Bontšha Gore o Leboga “Dimpho” Tšeo e Lego Banna

1. Ke dilo dife tše dingwe tšeo Jesu a re diretšego tšona?

GA GONA motho yo a ilego a thuša batho ba bangwe go feta Jesu. Ge a be a le mo lefaseng, o be a dira mehlolo go thuša batho ba bangwe. (Luka 9:12-17) O re file mpho e kgolo kudu ka go re hwela. (Joh. 15:13) Le ka morago ga gore a tsošwe, o ile a tšwela pele a thuša batho. O ile a phethagatša seo a re tshepišitšego sona, ka go re kgopelela moya o mokgethwa go Jehofa gore o re thuše le go re kgothatša. (Joh. 14:16, 17, 16:13) Jesu o diriša diboka go re thuša gore re kgone go dira batho barutiwa lefaseng ka moka.—Mat. 28:18-20.

2. Ke bomang bao ba kgethilwego gore e be “dimpho”? (Baefeso 4:7, 8)

² Go na le mpho e nngwe e bohlokwa yeo Jesu a re neilego yona. Moapostola Paulo o ngwadile gore ge Jesu a eya legodimong o re file banna gore e be dimpho. (Bala Baefeso 4:7, 8.) Paulo o hlalositše gore Jesu o re file dimpho tšeo gore di hole phuthego ka ditsela tše dintšhi. (Baef. 1:22, 23; 4:11-13) Lehono, “dimpho” tšeo ke bahlanka ba bodiredi, bagolo le balebeledi ba tikologo.a Re a tseba gore banna ba ga se ba phethagala ba tlo fela ba dira diphošo. (Jak. 3:2) Eupša Jesu Kriste o ba kgethile gore ba re thuše.

3. Re ka thuša bjang banna bao e lego “dimpho.”?

³ Jesu o file banna ba mošomo o bohlokwa kudu wa gore ba hlokomele phuthego. (Baef. 4:12) Ka moka ga rena re ka kgona go thuša banna ba. Ka mohlala, ba bangwe ba swarega ka go aga, ba bangwe ba dira dijo, ba bangwe ba thuša ka dinamelwa mola ba bangwe ba swaregile ka tše dingwe. Ka mo go swanago ka moka ga rena re ka thuša bahlanka ba bodiredi, bagolo le balebeledi ba tikologo ka dilo tšeo re di dirago goba re di bolelago. A re boneng gore mošomo woo banna ba ba o dirago o re hola bjang, le go bona kamoo re ka lebogago mpho ye, yeo Jesu a re filego yona.

BAHLANKA BA BODIREDI BA A “THUŠA”

4. Ke mešomo e fe e mengwe yeo bahlanka ba bodiredi ba bego ba e dira lekgolong la pele la mengwaga?

⁴ Lekgolong la pele la mengwaga, banna ba bangwe ba be ba kgethwa gore e be bahlanka ba bodiredi. (1 Tim. 3:8) Go bonagala ba be ba dira dilo tšeo Paulo a boletšego ka tšona go 1 Bakorinthe 12:28. Go ka direga gore bahlanka ba bodiredi ba be ba swarega ka dilo tše dingwe tše bohlokwa gore bagolo ba kgone go ruta le go dira maeto a bodiši. Ka mohlala, ba ka ba ba be ba thuša ka go kopolla Mangwalo goba ba ka be ba be ba reka dilo tšeo di bego di hlokega gore ba kgone go ngwala mangwalo ao.

5. Ke mešomo efe yeo bahlanka ba bodiredi ba ka thušago ka yona ka phuthegong lehono?

⁵ Nagana ka dilo tše bolokwa tšeo bahlanka ba bodiredi ba di dirago ka phuthegong ya geno. (1 Pet. 4:10) Ba ka dirišwa e le bahlanka ba diakhaonto goba bahlanka ba tšhemo, go kgonthišetša gore phuthego e dula e na le dikgatišo le gore bagoeledi ba di hwetše, go hlokomela tša medumo le dibidio, go ba bahlokomedi goba go hlokomela Holo ya Mmušo. Dilo tšeo ka moka di dira gore phuthego e sepele gabotse. (1 Bakor. 14:40) Go oketša moo, bahlanka ba bangwe ba bodiredi ba ba le dikarolo dibokeng tša gare ga beke e bile ba nea le dipolelo tša phatlalatša. Ba bangwe ba ka abelwa go ba mothuši wa molebeledi wa sehlopha sa tšhemo. Ka dinako tše dingwe, bahlanka ba bodiredi bao ba swanelegago ba felegetša bagolo maetong a bodiši.

6. Ke ka baka la’ng re swanetše go leboga bahlanka ba bodiredi bao ba šomago ka thata?

⁶ Bahlanka ba bodiredi ba tloga ba thuša phuthego kudu. Kgaetšedi Beberlyb wa kua Bolivia o re: “Bahlanka ba bodiredi ba dira gore ke thabele diboka. Ke kgona go opela, go nea dikarabo, go theetša dipolelo, go thabela dibidio le diswantšho ka bala la mošomo wa bona. Ba šoma ka thata go kgonthišetša gore re bolokegile ge re le dibokeng le go hlokomela bao ba tsenago diboka ka bidio. Ka morago ga diboka ba thuša ka go hlwekiša, go hlokomela diakhaonto le go kgonthišetša gore re hwetša dikgatišo tšeo re di hlokago. Ke tloga ke leboga seo ba re direlago sona!” Kgaetšedi Leslie, yo a dulago Colombia e bile monna wa gagwe a hlankelago e le mogolo o re: “Bahlanka ba bodiredi ba thuša monna wa ka gore a kgone go phetha dikabelo tša gagwe ka phuthegong. Ke tloga ke leboga tsela yeo ba nago le mafolofolo ka yona le go dula ba ikemišeditše go thuša ka gobane ge nkabe e se ka bona, monna wa ka o be a ka se be le nako.” Re kgodišegile gore le lena le ikwa ka tsela yeo ka bahlanka ba bodiredi ba phuthegong ya gabo lena.—1 Tim. 3:13.

7. Re ka bontšha bjang gore re leboga bahlanka ba bodiredi? (Bona le seswantšho.)

⁷ Le ge re thabela gore re na le bahlanka ba bodiredi, Beibele e re kgothaletša ka gore: ‘Le dule le leboga.’ (Bakol. 3:15) Ngwanabo rena Krzysztof yo e lego mogolo kua Finland o re: “Ke ngwalela mohlanka wa bodiredi karata goba ka mo romela molaetša moo ke tsopolago lengwalo leo le bontšhago tsela yeo a nthušago ka yona goba a nkgothatšago ka yona.” Pascal le Jael bao ba dulago New Caledonia, ba re bona ba rapelela bahlanka ba bodiredi. Pascal o re: “Matšatši’a ge re rapela re bolela kudu ka banna bao ba kgethilwego ka phuthegong ya gabo rena.” Jehofa o theetša dithapelo tša mohuta woo, e bile phuthego ka moka e a holega.—2 Bakor. 1:11.

BAGOLO BAO BA “ŠOMAGO KA THATA GARE GA LENA”

8. Ke ka baka la’ng Paulo a ngwadile gore bagolo ba lekgolong la pele la mengwaga ba be ba ‘šoma ka thata’? (1 Bathesalonika 5:12, 13)

⁸ Bagolo ba lekgolong la pele la mengwaga ba be ba šoma ka thata ka phuthegong. (Bala 1 Bathesalonika 5:12, 13; 1 Tim. 5:17) Ba be ba ‘okamela’ phuthego, ba swara diboka e bile ba dira diphetho e le sehlopha. Ba be ba eletša bana babo bona le dikgaetšedi, le go ba nea ditaelo tšeo di bego di dira gore phuthego e dule e šireletšegile. (1 Bathes. 2:11, 12; 2 Tim. 4:2) Le gona banna bao ba be ba šoma ka thata gore ba hlokomele malapa a bona le go dira gore ba dule ba na le segwera seo se tiilego le Jehofa.—1 Tim. 3:2, 4; Tito 1:6-9.

9. Ke maikarabelo afe a mangwe ao bagolo ba na go ona lehono?

⁹ Lehono bagolo ke banna bao ba šomago ka thata. Ba dira modiro wa boebangedi. (2 Tim. 4:5) Ba etelela pele tšhemong ka mafolofolo, ba rulaganya modiro wa boboledi tšhemong ya gabo bona e bile ba tlwaetša bagoeledi go bolela ditaba tše dibotse le go ruta ka tsela e kwagalago. E bile ba hlankela e le baahlodi bao ba nago le kwelobohloko le go se tšee lehlakore. Ge Mokriste a dira sebe se segolo, bagolo ba šoma ka thata go mo thuša gore a lokiše segwera sa gagwe le Jehofa. Ba kgonthišetša gore phuthego e dula e hlwekile. (1 Bakor. 5:12, 13; Bagal. 6:1) Sa bohlokwa le go feta, bagolo ba tsebja e le badiši. (1 Pet. 5:1-3) Ba nea dipolelo tšeo di lokišeditšwego gabotse, ba leka go tseba motho yo mongwe le yo mongwe ka phuthegong e bile ba dira maeto a bodiši. Bagolo ba bangwe ba thuša go aga Diholo tša Mmušo le go di hlokomela, ba rulaganya dikopano tša selete, ba šoma Dikomiting tša go Hloma Kwano le Dipetlele le Dihlopheng tša go Etela Balwetši. Bagolo ba tloga ba šoma ka thata!

10. Ke ka baka la’ng re leboga bagolo bao ba šomago ka thata?

¹⁰ Jehofa o boletše e sa le pele gore badiši ba tlo re hlokomela le gore “[re] ka se sa tšhaba e bile [re] ka se sa tšhoga selo.” (Jer. 23:4) Kgaetšedi Johanna yo a tšwago Finland, o ile a bona mantšu ao a phethagala nakong ya ge mmagwe a be a babja kudu. O re: “Le ge ke palelwa ke go botša batho ba bangwe kamoo ke ikwago ka gona, mogolo yo mongwe yo ke bego ke sa mo tsebe gabotse o be a sa mphelele pelo, a rapela le nna e bile a nkgodiša gore Jehofa o a nthata. Le ge ke sa gopole gore o ile a mpotša gore’ng, eupša seo ke se gopolago ke gore ke ile ka ikwa ke bolokegile. Ke nagana gore Jehofa o ile a mo romela gore a tle a nthuše.” Bagolo ba phuthegong ya geno ba ile ba go thuša bjang?

11. Re ka bontšha bjang gore re leboga bagolo? (Bona le seswantšho.)

¹¹ Jehofa o nyaka gore re leboge bagolo “ka baka la modiro wa bona.” (1 Bathes. 5:12, 13) Henrietta yo a tšwago Finland, o re: “Bagolo ba re thuša ka go rata, eupša seo ga se re gore ba na le matla a sa tlwaelegago goba ga ba na mathata. Ka dinako tše dingwe ke no re go bona, ‘wa tseba ke’ng, o mogolo yo a kgahlišago kudu. Ke tshepa gore o a se tseba seo.’” Kgaetšedi yo a bitšwago Sera wa kua Türkiyec o re: “Bagolo ba hloka go kgothatšwa. Re ka ba romela dikarata, ra ba mema dijong goba ra šoma le bona tšhemo.” Ge e ba o bona gore bagolo ba phuthegong ya geno ba tloga ba šoma ka thata, o ka nyaka ditsela tša go ba leboga.—1 Bakor. 16:18.

BALEBELEDI BA TIKOLOGO BAO BA KGOTHATŠAGO

12. Ke banna bafe ba bangwe gape bao Jesu a ilego a ba abela gore ba tiiše diphuthego lekgolong la pele la mengwaga? (1 Bathesalonika 2:7, 8)

¹² Jesu Kriste o ile a nea diphuthego “dimpho” tšeo e lego banna bao ba hlankelago ka tsela e fapanego. O ile a hlahla bagolo kua Jerusalema gore ba romele Paulo, Baranaba, le ba bangwe gore e be balebeledi ba basepedi. (Dit. 11:22) Ka baka la’ng? Ka gobane ba be ba swanetše go dira mošomo wo o bego o swanetše go dirwa ke bagolo le bahlanka ba bodiredi e lego go tiiša diphuthego. (Dit. 15:40, 41) Banna ba ba ile ba ikgafa le go bea maphelo a bona kotsing gore ba kgone go ruta le go kgothatša ba bangwe.—Bala 1 Bathesalonika 2:7, 8.

13. Ke maikarabelo afe a mangwe ao molebeledi wa tikologo a nago le ona?

¹³ Balebeledi ba tikologo ba dula ba le tseleng. Ba bangwe ba sepela maeto a matelele ge ba etela diphuthego. Beke e nngwe le e nngwe, molebeledi wa tikologo o nea dipolelo tše mmalwa, o dira maeto a bodiši le go swara seboka sa babulamadibogo, seboka sa bagolo le go swara diboka tša tirelo ya tšhemo. O lokišetša dipolelo le go rulaganya dikopano. O ruta dikolong tša babulamadibogo, o rulaganya seboka se se kgethegilego le babulamadibogo ba tikologo e bile o swaragana le merero e mengwe yeo ka dinako tše dingwe e akgofilego yeo a e abetšwego ke ofisi ya lekala.

14. Ke ka bala la’ng re leboga balebeledi ba tikologo bao ba šomago ka thata?

¹⁴ Balebeledi ba tikologo ba hola bjang diphuthego? Ngwanabo rena yo mongwe kua Türkiye ge a bolela ka balebeledi ba tikologo o re: “Ketelo e nngwe le e nngwe e nthuša gore ke fetše nako e ntšhi ke thuša bana babo rena. Ke kopane le balebeledi ba bantšhi ba tikologo eupša ga go le o tee wa bona yo a ilego a dira gore ke bone eka o swaregile kudu goba ga a batamelege.” Kgaetšedi Johanna, yo re boletšego ka yena pejana o ile a šoma tšhemo le molebeledi wa tikologo eupša ga se ba ka ba hwetša motho ka magaeng. O re: “Ke tlo dula ke gopola letšatši leo.” Bana ba gešo ba be ba sa tšwa go huduga, gomme ke be ke ba gopotše kudu. Molebeledi wa tikologo o ile a nkgothatša le go nthuša go bona gore taba ya gore bana ba gešo ba dula kgole, ga se ya swanela go ba selo seo se ntshwenyago kudu ka gobane nako e tlago ke tlo kgona go fetša nako e ntšhi ke na le bona.” Balebeledi ba bantšhi ba tikologo le bona ba dira sohle seo ba ka se kgonago gore ba thuše bana babo bona bao ba ba hlankelago.—Dit. 20:37-21:1.

15. (a) Re ka bontšha bjang gore re leboga balebeledi ba tikologo? (3 Johane 5-8) (Bona le seswantšho.) (b) Ke ka baka la’ng re swanetše go bontšha gore re leboga basadi ba banna bao ba kgethilwego, gona re ka dira seo bjang? (Bona lepokisi leo le rego “Gopola Basadi ba Bona.”)

¹⁵ Moapostola Johane o ile a kgothaletša Gayo gore a amogele bana babo bao ba etetšego phuthego le go ba “thuša ka tsela yeo e tlago go kgahliša Modimo.” (Bala 3 Johane 5-8.) Tsela e nngwe yeo re ka dirago seo ka yona, ke ka go mema molebeledi wa tikologo dijong. Bekeng ya ketelo le gona re ka thekga dithulaganyo tša tirelo ya tšhemo. Kgaetšedi Leslie yo re boletšego ka yena pejana, le yena go na le ditsela tšeo a bontšhago ka tšona gore o a leboga. O re: “Ke rapela Jehofa gore a ba hlokomele. Nna le monna wa ka re ba ngwalela mangwalo re ba botša kamoo diketelo tša bona di re thušago ka gona.” Gopola gore balebeledi ba tikologo le bona ke batho. Ka dinako tše dingwe ba a babja, ba ba le dipelaelo le go nyama. Mohlomongwe go ba botša mantšu a botho goba go ba nea mpho e ka ba karabo ya thapelo ya molebeledi wa tikologo!—Die. 12:25.

RE HLOKA “DIMPHO” TŠEO E LEGO BANNA

16. Bana babo rena ba ka ipotšiša dipotšišo dife? (Diema 3:27)

¹⁶ Lefaseng ka moka, go nyakega banna bao ba ka hlankelago ka diphuthegong. Ge e ba o le ngwanabo rena yo a kolobeditšwego na o ka kgona go thuša? (Bala Diema 3:27.) Na o ikemišeditše go šoma ka thata gore mafelelong o be mohlanka wa bodiredi? Ge e ba o šetše o le mohlanka wa bodiredi, na o ka šoma ka thata gore mafelelong o be mogolo?d Na o ka kgona go beakanya maemo a gago gore o ye Sekolong sa Baebangedi ba Mmušo? Sekolo seo se tlo go thuša gore Jesu a go diriše ka mo go oketšegilego. Ge eba o bona okare o ka se kgone, kgopela Jehofa a go thuše. Mo kgopele a go fe moya o mokgethwa gore o kgone go phetha dikabelo tšeo o di newago ka phuthegong.—Luka 11:13; Dit. 20:28.

17. Ke’ng seo banna bao e lego “dimpho” ba se bontšhago ka Kgoši ya rena e lego Jesu Kriste?

¹⁷ Tsela yeo banna bao ba kgethilwego ba šomago ka thata ka yona, e bontšha gore Jesu o re etelela pele mehleng ye ya bofelo. (Mat. 28:20) Re leboga kudu gore re na le Kgoši e lerato le e botho e bile e tseba dilo ka moka tšeo re di hlokago gomme e re nea bana babo rena bao ba re thušago. Leka go bontšha banna ba gore o leboga mošomo o mobotse wo ba o dirago. Ka mehla dula o leboga Jehofa ka gobane ke yena a re neago “mpho e nngwe le e nngwe e botse le neo e nngwe le e nngwe e phethagetšego.”—Jak. 1:17.