Ke ka Baka La’ng re Tšwela Pele ka Boboledi?
1 Na modiro wa go bolela ka Mmušo o tšwetše pele o dirwa ka nako e telele lefelong la geno? (Mat. 24:14) Ge e ba go bjalo, o ka nagana gore tšhemo ya phuthego e akareditšwe ka mo go lekanego. Ka gona ge o dira boboledi, mohlomongwe batho ba bantši bao o kopanago le bona ba bonala ba sa iše felo ka molaetša wa Mmušo. Lega go le bjalo, ela hloko seo se dumelwago mabapi le barutiwa ba kgonthe ba Jesu go letlakala 141 pukung ya Boporofeta bja Jesaya II: “Mafelong a mangwe, mafelelo a bodiredi bja bona a ka bonala e le a sa rego selo ge a bapišwa le tekanyo ya modiro le boiteko tšeo di dirišwago. Lega go le bjalo ba a kgotlelela.” Eupša ke ka baka la’ng re tšwela pele ka boboledi?
2 Gopola Jeremia: Go kgotlelela ga rena ka potego modirong wa boboledi ga se gwa swanela go ithekga ka gore batho ba a re theetša goba ga ba re theetše. Jeremia o ile a bolela ka nywaga e 40 tšhemong e swanago gaešita le ge e bile batho ba sego nene kudu bao ba ilego ba mo theetša, gomme ba bantši ba be ba ganetša molaetša wa gagwe. Ke ka baka la’ng Jeremia a ile a phegelela? Ka gobane o be a dira modiro woo Modimo a bego a mo laetše go o dira gomme le tsebo ya gagwe ya seo se bego se tla diragala nakong e tlago di ile tša mo tutuetša go tšwela pele a bolela.—Jer. 1:17; 20:9.
3 Boemo bja rena ke bjo bo swanago. Jesu “ó re laetše xo xoêlêla batho le xo mmeêla bohlatse bya xo re: Ké Yêna yo Modimo a mmeilexo Moahlodi wa ba ba phelaxo le ba ba hwilexo.” (Dit. 10:42) Molaetša woo re o bolelago ke taba ya bophelo le lehu go bao ba o kwago. Batho ba tla ahlolwa go ya ka karabelo ya bona ditabeng tše dibotse. Ge se se le bjalo, boikarabelo bja rena ke go dira ka go lebanya kamoo re laetšwego ka gona. Le ge batho ba gana go theetša, se se re nea sebaka sa go bontšha go tsenelela ga lerato la rena la go ba rata le go rata boineelo bja rena go Jehofa ka go phegelela go dira seo re swanetšego go se dira. Eupša go na le mo go oketšegilego.
4 Re a Holega: Go dira thato ya Modimo go sa šetšwe karabelo tšhemong, go re nea khutšo ya ka gare, kgotsofalo le lethabo tšeo di ka se hwetšwego ka tsela le ge e le efe e nngwe. (Ps. 40:8) Maphelo a rena a ba le morero wa kgonthe. Ge re tšwela pele re tšea karolo ka mo go oketšegilego bodireding, ke mo dipelo tša rena le megopolo di lebišago tlhokomelo kholofelong le lethabong la go phela lefaseng la Modimo le lefsa. Go dula re nagana ka dikholofetšo tše tša Mangwalo go godiša boemo bja rena bja moya gomme go matlafatša tswalano ya rena le Jehofa.
5 Gaešita le ge e ba re sa bone mafelelo a kapejana modirong wa rena wa boboledi, peu ya therešo e ka no ba e bjetšwe ka pelong ya motho yeo e tlago go mela ka nako ya Jehofa e swanetšego. (Joh. 6:44; 1 Ba-Kor. 3:6) Ga go le o tee wa rena yo a tsebago gore ke ba ba kae bao ba sa tlago go ithuta ka Mmušo wa Modimo ka maiteko a batho ba Jehofa, e ka ba lefelong la geno goba lefaseng ka bophara.
6 Ka go akgofa mo go gogolo go feta le ge e le neng pele, re swanetše go ela hloko taelo ya Jesu ye e rego: “Fahloxang, Le phakxamê Le rapêlê, xobane lebaka la tšôna xa Le le tsebe. Xomme tše ke Le botšaxo tšôna ke botša bohle, ke re: Phakxamang!” (Mar. 13:33, 37) Ka gona, eka ka moka ga rena re ka tšwela pele re bolela ditaba tše dibotse tša Mmušo, re thabiša pelo ya Jehofa ge re tšea karolo go kgethagatšeng leina la gagwe le le phagamego le le lekgethwa.