Oketša Lethabo la Gago Boboleding
1 Na o thabela go abelana le ba bangwe ditaba tše dibotse bodireding bja gago? Ge e ba re sa hlokomele, lefase le kgopo leo le re dikologilego le ka re dira gore re be le dihlong ka go dira boboledi, la dira gore re lahlegelwe ke lethabo la rena. Go šoma tšhemong yeo go yona go se nago karabelo le gona go ka re nyemiša moko. Ke megato efe e šomago yeo re ka e gatago bakeng sa go oketša lethabo la rena boboleding?
2 E-ba le Kgopolo e Nepagetšego: Go kgomarela boemo bjo bo nepagetšego bja kgopolo go thuša e le ka kgonthe. Tsela e nngwe ya go ba le boemo bjo bjalo bja kgopolo ke ka go naganišiša ka tokelo ya rena e kgolo kudu ya go ba “badirišani ba Modimo.” (1 Ba-Kor. 3:9) Jesu le yena o na le rena go phetheng modiro wo. (Mat. 28:20) Le gona o re thekga ka madira a gagwe a barongwa. (Mat. 13:41, 49) Ka baka leo, re ka kgonthišega gore maiteko a rena a hlahlwa ke Modimo. (Kut. 14:6, 7) Ka gona, go sa šetšwe kamoo batho ba bangwe ba ka arabelago ka gona modirong wa rena, karabelo ya magodimong ke ya lethabo le legolo!
3 Lokišetša Gabotse: Go lokišetša gabotse le gona go tlaleletša lethabong la rena. Go itokišeletša bodiredi ga se gwa swanela go ba modiro o mogolo. Go tšea feela metsotso e mmalwa go hlahloba ntlha e ka bolelelwago dimakasineng tša gona bjale goba mphong ya kgwedi ya puku. Kgetha thero go tšwa go “Seo o ka se Bolelago ka Dimakasine,” go Tirelo ya Rena ya Mmušo. Hlahloba pampiri ya ka gare ya January 2002, yeo e rego, “Dithero tše di Šišintšwego Bakeng sa Tirelo ya Tšhemo,” goba o lebelele pukung ya Go Boledišana bakeng sa matseno a atlegago. Ge e ba o šitišwa ke kganetšo yeo beng ba dintlo ka tlwaelo ba e rotošago, lokišetša karabo yeo e tlago go dumelela ditlhaloso tša bona gomme o lebiše tlhokomelo tabeng yeo e tsošago kgahlego. Puku ya Go Boledišana e thuša kudu go direng se. Go diriša dithušo tše go tla re nea kgodišego yeo re e nyakago bakeng sa go bolela ka lethabo.
4 Rapela go tšwa Pelong: Thapelo ke ya bohlokwa bakeng sa lethabo la ka mo go sa felego. Ka ge re dira modiro wa Jehofa, re swanetše go mo kgopela moya wa gagwe, woo se sengwe sa dienywa tša wona e lego lethabo. (Ba-Gal. 5:22) Jehofa o tla re nea matla a go tšwela pele re bolela. (Ba-Fil. 4:13) Go rapelela bodiredi bja rena go ka re thuša go boloka pono e nepagetšego ge re e-ba le diphihlelo tše di sa thabišego. (Dit. 13:52; 1 Pet. 4:13, 14) Ge e ba re ikwa re boifa, thapelo e ka re thuša go phegelela ka sebete le ka lethabo.—Dit. 4:31.
5 Bula Dibaka: Go ba gona, bodiredi bja rena bo thabiša kudu ge re kgona go hwetša batho gomme re ba nea bohlatse. Go fetoša thulaganyo ya gago e le gore o ye ka ntlo le ntlo ka nako e fapanego, mohlomongwe ka šwahlane goba mantšiboa, go ka feleletša ka katlego e kgolo. O gahlana le batho nako le nako ge o sepela setarateng, ge o e-ya go reka, o nametše pese goba o itshepelela phakeng. Ke ka baka la’ng o sa lokišetše matseno a makopana a go thoma poledišano gomme o gate mogato wa pele wa go batamela bao ba bonalago ba e-na le bogwera? Goba o ka ba o šoma mošomo wa boiphedišo goba o tsena sekolo sa bohle, moo o boledišanago le ba bangwe letšatši le letšatši. O ka hwetša sebaka sa go nea bohlatse ka go fo rotoša taba ya Mangwalo yeo e tsošago kgahlego. Ditšhišinyo tše dibotse di hwetšwa letlakaleng la pele la pampiri ya ka gare ya Tirelo ya Rena ya Mmušo ya January 2002. Le ge e le afe a maiteko a, a ka oketša kudu lethabo la motho boboleding.
6 Ka ge lethabo le re thuša go kgotlelela, go bohlokwa gakaakang go le kgomarela! Ka go dira bjalo, re tla buna moputso o mogolo ge modiro wo wo o ka se kego wa boeletšwa le ka mohla o fihla mafelelong a wona. Tebelelo yeo ka boyona e ka oketša lethabo la rena boboleding.—Mat. 25:21.