Diriša Dipuku tša Kgale ka mo go Holago

¹ Batho ba bolokile dipuku tša kgale tše dimilione makgobapukung a lefase ka bophara. Lega go le bjalo, ke mohola ofe wa go ya go ile wo di ilego tša o direla morafo wa batho? (Mmo. 12:12) Dikgatišo tšeo di lebišago tlhokomelo Mmušong wa Modimo le go seo o tlago go se direla batho ke tša bohlokwa kudu. Diphuthego tše dintši di na le dipuku tše bjalo tše di fapa-fapanego setokong tšeo di ilego tša gatišwa pele ga 1986. Ka ge ye e le kgwedi ya mafelelo ya lesolo la rena la tšhemo e sa abjago, re swanetše go phafogela go sepedišetša batho bohle dipuku tše tša kgale.

² Di Bohlokwa e le ka Kgonthe: Gaešita le ge ba bangwe ba rena re ka nagana gore dipuku tše di fetilwe ke nako ge di bapišwa le dikgatišo tša rena tše difsa, re swanetše go gopola gore di na le therešo ya Mangwalo. Ka gona, re swanetše go dira boiteko bjo bo oketšegilego bja go diriša gabotse dipuku tše tša kgale tšhemong ya lefelong la gabo rena le tšhemong e sa abjago.

³ Phihlelo ya mosadi yo a ilego a hwetša dikgatišo tše dintši tša Watch Tower go makgolo’agwe e gatelela bohlokwa bja tšona. Hlatse e ile ya botšiša mosadi ge e ba a be a e-na le tsebo le ge e le efe ka bohlokwa bja kgonthe bja dikgatišo tšeo. Mosadi o ile a araba ka gore: “Ga ke tsebe bohlokwa bja tšona, eupša nka bo tseba bjang?” Mosadi o ile a amogela thuto ya Beibele, a hwetša therešo gomme ka morago ga moo a lebelela bokgobapuku bja makgolo’agwe e le bja bohlokwa. Kgoboketšo yeo ya dipuku tša kgale e itlhatsetše e le lehumo gakaakang!

⁴ Di Abe: Go okeletša go sepedišeng dipuku tša kgale ka ntlo le ntlo le tšhemong e sa abjago, kgonthišega gore o a di sepediša ge o dira maeto a go boela bathong bao o tsebago gore ba thabela go bala dikgatišo tša rena, go akaretša bao ba beeletšago Morokami le Phafoga! le bao ba lego tsejaneng ya gago ya dimakasine. Bakeng sa bao ba ithutago Beibele le wena, dipuku tša kgale tše di kgethilwego di ka nea tsebo ya motheo yeo e tlago go katološa kwešišo ya bona ya therešo. O se ke wa lebala go hwetša dipuku le ge e le dife tšeo di sego gona kgoboketšong ya gago ya motho ka noši.

⁵ Go e na le go boloka dipuku tša rena tša kgale bobolokelong, anke re di dirišeng bakeng sa go tutuetša batho bao re kopanago le bona gore ba ‘boife Modimo, gomme ba boloke ditaelo tša gagwe.’—Mmo. 12:13, bapiša le PK.