Ke Mo Gobotse Gakaakang Go Ba Gona Ka Mehla!
1 Yuropa Bohlabela bontši bja banababo rena ba rategago ba be ba thibetšwe go kopana phatlalatša ka nywaga-some e mentši. Nagana kamoo ba ilego ba thaba ka gona ge dithibelo di be di tlošwa gomme ba be ba kgona go kopana gotee ka bolokologi!
2 Molebeledi wa tikologo o ngwadile mabapi le ketelo ya gagwe go e nngwe ya diphuthego tše bjalo gore: “Ka Labobedi mantšiboa, di sa tloga fase mathomong a ketelo ya-ka, tshepedišo ya go ruthufatša e ile ya kgaoga. Ka ntle, boemo bja leratadima e be e le bjo bo tonyago o šoro gomme ka gare e be e le feela di-degree Celsius tše 5. Banababo rena ba be ba dutše fase ba apere dijase, dikhafo, ditlelafo, mebese le diputsi tša bona. Go be go se yo a bego a ka lebelela ka Beibeleng, ka ge go phetla matlakala a yona go be go sa kgonege. Ge ke be ke eme sethaleng ke apere sutu, ke be ke tonyetšwa o šoro gomme nako le nako ge ke be ke bolela ke be ke kgona go bona mohemo wa-ka. Eupša seo se ilego sa mmakatša e bile gore ga se ka kwa le lentšu le tee la go belaela. Banababo rena ka moka ba ile ba bolela gore e bile mo go thabišago gakaakang go ba gona!” Banababo rena bao ba be ba bile ba sa nagane ka go foša seboka seo!
3 Na ke Kamoo re Ikwago ka Gona? Na re tšeela godimo sebaka sa go bokana ka bolokologi dibokeng tša rena tša beke le beke? Goba na re tšea diboka gabohwefo ge maemo a re dumelela? Go ba gona dibokeng ka mehla go ka no se be bonolo, gomme go ka ba le dinako tšeo re nago le lebaka le le kwalago la go se be gona. Lega go le bjalo, le ka mohla o se ke wa lebala gore gare ga rena go na le bao go sa šetšwe botšofadi, mathata a šoro a tša maphelo, bogole bja mmele, dithulaganyo tše di lapišago tša mošomo le boikarabelo bjo bongwe bjo bogolo ba bonago bohlokwa bja diboka gomme ba bago gona mo e nyakilego go ba ka mehla. A mohlala o mobotse gakaakang wo re ka o ekišago!—Bapiša le Luka 2:37.
4 Anke re direng go thekga borapedi bja therešo mokgwa wa rena ka go ba gona dibokeng tša rena ka moka tša Bokriste, go tloga sehlopheng se senyenyane sa thuto ya puku go fihla kopanong e kgolo. Ke ka baka la’ng re swanetše go tšeela dipokano tše godimo gakaakaa? Ka gobane re laetšwe ke Modimo gore re bokane gotee. Eupša go na le mabaka a mangwe a bohlokwa. Ka moka ga rena re nyaka mehola ya thuto ya Modimo le thušo ya moya o mokgethwa, yeo re e hwetšago dibokeng. (Mat. 18:20) Re agwa ke go kgothatšana ge re thabela bogwera le banababo rena.—Ba-Heb. 10:24, 25.
5 Nakong ya go fetoga lebopo, Petro o boletše gore: “Morêna, ké mo xo botse rè le fá.” (Luka 9:33) Re swanetše go ikwa ka mo go swanago ka diboka ka moka tša rena tša Bokriste. Ruri, ke mo gobotse gakaakang go ba gona ka mehla!