Na o ka Bota Dikholofetšo tša Modimo?

JEHOFA MODIMO, Mmopi wa rena, ka mehla e bile wa therešo lentšung la gagwe. O itše: “Ke boletše; ke tlo di ’tliša.” (Jesaya 46:​11) Ka morago ga go etelela ba-Isiraele pele go ya Nageng ya Kholofetšo, Jošua mohlanka wa Modimo o ngwadile gore: “Xa xo a’ hlaêla le setee sa tše botse ka moka tše Morêna a di boditšexo ba sethšaba sa Isiraele; ka moka di be di tšweletše.”​—⁠Jošua 21:45; 23:⁠14.

Go tloga mehleng ya Jošua go fihla ge Mesia a e-⁠tla, diporofeto tše makgolo tšeo di buduletšwego ke Modimo di ile tša phethagatšwa. Mohlala ke wa ge motsošološi wa Jeriko a be a welwa ke kotlo yeo e boletšwego nywaga-kgolong e mentši e sa le pele. (Jošua 6:​26; 1 Dikxoši 16:​34) O mongwe gape ke wa kholofetšo yeo go bego go bonagala eka e ka se phethagale ya gore badudi bao ba bolawago ke tlala ba Samaria ba be ba tla hwetša dijo tše dintši tšeo ba tlago go di ja letšatšing leo le latelago leo se se boletšwego ka lona. Go 2 Dikxoši kgaolo 7, o ka bala kamoo Modimo a phethagaditšego kholofetšo yeo ka gona.

Go Tšwelela le go wa ga Mebušo ya Lefase

Modimo o buduletše bangwadi ba Beibele gore ba ngwale ditaba ka botlalo mabapi le go tšwelela le go wa ga mebušo ya lefase. Ka mohlala, Modimo o ile a diriša moporofeta wa gagwe Jesaya gore a porofete ka go phekgolwa ga Babele e matla mo e nyakilego go ba nywaga e 200 pele seo se direga. Ge e le gabotse, ba-Meda bao ba ilego ba ipopa ngatana le ba-Peresia, ba ile ba bitšwa gore ke bafenyi. (Jesaya 13:​17-19) Se sengwe, seo se makatšago le go feta, moporofeta wa Modimo o boletše ka Korese kgoši ya Peresia e le yena yoo a bego a tla etelela pele phenyong, gaešita le ge Korese a be a sešo a belegwa nakong ya ge boporofeta bo be bo ngwalwa! (Jesaya 45:⁠1) Eupša go sa na le go gontši.

Moporofeta Jesaya o ile a ba a porofeta kamoo go fenywa ga Babele go bego go tla phethagatšwa ka gona. O ngwadile gore meetse ao a šireletšago motse, e lego noka ya Eforate, ‘a swanetše go gopa,’ le gore “dikgoro [tša Babele] di se ke tša tswalelwa.” (Jesaya 44:​27–45:⁠1, PK) Ditaba tše tše kgethegilego ka moka di ile tša phethagatšwa, bjalo ka ge radihistori Herodotus a begile.

Nakong ya ge Babele e sa dutše e le e phagamego, Modimo o ile a diriša gape moporofeta wa gagwe Daniele gore a bolele mabapi le babuši ba lefase bao ba bego ba tla e latela. Daniele o ile a bona pono ya kgapa ya dinaka tše pedi ya seswantšhetšo yeo e ilego ya atlega go fenyeng ‘diphoofolo’ (PK) tše dingwe ka moka. Ga go na pelaelo ya gore ke bomang bao ba bego ba swantšhetšwa ke kgapa ya dinaka tše pedi, Daniele o ngwadile gore “ké dikxoši tša Ba-Meda le Ba-Peresia.” (Daniele 8:​1-4, 20) Ee, bjalo ka ge go boletšwe e sa le pele, ba-Meda le ba-Peresia e bile mmušo o latetšego wa lefase ge o be o fenya Babele ka 539 B.C.E.

Ponong ye e tšwago go Modimo, se se latelago Daniele o bone ‘phoko yeo e bego e e-⁠na le lenaka le legolo makgatheng a mahlo a yona.’ Daniele o tšwetše pele ka tlhaloso ya gagwe ka gore: “Ka bona ge e fihla go kgapana, . . . ya thula kgapana, ya e thokga dinaka tše pedi tša yona; . . . gomme go be go se yo a ka namolelago kgapana. Gomme phoko ya gola ka go fetiša ka kudu; e itše ge e šetše e tiile matla, lenaka leo la yona le legolo la thokgega, gomme sebakeng sa lona gwa mela dinaka tše nne tše kgolo.”​—⁠Daniele 8:​5-⁠8, PK.

Lentšu la Modimo ga le tlogele pelaelo le ge e le efe mabapi le seo tše ka moka di se bolelago. Hlokomela tlhaloso: “Phôkô yela ya mabôya ké kxoši ya Ba-Gerika; lenaka le le medilexo makxatheng a mahlô a yôna, ké kxoši ya mathômô. Xe mo xo kxolexilexo lenaka leo la pele xò medile dinaka tše nnê, ké xo re sethšaba seo se tlo tšwa mebušô e menê ye e sa lekanexo le wa lôna.”​—⁠Daniele 8:​21, 22.

Histori e bontšha gore “kxoši [ye] ya Ba-Gerika” e be e le Alexander yo Mogolo. Ka morago ga lehu la gagwe ka 323 B.C.E., mmušo wa gagwe o ile wa feleletša o arogantšwe gare ga matona a gagwe a mane​—⁠e lego Seleucus I Nicator, Cassander, Ptolemy I le Lysimachus. Go fo etša ge Beibele e be e boletše e sa le pele, ‘setšhaba seo se ile sa tšwa mebušo e mene.’ Bjalo ka ge go boletšwe gape e sa le pele, ga go le o tee wa ba yo a bilego le matla a lekanago le ao Alexander a bego a e-⁠na le ona. Ee, diphethagatšo tše bjalo tša Beibele e bile tše makatšago kudu moo di ilego tša bitšwa “histori e ngwadilwego e sa le pele.”

Mesia yo a Holofeditšwego

Modimo o be a sa holofetša feela Mesia yo a tlago go lokolla batho sebeng le lehung, eupša gape o neile diporofeto tše dintši tša go hlaola Yo a Holofeditšwego. Nagana ka tše sego kae feela tša tše, e lego diporofeto tšeo Jesu a ka bego a sa ka a rulaganyetša go di phetha.

Go ile gwa bolelwa nywageng e mentši e sa le pele gore Yo a Holofeditšwego o be a tla belegelwa Betlehema gotee le gore o tla belegwa ke kgarebe. (Bapiša Mika 5:⁠1 le Mateo 2:​3-⁠9; Jesaya 7:​14 le Mateo 1:​22, 23.) Go be go porofetilwe gore o be a tla ekwa ka ditsekana tše 30 tša silifera. (Sakaria 11:​12, 13; Mateo 27:​3-⁠5) Go be go bile go boletšwe gore ga go na lerapo la mmele wa gagwe leo le bego le tla robja le gore diaparo tša gagwe di be di tla direlwa matengwa.​—⁠Bapiša Psalme 34:​20 le Johane 19:​36, Psalme 22:​18 le Mateo 27:⁠35.

Sa bohlokwa kudu ke therešo ya gore Beibele e boletše e sa le pele ka nako yeo Mesia a bego a tla tla ka yona. Lentšu la Modimo le porofetile gore: “Go tloga ge lentšu le e-⁠tšwa la gore Jerusalema o tlo buša a agiwa, go fihla go Motlotšwa, e lego kgoši, ke dibeke tše di šupago, le dibeke tše masome a selelago a metšo e mebedi.” (Daniele 9:​25, PK) Go ya ka Beibele, lentšu la go tsošološwa le go agwa lefsa ga merako ya Jerusalema le tšwile ngwageng wa bo-20 wa pušo ya Kgoši Arithasasitha, woo histori ya lefase e bontšhago gore e bile ngwaga wa 455 B.C.E. (Nehemia 2:​1-⁠8) Dibeke tše tše 69 tša nywaga di fedile nywageng e 483 ka morago (7 x 69 = 483), ka 29 C.E. Woo e bile ngwaga woo ka wona Jesu a kolobeditšwego gomme a tlotšwa ka moya o mokgethwa, a ba Mesia goba Kriste!

Ka mo go lemogegago, batho ba mehleng ya Jesu ba be ba letetše gore Mesia a tšwelele ka nako yeo, bjalo ka ge radihistori wa Mokriste Luka a boletše. (Luka 3:​15) Bo-radihistori ba ba-Roma Tacitus le Suetonius, radihistori wa mo-Juda Josephus le radifilosofi wa mo-Juda Philo Judaeus le bona ba hlatsetše gore boemo bjo bja go letela bo be bo le gona. Gaešita le Abba Hillel Silver ka pukung ya gagwe ya A History of Messianic Speculation in Israel, o dumela gore “Mesia o be a letetšwe kotareng ya bobedi ya lekgolo la pele la nywaga C.E.” O boletše gore se e bile ka baka la “tatelelano ya mabaka e tumilego ya mehleng yeo,” yeo e bego e tšerwe ka boripana ka pukung ya Daniele.

Ka go naganišiša ka tsebišo e bjalo, ga se gwa swanela go ba mo go makatšago gore Beibele e be e ka šupa gape nako yeo ka yona Mesia a bego a tla boa bakeng sa go thoma pušo ya gagwe e le kgoši. Bohlatse bja tatelelano ya ditiragalo bjo bo lego boporofeteng bja Daniele bo ile bja šupa ka go lebanya nako yeo ka yona “Yo xodimo-dimo” a bego a tla neela bogoši bja lefase go “mothwana wa mmôtlana,” e lego Jesu Kriste. (Daniele 4:​17-25; Mateo 11:​29) Go bolelwa ka lebaka la “mabaka a šupaxo,” goba nywaga e šupago ya boporofeta, gomme lebaka le le ile la balwa gore le fedile ka ngwaga wa 1914.a

Ga go na Letšatši Leo le Neilwego Bakeng sa Bofelo

Lega go le bjalo, ngwaga wa 1914 ke nako feela ya go thoma ga pušo ya Kriste “xare xa manaba a [gagwe].” (Psalme 110:​1, 2; Ba-Hebere 10:​12, 13) Puku ya Beibele ya Kutollo e utolla gore nakong yeo ka yona pušo ya Kriste ya legodimong e bego e tla thoma, o be a tla lahlela Sathane Diabolo le barongwa ba gagwe lefaseng. Pele a ka fediša batho ba ba kgopo ba moya, Beibele e bolela gore ba be ba tla baka mathata a magolo lefaseng ka “lebakanyana fêla.”​—⁠Kutollo 12:​7-⁠12.

Sa bohlokwa ke gore Beibele ga e nee letšatši leo “lebakanyana” le le bego le tla fela ka lona le nako yeo ka yona Kriste a bego a tla dira e le Mophethi wa kahlolo go manaba a Modimo ka Haramagedone. (Kutollo 16:​16; 19:​11-21) Ge e le gabotse, bjalo ka ge go boletšwe sehlogong se se fetilego, Jesu o boletše gore go dulwe go itokišitšwe ka gobane ga go na motho yo a tsebago letšatši la tiragalo yeo. (Mareka 13:​32, 33) Ge motho a fetela ka kua ga seo Jesu a se boletšego, go etša ge go dirile Bakriste ba pele kua Thesalonika le ba bangwe ka morago ga bona, go tla ba le dipolelelo-pele tša maaka goba tšeo di sa nepagalago.​—⁠2 Ba-Thesalonika 2:​1, 2.

Go Ile gwa Nyakega go Phošollwa ga Kgopolo

Pejana ga karolo ya mafelelo ya ngwaga wa 1914, Bakriste ba bantši ba be ba lebeletše gore Kriste o tla boa ka nako yeo gomme a ba rotošetša legodimong. Ka go rialo, polelong yeo e neilwego ka September 30, 1914, Morutwana wa Beibele A. H. Macmillan o itše: “Mohlomongwe ye ke polelo ya mafelelo ya phatlalatša yeo ke e neago ka gobane re tla tloga re e-⁠ya gae [legodimong].” Go molaleng gore Macmillan o be a fošitše, eupša yeo e be e se tebelelo e nnoši yeo e sa phethagatšwago yeo yena goba Barutwana-gotee le yena ba Beibele ba bilego le yona.

Barutwana ba Beibele bao ga e sa le go tloga ka 1931 ba ilego ba tsebja e le Dihlatse tša Jehofa, ba be ba bile ba letetše gore ngwaga wa 1925 o tla ba le phethagalo e kgahlišago ya boporofeta bja Beibele. Ba be ba nagana gore tsogo ya lefaseng e be e tla thoma ka nako yeo, go yona go bušwa banna ba kgale ba tumelo ba bjalo ka Aborahama, Dafida le Daniele. E sego kgale kudu, Dihlatse tše dintši di be di nagana gore ditiragalo tše di tswalanago le go thoma ga Pušo ya Kriste ya Nywaga e Sekete di be di tla thoma go direga ka 1975. Tebelelo ya bona e be e theilwe kwešišong ya gore sekete sa bošupa sa histori ya batho se be se tla thoma ka nako yeo.

Dikgopolo tše tše di fošagetšego di be di sa bolele gore dikholofetšo tša Modimo di fošagetše le gore o be a dirile phošo. Le gatee! Diphošo goba dikgopolo tše di fošagetšego go etša tabeng ya Bakriste ba lekgolo la pele la nywaga, di be di bakwa ke go palelwa ke go kwa temošo ya Jesu ya gore ‘Ga le tsebe lebaka.’ Diphetho tše fošagetšego di be di sa bakwe ke lehloyo goba go se dumele go Kriste, eupša e be e le ka baka la kganyogo ya go fišegela go bona phethagatšo ya dikholofetšo tša Modimo ka nako ya gona.

Ka gona, ka morago A. H. Macmillan o ile a hlalosa gore: “Ke ile ka lemoga gore re swanetše go amogela diphošo tša rena gomme re tšwele pele re nyakišiša Lentšu la Modimo bakeng sa tshedimošo e oketšegilego. Go sa šetšwe gore ke dipeakanyo dife tše re tlago go swanelwa ke go di dira nako le nako dikgopolong tša rena, seo se ka se fetoše neo e botho ya topollo le kholofetšo ya Modimo ya bophelo bjo bo sa felego.”

Ee, dikholofetšo tša Modimo di ka botwa! Batho ke bona ba sekametšego phošong. Ka gona, Bakriste ba therešo ba tla kgomarela moya wa go leta ka go kwa taelo ya Jesu. Ba tla dula ba phakgame ba bile ba itokišeleditše go tla ga Kriste mo go ka se phemegego e le Mophethi wa kahlolo ya Modimo. Ba ka se ke ba dumelela dipolelelo-pele tša maaka di šira kgopolo ya bona gomme ka go rialo tša ba dira gore ba hlokomologe temošo ya kgonthe ya bofelo bja lefase.

Ka gona, go thwe’ng ka tumelo ya gore lefase le le tla fela? Na ruri go na le bohlatse bja gore bofelo bo tla tla kapejana, lebakeng la ge o sa phela?

[Mengwalo ya tlase]

[Seswantšho go letlakala 23]

Ditaba tše kgethegilego ka botlalo di ile tša bolelwa e sa le pele mabapi le go wa ga Babele

[Seswantšho go letlakala 25]

Jesu o be a ka se rulaganye go phethagatša diporofeto tše dintši mabapi le yena ka noši