Morero wa Kgonthe wa Bophelo

AKANYA o etetše lefelong leo mogwera wa gago a šomelago go lona. O sa tšwa go fetša go dira selo se itšego, gomme se a go kgahliša. Selo seo se dirilwe gabotse gomme se bopilwe ka tsela e kgahlišago. Eupja gaešita lege o leka ka matla, ga o kgone go kwešiša morero wa sona. O tla nyakišiša bjang ka sona? Ee, o fo botšiša mogwera wa gago, gomme go bonala a tla thabela go go botša.

Ka gona re ka kwešiša bjang morero wa bophelo? Ee, ke ka baka la’ng re sa botšiše Modimo, “mothôpô wa bophelô”? (Psalme 36:⁠9) O ka dira seo bjang? Ka mo go thabišago, o boletše le rena ka Beibele. O dirile gore batho bao ba nago le tumelo ba ngwale dikgopolo tša gagwe ka tsela yeo re tlago go e kwešiša. Ge e le gabotse, morero wa bophelo o ka hlaloswa ka mantšu a sego kae feela: Re mo bakeng sa go ithuta ka Modimo le go dira thato ya gagwe. Beibele e re: “A re kweng phêthêxô ya ditaba tšohle: Boifa Modimo, o lôtê taêlô tša xaxwe. Ké se se swanetšexo batho bohle.”​—⁠Mmoledi 12:⁠13.

Na seo se kwala e le se bonolo kudu? Ruri ga se bonolo. Go ba ga rena mo bakeng sa go ithuta ka Modimo le go dira thato ya gagwe go na le bohlokwa bjo bo makatšago le bjo bogolo.

Morero wa Modimo wa Mathomong

Go ithuta seo Modimo a bego a se rerile mathomong ka batho go tla go thuša go kwešiša kaone morero wa bophelo. Gape go tla hlalosa lebaka leo ka lona tše dingwe tša dilo tšeo di boletšwego sehlogong se se fetilego di tlišago tekanyo e itšego ya bohlokwa le morero maphelong a ba bantši lehono.

Pego ya Beibele ya go bopja ga motho e re: “Byale Modimo a re: A re direng motho ka xo swanthšha ka rena, a swanê le rena.” (Genesi 1:​26) Ka gona, batho ba bopilwe ba e-⁠na le kgonagalo ya go swana le Modimo, ba e-⁠na le dika tše kgolo tšeo a nago le tšona, go akaretša bohlale, matla, go loka le lerato. Ka gona, na ke mo go makatšago gore ba bangwe ba kgotsofatšwa ke go tsoma tsebo e mpsha goba go nwelela medirong yeo e hlohlago matla a bona a monagano goba a mmele? Na ke mo go sa letelwago gore go thuša ba bangwe go nee morero o kgotsofatšago maphelong a ba bantši? Le gatee. Ka boripana, se ke sona seo re bopetšwego go se dira.

Pego ya Beibele e tšwela pele ka go bolela gore batho ba ile ba abelwa go hlokomela diphedi tše dingwe ka moka lefaseng​—⁠“dihlapi tša lewatlê le ’nonyana tša xodimo, . . . le dixaxabi ka moka tše di xaxabaxo lefaseng.” (Genesi 1:​26) Ka gona, ga go makatše ge le lehono ba bantši ba hwetša kgotsofalo ka go dula le diphoofolo le go bapala le tšona. Ba bangwe ba ikwa ba e-⁠na le boikarabelo diphoofolong go fihla bokgoleng bja go katanela go šireletša mehuta yeo e lego kotsing ya go fedišwa, goba ba tšwa lesolo la go lwantšha go lebanya diphoofolo le tlaišego e sa nyakegego.

Gape batho ba ile ba laelwa gore ba ‘fenye lefase.’ (Genesi 1:​28) Se se be se bolela’ng? Ruri ga se gore batho ba swanetše go diriša lefase ka boithati le ka go hloka boikarabelo go fihlela ge mahumo a lona a feditšwe, tikologo ya lona e šilafaditšwe gomme mafelo a lona a mawatle le a naga a šilafaditšwe ka ditlakala. Go e na le moo, Modimo o beile mohlala wa go fenya lefase ge a be a “dira thšemo ya Edene thokô ya Bohlabêla, ’me motho yo a mmopilexo a mmea xôna-moo.” (Genesi 2:⁠8) Tšhemo ye ya Edene e be e le mohlala wa go bontšha seo lefase le tlago go ba sona. E bonagaditše morero wa Modimo ka polanete ya rena.

Pego ya Beibele e hlalosa gore: “Modimo a . . . šexofatša [monna wa pele le mosadi], a bolêla le bôná a re: Tswalang Le atê, tlalang lefase, Le le fenyê.” (Genesi 1:​28) Modimo o be a nyaka gore batho ba be le bana gomme ba age lefaseng. O ile a kopanya monna wa pele le mosadi, ge e le gabotse a dira lenyalo la mathomo. (Genesi 2:​22-24) Ga go makatše ge lenyalo le lapa di oketša bohlokwa le morero maphelong a ba bantši gakaakaa!

Seo Bophelo bo ka Bego bo Bile Sona

Ge re dutše re ithuta Beibele, go molaleng gore Modimo o be a rerile gore lapa la Adama le gole le gore yena le bana ba gagwe ba katološe mellwane ya tšhemo ya Edene go fihla batho ba tlala lefase ka moka. Lefase leo le fentšwego e be e tla ba paradeise. Ee, motho o be a tla diriša mahumo a lefase bakeng sa go ikhola. Eupja se se be se tla dirwa ka tsela e nago le boikarabelo. Motho e be e swanetše go ba mohlokomedi wa lefase, e sego mosenyi wa lona. Tshenyego ya lefase yeo re e bonago lehono e lwantšhana le thato ya Modimo, gomme bao ba bago le karolo go yona ba dira se se fapanego le morero wa bophelo.​—⁠Kutollo 11:⁠18.

Re ithuta selo se sengwe gape pegong ya pele ya Beibele, e lego gore e be e se morero wa Modimo gore batho ba hwe. Batswadi ba rena ba pele ba hwile feela ka gobane ba ile ba se kwe Modimo. (Genesi 2:​16, 17) Ge ba be ba sa kwe, ba be ba se sa hlwa ba phetha morero wa bophelo​—⁠ba be ba se sa hlwa ba dira thato ya Modimo. Ka gona ga se feela gore ba ile ba hwa eupja bana ba bona ka moka le bona ba ile ba ba tlase ga lehu ka baka la go abela go se phethagale go bona. (Ba-Roma 5:​12) Lega go le bjalo, mathomong batho ba be ba reretšwe go phela ka mo go sa felego, e sego gore ba hwe. Go bonala se e le lebaka leo ka lona ba bantši ba hwetšago go nagana ka go khutsufatšwa ga modiro wa bona wa bophelo ka lehu e le mo go ferekanyago.

Go Phetha Morero wa Modimo

Morero wa Modimo wa mathomo bakeng sa batho le lefase le ga se wa fetoga. O sa dutše a rera go dira lefase la paradeise leo le nago le moloko o phethagetšego wa batho. Eupja, o ile a swanelwa ke go dira dithulaganyo tša go fenya mafelelo a nyamišago a go palelwa ga batswadi ba rena ba pele. Go dira thato ya Modimo lehono go akaretša go dira ka go dumelelana le dithulaganyo tše tša Modimo. Ka mo go thabišago, Beibele e nea tlhaloso ya go phethagala mo go tšwelago pele ga morero wa gagwe.

Re bala pukung ya pele ya Beibele gore Modimo o ile a bolela ka “peu” yeo e bego e tla tla e tloša kgobalo ka moka yeo e bakilwego ke go palelwa ga Adama le Efa ke go dira thato ya Gagwe. (Genesi 3:​15) Mangwalong a Bakriste a Segerika (“Testamente e Mpsha”), re bala ka go tšwelela ga Jesu Kriste e le “peu” yeo, ka bophelo bja gagwe bjo bo se nago sebe le ka lehu la gagwe diatleng tša manaba a gagwe. Ge e le gabotse, lehu la Jesu e be e le sehlabelo bakeng sa rena, le re bulela tsela ya go hwetša gape bophelo bjo bo sa felego bjo bo lahlegetšego Adama le Efa. (Ba-Hebere 7:​26; 9:​28) Ee, Beibele e re: “Mang le mang e a mo dumetšexo [a ka] se kê a lahlêxa, [o tla ba] le bophelô byo bo sa felexo.”​—⁠Johane 3:⁠16.

Go na le mo gontši. Ka morago ga lehu la gagwe, Jesu o ile a tsošwa e le sebopiwa se se sa hwego sa moya gomme mo nakong ye o buša e le Kgoši ya Mmušo wa Modimo wa legodimong. Go se go ye kae Mmušo woo o tla gata mogato wa go bea legatong la mebušo ya gona bjale ya lefase lekoko la lefase le lefsa leo le tlago go tšea taolo ya ditaba tša batho. Boporofeta bja Beibele bo holofetša gore: “Mmušô . . . wo o ka se [ke] wa selêla xo sethšaba se sengwê. O tlo phšatla mebušô e mengwê ka moka wa e fediša; xe e le wôna, o tlo êma xo ya xo ile.”​—⁠Daniele 2:⁠44.

Ka morago ga moo, Mmušo wo o tla hlokomela modiro o thabišago wa go tsošološa Paradeise lefaseng gomme wa phagamišetša batho phethegong. Beibele e bile e bolela ka tsogo ya bahu, e le gore le bona ba ka ba le sebaka sa go ba le karolo go phethagatšeng morero o mogolo wa Modimo bakeng sa batho. (Ditiro 24:​15) Ka gona kholofetšo ye e botse e tla phethagatšwa: “Ba bolêta e tlo ba bôná beng ba naxa; ba tlo thaba ka botlalô bya moláô. Baloki e ba beng ba naxa, ba dula mo xo yôna ka mehla le ka mehla.”​—⁠Psalme 37:​11, 29.

Go Holega ka Noši

Gore re holwe ka noši ke go phethagala ga morero o mogolo wa Modimo ka lefase, sa pele re swanetše go tseba Modimo. Jesu Kriste o itše: “Bophelô byo bo sa felexo ké xe ba Xo tseba, Wene Modimo-dimo Ò le nnoši. Ba tsebê le Moromiwa wa xaxo Jesu Kriste.” (Johane 17:⁠3) Re ka dira seo bjang? Re ithuta dilo tše itšego ka Modimo ka go lebelela lefase leo le re dikologilego, tlholo, go akaretša magodimo ao a tletšego dinaledi. (Psalme 19:⁠1) Lega go le bjalo, re ithuta kudu-kudu ka Modimo​—⁠gotee le ka Morwa wa gagwe, Jesu Kriste⁠—​ka Beibele. Re ithuta leina la gagwe le dika tša gagwe gomme re utolla ditaba ka botlalo tša seo Modimo a se diretšego batho. Tsebo e bjalo e re dira gore re mo rate gomme e re gogela kgaufsi kudu le yena le Morwa wa gagwe.

Go tseba Modimo go re dira gore re nyake go dira thato ya gagwe. Mohlomongwe re ile ra rapela bjalo ka ge Jesu a laetše gore: “Mmušô wa xaxo a o tlê; thatô ya xaxo a e dirwê mono lefaseng byalo ka xe e dirwa lexodimong.” (Mateo 6:​10) Morero wa kgonthe wa bophelo​—⁠wo o tlišago kgotsofalo ya kgonthe⁠—​ke go phela maphelo a rena ka go dumelelana le thato yeo ya Modimo.

Ka gona, ke’ng seo se akaretšwago go direng thato ya Modimo? Bakeng sa Adama le Efa, go be go akaretša go hlokomela legoro la diphoofolo le go fenya lefase gotee le go le tlatša ka bana bao ba phethagetšego. Ge e ba re tla dira thato ya Modimo lehono, re swanetše go ithuta le go dumela sehlabelong sa Jesu sa topollo. Le gona re swanetše go latela mohlala wa Jesu ka go botša ba bangwe ka ‘ditaba tše di lokilego tša mmušo wa Modimo.’​—⁠Mateo 24:⁠14, NW.

Gape go dira thato ya Modimo go akaretša go hlagolela semelo sa go boifa Modimo. Ka gona re lemoga dilo tšeo Modimo a di hloilego​—⁠tše bjalo ka go bolela maaka, bohodu, lesebo le le gobatšago, pefelo yeo e sa laolegego⁠—​gomme ra di furalela. Gape re ithuta dika tšeo Modimo a di ratago​—⁠bjalo ka lerato, lethabo, khutšo, botho le go loka⁠—​gomme re di hlagolela ka thušo ya moya wa Modimo o mokgethwa. (Ba-Galatia 5:​19-24) Ge e ba re tla hwetša bophelo bjo bo sa felego, re swanetše go ba mohuta wa batho bao Modimo a tlago go rata go ba le bona ka mo go sa felego. Ee, go ithuta ka Modimo le go dira thato ya gagwe go nea maphelo a rena morero le tlhaloso go feta kamoo selo lege e le sefe se sengwe se ka dirago ka gona!

Phapano Yeo go e Dirago

Maphelo a batho ba dimilione go dikologa lefase a hlatsela gore go hwetša morero wa kgonthe wa bophelo ruri go dira phapano. Ela hloko mohlala wa Wayne yo a ilego a nyamišwa kudu ke lehu la mosadi wa gagwe wa pele. Moruti wa lefelong la gabo o be a sa kgone go mo homotša, ka gona Wayne o ile a swarega kudu ka modiro wa boithapi. O ile a šoma e le molaodi wa Madira a Amerika e bile a le mafolofolo dihlopheng tša dipolitiki. Ka morago o ile a nyala gape, eupja lenyalo le be le e-⁠na le mathata. Yena le mosadi wa gagwe ba be ba se na thulaganyo maphelong a bona.

Lega go le bjalo, ka letšatši le lengwe Wayne o ile a topa Beibele gomme a thoma go bala. O ile a e fetša ka dikgwedi tše tharo, gomme o re: “Bjale ke be ke tseba gore go be go e-⁠na le morero wa go ba ga rena mo le kholofelo ya bophelo ka morago ga lehu.” O ile a botša mosadi wa gagwe gore: “Re swanetše go hwetša batho bao re ka kopanelago le bona bao ba kgomarelago Beibele.” Go se go ye kae ba ile ba kopana le Dihlatse tša Jehofa gomme dipoledišano tša tšona le bona di ile tša godiša kganyogo ya bona ya go dira thato ya Modimo. Bobedi Wayne le mosadi wa gagwe ba ile ba neela maphelo a bona go Modimo, gomme bophelo bja lapa la bona bja holega kudu.

Susan, e lego morwedi wa baromiwa ba Presbyterian o be a rata go dira selo se sengwe ka bophelo bja gagwe seo se bego se tla thuša lefase e le ka kgonthe. Polelo e lego mabapi le dikotsi tša matla a nuclear e ile ya mo kgodiša gore se e be e le sa bohlokwa bjo bogolo. Ka gona o ile a tloga kholetšeng e le gore a diriše nako ya gagwe ka moka a ruta batho ka bothata bjo. Ge a e-⁠na le nywaga e 21, o ile a dira e le molomaganyi wa seboka se segolo sa go lwantšha nuclear. Ka morago o ile a etelwa ke Dihlatse tša Jehofa gomme a bontšhwa seo Beibele e se bolelago, gomme ge nako e dutše e e-⁠ya a hwetša morero wa kgonthe wa bophelo. Mola ka ntle le pelaelo a be a sa dutše a tshwenyegile ka go fediša ga batho lefase, o ile a lemoga gore Modimo o tla rarolla mathata a ka Mmušo wa gagwe. Ka gona, o thuša batho go ba le tumelo go seo.

Marielle o ile a dira gore go thabela dilo tšeo lefase le di neago e be morero bophelong bja gagwe. O ile a phegelela modiro wa bophelo ka moka. O ile a thabela dilo ka moka ‘tšeo di lego gona’ Los Angeles, California, U.S.A., go akaretša meletlo le dihlare-tagi. Eupja ge a be a thoma o ithuta Beibele, a tseba le go hlankela Modimo, a bona kamoo dilo tšeo e bego e le tša lefeela ka gona. O bolela gore bophelo bja gagwe bo humile kudu mo nakong ye ka gobane bo dumelelana le merero ya Modimo.

Palo ya bao maphelo a bona a humišitšwego ke go ithuta morero wa kgonthe wa bophelo e oketšega ka makgolo letšatšing le lengwe le le lengwe. Go phela ka go dumelelana le morero woo wa kgonthe wa bophelo ka go dira thato ya Tatago rena yo lerato wa legodimong ruri go dira phapano. Ke selo seo se ka fetošago bophelo bja gago ka moka ya ba bjo bokaone. Re go laletša gore o itlhahlobele taba ye ka bowena. Bophelo bja gago e tla ba bjo bo kgotsofatšago kudu ge e ba o e hlahloba.

[Seswantšho go letlakala 9]

Monei wa bophelo o be a e-⁠na le morero ge a bopa batho

[Seswantšho go letlakala 10]

Modimo ga se a lahla morero wa gagwe wa go dira lefase la paradeise leo le tletšego moloko o phethagetšego wa batho