Go ba Gona Dibokeng—Boikarabelo bjo Bogolo
1 O lebelela go ba gona dibokeng e le gabohlokwa gakaaka’ng? Yeo ke potšišo yeo e fatišišago, na ga go bjalo? Ga go pelaelo gore bontši bja rena re ikwa re leboga diboka. Lega go le bjalo, dipego di bontšha gore palo ya bao ba bago gona dibokeng diphuthegong tše dintši e fokotšegile kudu mo nakong ye. Se se ka ba se bakwa ke’ng? Na ba bangwe ba rena ba dumelela mošomo wo o sa nyakegego wa boiphedišo, go lapa, mošomo wa sekolo wa gae, bolwetši bjo bonyenyane goba maemo a leratadima a mabe ganyenyane a šitišana le boikarabelo bja rena bja go ba gona dibokeng ka mehla? (Doit. 31:12) Ka ge se e le seo se laelwago ke Mangwalo, gona yo mongwe le yo mongwe wa rena o swanetše go naganišiša potšišo ye ka thapelo, Ke lebelela go ba gona dibokeng e le gabohlokwa gakaaka’ng?
2 Ba bangwe ba banababo rena ba tšea diiri tše dintši ba sepela ditseleng tša mobu gomme ba tshela dinoka tšeo di nyeumago dikwena gore ba be gona dibokeng. Phuthegong ya geno, go ka ba go e-na le bao ba botegago bao “le ka mohla ba sa hlokegego” go sa šetšwe mathata a šoro a bophelo bjo bobotse, bogole, merwalo e boima ya mošomo mafelong ao ba thwetšwego go ona goba dikabelo tše thata sekolong. (Luka 2:37) Ke ka baka la’ng ba dira boiteko bja go ba gona dibokeng? Ke ka gobane ba tseba gore ba ka se ke ba lebeletšana le ditlhohlo tša lefase le le le tletšego kgateletšo ka matla a bona. Ba swanetše go ithekga ka matla ao Modimo a a neago.—2 Ba-Kor. 12:9, 10.
3 Lehono re latela mohlala wo o beilwego ke Bakriste ba pele, bao ba bego ba kopana ka mehla bakeng sa go rapela, go abelana diphihlelo le go ithuta Lentšu la Modimo. (Dit. 4:23-30; 11:4-18; Ba-Kol. 4:16) Re hwetša thuto ka ga boporofeta le thuto ya Beibele, gotee le ka ga boitshwaro bjo bo amogelwago ke Modimo le ditekanyetšo tša Bokriste tša boitshwaro, go akaretša le keletšo yeo e lego nakong mabapi le go kaonefatša maphelo a rena gona bjale ka go diriša melao ya motheo ya Mangwalo ka kelohloko. (1 Tim. 4:8) Go oketša moo, re gopotšwa ka kholofelo ya rena ya gore ka letšatši le lengwe mathata le go tlaišega di tla fela. Ke gabohlokwa gore kholofelo ye e dule e phela.—Ba-Heb. 6:19.
4 Lapa la gago le lebelela go ba gona dibokeng e le gabohlokwa gakaaka’ng? Na go fetogile karolo e kgolo ya lenaneo la gago go etša nako ya dijo goba ya modiro wa boiphedišo? Mantšiboeng a diboka, na le ikhwetša le tšere kgang mabapi le go ya go tšona goba go se ye, goba na go kopana ka mehla le banababo lena ga se ga boikgethelo lapeng la gago? Bagoeledi ba bantši ba gopola mohlala wa batswadi ba bona bao ba ineetšego nakong ya ge ba be ba sa gola. Mogolo ka lerato o gopola gore, “Selo se sengwe ka tate e be e le gore ka mehla o be a kgonthiša gore lapa le ba gona dibokeng. Ge e ba yo mongwe a be a babja, gona yo mongwe wa rena o be a šala gae le yena, eupja ba bangwe ka moka ba be ba e-ya dibokeng!”
5 Ditokollong tše di latelago tša Tirelo ya Rena ya Mmušo, re tla ahla-ahla bohlokwa bja seboka se sengwe le se sengwe sa phuthego ka kgopolo ya go thuša go aga tebogo ya rena bakeng sa ditokišetšo tše tša moya. Ge e ba o ka dira gore o be gona dibokeng ka mehla, re kgodišegile gore dihlogo tše di tla go thuša go lemoga seo se go lahlegelago. Di tla akaretša dikgopotšo tše di thušago bakeng sa bao ba swarago diboka gotee le ditšhišinyo tšeo ka moka ga rena re ka di dirišago ge re di lokišetša le ge re tšea karolo go tšona. Ke ka baka la’ng le sa dule fase le le lapa gomme la naganišiša ka thapelo mokgwa wa lena wa go ba gona dibokeng? Ke moka le dire diphetogo lege e le dife tšeo di nyakegago thulaganyong ya lena. Go ba gona dibokeng ka mehla ke karolo e bohlokwa ya thuto ya rena ya pušo ya Modimo gomme go swanetše go tšewa e le gabohlokwa e le ka kgonthe.