Go Thwe’ng ge e ba Lapa Lešo le Diila?

TOROPO ya Afrika Borwa e diilago yeo George a goletšego go yona ga e mo tlišetše dikgopotšo tše di thabišago. O a gopola, “Re be re dula ka gare ga ngwako o tlwaelegilego o bitšwago mukhukhu​—⁠se e fo ba mokutwana o agilwego ka masenke o nago le diphapoši tše pedi.” O be a hlakanetše e nngwe ya diphapoši le banababo le dikgaetšedi ba seswai. Nakong ya dikgwedi tša marega, George o be a šwahla phefo e tonyago ya marega gore a ye go ga meetse pomping e tee yeo e bego e nea setšhaba ka moka meetse. George o re, “Eupja selo seo ke bego ke se hloile ka kudu mabapi le go gola ka bodiidi, e be e le go bona tate a šoma ka thata e le feela gore a kgone go re phediša. Ke be ke kgopišwa ke gore go be go bonagala eka go be go se na tsela ya go tšwa bothateng bjoo.”

Bothata bja tša boiphedišo ke tsela yeo batho ba phelago ka yona dinageng tšeo di hlabologago. Gaešita le dinaga tše dintši tša Bodikela tše di humilego kudu, di na le dipalo tšeo di boifišago tša batho bao ba diilago. Mohlomongwe o o mongwe wa bona. Ka go swana le George mo gongwe o ka ba wa ikwa o kgakgetšwe bodiiding. Lege maikwelo a bjalo e le ao a kwešišegago, a ka ba a go šušumeletša gore o itshware ka ditsela tšeo di gakatšago go e na le go fokotša mathata a go ba modiidi.

Tsela ya go Tšhabela Molaba

Dipalo tšeo di golago tša bafsa bao ba diilago di leka go tšhabela bohloko bja bodiidi ka go gwalatša dikwi tša tšona ka go diriša bjala goba dihlare-tagi. Go ya ka monyakišiši Jill Swart, bana bao ba dulago mekgotheng ba motseng o mongwe o mogolo wa borwa bja Afrika “ga ba kgoge glue feela ‘bakeng sa go ithabiša.’ Ba e dirišetša go . . . tšhabela go tonya, go lewa ke bodutu le tlala.”

Eupja bafsa ba ba ikwa bjang nakong ya ge ba hlaphogetšwe gomme botagwa bja dihlare-tagi bo fedile? Jill Swart o ngwadile dika tše swanago le go ba le “kgateletšo e tseneletšego,” “go ferekana,” “go feto-fetoga ka go akgofa ga maikwelo,” “go se bone gabotse” le bontši bja matshwenyego a mangwe a mmele ao a ka se kego a hlaloswa e le mokgwa o mobotse wa go “tšhabela” bodiidi.

Kgoši Salomo yo bohlale o itše: “Xobane monwi . . . o tlo diila; ’me serôkô-rôkô se tlo tšwara mankxeretla.” (Diema 23:​21) Go leka go tšhabela maemo a kgonthe a bodiidi ka go fetola boemo bja gago bja kgopolo ka bjala, glue, goba dihlare-tagi go ka se ke gwa dira gore bothata bja gago bo nyamele. (Bapiša le Diema 31:⁠7.) Bjalo ka Maria, ngwanenyana wa nywaga e 16 yo a tšwago lapeng leo le diilago la motswadi o tee Afrika Borwa, o boletše gore: “Go leka go tšhabela boemo bja kgonthe go baka mathata a mantši go feta ao go a rarollago.” Ka ntle le moo, tshenyagalelo e phagamego ya go lefelela mekgwa e bjalo e senyago e nweletša motho ka gare-gare ga bodiidi. Ke feela ge mofsa yo a diilago a lebeletšana ka go lebanya le boemo bja gagwe, mo a ka holofelago gore o tla kgona go thulana le bjona ka katlego.

Pefelo le Kgakanego

E le bao ba galefilego ka go ba bao ba kgakgetšwego tikologong ya bodiidi, bafsa ba bantši ba bontšha kgalefo ya bona ka bošoro, bosenyi bja dithoto bja ka boomo, go utswa le dibopego tše dingwe tša bosenyi bjo bo dirwago ke bafsa. The World Book Encyclopedia e bolela gore bafsa ba bjalo ba lebelela se e le “tsela e nnoši ya go tšhabela go lewa ke bodutu, bodiidi le mathata a mangwe.” George, yo a boletšwego pele, o gopola gore tše dingwe tša dithaka tša gagwe di be di galefile e bile di gakanegile gomme di ile tša tsenela dihlopha tšeo di bego di tšhošetša tikologo yeo ba dulago go yona. O oketša ka go bolela gore “gantši ba be ba e-⁠lwa gomme ba utswa bakeng sa go iphediša.” Lega go le bjalo, bafsa ba bangwe ba leka go fediša bodiidi ka go thoma go ba bao ba swaregilego medirong yeo e sego ya molao e humišago, e swanago le go rekiša goba go šwahliša dihlare-tagi.

Lega go le bjalo, go e na le go fokotša bodiidi, boitshwaro bja bosenyi bo fo dira gore maemo e be a mabe le go feta. Matla ao a ka bego a dirišetšwa go dira mediro e holago​—⁠e swanago le go ithuta bokgoni bjo holago goba modiro⁠—​a a senywa. Go e na le gore a kaonefatše boemo bja gagwe, mofsa yo a sa kwego o fo ineela bohlokong bjo oketšegilego bja mmele le maikwelo. Bafsa ba bangwe ba feleletša ka go fetša lebaka ba le kgolegong​—⁠goba ba lahlegelwa ke maphelo a bona ka bošoro. Go bjalo ka ge Kgoši Salomo a lemošitše gore: “Tšhaparego le kgobogo ke tša eo a lahlago tsholo.”​—⁠Diema 13:​18, PK.

Maikwelo a go Hloka Thušo le a go Itlhoboga

Mohlomongwe maswao ao a gobatšago kudu ao bodiidi mo gongwe bo ka a tlogelago godimo ga mofsa e ka ba maikwelo ao a sa tlogego ka pela a go ikwa a se na mohola le go inyatša. Go ba bantši, go fo ba le tekanyo e phagamego ya bodiidi dibopegong ka moka tša bophelo go fedišitše kholofelo lege e le efe ya go ka kaonefatša boemo bja bona bja go phela. The World Book Encyclopedia e bolela gore batho ba bafsa gantši “e ba bao ba bago le maikwelo a go hloka thušo le a go itlhoboga a swanago le ao batswadi ba bona ba nago le ona.” Mafelelong, “setlogo sa bodiidi” se ka agega, gomme bahlaselwa ba sona ba ineela manyaming a bophelo ka moka.

Eupja na go nwelela maikwelong ao a go hloka thušo le go itlhoboga go tla kaonefatša boemo bja gago? Aowa! Go dira bjalo go tla fo oketša modikologo o sehlogo wa bodiidi. Go bjalo ka ge seema sa bogologolo se bea taba ka gore: “E a hlokometšego phefo a ka se ke a bjala, gomme e a lebelelago maru, a ka se ke a buna.” (Mmoledi 11:​4, PK) Ge e ba molemi a lebeletše feela godimo ga dikgonagalo tše mpe​—⁠e lego phefo yeo e kago go tšea peu ya gagwe goba pula yeo e ka kolobišago dimela tša gagwe tše di bunnwego⁠—​o tla palelwa ke go tšea mogato o swanetšego. Ka mo go swanago, ka go lebelela feela godimo ga maikwelo ao a fošagetšego, o ka šitiša maiteko ka moka a go ikaonefatša.

Ka gona Kgoši Salomo o ile a tšwela pele go nea keletšo ye: “Byala peu ya xaxo e sa le bosasa, le ka mantšibua ’atla s’axo se se khutšê; xa O tsebe ye e tl’o xo mela.” (Mmoledi 11:⁠6) Ee, go e na le gore o paledišwe go dira selo se itšego ke go ba le poifo ya gore o tla palelwa goba go ba le maikwelo a gore dilo ke tšeo di sa holofetšego, gata mogato! Go na le dilo tše dintši tšeo o ka di dirago go go thuša gore ganyenyane-ganyenyane o tlatše sekgoba sa maikwelo a fošagatšego ka ao a nepagetšego.

Go Aga Boitlhompho

Ela hloko James wa nywaga e 11. O dula le mmagwe le kgaetšedi ya gagwe kampeng yeo e dulwago ka ntle le tumelelo kgaufsi le Johannesburg, Afrika Borwa. Dilong tšeo di bonagalago, ba na le mo e nyakilego e se selo. Mafelo-bekeng a mangwe le a mangwe James o ithapa ka ditirelo tša gagwe go thuša go ageng Holo ya Mmušo ya Dihlatse tša Jehofa ya lefelong la gabo. Ga se feela gore se se tšea nako yeo go sego bjalo e bego e tla feta ka go nanya e le ka diatleng, eupja se mo nea gape maikwelo a kgotsofalo ka go fihlelela se sengwe. James o bolela ka go nywanywa gore: “Ka morago ga letšatši la go aga holo, ke ikwa ke e-⁠na le maikwelo a magolo a kgotsofalo ka gare ga-ka!” Lege mofsa yo a diila, o sa dutše a e-⁠na le mehola e bohlokwa: e lego nako le matla.

Modiro o mongwe o nago le mohola ke modiro wa go ya ka ntlo le ntlo wa thuto ya Beibele. (Mateo 24:​14) Dihlatse tša Jehofa tše dintši tša bafsa di kopanela ka mehla modirong woo. Ka go dira bjalo ga se feela gore ba nea ba bangwe kholofelo ya bophelo bjo bo kaone nakong e tlago, eupja ba oketša maikwelo a bona ka noši a boitlhompho, go ikwa ba le bohlokwa le go ba le seriti. Ke therešo gore motho ga a hwetše tšhelete ka go dira modiro o bjalo. Eupja gopola molaetša wo Jesu a ilego a o nea Bakriste ba phuthego ya bogologolo ya Simirina. Ba be ba diila e le ka kgonthe dilong tše di bonagalago, eupja ka baka la go ba ga bona le boemo bjo tiilego bja moya, Jesu o be a ka re go bona: “Tlaišêxô ya xaxo ké a e tseba, le bodiitšana bya xaxo. Fêla, O mohumi.” Mafelelong, ka baka la go bontšha ga bona tumelo ka mafolofolo mading a Jesu ao a tšholotšwego, e be e tla ba bao ba humilego ka mo go phagamego kudu, ba amogela mphapahlogo wa bophelo bjo bo sa felego.​—⁠Kutollo 2:⁠9, 10.

Go gola o diila ga go bonolo. Lega go le bjalo, ga go na lebaka la gore o ikwe o e-⁠na le dihlong, o hloka thušo o itlhobogile ge e le ka boemo bja gago. Bodiidi bo gona ka gobane ‘motho a buša motho gore a mo senye.’ (Mmoledi 8:⁠9) Bohlatse bo bontšha gore Modimo kgaufsinyana o tla tšea taolo ya ditaba tša lefase gomme a fediša bodiidi le mafelelo a bjona ao a senyago. (Psalme 37:​9-11) Morwa wa gagwe, Jesu Kriste, o tla lebiša dimilione tše dikete tša batho Paradeiseng ya mo lefaseng, bjalo ka ge a ile a holofetša modiradibe yo a bego a feletšwe ke kholofelo yo a ilego a bontšha tumelo go yena nakong ya ge ba be ba e-⁠hwa dikoteng tša tlhokofatšo. (Luka 23:​43) Lega go le bjalo, mo nakong ye go na le mo gontši mo o ka go dirago ka tsela e holago gore o kgone go lebeletšana le bodiidi. Se se tla ahla-ahlwa tokollong e latelago.

“Ke Ile ka Ikwa ke Kgakgetšwe Bodiiding”

George e be e le mofsa wa mo-Afrika yo a bego a nyaka e le ka kgonthe go dula sekolong gomme a fetše thuto ya gagwe ya motheo. O be a nagana gore ka go dira bjalo o be a ka kgona go hwetša mošomo o lefelelago gabotse wo o bego o tla ntšha yena gotee le lapa la gabo bodiiding. Lega go le bjalo, dilo ga se tša sepela ka tsela yeo. Lapa la gabo le ile la wela mathateng ao a boifišago a tša ditšhelete mo e lego gore ka morago ga nywaga e tshelelago feela ya go tsena sekolo, George o ile a ikwa a gapeletšega go tlogela sekolo le go yo nyaka mošomo. Mafelelong o ile a hwetša mošomo wa go paka dimela ka mapokising lefelong la go lokela dimela ka mapotlelong, a gola diranta tše 14 feela ka beke. Moputso wa gagwe ka moka o be o dirišetšwa go boloka lapa la gabo le le boemong bjo bobotse.

George o re, “Gaešita lege ke be ke ikwa ke tateditšwe ke bodiidi, ke ile ka lemoga gore go tsenela sehlopha sa disenyi goba go utswa bakeng sa go iphediša go be go ka se ke gwa thuša le gatee. Lehono, ba bantši go tšwa sehlopheng sa dithaka tša-ka bao ba dirilego dilo tšeo ke maarogi ao a se nago kholofelo setšhabeng, makgoba a bjala le dihlare-tagi goba ba kgolegong. Ba bangwe ba ile ba ba ba bolawa ka baka la mokgwa wa bona wa go phela.”

Ka morago George o ile a kopana le Dihlatse tša Jehofa. George o re, “Se sengwe sa dilo tša pele tšeo ke ilego ka di lemoga e be e le gore dibokeng tša Bokriste, motho o mongwe le o mongwe o be a e-⁠tla go nna le go bolela le nna ka tsela ya tlhompho.” O oketša ka gore: “Ke ile ka thoma go ikwa ganyenyane-ganyenyane ke e-⁠ba le kholofelo le boitlhompho tšeo pele ke bego ke se na tšona.” George gape o ile a hwetša khomotšo e kgolo ditemaneng tša Beibele tše swanago le Psalme 72:​12, 13, yeo e rego: “Xobane ó [Kgoši ya Mesia] tlo hlakodiša modiitšana xe a lla, . . . Ó tlo xauxêla [“mmotlana,” NW] le mohloki; meôya ya bahumanexi ó tlo e phološa.” Dikholofetšo tša Beibele di ile tša mo tlatša ka kgahlego e mpshafaditšwego le go ba le kholofelo bophelong.

Ge o lebelela George lehono, o ka se ke wa akanya le gatee kamoo a ilego a katana ka gona gore a fetole maikwelo a gagwe a go hloka thušo le a go itlhoboga go ba pono e nepagetšego. E le monna yo a thabilego yo a nyetšego, mo nakong ye o dira bjalo ka molebeledi yo a okamelago phuthegong ya Dihlatse tša Jehofa kua Soweto, Afrika Borwa.

[Pictures on page 19]

Go dirišetša nako ya gago le matla go dira selo se sengwe seo se holago go kaone kudu go e na le go ineela maikwelong a go itlhoboga