“Dimpho Tšeo e Lego Banna” di Diša Mohlape wa Modimo ka Phišego

¹ A tokišetšo e lerato gakaakang yeo Jehofa a e dirilego ka Morwa wa gagwe ka go nea “dimpho tšeo e lego banna”! (Ba-Ef. 4:8, 11, 12, bapiša le NW.) Ba na le boikarabelo bjo bontši, go akaretša go diša mohlape wa Modimo ka mafolofolo le ka phišego. (1 Pet. 5:2, 3) Ka moka ga rena re holwa ke tokišetšo ye yeo e nyakegago kudu. Go sa šetšwe gore ba bangwe ba lebeletšana le mathata, ba sa tšwa go thoma go kopanela, ba na le mafokodi a itšego goba ba timetše, banna ba ba na le kgahlego e tseneletšego ya motho ka noši ka katlego ya moya ya bohle.—Ba-Fil. 2:4; 1 Ba-Thes. 5:12-14.

² Ge ditiragalo tša lefase tše di tshwenyago di baka poifo e kgolo, badiši ba tlasana ba iponagatša ba le “bjalo ka tšhireletšo ge phefo e foka, le setšhabelo sa go tšhabela pula.” Ge re felelwa ke matla goba re imelwa gomme re ikwa re nyaka khomotšo, ba a re lapološa, “bjalo ka noka ya meetse nageng e omilego” goba “bjalo ka moriti wa lefsika le legolo nageng e nyorilwego.”—Jes. 32:2, PK.

³ Go Kgothatša ba ba Tapilego: Bagolo ba dira boiteko bjo bo kgethegilego bja go kgothatša bao ba fetogilego ba ba sa tšwego ka mehla goba ba tapilego, ba ba thuša go boela boemong bja go tšea karolo ka mehla medirong ka moka ya phuthego. Maeto a bodiši a lerato a thušitše ba bantši go ba gona ka mehla dibokeng tša phuthego le go agega moyeng go fihla boemong bja go ba le karolo gape bodireding bja tšhemo. Maiteko a bjalo ka moka a dirwago ke bagolo a bonagatša tlhokomelo ya Jehofa e lerato le boetapele bjo mafolofolo bja Jesu Kriste. O beile mohlala wa go bontšha tlhokomelo e bjalo bakeng sa dinku tša gagwe tšeo di ka bago di fapogile goba di timetše.—Mat. 18:12-14; Joh. 10:16, 27-29.

⁴ Badiši ba tlasana ba lebeledišiša maswao ao a bontšhago ge yo mongwe a ka ba a tekema moyeng. Batho le ge e le bafe bao ba bontšhago maswao a go nyama, bao ba se sa hlwago ba e-ba gona ka mehla dibokeng, goba bao ba nyefišago tirelong ya tšhemo go bonala ba nyaka thušo ya moya. Bagolo ba ikemišeditše go thuša le ge e le mang yo a thomago go bontšha tshekamelo ya go sekamela moaparong le go itokišeng ga lefase goba yo a thomago go ba le boemo bja kgopolo bja go swaya phuthego diphošo. Ka kgahlego ya kgonthe le ka maikwelo a borutho, balebeledi bao ba kgomegago ba ‘nea bophelo bja bona’ ka go rata ka maikemišetšo a go thuša batho ba bjalo gore ba tsošološe lerato la bona la go rata Jehofa.—1 Ba-Thes. 2:8.

⁵ Nakong e fetilego, Bakriste ba bangwe ba ba ineetšego ba ile ba arogana le phuthego, ba wela boemong bja go tapa moyeng ka gobane ba ile ba fenywa ke mathata a tša bophelo, poela-morago go tša boiphedišo goba dikgateletšo tša lapa. Ka ntle le go ba ba swayago diphošo, bagolo ka lerato ba nea kgonthišetšo ya gore Jehofa o hlokomela dinku tša gagwe ka moka gomme o tla di thekga dinakong tše thata. (Ps. 55:22; 1 Pet. 5:7) Badiši ba phafogilego ba mohlape ba ka ba thuša go hlokomela gore ge e ba ba ‘batamela kgaufsi le Modimo, le yena o tla batamela kgaufsi le bona,’ a ba nea khomotšo le tapološo.—Jak. 4:8, bapiša le NW; Ps. 23:3, 4.

⁶ Go Lebelela ba Babjago e le ba Bohlokwa: Badiši ba ka tlase ba nago le lerato ba bile ba kgomega ka bao go ka diregago gore ba hlokomologwe. Phuthegong e nngwe le e nngwe go na le bao ba fokolago, bao ba lego legaeng la batšofadi goba bao ba golofetšego ka tsela e itšego. Go ba ga bona le karolo go boleleng molaetša wa Mmušo ke mo go lekanyeditšwego ka mo go kwagalago ka baka la maemo a bona. Mohlomongwe sebaka sa bona sa go dira boboledi se ka tšwelela feela ka go kopana le baeti, balwetši ba bangwe goba bahlokomedi. Lega go le bjalo, selo le ge e le sefe seo ba kgonago go se dira se lebelelwa e le thekgo e bohlokwa modirong wa kakaretšo wa go ruta. (Mat. 25:15) Gaešita le ge e ba ba nea bohlatse ka metsotso e 15, metsotso ye e swanetše go begwa, gomme ba tla tšwela pele ba balwa e le bagoeledi ba ka mehla ba Mmušo.

⁷ “Dimpho tšeo e lego banna” di ela hloko ka mo go kgethegilego dinyakwa tša moya tša bana babo bona nakong ye ya ngwaga—e lego sehla sa Segopotšo. A nako e botse gakaakang bakeng sa gore bagolo ba dire boiteko bjo bo kgethegilego bja go thuša ka moka bao ba timetšego gore ba buše ba be le lethabo le khutšo ya monagano yeo e tlišwago ke bogwera bjo borutho bja ka phuthegong! Re a thaba ge re bona batho ba bjalo “ba-bô-rena ba tumêlô” ba le gona dibokeng tša phuthego le go ya bodireding gape ba tsebatša tumelo ya bona sehlabelong sa topollo.—Ba-Gal. 6:10; Luka 15:4-7; Joh. 10:11, 14.