Dinaledi Di Go Swaretše Molaetša!

GO ETŠA ge go bontšhitšwe dihlogong tše di fetilego, go sa šetšwe letago leo dinaledi di le bontšhago, motho o be a reretšwe go di lebelela feela seo di lego sona​—⁠dilo tše di sa phelego tše di beilwego magodimong ke Mmopi bakeng sa morero wa gagwe. Di be di sa swanela go rapelwa. E le karolo e bohlokwa ya tlholo e makatšago ya Jehofa e lego ka tlase ga melao ya gagwe, dinaledi di be di swanetše go ‘tsebatša letago la Modimo’ gomme ka nako e swanago e be mothopo wa seetša bakeng sa motho ge a dutše a phetha seo Mmopi a mo reretšego sona.​—⁠Psalme 19:⁠1; Doiteronomio 4:⁠19.

Re bala ka Beibeleng gore: “Xo wêna xo se kê xwa hwetšwa e a . . . diraxo tša bonoxê le tša maphalô, le e a upaxo ka meupô le boloi. Xo se kê xwa hwetšwa wa malôpô, le e a botšišaxo badimo, le xe e le sedupê, le e a nyakaxo selô bahung. Ka xobane ba ba diraxo tše byalo, Morêna ó bôna e le makxapa.” (Doiteronomio 18:​10-⁠12) Jesaya o itše: “Anke [baeletši ba gago] ba eme, gona bjale gomme ba go phološe, barapedi ba magodimo, ba ba lebelelago dinaleding . . . Bona! Ba etša mahlaka.”​—⁠Jesaya 47:​13, 14, NW.

Seo re ka Ithutago Sona Dinaleding

Lega go le bjalo, dinaledi tše di sa phelego di ka re botša se sengwe ge e ba re ikemišeditše go theetša. Edwin Way Teale o ngwadile gore: “Dinaledi di bolela ka go se be selo ga motho nakong e telele e sa felego.” Ee, ge re lemoga gore bontši bja dinaledi tše re di bonago ka mahlo a rena bošegong bjo bo se nago maru di bonwe ke bagologolo ba rena nywaga-kgolong e mentši e fetilego, na seo ga se re kokobetše? Na ga re ikwe re tletše tlhompho ya borapedi bakeng sa Yo Mogolo yo a di hlotšego “mathomong,” le yoo ka morago a ilego a tšweletša batho? Kgoši Dafida wa Isiraele o ngwadile ka tlhompho gore: “Xe ke bôna lexodimo lé la xaxo, medirô ya menô ya xaxo, kxwedi le ’naledi tšé, O di beilexo, ke re motho ké eng, xe O bile O sa mo lebale? Ngwana wa motho ké eng, xe O bile O mo êla hloko?” Magodimo a swanetše go re kokobetša gomme a re dire gore re ipotšiše mabapi le seo re se dirago ka maphelo a rena.​—⁠Genesi 1:⁠1; Psalme 8:​3, 4.

Lebakeng le lengwe Dafida o ile a rapela ka gore: “Nthutê xo dira se se Xo kxahlaxo, xobane O Modimo wa-ka.” (Psalme 143:​10) Pego ya bophelo bja Dafida e bontšha gore thapelo ya gagwe e ile ya arabja. O ile a ithuta go dira thato ya Modimo bjalo ka ge e hlalositšwe Molaong wa Gagwe. Gape o ile a ithuta morero wa Mmopi bakeng sa batho gomme a ngwala ka wona. “Xo se xokae e mobe ó tlo ba a ile . . . Ba bolêta e tlo ba bôná beng ba naxa; ba tlo thaba ka botlalô bya moláô. . . . Ilá bobe, O dirê tše botse; O tseb’o axišwa xo ya xo ile. . . . Baloki e ba beng ba naxa, ba dula mo xo yôna ka mehla le ka mehla.” Go tseba morero woo go ile gwa tliša boikarabelo: “Ilá bobe, O dirê tše botse.”​—⁠Psalme 37:​10, 11, 27-29.

Dinaledi di swaretše batho ka moka molaetša o swanago. Ka ntle le go di rapela goba go ‘lebelela’ go tšona, re ka bona lerato la Mmopi, bohlale bja gagwe le matla di bonagatšwa go tšona. Thuto ya tša dinaledi, ka ge e ganetšana le bolepi bja dinaledi e swanetše go bjala tlhompho ya borapedi ka dipelong tša rena. Eupja go feta moo, na ga e mediše ka go rena kganyogo ya go ithuta mo go oketšegilego ka Modimo? O neile Lentšu la gagwe, e lego Beibele bakeng sa morero wona woo. Ge e ba o lemogile molaetša wo o tšwago dinaleding, o ka ithuta seo Jehofa a se boloketšego batho gomme sa bohlokwa kudu, kamoo o ka bago le karolo ka gona ditšhegofatšong tšeo a ba lokišeditšego tšona. Ge e ba o e-⁠na le dipotšišo mabapi le Modimo le morero wa bophelo, ikwe o lokologile go ikopanya le Dihlatse tša Jehofa lefelong la geno goba o ngwalele atereseng e lego kgaufsi e bontšhitšwego go letlakala 5.

Dinaledi di ka re ruta boikokobetšo