Kamoo Ditho tša Lapa di Dirišanago ka Gona Bakeng sa go ba le Karolo ka mo go Tletšego—Thutong ya Beibele
1 Therešo e oketša bohlokwa bja kgonthe le morero bophelong bja lapa, eupša go atlega go hlankeleng Jehofa ga go fo itlela. Go nyakega nako le boiteko bakeng sa go aga lapa le tiilego moyeng. Go nyakega go gontši gore ditho tša lapa di šome kgaufsi di le gotee katanong ye. Sehlogo se sa pele lelokelelong la dikarolo tše tharo se tla lebiša tlhokomelo mabapi le kamoo malapa a ka dirišanago ka gona go hlagoleleng mekgwa e mebotse ya go ithuta.
2 Ka go Bala Beibele Letšatši le Lengwe le le Lengwe: Diema 24:5 e re, “yo tsebô ó bôna tše a di kxônaxo.” Tsebo e hwetšwago go tšwa go go baleng Lentšu la Modimo ka mehla e nea motho matla a ka gare ao a nyakegago bakeng sa go ganetša ditlhaselo tša Sathane boemong bja motho bja moya. (Ps. 1:1, 2) Na le bala Beibele letšatši le letšatši le le gotee le le lapa? Lenaneo la Sekolo sa Bodiredi sa Pušo ya Modimo le na le “Lenaneo la Tlaleletšo la Mmalo wa Beibele” bakeng sa beke e nngwe le e nngwe ka ngwaga. Go le latela go nyakega metsotso e lesome feela ya nako ya lapa letšatši le lengwe le le lengwe. Kgetha nako e swanetšego, go etša ka nako ya sefihlolo, ka morago ga dijo tša mantšiboa goba pele o yo robala bakeng sa go bala Beibele le go hlahloba temana ya letšatši go tšwa go Go Hlahloba Mangwalo. Dira se gore e be karolo ya mokgwa wa lapa la gago letšatši le lengwe le le lengwe.
3 Ka go Ithuta Gotee Beke e Nngwe le e Nngwe: Thuto ya lapa ya Beibele e swanetše go ba selo sa bohlokwa bekeng ya lapa. Setho se sengwe le se sengwe se swanetše go e thekga ka go tšea karolo ka mafolofolo thutong. Hlogo ya lapa e tla rata go ela hloko dinyakwa tša lapa ge e kgetha taba e tlago go ithutwa le letšatši, nako le botelele bja thuto. Dira gore thuto ya lapa e be selo se tlago pele thulaganyong ya beke. O se ke wa dumelela dilo tšeo e sego tša bohlokwa gore di go šitiše.—Ba-Fil. 1:10, 11.
4 Tate yo gantši a amogelago megala ya kgwebo lapeng la gagwe o tla kgaola mogala nakong ya thuto ya lapa. Ge e ba bagwebišani ba e-tla legaeng, ba be ba laletšwa go kopanela thutong goba go leta go ba go fihla e fela. Tate o be a ikemišeditše go bona gore ga go selo seo se bego se ka šitiša thuto ya lapa. Se se bile le tutuetšo e tseneletšego baneng ba gagwe, ge e le ka kgwebo ya gagwe, yona e ile ya atlega.
5 Ke mo go kgahlišago gakaakang ge ditho tša lapa di dirišana medirong ya moya! Go botega maitekong a rena gore re be le karolo e tletšego thutong ya lapa ya Beibele go tla tliša tšhegofatšo ya Jehofa.—Ps. 1:3.