamadibogo bja ka mehla, o swanetše go ba mogoeledi yo a beago mohlala yo a nago le bonyenyane dikgwedi tše tshelelago a kolobeditšwe.

¹⁴ Gantši babulamadibogo ba kgethegilego ba kgethwa gare ga babulamadibogo ba ka mehla bao ba atlegago tšhemong. Ba swanetše go kgona go hlankela kae le kae moo ofisi ya lekala e ba romelago gona. Gantši e ba romela metsemagaeng moo ba ka hwetšago batho bao ba thabelago gomme ba hloma diphuthego tše difsa. Ka dinako tše dingwe, babulamadibogo ba kgethegilego ba abelwa diphuthegong tšeo di nyakago go thušwa gore di šome tšhemo ya tšona ka moka. Babulamadibogo ba bangwe ba kgethegilego bao e bilego e le bagolo ba abelwa go thuša diphuthego tše dinyenyane, gaešita le ge di sa hloke thušo tšhemong. Babulamadibogo ba kgethegilego ba newa tšhelete e nyenyane gore ba kgone go itlhokomela. Babulamadibogo ba bangwe ba kgethegilego ba kgethwa ka nakwana.

BAROMIWA

¹⁵ Baromiwa ba kgethwa ke Komiti ya Tirelo ya Sehlopha se Bušago, ke moka Ofisi ya Lekala ya moo ba rometšwego gona ya ba abela go šoma tšhemo ya ditikologo tšeo di nago le batho ba bantši. Ba dira mošomo o mobotse wa go tiiša diphuthego le go thuša gore bagoeledi ba be mafolofolo bodireding le go thuša ka mediro ya phuthego. Gantši baromiwa ba hwetša tlwaetšo Sekolong sa Baebangedi ba Mmušo. Ba newa madulo le tšhelete e nyenyane gore ba kgone go itlhokomela.

GO BA MOLEBELEDI WA TIKOLOGO

¹⁶ Pele Sehlopha se Bušago se kgetha motho gore e be molebeledi wa tikologo, o swanetše go hwetša tlwaetšo le phihlelo ka go šoma ka nakwana e le molebeledi wa tikologo. Banna ba bjalo ba rata bodiredi le bana babo bona. Ke babulamadibogo ba fišegago, ba ithuta Beibele ka mafolofolo e bile ke diboledi tše di nago le bokgoni le barutiši ba babotse. Ba bontšha dika tšeo di enywago ke moya, ba na le tekatekano, kahlolo e botse le temogo. Ge e ba ngwanabo rena yoo a nyetše, mosadi wa gagwe yo le yena e lego mmulamadibogo o itshwara gabotse e bile o kgona go dirišana le ba bangwe. O kgona go ruta tšhemong. Le gona o a kwešiša gore o swanetše go ikokobeletša monna wa gagwe, ga a dire gore monna wa gagwe a kwe ka yena goba go bolela kudu ge go swerwe magang. Balebeledi ba tikologo le basadi ba bona ba phela ba swaregile, ka gona bao ba nyakago go tsenela tirelo ye ba swanetše go ba ba phetše gabotse mmeleng. Babulamadibogo ga ba dire dikgopelo tša go ba balebeledi ba tikologo. Go e na le moo, ba tsebiša molebeledi wa tikologo, ke moka yena o tla ba nea ditšhišinyo.

DIKOLO TŠA KA MOKGATLONG

¹⁷ Sekolo sa Baebangedi ba Mmušo: Go nyakega baebangedi ba Mmušo ba oketšegilego gore ba šome ditšhemo tšeo di šongwago ka sewelo le go thekga diphuthego moyeng. Ka go re’alo, bana babo rena bao ba sa nyalago, dikgaetšedi tšeo di sa nyalwago le banyalani ba ka dira dikgopelo tša go ya Sekolong sa Baebangedi ba Mmušo gore ba yo newa tlwaetšo e kgethegilego. Ge ba feditše sekolo se, ba romelwa go yo hlankela e le babulamadibogo ba ka mehla moo go nyakegago bagoeledi ba oketšegilego nageng ya gabo bona. Eupša bao ba ka kgonago ba newa dikabelo tše dingwe nageng ya gabo bona goba nageng e nngwe. Ba sego kae ba bona ba ka abelwa go ba babulamadibogo ba kgethegilego ba nakwana goba ba ka mehla. Babulamadibogo bao ba ka ratago go ya sekolong se ba ka botšwa dilo tšeo ba swanetšego go di dira sebokeng seo se swarwago kopanong ya selete.

¹⁸ Sekolo sa Beibele sa Watchtower sa Gilead: Bana babo rena bao ba sa nyalago, dikgaetšedi tšeo di sa nyalwago le banyalani bao ba kgethwago go ya sekolong se ba kgona go bolela Seisemane gomme ba hlankela tirelong e kgethegilego ya nako e tletšego. Ba itlhatsetše gore ba kgona go thuša bagoeledi go ba mafolofolo tšhemong le go thekga dithulaganyo tša mokgatlo. Ba šetše ba ipontšhitše gore ba thabela go hlankela bana babo bona le gore ba ka ruta ba bangwe ka botho go latela tlhahlo ya Mangwalo le ya mokgatlo. Komiti ya Lekala ke yona e botšago bao ba ka swanelegago go ya sekolong se gore ba dire dikgopelo. Bao ba tšwago sekolong se ba abelwa tšhemong goba ofising ya lekala nageng e šele goba nageng ya gabo bona.

TIRELO YA BETHELE

¹⁹ Go hlankela Bethele ke tokelo e kgethegilego. Leina Bethele le bolela gore “Ntlo ya Modimo,” gomme leina le le tloga le swanela mafelo a ao go wona go dirwago mediro ya mokgatlo. Bana babo rena le dikgaetšedi bao ba šomago Bethele ba dira modiro o bohlokwa wa go tšweletša dikgatišo tše di theilwego Beibeleng, go di fetolela le go di romela diphuthegong. Ba thuša kudu Sehlopha se Bušago, seo se okametšego diphuthego lefaseng ka moka le go di nea tlhahlo. Bafetoledi ba bantši bao e lego ditho tša lapa la Bethele ba dula le go šoma ditikologong tšeo go bolelwago leleme leo ba le fetolelago. Se se ba thuša gore ba kwe batho ba bolela leleme leo letšatši le letšatši. Le gona ge ba le moo ba kgona go bona ge e ba batho ba kwešiša mantšu ao ba a dirišitšego dikgatišong tšeo ba di fetoletšego.

²⁰ Bontši bja modiro wo o dirwago Bethele o nyaka matla. Ka baka leo, gantši bao ba bitšwago Bethele ke bana babo rena ba bafsa bao ba ineetšego le go kolobetšwa, bao ba phetšego gabotse le go ba le matla. Ge e ba go nyakega batho lekaleng leo le okametšego naga ya geno gomme o ka rata go hlankela Bethele, o ka tseba mo go oketšegilego ka dilo tšeo o swanetšego go di fihlelela ka go botšiša bagolo ba phuthegong yeo o lego go yona.

TIRELO YA GO AGA

²¹ Modiro wa go aga mafelo a mokgatlo ke sebopego sa tirelo e kgethwa, go swana le modiro wa go aga tempele ya Solomone. (1 Dikg. 8:13-18) Bana babo rena ba bantši le dikgaetšedi ba bontšha phišego e kgolo ka go diriša nako ya bona le dilo tša bona gore ba tšee karolo modirong wo.

²² Na o ka kgona go thuša? Ge e ba o le mogoeledi yo a kolobeditšwego gomme o ka rata go tšea karolo modirong wo, bana babo rena bao ba okametšego modiro wa go aga tikologong ya geno ba tla thabela thušo ya gago e bile ba tla go nea tlwaetšo le ge o se na bokgoni. Go re’ng o sa tsebiše bagolo ba phuthegong ya geno gore o ka thuša? Bagoeledi ba bangwe bao ba kolobeditšwego bao ba swanelegago ba ile ba kgona le go ithaopela modirong wa go aga mafelo a pušo ya Modimo dinageng tše dingwe.

²³ Go na le mešomo e mentši yeo o ka e dirago tirelong ya go aga. Bagoeledi ba kolobeditšwego bao ba beago mohlala bao ba nago le bokgoni bjo itšego, bao ba ka thušago medirong ya go aga kgauswi le mo ba dulago ba ka hlankela e le baithaopi Lefapheng la Bohlami le la Mediro ya go Aga (LDC). Ba bangwe ba kgona go thuša medirong ya kgole ka nako e itšego, gomme ba kgethwa ke ofisi ya lekala gore e be baithaopi ba go aga go tloga ka dibeke tše pedi go ya go dikgwedi tše tharo. Bao ba kgethilwego go hlankela nako e telele ba bitšwa bahlanka ba go aga. Mohlanka wa go aga yo a neilwego kabelo nageng e šele o bitšwa mohlanka wa go aga yo a tšwago nageng e šele. Sehlopha sa go Aga seo se bopšago ke bahlanka ba go aga le baithaopi ba go aga se etelela pele modirong o mongwe le o mongwe wa go aga gomme se thušwa ke baithaopi ba Lefapha la Bohlami le la Mediro ya go Aga le baithaopi ba diphuthegong tše dingwe. Bahlanka bao ba lego Dihlopheng tša go Aga ba dira se gohle tšhemong ya lekala leo le ba okametšego.

KE DILO DIFE TŠEO O NYAKAGO GO DI FIHLELELA?

²⁴ Ge e ba o ineetše go Jehofa, go ra gore o nyaka go mo hlankela ka mo go sa felego. Ke dilo dife tšeo o nyakago go di fihlelela ge o dutše o dira bjalo? Go di fihlelela go tla go thuša gore o diriše ka bohlale matla a gago le dilo tše dingwe. (1 Bakor. 9:26) Go ba le dilo tšeo o nyakago go di dira go go thuša go matlafatša segwera sa gago le Jehofa e bile go tla go thuša go swarega ka dilo tša bohlokwa kudu ge o dutše o katanela go hwetša ditokelo tše di oketšegilego tša tirelo.—Bafil. 1:10; 1 Tim. 4:15, 16.

²⁵ Moapostola Paulo o re beetše mohlala o mobotse tabeng ya go hlankela Modimo. (1 Bakor. 11:1) Paulo o ile a šoma ka thata tirelong ya Jehofa. O ile a lemoga gore Jehofa o mmuletše dibaka tše dintši tirelong ya gagwe. Paulo o ile a ngwalela bana babo kua Korinthe gore: “Ke bulegetšwe ke mojako o mogolo o išago modirong.” Na se ga se sa therešo le ka rena? Ee, re na le dibaka tše dintši tša go hlankela Jehofa ka phuthegong, kudukudu modirong wa go bolela ditaba tše dibotse tša Mmušo. Eupša ka go swana le Paulo, go tsena ka “mojako [woo] o mogolo” go akaretša go lwa le “baganetši ba bantši.” (1 Bakor. 16:9) Paulo o be a ikemišeditše go itaya. Ela hloko seo a se boletšego. O itše: “Ke tula mmele wa ka gomme ka o laola bjalo ka lekgoba.” (1 Bakor. 9:24-27) Na le rena re dira se se swanago?

²⁶ Yo mongwe le yo mongwe o kgothaletšwa go ba le dilo tšeo a nyakago go di dira go hlankela Modimo go ya ka maemo a gagwe bophelong. Lehono ba bantši ba tirelong e itšego ya nako e tletšego ka gobane ba ile ba ipeela dilo tšeo ba nyakago go di dira go hlankela Modimo e sa le ba banyenyane. Le ge e be e sa le bana, batswadi ba bona le ba bangwe ba ile ba ba kgothaletša go tsenela tirelo. Ka baka leo, ba ipshina ka go hlankela Jehofa, e bile ga ba itshole. (Die. 10:22) Dilo tše dingwe tšeo re ka di dirago go hlankela Modimo ke go ya tšhemong beke e nngwe le e nngwe, go thoma thuto ya legae ya Beibele le go e swara, goba go fetša nako e oketšegilego re lokišeletša diboka. Selo sa bohlokwa ke gore re dule re na le segwera se sebotse le Modimo gomme re phethe bodiredi bja rena ka botlalo. Ge re ka dira bjalo, re tla godiša Jehofa gomme ra fihlelela selo se segologolo, e lego ya go mo hlankela ka mo go sa felego.—Luka 13:24; 1 Tim. 4:7b, 8.