Batho ba Thabilego go Feta Bohle Lefaseng
1 “Go thabile batho bao Modimo wa bona e lego Jehofa!” (Ps. 144:15, NW) Mantšu ao a hlalosa Dihlatse tša Jehofa e le batho ba thabilego go feta bohle lefaseng. Ga go na lethabo le legolo go feta leo le tlišwago ke go hlankela Modimo a nnoši wa therešo le yo a phelago, Jehofa. Ka ge e le “Modimo yo a thabilego,” bao ba mo rapelago ba bonagatša lethabo la gagwe. (1 Tim. 1:11, NW) Ke dibopego dife tše dingwe tša borapedi bja rena tšeo di dirago gore re be ba thabilego gakaakaa?
2 Mabaka a go ba ba Thabilego: Jesu o ile a re kgonthišetša gore lethabo le tlišwa ke go ‘lemoga dinyakwa tša [rena] tša moya.’ (Mat. 5:3, bapiša le NW.) Go ithuta Beibele ka mo go tšwelago pele le go ba gona dibokeng ka moka tša rena tša Bokriste go kgotsofatša senyakwa seo. Go ithuta therešo ya Lentšu la Modimo go re lokolotše maakeng le phošong ya bodumedi. (Joh. 8:32) Mangwalo gape a re rutile tsela e botse kudu ya go phela. (Jes. 48:17) Ka baka la seo, re thabela bogwera bjo bo agago bja Bokriste ka gare ga mokgatlo wa rena o thabilego wa barwarre.—1 Ba-Thes. 2:19, 20; 1 Pet. 2:17.
3 Re ba le kgotsofalo e kgolo ka go ikokobeletša ditekanyetšo tša Modimo tše phagamego tša boitshwaro, ka gobane re tseba gore se se a re šireletša gomme se thabiša Jehofa. (Die. 27:11) Mmegi wa ditaba tša kuranta o itše: “Go sa šetšwe ditekanyetšo tša tšona tše thata, Dihlatse tša Jehofa ga di bonagale e le tše sa thabago. Boemo bo ka mo go fapanego. Ba banyenyane gotee le ba bagolo [bao ba lego gare ga bona] ba na le ponagalo ya go ba ba thabilego ka tsela yeo e sa tlwaelegago le go ba bao ba leka-lekanego.” Re ka thuša ba bangwe bjang gore le bona ba kopanele lethabong le la rena?
4 Thuša ba Bangwe go Hwetša Lethabo: Lefase le tletše ka go se thabe, gomme batho ka kakaretšo ba na le pono e fsifetšego ka bokamoso. Lega go le bjalo, re na le pono e phadimago ka bokamoso, re tseba gore ka letšatši le lengwe manyami ka moka e tla ba selo sa nakong e fetilego. (Kut. 21:3, 4) Ka gona, re kopanela ka phišego bodireding, re tsoma ba dipelo tše di botegago bao re ka abelanago le bona kholofelo ya rena le ditumelo tša rena ka Jehofa.—Hesek. 9:4.
5 Kgaetšedi wa mmulamadibogo o itše: “Ga go na selo seo se kgotsofatšago kudu go feta go thuša batho go tseba Jehofa le therešo ya gagwe.” Anke re direng sohle seo re ka se kgonago go kgothaletša ba bantši ka mo go oketšegilego go amogela dithuto tša legae tša Beibele. Go hlankela Jehofa le go ikgafa bakeng sa go thuša ba bangwe go mo hlankela go tliša lethabo le legolo kudu.—Dit. 20:35.