Mogwera Wa Rena Wa Potego O —Lefelong La Moya
BEIBELE e re nea tlhaloso e kwalago ka bao ba dulago lefelong la moya. Jehofa Modimo ke yo a phagamego legodimong. Jesu Kriste o latela Jehofa ka matla le taolo. Barongwa ba ba botegelago Modimo ba hlankela e le badiredi ba Modimo le ba batho ba gagwe ba lefaseng. Sathane le batemona ba gagwe ba ganetša Modimo e bile ba timetša batho. Bahu ba robetše lehung go fihlela ge Modimo a ba tsoša.
Batemona ba Nyaka Borapedi bja Rena
Ka ge bahu ba sa phele, ga go na selo se se ka hwetšwago ka go ba rapela. Go direla bahu dihlabelo go godiša feela maaka a Sathane le batemona ba gagwe.
Na barongwa ba Modimo ba kganyoga borapedi bja rena? Le gatee! Barongwa ba ba botegago ba nea Modimo tumišo gomme ba kgothaletša batho gore ba dire se se swanago. Moapostola Johane o ile a leka go rapela barongwa ka makga a mabedi, eupša ba ile ba mo kgalemela ka gore: “Bona, se dire bjalo; . . . khunamela Modimo.”—Kutollo 19:10, PK; 22:8, 9.
Ka go fapana le barongwa ba ba botegago, Sathane le batemona ba gagwe ba nyaka go rapelwa gotee le go tumišwa. Se se bonagetše gabotse ge Sathane a be a leka Jesu nakong ya ge Jesu e be e le motho lefaseng. Beibele e laodiša ka gore: “Ya ba xôna Diabolo a mo [Jesu] išitšexo thabeng e telele, a mmonthša mebušô ka moka ya lefase le letaxô la yôna; a bolêla naê’ a re: Tšôna-tšé ka moka ke tlo Xo neêla tšôna, xe O ka khunama wa lothša nna.”—Mateo 4:8, 9.
Jesu o arabile ka gore: “Ntloxêlê, Sathane, xobane xo ngwadilwe xwa thwe: O khunamêlê Morêna Modimo wa xaxo, O dirêlê Yêna à nnoši!” (Mateo 4:10) Jesu o be a tseba Molao wa Jehofa, gomme o ile a gana go o roba.—Doiteronomio 6:13.
Le ge Sathane a se a ka a kgona go dira gore Jesu a mo rapele, o atlegile go ba bangwe. Ee, ke batho ba sego kae bao ba rapelago Sathane ka go rata. Lega go le bjalo, ka mokgwa wa boradia, bohwirihwiri, maaka le poifo, Sathane le batemona ba gagwe ba arošitše batho ba bantši kudu borapeding bjo bo hlwekilego bja Jehofa moo moapostola Johane a ilego a ngwala gore: “Lefase ka moka le rapaletše matleng a yo mobe.” (1 Johane 5:19, NW) Batho bao ba rapelago ka ditsela tše di thulanago le Lentšu la Modimo ba godiša Sathane, e sego Jehofa. Beibele e lemoša ka gore: “Didimo tše ba ntlê ba di diraxo bà di dirêla diriti tše mpe; xa ba di direle Modimo.”—1 Ba-Korinthe 10:20.
Borapedi ke bja Jehofa
Borapedi bja rena bo swanetše go lebišwa go Modimo a nnoši. Jehofa o boditše Moše gore: “Ke se kê ka bôna Ò na le medimo e šele. O se ke wa itirêla modimo wa xo betlwa, le xe e le seswanthšô se sengwê sa tše di lexo kwa lexodimong, le xe e le sa tše di lexo mono lefaseng, le sa tše di lexo meetseng ka tlase xa lefase. O se ke wa di khunamêla; O se kê wa di dirêla; ka xobane Nna Morêna Modimo wa xaxo ke Modimo yo [a nyakago boineelo bjo bo feletšego, NW].”—Ekisodo 20:3-5.
Le ge Jehofa bogolo bja gagwe e le bjo bo boifišago, o a batamelega. Morutiwa Jakobo o ngwadile gore: “Batamêlang Modimo, le Yêna a Le batamêlê.” (Jakobo 4:8) Moapostola Paulo o itše: “[Modimo] xa a kxolê, ó kxaufsi le e mongwê le e mongwê wa ba re lexo fá.” (Ditiro 17:27) Le gona moapostola Johane o ngwadile gore: “Xomme kholofêlô ye e tiilexo, ye re Mo [Jehofa] holofetšexo ka yôna, ké xe re tseba xore ó a re kwa xe re kxopêla se se amanaxo le thatô ya xaxwe. Xomme xe re tseba xobane ó a re kwa xe re tla le kxopêlô efe le efe, xôna re tseba le xore, tše re di kxopetšexo re šetše rè na natšô’.”—1 Johane 5:14, 15.
Hlokomela gore Johane o ngwadile gore Jehofa o tla re nea tše re di kgopelago ge e ba re kgopela “se se amanaxo le thatô ya xaxwe.” Gore re tsebe seo thato ya Modimo e lego sona, re swanetše go ithuta seo Beibele e se rutago. Dihlatse tša Jehofa di tla thabela go go thuša go kwešiša Beibele.
Ge o dutše o ithuta go gontši ka Jehofa, o tla hwetša tsebo e oketšegilego ka bao ba phelago lefelong la moya. Tsebo ye e lokolla ditumela-khweleng, ditumelong le meetlong yeo Sathane a e dirišago go swarelela batho poifong le bokgobeng. Ka tsebo e nepagetšego ya go tseba Modimo, o tla ithuta go mmota gore a go thuše go phema le go fenya mathata a letšatši le lengwe le le lengwe a bophelo. O ka ba mogwera wa Modimo. Le gona Modimo o tla itlhatsela e le “setšhabelo sa [gago], ke matla a [gago], o bonwe gobane ke tlhakodišo e kgolo ditlalelong.”—Psalme 46:1, PK.
Madira a Kgopo a Swanelwa ke go Fedišwa
Le ka mohla o se ke wa belaela gore madira a lokilego a moya a tla fenya madira a kgopo a moya. Go šetše go lwelwe ntwa yeo e ilego ya hlwekiša magodimo ka go tloša Sathane le bagwera ba gagwe ba babe lefelong la moya. Puku ya Kutollo e re: “Kwa lexodimong xwa tsoxa ntwa ya xe Mikaele [Jesu Kriste yo a tsošitšwego] le Barongwa ba xaxwe bà e-lwa le Nôxa, ’me Nôxa è e-lwa è na le Barongwa ba yôna. Nôxa ya se kê ya fenya; kwa lexodimong xwa se kê xwa hlwa xò e-ba le madulô a yôna. Nôxa e kxolo yeo ya rakwa; yôna ye ba rexo ké Diabolo le Sathane, motimetši wa lefase ka moka la batho. Ya lahlêlwa lefaseng; le Barongwa ba yôna ba lahlwa le yôna.”—Kutollo 12:7-9.
Mafelelo a ntwa yeo e bile afe? Pego e tšwela pele ka gore: “Thabang-xê, lena Maxodimo, le ba ba axilexo xôna. Ba madi-mabe ké lena ba Le axilexo lefaseng le lewatleng, xobane Diabolo ó theoxetše xo lena à tuka boxale ka kudu; ó tseba xe a sa šaletšwe ke lebakanyana fêla.” (Kutollo 12:12) Bao ba lego legodimong ba be ba ka thaba, ka ge Sathane le batemona ba gagwe ba be ba se sa le gona moo go baka bothata. Lega go le bjalo, go rakwa ga gagwe legodimong go tlišitše madimabe a magolo, bothata bjo bogolo go bao ba lego lefaseng. Gona bjale re phela mehleng yeo ya madimabe.—2 Timotheo 3:1-5.
Bokamoso bjo bo se Nago Bokgopo
Le gona, Beibele e bile e nea kholofelo. E re kgonthišetša gore Diabolo o šaletšwe ke “lebakanyana fêla” pele a ka fedišwa. Ge seo se direga, Jehofa o tla tliša ditšhegofatšo tše di kgahlišago go bohle ba ba lego lefaseng bao ba tsomago segwera sa gagwe. Ela hloko tše sego kae tša dikholofetšo tša gagwe bakeng sa bokamoso:
“Xo tlo ba le mohora wa mabêlêʹ mo naxeng; ’phoxong tša thaba meré ya dienywa e tlo xwaša.”—Psalme 72:16.
“Bahlaolwa ba-ka ba tlo phela ka tše ba itiretšexo tšôna, tša tlo bá tša ba ônalêla diatleng. Ba ka se itapiše, ’me ya ba lefêla.”—Jesaya 65:22, 23.
“Mo xo ba ba axilexo fá xo ka se bê le e a rexo: Ke a babya!”—Jesaya 33:24.
“Ké mo xo tl’o xo budollwa mahlô a difofu, xwa thibollwa ’tsêbê tša difoa. Ké mo dixôlê di tl’o xo taboxa bo-ka thsêpê, xwa tlo hlalala ’leme la semuma.”—Jesaya 35:5, 6.
“’Me Yêna Modimo ó tlo phomola mexôkxô ka moka mahlong a bôná; le lehu le ka se hlwê le e-ba xôna; le xe e le manyami le dillô le bohloko, di ka se hlwê di e-ba xôna; xobane tša pele di fetile.”—Kutollo 21:4.
“Baloki e ba beng ba naxa, ba dula mo xo yôna ka mehla le ka mehla.”—Psalme 37:29.
Ke Jehofa a nnoši, Modimo wa therešo, yo a ka phethagatšago dikholofetšo tše bjalo tše dikgolo. Ga go na selo se se tlago go mo thibela go phetha morero wa gagwe. “Xobane Modimo, xa xo se se sa kxônexexo xo Yêna.”—Luka 1:37.
[Seswantšho go letlakala 1]
Ge o le mogwera wa Modimo, o tla go thuša go lebeletšana le mathata a bophelo