Segopotšo sa Lefase ka Bophara sa Lehu la Kriste

¹ Jehofa o re tšholletše dimpho tše dintši. Kakaretšo ya go loka ga gagwe le botho bjo lerato di hlaloswa ka mo go kwagalago e le “mpho ya gagwe e sa lefelelwego yeo e sa hlalosegego.” Ee, “botho bjo bo sa swanelago bja Modimo” ke bjo bo makatšago kudu mo e lego gore go bo hlalosa go phagametše bokgoni bja rena.—2 Ba-Kor. 9:14, 15, bapiša le NW.

² Mpho ya Gagwe Yeo e di Fetago Tšohle: Jesu Kriste, ka ge e le Molopolodi wa batho, ke mpho e kgolo kudu go feta tšohle. Ka go bontšha lerato la gagwe le legolo bakeng sa lefase la batho, Jehofa o ile a neela ka Morwa wa gagwe yo a mo ratago le yo a tswetšwego a nnoši. (Joh. 3:16) Tšhegofatšo e bjalo e sa swanelago yeo e tšwago go Modimo e swanelwa ke go gopolwa lefaseng ka bophara. Neng gona bjang? Mantšiboeng a Labone, April 1, 1999, Bakriste go dikologa lefase ba tla be ba bina Selalelo sa Morena, ba bina Segopotšo sa sehlabelo se se fetago dihlabelo ka moka.—1 Ba-Kor. 11:20, 23-26.

³ Kriste o re hwetše “rè sa le ba-dira-dibe,” gomme re ka bontšha tebogo ya rena ka noši ka go bina Segopotšo sa lehu la gagwe le ka go laletša ba bangwe gore ba be gona le rena tiragalong yeo ya bohlokwa-hlokwa.—Ba-Roma 5:8.

⁴ Tiragalo ya Bohlokwa-hlokwa: Go gopolwa ga lehu la Kriste go gatelela kudu gore o be a thekga bogoši bja Modimo ka ntle le bosodi. Gape go re gopotša gore re ka ba le boemo bjo bo hlwekilego pele ga Jehofa ka go bontšha tumelo sehlabelong sa Jesu, ka go rialo ra kgonthišetšwa ka phološo. (Dit. 4:12) Ka kgonthe, ye ke tiragalo ya bohlokwa-hlokwa ya ngwaga!

⁵ Lerato la go rata baagišani ba rena le bontšhwa ka go ba laletša ga rena gore ba tle ba bine Selalelo sa Morena le rena. Mehola ya topollo e sa dutše e hwetšagala bakeng sa ba dimilione bao ba ithutago bohlokwa bja yona bjo bogolo. (Ba-Fil. 3:8) Bao ba bontšhago tumelo sehlabelong sa Kriste ba ka hwetša kholofelo e tiilego ya bophelo bjo bo sa felego.—Joh. 17:3.

⁶ Sehla sa Segopotšo se re nea dibaka tše kgethegilego tša gore re bontšhe tebogo ya go leboga botho bjo bo phadišago bjo bo sa swanelago bja Modimo. Ye ke nako e botse kudu ya go ba le karolo ka mafolofolo go boleleng ditaba tše di lokilego tša Mmušo wa Modimo. Mehola e megolo e letetše bohle bao ka thapelo ba naganišišago ka mpho ya Jehofa e sa lefelelwego yeo e sa hlalosegego gomme ba rulaganyetša go ba gona monyanyeng wa lenyaga wa Selalelo sa Morena!