Na ke Swanetše go Hudugela Nageng Yeo e Atlegilego Kutšwanyana?

TARA o tlogile nageng ya gabo ya Trinidad, Sheila a tloga Jamaica gomme Erick o tloga Suriname. Bafsa ba ba bararo ka moka ga bona ba hudugetše setšhabeng seo se humilego kudu. Ka baka la’ng?

Tara o hlalosa gore, “Rena bafsa ba Trinidad re tutuetšwa kudu ke seo re se bonago dimakasineng le thelebišeneng. Ka manyami, se se re dira gore re be le pono ya bofora ka United States le dinaga tše dingwe tšeo di humilego.”

Taba ya Sheila le yona e bjalo: “Ke sa gopola ke botšwa ka dibaka tše dikgolo tše di lego gona tša go hwetša mešomo le thuto yeo e sa lefelelwego.” Lega go le bjalo, o okeditše ka gore: “Ga ke tsebe lebaka, fela bao ba kilego ba ya dinageng tše ga ba hlalose ditaba ka botlalo mabapi le dinaga tše. Mohlomongwe ba llwe ke dihlong tša go dumela gore maemo dinageng tšeo ga a kgahliše go ya kamoo ba bego ba nagana ka gona.”

Lega go le bjalo, batho ba a huduga. Pego yeo e lego ka go Los Angeles Times e bontšhitše gore go tloga ka 1980 go fihla ka 1990, palo ya batho bao ba hudugelago dinageng tše dingwe e ikoketša gabedi gomme go letetšwe gore e oketšege gabedi gape ka ngwaga wa 2000. Ngwaga le ngwaga batho ba fetago 700 000 ba hudugela United States. Australia, Canada, Côte d’Ivoire le Saudi Arabia, e nngwe le e nngwe e hwetša batho ba fetago 50 000 bao ba hudugela go yona ngwaga le ngwaga, bao ba bantši ba bona ba tsomago bophelo bjo bo humilego.

Ge e ba o phela setšhabeng seo se diilago goba seo se hlabologago, le wena o ka ipotšiša ge e ba bokamoso bja gago e tla ba bjo bo tagilego nageng yeo e humilego kutšwanyana. Ye ke phetho ya boima. O ka kgetha bjang ka bohlale?

O se ke wa Phakišetša go Dira Phetho ya Gago

Erick yo a tšwago Suriname, o nagana gore le ka mohla o se ke wa dira ka lephakuphaku, eupja o swanetše gore pele o hwetše tshedimošo e ntši ka mo o ka kgonago ka gona ka naga yeo. O re, “Le gona kua Suriname, go na le malapa a mantši ao a nago le meloko yeo e dulago dinageng tše di humilego gomme o ka kgona go hwetša tshedimošo yeo e lego nakong le go tseba therešo mabapi le maemo a tša boiphedišo a lefase.”

Pele ga ge o dira phetho, gopola se: “Maanô a padile, xe xò se keletšanô; a tlo kxônêxa xe baeletši ba ka ata.” (Diema 15:​22) Ka gona botša batswadi ba gago, bagolo ba Bakriste le ba bangwe bao ba nago le phihlelo le bao ba go ratago ka go ba ntšhetša seo se lego mafahleng.

O se ke wa Dumela se Sengwe le se Sengwe Seo o se Botšwago

Ge o e-⁠kwa dipego tše di beago pelo mabapi le dinaga tša kgole tše di humilego, go tla nyakega gore o be le go belaela ka mo go kwalago. Seema se se bohlale se re, “Lešilo le dumêla ’taba tšohle; mohlale ó hlatha dikxatô.”​—⁠Diema 14:⁠15.

Sheila, yo a bego a dula Jamaica o itše: “Morutiši wa-ka wa Seisemane o ile a mphegelela gore ge nka hudugela United States ke tla be ke dirile selo se sekaone-kaone. Batho ba bangwe ba bagolo ba ile ba mpotša gore ge nka ya Canada, United States goba Engelane, ke be ke tla ba ke ithušitše go sa šetšwe mošomo woo ke bego ke o kgethile. Ka boripana, ke be ke tla ba ke dirile bošilo ge nka gana sebaka se se bjalo.”

Na go hudugela ga gagwe United States ruri go ile gwa mo thuša? “Bophelo bja-ka bo ile bja kaonefala ka ditsela tše dintši kudu, eupja bagwera ba-ka bao ba bego ba šetše ba kua Jamaica le bona ba be ba kaonefaditše maphelo a bona. Gantši motho o bapatša bothata bjo bongwe ka bjo bongwe. Moo o dulago gona go ka se ke gwa dira phapano e kgolo ka go itiragalela feela.”

Tara, yo a hudugetšego United States a e-⁠tšwa Trinidad, o a dumela: “Batho ba boletše dinaga tše di humilego e le dinaga tšeo di neago sebaka​—⁠sa go ithuta, sa mošomo, sa go ba le tšhelete e ntši le go phela ka tlase ga maemo a kaone. Eupja mo nakong ye ba bantši bao ba hudugilego ba lemoga gore maemo a thomile go mpefala gohle. Ba bangwe ba boetše gae.”

Naganišiša ka Mehola le Dikotsi

Gore o tle o dire phetho yeo e leka-lekanego, naganišiša e sego feela ka dipego tše beago pelwana-tšhwaana tša lehumo le legolo dinageng tše dingwe. Naganišiša ka mehola le dikotsi tšeo go huduga go ka di akaretšago​—⁠ka tša boiphedišo, tša leago, boitshwaro le tša moya.

Ka mohlala, maemo a tša boiphedišo e ka ba e le a mabe ga geno. Eupja na ga go na dibaka tša mošomo kgaufsi le ga geno? Tara o re, “Kua nageng ya gešo go be go e-⁠na le tlhokego ya mešomo e phagamego, kudu-kudu go bao ba bego ba se na thuto e phagamego.” Ka baka leo o ile a huduga; dikgaetšedi tša gagwe di ile tša šala. “Dikgaetšedi tša-ka tše pedi tše nyenyane di ile tša tsenela modiro wa go betla phahlo le go apeša ditulo. Gona bjale ba šoma difeketoring gomme ba hwetša mešomo e mentši yeo ba hirwago ke batho bao ba ratago modiro wa bona. Go bonala ba phela gakaone kua gae go feta kamoo nna ke phelago ka gona mo ‘nageng ye go thwego e na le dibaka tše dintši.’”

Ge e ba o huduga, o tla ba le kgakanego e itšego bophelong bja gago nageng e šele, mohlomongwe gaešita le go tsena bothateng mabapi le melao ya motheo ya boitshwaro yeo o e tšeago e le ya bohlokwa kudu. Na go huduga moo go swanelwa ke go lekela hlogong gakaalo? Gape, go rata dilo tše di bonagalago go iphile matla dinageng tšeo di humilego. Na seo se ka go kgoma bjang moyeng?

Go Ithuta ka Diphošo tša Esau

Ge go tliwa tabeng ya go naganišiša ka mehola le dikotsi tša go dira diphetho, Esau wa mehleng ya Beibele o bile le bothata bjo bogolo. O ile a palelwa gantši ke go naganišiša ka mabaka a bohlokwa​—⁠e lego boemo bja moya bja gagwe le lapa la gabo. Ka baka leo, tše dingwe tša diphetho tše dikgolo tšeo a bego a di dira di ile tša feleletša ka masetlapelo.

Beibele e lemoša ka “motho le ge e le mang yo a sa lebogego dilo tše kgethwa, go swana le Esau, yo a ilego a rekiša ditshwanelo tša gagwe tša go ba leitšibolo ka sesola sa dijo.” (Ba-Hebere 12:​16, NW) Tshwanelo ye ya bogolo e be e le e kgethwa. Modimo o file lapa la Esau sebaka gore le be lešikeng la leloko leo Mesia a bego a tla tswalwa go lona, e lego yena yoo a bego a tla iša batho ka moka phološong. (Genesi 22:​18) Lega go le bjalo ‘Esau o nyaditše bogolo bja gagwe.’ O ile a ikemišetša go bo rekiša ka sesola sa dinawa tše khubedu! (Genesi 25:​30-34) Selo se sekgethwa-kgethwa seo wena o nago le sona ke tswalano ya gago le Mmopi wa gago. O se ke wa e ananya, wa e hlokomologa goba wa e bea kotsing bakeng sa go hwetša mehola lege e le efe ya dilo tše di bonagalago.​—⁠Mareka 12:⁠30.

Ka morago, ge Esau a hudugile nageng yeo a goletšego go yona a ile go e nngwe, o ile a nyala basadi ba babedi ba ba-Hethe. Manyalo a a gagwe mo gongwe ka lebaka le itšego a be a bonagala a e-⁠na le mohola, eupja a ile a mo tlišetša mathata feela moyeng ka ge basadi bao ba be ba sa rapele Modimo yo a bego a rapelwa ke batswadi ba Esau, e lego Isaka le Rebeka. Basadi bao “ba hlwile ba nyamiša [batswadi ba gagwe] pelo.”​—⁠Genesi 26:​34, 35.

Ga se selo seo se sa tlwaelegago gore bafsa ba tsene lenyalong e le gore ba kgone go tsena setšhabeng seo se humilego. Go begilwe gore India e bile le batho ba lego lenyalong ba 4 000 bao ba hudugelago United States ngwaga le ngwaga, ka palo e akanyetšwago e le 10 000 ya bao ba sa dutšego ba letetše go dira bjalo. Lega go le bjalo, lenyalo ke mpho e bohlokwa e tšwago go Modimo. Ga se la swanela go tšewa gabohwefo gomme le dirišwa e le tsela feela ya go huduga. Gape, nagana kamoo go bego go tla kweša Jehofa bohloko le ditho tše botegago tša lapa la geno ka gona ge o be o ka ‘ikgokela jokong e šele le motho yo a sa dumelego.’​—⁠2 Ba-Korinthe 6:⁠14.

Dira Phetho Yeo e Atlegilego

Tsela e botse ya kamoo o latelago phetho ya gago ka gona e ka ba e bohlokwa go feta phetho ka boyona. Go sa šetšwe gore o dula nageng ya geno goba o rera go huduga, selo sa bohlokwa kudu ke go dira gore phetho ya gago e atlege.

Ge e ba o dula: O se ke wa sola bao ba hudugago. Phetho yeo ba e dirilego ke boikarabelo bja bona ka noši. (Ba-Roma 14:⁠4; Ba-Galatia 6:​4, 5) Ithute go thabela bothakga le mehola yeo e kgethegilego nageng ya geno. Mediša lerato le le oketšegilego la go rata batho le go ba kwela bohloko ka baka la dilo tšeo ba katanago le tšona le ditlhohlo.

Ge e ba o huduga: Rulaganya ka bohlale dilo tšeo di tlago pele bophelong bja gago ge o dutše o ithuta meetlo e mefsa le ge mohlomongwe o ithuta le leleme le lefsa. O se ke wa nwelela go šomeng nako e telele kudu e le feela gore o hwetše dilo tše di bonagalago tšeo o sa kago wa di nyaka pele. Go sego bjalo go se go ye kae o tla ikhwetša o swaregile kudu go ka ba le nako ya dilo tša moya.

Sheila o a dumela: “Ke gabohlokwa kudu go ba le mošomo lefaseng la mehleng yeno. Lega go le bjalo, ba lapa, bagwera le ditaba tša moya di bohlokwa kudu. Ge dilo tše dingwe ka moka di sa atlege, ke tšona tšeo di re bolokago re tšwela pele.” Beibele ka bohlale e re lemoša malebana le ‘go ikhola ka tša lefase le, gobane sebopego sa lefase le se a feta.’ (1 Ba-Korinthe 7:​31, PK) Bao ba tlogago ba atlega ba boloka dilo tše ba tshwenyegilego ka tšona mabapi le mošomo le tšhelete mo go swanetšego​—⁠e lego go hlokomela gabotse dinyakwa tša lapa le dilo tša moya tšeo ba di phegelelago.

Kgetha bagwera ba bafsa ka kelohloko. Erick o re: “Kgomarelang bagwera bao ba tšeelago godimo mokgwa wa bophelo wo o agago.”

Gopola Dinyakwa tša Gago tša Kgonthe

Dilo tšeo re tlogago re di nyaka gore re thabe ga di fetoge. Sheila o re, “Go sa šetšwe moo re dulago gona, dilo tšeo Jehofa a di nyakago go rena ga di fetoge.” Ke dife? Jesu o beile seo ka boripana ka gore: “Go thaba bao ba lemogago dinyakwa tša bona tša moya.” “Lesang go belaêla” ka dijo tše di lekanego goba diaparo. Etišang pele “mmušô wa Modimo le toko [ya Modimo], ké mo Le tl’o xo ekeletšwa ka tšeo ka moka.”​—⁠Mateo 5:​3, NW; 6:​31, 33.

Go phela ka melao ye ya motheo go ka go thuša gore o hwetše bophelo bjo bokaone nageng lege e le efe.

Dinaga tšeo di humilego di ka bonagala e le tšeo di nago le kgogedi go feta kamoo ge e le gabotse di lego ka gona