Diboka tša Tirelo tša October
Beke e Thomago ka October 4
10 mets: Ditsebišo tša phuthego. Ditsebišo tše di kgethilwego go tšwa go Tirelo ya Rena ya Mmušo. Ye ke kgwedi ya mafelelo ya lesolo la tšhemo e sa abjago. Bolela dithulaganyo gomme o kgothaletše bohle gore ba be le karolo ka mo go tletšego.
17 mets: “Diriša Dipuku tša Kgale ka mo go Holago.” Dipotšišo le dikarabo. Bolela ka dipuku tša kgale tšeo di lego gona phuthegong. Bolela ka tše dingwe tša dibopego tša tšona tše di kgahlišago, gomme o hlalose kamoo di ka sepedišetšwago ba bangwe ka gona. Kgothaletša bohle gore ba sepediše dipuku tše tšhemong e sa abjago, bodireding bja tšhemo le ge ba nea bohlatse bjo bo sa rulaganyetšwago ka October. Akaretša pontšho ya thero e kopana e bonolo.
18 mets: E-ba yo a Kgomegago ka Dimakasine! Bolela palo ya dimakasine tšeo phuthego e di sepedišitšego kgweding e fetilego. Palo ye e sepedišana bjang le palo yeo e amogetšwego go tšwa go Mokgatlo? Ge e ba go e-na le tše dintši tše di šalago, ke eng seo se swanetšego go dirwa? Laletša bagoeledi go nea ditlhaloso ka tše di latelago: (1) Mogoeledi yo mongwe le yo mongwe o swanetše go otara sesola se se lekanego eupša seo se swanetšego. (2) Lebelela Mokibelo o mongwe le o mongwe e le Letšatši la Dimakasine. (3) Rulaganya thulaganyo ya gago ya motho ka noši ya tirelo gore o akaretše modiro wa dimakasine kgwedi e nngwe le e nngwe. (4) Rulaganya go dira go nea bohlatse bjo bo sa rulaganyetšwago ka mo go oketšegilego o diriša dimakasine bakeng sa go thoma dipoledišano. (5) Tšea dimakasine tšeo ka mo go kgethegilego di bolelago ka kgwebo le batho bao ba rutegilego bao go bonagalago ba e-na le kgahlego ka tšona. (6) Boloka pego e nepagetšego ya dilo tšeo o di sepedišitšego, gomme o age tsejana ya dimakasine, o boele ka mehla ka ditokollo tša morago-rago. (7) Diriša dikopi le ge e le dife tša dimakasine tša kgale ka mo go holago e le gore di se ke tša kgobelana. Bontšha dimakasine tša morago bjale, gomme o šupe dihlogong tše go bonagalago di ka tsoša kgahlego. Dira gore motho yo mogolo le ngwana o monyenyane yo mongwe le yo mongwe wa bona a dire thero e kopana ya dimakasine.—Bona pampiri ya ka gare ya Tirelo ya Rena ya Mmušo ya September 1995.
Kopelo 105 le thapelo ya go phetha.
Beke e Thomago ka October 11
10 mets: Ditsebišo tša phuthego. Pego ya tša ditšhelete.
20 mets: “Dikopano tša Selete tša ‘Lentšu la Modimo la Boporofeta’ tša 1999.” (Dirapa 1-15) Dipotšišo le dikarabo. Bala dirapa 6, 8, 11 le 15. Gatelela lebaka leo ka lona re swanetšego go ba gona kopanong ka moka, go akaretša le lenaneo la Labohlano. Gatelela bohlokwa bja go latelela taelo ya Mokgatlo ya go tla le dijo tša rena ka noši tša mosegare kopanong letšatši le lengwe le le lengwe.
15 mets: “Kamoo re ka Hwetšago Lethabo le Oketšegilego ka Gona Dibokeng.” Dipotšišo le dikarabo. Bontšha mehlala e itšego ya kamoo re ka bontšhago go ela hloko le go kgothatšana dibokeng. Laletša batheetši gore ba laodiše mehlala e tšwago diphihlelong tša bona ka noši.
Kopelo 152 le thapelo ya go phetha.
Beke e Thomago ka October 18
10 mets: Ditsebišo tša phuthego le diphihlelo tša tirelo ya tšhemo.
10 mets: “Na o a Huduga?” Polelo e kgothatšago ka mongwaledi. Ge bagoeledi ba hwetša gore ba swanetše go hudugela phuthegong e nngwe, ke gabohlokwa gore ba lemogwe gabotse tikologong ya bona e mpsha e le gore ba pheme ditšhitišo le ge e le dife tša moya. Gatelela bohlokwa bja go tsebiša bagolo ka dithulaganyo tše bjalo gomme o kgopele thušo ya bona ya go ikgokaganya le phuthego e mpsha.
25 mets: “Dikopano tša Selete tša ‘Lentšu la Modimo la Boporofeta’ tša 1999.” (Dirapa 16-23) Dipotšišo le dikarabo. Bala dirapa 17-20. Diriša mangwalo a tsopotšwego le ao a bontšhitšwego go gatelela lebaka leo ka lona moaparo, go itokiša le boitshwaro e lego dilo tšeo di nyakago tlhokomelo ya rena.
Kopelo 142 le thapelo ya go phetha.
Beke e Thomago ka October 25
15 mets: Ditsebišo tša phuthego. Gopotša bohle gore ba tliše dipego tša bona tša tirelo ya tšhemo. Thuša bohle go lokišetša go sepediša poroutšha ya Seo Modimo a se Nyakago goba puku ya Tsebo ka November. Hlalosa kamoo go ka lokišetšwago thero yeo e ka lebišago tlhokomelo potšišong e rego, “Na Modimo o Araba Dithapelo?” Diriša dintlha tša poroutšha tšeo di tšwago go thuto 7 goba kgaolo 16, dirapa 12-14 tša puku. Bontšha thero e bonolo yeo e akaretšago lengwalo le tee.
15 mets: Go Hwetša Dikarabo Dipotšišong tša Beibele. Mogoeledi yo a kopanego le motho yo a nago le kgahlego potšišong ya Beibele o batamela mohlanka wa bodiredi. Mohlanka wa bodiredi go e na le gore a nee karabo, o hlalosa kamoo e ka hwetšwago ka gona. Sa pele o boeletša ditšhišinyo tšeo di hwetšwago ka go Puku ya Tlhahlo ya Sekolo, thuto 7, dirapa 8-9. Ke moka, ba le gotee ba dira nyakišišo ya potšišo ye e botšišwago gantši tšhemong ya lefelong leo. Ba lebelela ditšhupetšo tše itšego tšeo di bolelago ka taba yeo gomme ba hwetša dintlha tšeo di kgodišago tšeo di hlalosago ka mo go kwagalago lebaka la motheo bakeng sa karabo ya Beibele. Kgothaletša bagoeledi gore ba dire mohuta wo wa thuto e putsago bakeng sa go dira dinyakišišo tša dipotšišo tša Beibele.
15 mets: “O tla Re’ng go Motho wa Mo-Juda?” Dipotšišo le dikarabo. Hlalosa phapano magareng ga Bojuda bja Orthodox, bja Mpshafatšo le bja go Kgomarela Sekgale. (Bona Go Tsoma ga Batho Modimo, matlakala 226-7.) Bolela ka mafelo ao go ona go bonalago go e-na le selo seo re dumelelanago ka sona le motho wa mo-Juda. Bontšha thero yeo e lokišeditšwego gabotse. Bakeng sa tsebišo e oketšegilego ka Bojuda, bona pampiri ya ka gare ya Tirelo ya Rena ya Mmušo ya February 1998; puku ya go Boledišana, matlakala 22-3; le kgaolo 9 ya Go Tsoma ga Batho Modimo. Ge e ba e le ka sewelo gore bagoeledi ba kopane le Mojuda bodireding, fetolang poledišano bakeng sa maemo a lefelong leo le dutše le gatelela mpho ya kgwedi.
Kopelo 151 le thapelo ya go phetha.