Karolo 5
Bophelo bo na le Morero o Kgahlišago
1, 2. Re ka bona bjang gore Modimo o na le taba le rena, gomme re swanetše go retologela kae bakeng sa dikarabo mabapi le dipotšišo tša bophelo?
1 Tsela yeo lefase le diphedi tšeo di lego go lona di dirilwego ka yona e bontšha gore Mmopi wa tšona ke Modimo wa lerato le yoo a hlokomelago e le ka kgonthe. Lentšu la gagwe, Beibele, le bontšha gore o a hlokomela; le re nea dikarabo tše botse kudu tše di ka hwetšagalago mabapi le dipotšišo tše: Ke ka baka la’ng re le mo lefaseng? le gore, Re ya kae?
2 Re swanetše go nyakišiša ka Beibeleng gore re hwetše dikarabo tšeo. Lentšu la Modimo le re: “Xe Le mo tsoma, Le tlo mmôna. Xe Le ka mo tloxêla, Le Yêna ó tlo Le tloxêla.” (2 Koronika 15:2) Ka gona-ge, go nyakišiša Lentšung la Modimo go utolla’ng mabapi le morero wa gagwe ka rena?
Lebaka Leo ka Lona Modimo a Bopilego Batho
3. Ke ka baka la’ng Modimo a ile a bopa lefase?
3 Beibele e bontšha gore Modimo o lokišeditše lefase kudu-kudu a nagana ka batho. Jesaya 45:18 mabapi le lefase e bolela gore Modimo “a se le bope ya ba la lefêla, [eupja] a le dirêla xo dulwa ke batho.” O lokišeditše gore lefase le be le selo se sengwe le sengwe se batho ba bego ba tla se nyaka, e sego feela go ba gona, eupja le go thabela bophelo lefaseng ka mo go tletšego.—Genesi, dikgaolo 1 le 2.
4. Ke ka baka la’ng Modimo a ile a bopa batho ba pele?
4 Ka Lentšu la gagwe, Modimo o bolela ka go bopa ga gagwe batho ba pele, e lego Adama le Efa, e bile o utolla seo a bego a se naganne ka lapa la batho. O itše: “A re direng motho ka xo swanthša ka rena, a swanê le rena; a bušê dihlapi tša lewatlê le ’nonyana tša xodimo, le diruiwa, le lefase ka moka, le dixaxabi ka moka tše di xaxabaxo lefaseng.” (Genesi 1:26) Batho ba be ba tla hlokomela ‘lefase ka moka’ le dibopiwa tšeo di lego go lona tšeo e lego diphoofolo.
5. Batho ba pele ba ile ba bewa kae?
5 Modimo o ile a dira tšhemo e kgolo, e swanago le phaka lefelong leo le bitšwago Edene leo le bego le le Bohlabela bja Magareng. Ke moka “a tšea motho a mmea thšemong ya Edene xore a e lemê, a e dišê.” E be e le paradeise e nago le tšohle tše batho ba pele ba bego ba tla nyaka go di ja. E be e akaretša le “dihlare tšohle tše di kxahlišaxo xe di bônwa, tše bose xe di lewa,” gotee le dimela tše dingwe le mehuta e mentši ya diphoofolo.—Genesi 2:7-9, 15.
6. Ke dika dife tša monagano le tša mmele tšeo batho ba bopilwego ba e-na le tšona?
6 Mebele ya batho e be e bopilwe e phethagetše, ka gona ba be ba ka se babje, ba tšofala le go hwa. Le gona ba be ba neilwe dika tše dingwe tše bjalo ka tokologo ya go ikgethela. Tsela yeo ba bego ba dirilwe ka yona e hlaloswa go Genesi 1:27: “Ké mo Modimo a bopilexo motho, a mmopa ka xo ithswanthša, a mmopa ka xo swanthša ka Yêna Modimo; a ba bopa monna le mosadi.” Ka ge re bopilwe ka seswantšho sa Modimo, ga se ra newa feela dika tša mmele le tša monagano, eupja re neilwe le dibopego tša boitshwaro le tša moya, gomme tšona di swanetše go kgotsofatšwa ge e ba re tla ba bao ba thabilego e le ka kgonthe. Modimo o be a tla nea ditsela tša go kgotsofatša dinyakwa tšeo gotee le go nyaka dijo, meetse le moya. Bjalo ka ge Jesu Kriste a boletše, “motho xa a phele ka boxôbê fêla; ó phela ka mantšu ohle a a tšwaxo molomong wa Modimo.”—Mateo 4:4.
7. Ke taelo efe yeo batho ba babedi ba pele ba e neilwego?
7 Go feta moo, Modimo o neile batho ba pele ba babedi taelo e kgahlišago mola ba le kua Edene: “Tswalang Le atê, tlalang lefase.” (Genesi 1:28) Ka gona, ba be ba tla kgona go ikoketša gomme ba belega bana bao ba phethagetšego. Gape, ge palo ya batho e be e dutše e oketšega, ba be ba tla ba le modiro o kgahlišago wa go katološa mellwane ya lefelo la pele la paradeise la go swana le phaka, la Edene. Mafelelong, lefase ka moka le be le tla fetoga paradeise yeo e dulwago ke batho ba phethagetšego bao ba thabilego bao ba bego ba ka phela ka mo go sa felego. Beibele e re tsebiša gore ka morago ga ge a thomile dilo tše ka moka, “Ya re xe Modimo a lebêlêla tšohle tše a di dirilexo, a bôna e le tše botse kudu.”—Genesi 1:31; bona gape le Psalme 118:17.
8. Batho ba be ba tla hlokomela lefase bjang?
8 Go molaleng gore batho ba be ba tla diriša lefase leo le fentšwego bakeng sa go ikhola. Eupja se se be se tla dirwa ka tsela ya go bontšha boikarabelo. Batho e be e tla ba bahlokomedi bao ba nago le tlhompho ba lefase, e sego basenyi ba lona. Go senywa ga lefase mo re go bonago lehono go thulana le thato ya Modimo, gomme bao ba tsenyago letsogo ba thulana le morero wa bophelo mo lefaseng. Ba tla swanelwa ke go otlwa ka baka la seo, ka gobane Beibele e bolela gore Modimo o tla “senya basenya-lefase.”—Kutollo 11:18.
E sa Dutše e le Morero wa Modimo
9. Ke ka baka la’ng re kgodišega gore morero wa Modimo o tla phethagala?
9 Ka gona, go tloga mathomong e be e le morero wa Modimo bakeng sa lapa le le phethagetšego la batho gore le dule lefaseng ka mo go sa felego paradeiseng. Le gona e sa dutše e le morero wa gagwe! Morero woo o tla phethagala e le ka kgonthe. Beibele e re: “Morêna wa mašaba ó enne a re: Xe xo sa direxe tše ke di xopotšexo xe xo sa tšwêlêle tše ke di rerilexo, e tlo ba è se Nna!” “Ke boletše; ke tlo di tliša. Ke rerile; ke tlo dira.”—Jesaya 14:24; 46:11.
10, 11. Jesu, Petro le mopsalme Dafida ba ile ba bolela bjang ka Paradeise?
10 Jesu Kriste o ile a bolela ka morero wa Modimo wa go tsošološa paradeise mo lefaseng ge a be a botša motho yo mongwe yo a bego a nyaka kholofelo bakeng sa bokamoso gore: “O tlo ba le Nna le Paradiseng.” (Luka 23:43) Moapostola Petro le yena o boletše ka go tla ga lefase le lefsa ge a be a bolela e sa le pele gore: “Se re se letetšexo ka xo kwa dikholofedišô [tša Modimo] ké maxodimo a mafsa [thulaganyo e mpsha ya mmušo yeo e bušago e le legodimong] le lefase le lefsa [lekoko le lefsa la lefaseng], moo xo axilexo tokô.”—2 Petro 3:13.
11 Mopsalme Dafida le yena o ngwadile ka go tla ga lefase le lefsa le gore le tla ba gona nako e kaaka’ng. O boletše e sa pele gore: “Baloki e [tlo] ba beng ba naxa, ba dula mo xo yôna ka mehla le ka mehla.” (Psalme 37:29) Ke ka baka leo Jesu a ilego a holofetša gore: “Ba lehlôxônôlô ké ba bolêta, xobane bôná-bao ba tlo tšea lefase ya ba kabêlô bôná.”—Mateo 5:5.
12, 13. Akaretša morero o kgahlišago wa Modimo bakeng sa batho.
12 A tebelelo e kgahlišago gakaakang, go phela ka mo go sa felego lefaseng la paradeise leo se nago mehuta ka moka ya bobe, bosenyi, bolwetši, manyami le bohloko! Ka pukung ya mafelelo ya Beibele, Lentšu la Modimo la boporofeta le akaretša morero wo o kgahlišago ka gore: “Modimo ó tlo phomola mexôkxô ka moka mahlong a bôná; le lehu le ka se hlwê le e-ba xôna; le xe e le manyami le dillô le bohloko, di ka se hlwê di e-ba xôna; xobane tša pele di fetile.” E oketša ka gore: “E a dutšexo sedulong sa boxoši a re: Šidio; dilô tšohle ke di dira tše mphsa.—Nna a ntaêla a re: Ngwala, xobane ’taba tšé ké tša xo rereša le xo bôtêxa.”—Kutollo 21:4, 5.
13 Ee, Modimo o nagana ka morero o kgahlišago. E tla ba lefase le lefsa la toko, e lego paradeise ya ka mo go sa felego, yeo e boletšwego e sa le pele ke Yoo a ka kgonago, a bilego a tla kgona go dira seo a se holofetšago, ka gobane ‘ditaba tša gagwe e le tša go rereša le go botega.’
[Seswantšho go letlakala 20, 21]
Modimo o rerile gore batho ba phele ka mo go sa felego lefaseng la paradeise. Woo e sa dutše e le morero wa gagwe
[Seswantšho go letlakala 22]
Mong wa ntlo a ka nyaka gore ba bahirišwa bao ba senyago ntlo ya gagwe ba ikarabelele