Seo re Ithutago Sona go Boporofeta bja Jakobo—Karolo 1

1-2. Jakobo o ile a dira’ng pele a hlokofala, gona ka baka la’ng? (Bona le seswantšho la ka ntle.)

GO BE go fetile mengwaga e ka bago e 17 ga e sa le mohlanka yo a botegago wa Jehofa e lego Jakobo a eya Egepeta le lapa la gagwe. (Gen. 47:28) Ka nako yeo o ile a thaba kudu ge a ile a kgona go kopana le morwa wa gagwe e lego Josefa le go bona lapa la gagwe le le gotee gape. Jakobo o be a tseba gore o kgauswi le go hlokofala. O ile a kopanya lapa la gagwe ka moka ka ge a be a na le selo sa bohlokwa kudu seo a bego a nyaka go ba botša sona.—Gen. 49:28.

² Mehleng yeo go be go tlwaelegile gore hlogo ya lapa yeo e lego kgauswi le go hlokofala, e kgobokanye lapa gomme e le nee ditaelo tša mafelelo tšeo lapa leo le bego le swanetše go di latela. (Jes. 38:1) Ka nako yeo, o be a ka botša lapa la gagwe gore ke mang a bego a tlo le etelela pele ka morago ga gore a hlokofale.

3. Ke ka baka la’ng mantšu ao Jakobo a a boletšego go Genesi 49:​1, 2, a le bohlokwa?

³ Bala Genesi 49:​1, 2. Jakobo o be a se a no kopana le lapa la gagwe feela. E be e le moporofeta. Nakong ya ge lapa leo le be le kopane, Jehofa o ile a thuša Jakobo gore a botše barwa ba gagwe ka dilo tše bohlokwa tšeo di bego di tlo direga nakong e tlago tšeo di bego di tlo kgoma le ditlogolo tša gagwe. Ke ka baka leo ka dinako tše dingwe go bolelwago gore mantšu a Jakobo ke boporofeta bja nakong ya ge a le kgauswi le go hlokofala.

4. Ke’ng seo re swanetšego go naganišiša ka sona ge re hlahloba boporofeta bja Jakobo bja mafelelo? (Bona le lepokisi leo le rego “Lapa la Jakobo.”)

⁴ Sehlogong se, re tlo boledišana ka dilo tšeo Jakobo a di boditšego barwa ba gagwe ba bane e lego: Rubeni, Simeone, Lefi le Juda. Sehlogong seo se latelago, re tlo boledišana ka mantšu ao Jakobo a a boditšego barwa ba gagwe ba seswai. Re tlo bona le gore Jakobo ga se a bolela ka barwa ba gagwe feela, eupša o boletše le ka ditlogolo tša bona tšeo e bego e tlo ba setšhaba sa Isiraele. Ge re ka ithuta ka seo se diragaletšego setšhaba sa Isiraele, re tlo kgona go bona gore boporofeta bja Jakobo bo ile bja phethagala. Ge re ka naganišiša ka mantšu a gagwe, re tlo ithuta dilo tše bohlokwa tšeo di ka re thušago gore re kgahliše Tatago rena wa legodimong e lego Jehofa.

RUBENI

5. Rubeni a ka ba a ile a letela gore tatagwe a mo nee tokelo ya mohuta mang?

⁵ Jakobo o ile a botša Rubeni gore: “O morwa wa ka wa mathomo.” (Gen. 49:3) Rubeni a ka ba a ile a letela gore a hwetše karolo e kgolo ya dithoto tša tatagwe ka ge e le morwa wa mathomo. A ka ba a ile a letela le gore a tle a be hlogo ya lapa ka morago ga gore tatagwe a hlokofale le gore tokelo yeo e tle e fetišetšwe go ditlogolo tša gagwe nakong e tlago.

6. Ke ka baka la’ng Rubeni a se a hwetša tokelo yeo e bego e swanela morwa wa mathomo? (Genesi 49:​3, 4)

⁶ Rubeni ga se a ka a hwetša tokelo yeo e bego e swanela morwa wa mathomo. (1 Dikor. 5:1) Ka baka la’ng? Mengwaga e sego kae pejana, Rubeni o ile a robala le mosadi wa Jakobo wa serethe e lego Biliha. E be e le mohlanka wa mosadi yo Jakobo a bego a mo rata kudu yo a hlokofetšego e lego Ragele. (Gen. 35:​19, 22) Rubeni e be e le morwa wa Lea, e lego mosadi yo mongwe wa Jakobo. Mohlomongwe Rubeni o ile a robala le Biliha ka ge a be a mo kganyoga. Goba a ka ba a ile a robala le Biliha gore Jakobo a mo hloye gomme a rate mmagwe kudu. Go sa šetšwe mabaka ao a dirilego gore a robale le yena, seo a se dirilego se be se šišimiša Jehofa le tatagwe.—Bala Genesi 49:​3, 4.

7. Go diregile’ng ka Rubeni le ditlogolo tša gagwe? (Bona le lepokisi leo le rego “Boporofeta bja Jakobo bja Mafelelo.”)

⁷ Jakobo o ile a botša Rubeni gore: “O ka se fete bana beno.” Mantšu ao a ile a phethagala. Ga go na mo Beibele e re botšago gore yo mongwe wa ditlogolo tša Rubeni o ile a ba kgoši, moperisita goba moporofeta. Jakobo ga se a ka a lahla morwa wa gagwe, ebile ditlogolo tša Rubeni e ile ya ba karolo ya meloko ya Isiraele. (Josh. 12:6) Rubeni o ile a bontšha dika tše dibotse dikarolong tše dingwe ebile ga go na mo Beibele e re botšago gore o ile a dira bootswa gape.—Gen. 37:​20-22; 42:37.

8. Re ithuta’ng mohlaleng wa Rubeni?

⁸ Seo re ithutago sona. Re swanetše go šoma ka thata gore re be le boitshwaro ebile re gane go dira bootswa. Ge eba re ka lekega go dira sebe, re swanetše go naganišiša kamoo dilo tšeo re di dirago di ka kwešago Jehofa, ba malapa a gabo rena le batho ba bangwe bohloko ka gona. Re swanetše go gopola le gore “se sengwe le se sengwe seo motho a se bjalago, ke sona seo a tlago go se buna.” (Bagal. 6:7) Le gona, seo se diragaletšego Rubeni, se re gopotša gore Jehofa o na le kgaugelo. Le ge Jehofa a ka se re šireletše go ditlamorago tša diphošo tša rena, o tlo re šegofatša ge re leka go dira seo se lokilego.

SIMEONE LE LEFI

9. Ke ka baka la’ng Jakobo a ile a kgala Simeoni le Lefi? (Genesi 49:​5-7)

⁹ Bala Genesi 49:​5-7. Jakobo o ile a kgala Simeoni le Lefi ka gobane o be a se a kgahlwa ke seo ba se dirilego. Mengwaga e fetilego, morwedi wa Jakobo e lego Dina, o ile a katwa ke monna wa Mokanana e lego Shikeme. Barwa ba Jakobo ka moka ba be ba galefišitšwe ke seo se diragaletšego kgaetšedi ya bona, eupša Simeone le Lefi ba ile ba palelwa ke go laola kgalefo ya bona. Ka bofora ba ile ba tshepiša go dira khutšo le banna ba Shikeme ge eba ba ka dumela go bolotšwa. Banna ba Shikeme ba ile ba dumelelana le tšhišinyo yeo. Ge banna bao ba be ba sa kwa bohloko ka baka la go bolotšwa, Simeone le Lefi ba ile “ba tšea ditšhoša tša bona ba ya motseng woo go se na motho yo a belaelago gore ba ya go dira eng moo. Ge ba fihla ba bolaya motho yo mongwe le yo mongwe yo motona.”—Gen. 34:​25-29.

10. Mantšu ao Jakobo a a boletšego ka Simeone le Lefi a ile a phethagala bjang? (Bona le lepokisi leo le rego “Boporofeta bja Jakobo bja Mafelelo.”)

¹⁰ Jakobo o be a kwatišitšwe ke seo barwa ba gagwe ba babedi ba se dirilego. O ile a bolela gore ba tlo aroganywa le go phatlalala nageng ya Isiraele. Mantšu ao a ile a phethagala mengwageng e fetago e 200 ka morago ge setšhaba sa Isiraele se tsena nageng ya kholofetšo. Moloko wa Simeone o ile wa hwetša dikarolwana tše dingwe tša metse ka gare ga naga ya Juda. (Josh. 19:1) Balefi bona ba ile ba hwetša metse e 48 yeo e bego e phatlaletše Isiraele.—Josh. 21:41.

11. Ke dilo dife tše dibotse tšeo Basimeone le Balefi ba ilego ba di dira?

¹¹ Bana ba Simeone le ba Lefi ga se ba ka ba bušeletša diphošo tšeo borakgolokhukhu ba bona ba ilego ba di dira. Balefi ba ile ba botegela borapedi bjo bo hlwekilego. Ge Moshe a be a ile go hwetša molao wa Jehofa Thabeng ya Sinai, Baisiraele ba bantši ba ile ba rapela modingwana wa namane. Balefi bona ba ile ba ba ka lehlakoreng la Moshe gomme ba mo thuša go senya modingwana woo. (Ek. 32:​26-29) Jehofa o ile a kgetha Balefi gomme a ba nea tokelo e kgolo ya gore e be baperisita. (Ek. 40:​12-15; Num. 3:​11, 12) Ka morago, Basimeone ba ile ba thuša Bajuda gore ba lwe le Bakanana ba lwela karolo ya bona Nageng ya Kholofetšo.—Baa. 1:​3, 17.

12. Re ithuta’ng mohlaleng wa Simeone le Lefi?

¹² Seo re ithutago sona. Ga se ra swanela go dira diphetho re kwatile. Ke ga tlhago gore re kwate ge eba rena goba motho wa gabo rena a se a swarwa gabotse. (Ps. 4:4) Re swanetše go gopola gore re ka se kgahliše Jehofa ge eba re bolela goba re dira dilo tše itšego gore re itefeletše go batho bao ba re kwešitšego bohloko. (Jak. 1:20) Ga re itefeletše ge ba bangwe ba sa re sware gabotse, go sa šetšwe gore ba hlankela Jehofa goba ga ba mo hlankele ka gobane re phela ka melao ya motheo ya Beibele. (Baroma 12:​17, 19; 1 Pet. 3:9) Le ge batswadi ba rena ba ka dira dilo tšeo di sa kgahlišego Jehofa, ga re gapeletšege go latela mohlala wa bona. O se ke wa nagana gore ga go kgonege gore o kgahliše Jehofa. Jehofa o tlo go thuša gore o dule o dira dilo tšeo di lokilego a ba a go šegofatša.

JUDA

13. Ke ka baka la’ng Juda a ka ba a ile a tshwenyega ge a be a tlo kwa mantšu ao tatagwe a bego a tlo a bolela ka yena?

¹³ Juda ke yena a bego a tlo latela yoo tatagwe a bego a tlo boledišana le yena. Juda a ka ba a ile a tshwenyega ka morago ga go kwa seo tatagwe a se boditšego bo buti ba gagwe. Le yena o ile a dira diphošo tše dikgolo. O be a le gona ge banna ba Shikeme ba be ba bolawa. (Gen. 34:27) O ile a dirišana le bo buti ba gagwe ge ba be ba rekiša Josefa gore e be lekgoba le go fora tatago bona ka taba yeo. (Gen. 37:​31-33) Ka morago o ile a robala le ngwetši ya gagwe e lego Thamara a nagana gore ke mogweba ka mmele.—Gen. 38:​15-18.

14. Ke dilo dife tše dibotse tšeo Juda a ilego a di dira? (Genesi 49:​8, 9)

¹⁴ Jakobo o ile a reta Juda le go mo tshepiša gore yena le ba lapa la gagwe ba tlo diragalelwa ke dilo tše dibotse. (Bala Genesi 49:​8, 9.) Juda o ile a bontšha gore o tloga a tshwenyegile ka tatagwe yo a bego a tšofetše. Le gona o ile a bontšha gore o šokela moratho wa gagwe e lego Benjamini.—Gen. 44:​18, 30-34.

15. Juda o ile a šegofatšwa bjang?

¹⁵ Jakobo o ile a bolela gore Juda o tlo etelela bo buti ba gagwe pele. Boporofeta bjoo bo be bo tlo phethagala ka morago ga nako e telele. Go bolelwa la mathomo ka Juda gore o etelela pele mengwaga e ka bago e 200 ka morago ga gore Baisiraele ba tšwe nageng ya Egepeta gomme ba ye Nageng ya Kholofetšo. Bajuda ba ile ba etelela Baisiraele pele ge ba be ba le lešokeng ba eya Nageng ya Kholofetšo. (Num. 10:14) Mengwaga e mentši ka morago, Jehofa o ile a laela Juda gore a etelele pele ge setšhaba Baisiraele se eya go lwa le Bakanana. (Baa. 1:​1, 2) Dafida yo e lego setlogolo sa Juda, e bile kgoši ya mathomo go tšwa molokong woo. Eupša ga go felele moo.

16. Boporofeta bjo bo lego go Genesi 49:10 bo phethagetše bjang? (Bona le lepokisi leo le rego “Boporofeta bja Jakobo bja Mafelelo.”)

¹⁶ Jakobo o ile a bolela gore yo a tlo bušago batho ka mo go sa felego, o tlo tšwa molokong wa Juda. (Bala Genesi 49:10.) Mmuši yoo ke Jesu Kriste yo Jakobo a ilego a mmitša gore ke Shilo. Ge morongwa a be a bolela ka Jesu, o ile a re: “Jehofa Modimo o tla mo nea sedulo sa bogoši sa Dafida tatagwe.” (Luka 1:​32, 33) Jesu o bitšwa le gore ke “Tau ya moloko wa Juda.”—Kut. 5:5.

17. Re ka ekiša bjang tsela yeo Jehofa a lebelelago batho ka yona?

¹⁷ Seo re ithutago sona. Jehofa o ile a šegofatša Juda le ge a ile a dira diphošo tše dikgolo. Bo buti ba Juda ba ka ba ba ile ba ipotšiša gore ke eng seo Jehofa a se bonego go yena. Go sa šetšwe dilo tšeo ba ka bego ba be ba di nagana, re a tseba gore Jehofa o ile a bona dilo tše dibotse go Juda a ba a mo šegofatša. Re ka ekiša bjang mohlala wa Jehofa? Ge Mokristegotee le rena a hwetša tokelo e itšego, re ka lekega go nagana kudu ka mafokodi ao a nago le ona. Re dira gabotse ge re gopola gore Jehofa o kgahlwa ke dika tše dibotse tšeo Mokriste yoo a nago le tšona. Jehofa o lebelela dika tše dibotse go bahlanka ba gagwe. Le rena re swanetše go šoma ka thata gore re mo ekiše.

18. Ke ka baka la’ng re se ra swanela go fela pelo?

¹⁸ Selo se sengwe seo re ithutago sona go Juda ke go se fele pelo. Jehofa o dula a phethagatša dilo tšeo a di tshepišitšego, eupša e sego ka tsela goba ka nako yeo rena re e letetšego. Bana ba Juda ga se ba no thoma ka go etelela batho ba Modimo pele. Ba ile ba thekga bao Jehofa a bego a ba kgethile gore ba etelele pele, e lego Moshe wa Molefi, Joshua wa Moefuraime goba Kgoši Saulo wa Mobenjamini. Eka le rena re ka thekga bao Jehofa a ba kgethago gore ba re etelele pele lehono.—Baheb. 6:12.

19. Boporofeta bja Jakobo bja mafelelo bo re ruta’ng ka Jehofa?

¹⁹ Ke’ng seo re ithutilego sona sehlogong se ka boporofeta bja Jakobo? Go molaleng gore “tsela yeo motho a bonago ka yona, ga se yeo Modimo a bonago ka yona.” (1 Sam. 16:7) Jehofa ga a fele pelo ebile o a lebalela. Le ge a sa amogele diphošo, eupša o a tseba gore bahlanka ba gagwe ga se ba phethagala. A ka šegofatša le batho bao ba dirilego diphošo tše dikgolo nakong e fetilego ge eba ba itshola gomme ba dira selo seo se lokilego. Sehlogong seo se latelago, re tlo boledišana ka seo Jakobo a ilego a se botša barwa ba gagwe ba bangwe ba seswai.