Batswadi—Beelang Bana ba Lena Mohlala o Mobotse
1 Lentšu la Modimo le re botša gore “tata-xo-moloki [le mmagwe] ó tlo hlalala ka xoxolo.” (Die. 23:24, 25) Batswadi bao ba beelago bana ba bona mohlala o mobotse ba ba le tšhegofatšo e kgolo gakaakang! Setho sa Komiti ya Lekala se ile sa bolela ka batswadi ba sona gore: “Therešo e be e le bophelo bja bona ka moka, le nna ke ile ka nyaka gore ke e dire bophelo bja-ka ka moka.” Ke eng seo bana ba swanetšego go se bona go batswadi ba bona?
2 Mekgwa e Mebotse le Tlhompho e Tseneletšego: Ke boikarabelo bja batswadi go tsenya mekgwa e agago baneng ba bona. Mekgwa e mebotse ga e ithutwe feela ka taelo ya molomo, eupša e ithutwa ka go bona le go ekiša. Ka gona, ke mekgwa efe yeo le e bontšhago? Na bana ba lena ba le kwa le re, “tshwarelo,” “hle,” le “ke a leboga”? Na le swarana ka tlhompho e tseneletšego ka lapeng? Na le theetša ka kelohloko ge ba bangwe ba bolela? Na le a theetša ge bana ba lena ba bolela le lena? Na mekgwa ye e bontšhwa bobedi Holong ya Mmušo le ge le le noši ka gae?
3 Boemo bja Moya bjo bo Tiilego le Modiro wa Phišego: Ngwanabo rena yo a feditšego nywaga e fetago 50 a le tirelong ya nako e tletšego o a gopola: “Mma le tate e be e le mohlala o mobotse go bontšheng tebogo ya go leboga diboka le phišego ya bona ya go fišegela bodiredi.” O bontšha bjang bana ba gago gore o tshwenyega mabapi le go kgomarela boemo bja moya bja bao ba lego lapeng la gago? Na le hlahloba temana ya letšatši gotee? Na le na le thuto ya lapa ya ka mehla? Na bana ba lena ba le bona le bala Beibele le dikgatišo tša Mokgatlo? Ke eng seo ba se kwago ge o rapela legatong la lapa? Na le ba le karolo poledišanong e agago ya moya le bana ba lena, le boledišana ka dilo tše di swanetšego mabapi le therešo gotee le phuthego? Na le fagahlela go ba gona dibokeng ka moka le go ba le karolo bodireding bja tšhemo le le lapa?
4 Batswadi, naganišišang ka mohlala woo le o beelago bana ba lena. Dirang gore e be o mobotse kudu, gomme ba tla o lebelela e le wa bohlokwa bophelong bja bona ka moka. Mosadi wa molebeledi wa mosepedi, yo ga bjale a lego nywageng ya bo-70, o itše: “Ke sa dutše ke holwa ke mohlala o mobotse wa batswadi ba-ka ba lerato ba Bakriste. Le gona ke rapela go tšwa pelong gore ke tla hlatsela tebogo ya-ka e tletšego bakeng sa bohwa bjo ka go bo diriša ka mo go swanetšego nywageng ka moka e tlago.”