Babuši Lefelong la Moya
KE MANG yo a bušago lefase? Na go na le mohuta o itšego wa taolo o phagametšego motho? Goba na Modimo o tlogeletše batho gore ba itlhokomele? Go tsoma dikarabo tša dipotšišo tše, sa pele anke re hlahlobeng tiragalo yeo e diragetšego nakong ya bodiredi bja Jesu Kriste bja lefaseng.
Ka morago ga go kolobetšwa ga gagwe, Jesu o ile a lekwa ke sebopiwa se se sa bonagalego sa moya seo se bitšwago Sathane Diabolo. Beibele ge e bontšha e nngwe ya diteko e re: ‘Diabolo a iša Jesu thabeng e telele, a mmontšha mebušo ka moka ya lefase le letago la yona.’ (Mateo 4:8) Ka morago Sathane o ile a botša Jesu gore: “Boxoši byó ka moka le borêna bya byôna ke tlo fa Wêna; ka xobane bo xafetšwe nna; ke bo nea yo nkaxo rata xo mo nea. Byale xe O ka lothša nna, ka moka e tlo ba tša xaxo.”—Luka 4:6, 7.
Sathane o ipoletše e le yo a nago le matla a taolo godimo ga mebušo ka moka ya lefase. Na Jesu o ile a ganetša polelo ye? Aowa. Ge e le gabotse, o ile a e tiišetša nakong e nngwe ge a be a bitša Sathane e le “mmuši wa lefase.”—Johane 14:30.
Go ya ka Beibele, Sathane ke morongwa yo kgopo yo a nago le matla a magolo. Moapostola wa Mokriste Paulo o tswalanya Sathane le “meôya ya bobe” gomme a bolela ka yona e le “balaola-mafase ba lefsifsi.” (Ba-Efeso 6:11, 12) Go feta moo, moapostola Johane o boletše gore “lefase ka moka le rapaletše bobeng.” (1 Johane 5:19) Puku ya Beibele ya Kutollo e bontšha gore Sathane ke “motimetši wa lefase ka moka la batho.” (Kutollo 12:9) Ka dipolelo tša seswantšhetšo, Kutollo gape e swantšha Sathane e le noga e kgolo yeo e neago tshepedišo ya lefase ya tša bopolitiki “matla a yôna, le sedulô sa boxoši bya yôna, le boxoši byo boxolo.”—Kutollo 13:2.
Gape ditiragalo tša lefase di hlatsela gore go na le matla a mabe ao a šomago, ao a goketšago batho ka bohlale gore ba ikgobatše. Ke ka lebaka lefe le lengwe mebušo ya batho e palelwago ke go godiša khutšo? Ke selo sefe se sengwe seo se bakelago batho gore ba hloyane le go bolayana? Ka baka la go boifišwa ke tšhollo ya madi le lehu ntweng ya selegae, hlatse e nngwe yeo e bonego ka mahlo e itše: “Ga ke tsebe kamoo se se ilego sa direga ka gona. Ke se se fetago lehloyo. Ke moya o mobe wo o dirago batho gore ba bolayane.”
Motho wa Kgonthe yo a Ganetšago Modimo
Lehono ba bantši ga ba dumele Sathane Diabolo. Lega go le bjalo, ga e fo ba selo sa motheo sa bobe bathong go etša ge ba bangwe ba dumela bjalo. Bobedi Beibele le ditiragalo tša lefase di bontšha gore ke motho wa kgonthe. Go feta moo, Sathane ke yo a ganetšago Jehofa Modimo o šoro. Ee, Sathane ga a lekane le Modimo. Ka ge Jehofa e le Mmopi yo matla ohle, ke Mmuši yo a swanetšego godimo ga dibopiwa tšohle.—Kutollo 4:11.
Modimo ga se a bopa sebopiwa se kgopo e le gore se tle se mo ganetše. Go e na le moo, yo mongwe wa “bana . . . ba Modimo” ba barongwa o ile a aga kganyogo ya boithati gore a ikhole ka noši ka borapedi bjo e lego bja Jehofa ka mo go swanetšego. (Jobo 38:7; Jakobo 1:14, 15) Kganyogo ye e ile ya mo dira gore a ikhwetše a le tseleng ya borabele malebana le Modimo. Ka go rabela, sebopiwa se sa moya se ile sa itira Sathane (e lego seo se bolelago “moganetši”) le Diabolo (e lego seo se bolelago “mothomeletši”). Ka baka la tše ka moka, o ka ipotšiša lebaka leo ka lona Sathane a ilego a dumelelwa gore a buše lefase.
Lebaka Leo ka Lona Sathane a Dumeletšwego go Buša
Na o sa gopola seo Sathane a se boditšego Jesu mabapi le bogoši godimo ga lefase? Sathane o itše: “Boxoši byó ka moka . . . ke tlo fa Wêna, ka xobane bo xafetšwe nna.” (Luka 4:6) Polelwana yeo e bontšha gore Sathane Diabolo o laola feela ka tumelelo ya Modimo. Eupša ke ka baka la’ng Modimo a dumelela Sathane?
Karabo ya potšišo yeo e lebiša ditiragalong tša tšhemong ya Edene, moo Sathane a ilego a thoma modiro wa gagwe e le mmuši wa lefase. Moo Sathane o šišintše gore Modimo o be a buša ka tsela e mpe ka go diegiša selo se sengwe se se botse monneng wa pele le mosading wa pele Adama le Efa. Go ya ka Sathane, ge e ba ba be ba ka ja seenywa se se ileditšwego ke Modimo, ba be ba tla lokologa. Adama le Efa ba be ba tla lokologa gomme ba tšwa ka tlase ga taolo ya Jehofa. Ba be ba tla swana le Modimo ka noši!—Genesi 2:16, 17; 3:1-5.
Ka go aketša ka tsela ye le go fapoša Efa gomme ka yena a fapoša Adama gore a robe molao wa Modimo, Sathane o ile a tliša batho ba babedi ba banyalani ka tlase ga boetapele bja gagwe le taolo. Ka go rialo Diabolo o ile a ba modimo wa bona, yo a ganetšago Jehofa. Lega go le bjalo go e na le gore ba lokologe, Adama le Efa ba ile ba lebeletšana le bohlanka bja Sathane, bja sebe le lehu.—Ba-Roma 6:16; Ba-Hebere 2:14, 15.
Ka go dumelelana le toka ya gagwe e phethagetšego, Jehofa a ka be a ile a fediša Sathane gatee-tee le balatedi ba gagwe ba babedi ba bafsa. (Doiteronomio 32:4) Lega go le bjalo, go be go e-na le kgang e kgolo e akaretšwago. Sathane o ile a belaela go swanelega ga tsela ya Jehofa ya go buša. Ka bohlale bja gagwe, Modimo o dumeletše nako gore e fete e le gore go ka hlatselwa gore go itokolla go yena go tliša kotsi. Jehofa o dumeletše marabele go tšwela pele a phela lebakanyana, a dumelela Adama le Efa go ba le bana.—Genesi 3:14-19.
Gaešita le ge e le gore bontši bja bana ba Adama ga se bja ikokobeletša bogoši bja Jehofa, ditirišano tša Modimo le barapedi ba Gagwe di ile tša bontšha bogolo bja bogoši bja gagwe. Go lemogwa mo go swanetšego ga taolo ya Jehofa go tliša lethabo le polokego ya kgonthe. Ka lehlakoreng le lengwe, manyami le go se bolokege di ile tša tšwelela pušong ya batho ka tlase ga tutuetšo ya Sathane. Ee, ‘motho o buša motho gore a mo senye.’ (Mmoledi 8:9) Batho ga se ba hwetša polokego ya kgonthe le lethabo la neng le neng tlase ga pušo ya batho lefaseng le le le rapaletšego matleng a Sathane. Lega go le bjalo, go na le lebaka le le kwalago la go ba le kholofelo.
Nako ya Sathane ke e Kopana!
Tutuetšo ya Sathane mo lefaseng ke ya nakwana. Jehofa a ka se ke a kgotlelela pušo ya Sathane gore e tšee lebaka le letelele! Kgaufsinyane Diabolo o tla dirwa gore a se sa hlwa a kgona go šoma. Mmuši yo mofsa o tla laola lefase, kgoši ya toko yeo e kgethilwego ke Modimo ka noši. Kgoši yeo ke Jesu Kriste. Mabapi le go bewa ga gagwe sedulong sa bogoši legodimong, Kutollo e re: “Mebušô ya lefase e tlile ya ba Mmušô wa Mong wa rena [Jehofa] le wa Motlotšwa wa xaxwe.” (Kutollo 11:15) Tatelelano ya mehla ya Beibele gotee le go phethagala ga boporofeta bja Mangwalo, di hlatsela gore tiragalo ye e diragetše ka 1914.—Mateo 24:3, 6, 7.
Beibele gape e hlalosa seo se diragetšego ka morago ga go bewa ga Jesu sedulong sa bogoši. E re: “Kwa lexodimong xwa tsoxa ntwa ya xe Mikaele [Jesu Kriste] le Barongwa ba xaxwe bà e-lwa le Nôxa [Sathane Diabolo], ’me Nôxa è e-lwa è na le Barongwa ba yôna. Nôxa ya se kê ya fenya; kwa lexodimong xwa se kê xwa hlwa xò e-ba le madulô a yôna. Nôxa e kxolo yeo ya rakwa; yôna ye ba rexo ké Diabolo le Sathane, motimetši wa lefase ka moka la batho. Ya lahlêlwa lefaseng; le Barongwa ba yôna ba lahlwa le yôna.”—Kutollo 12:7-9.
Mafelelo a go rakwa ga Sathane legodimong e be e tla ba afe? Bao ba lego legodimong ba be ba ka thaba, eupša go ka thwe’ng mabapi le badudi ba lefase? Kutollo 12:12 e re: “Ba madi-mabe ké lena ba Le axilexo lefaseng le lewatleng, xobane Diabolo ó theoxetše xo lena à tuka boxale ka kudu; ó tseba xe a sa šaletšwe ke lebakanyana fêla.” Ruri, go rakwa ga Sathane legodimong go tlišitše madimabe lefaseng. The Columbia History of the World e re: “Kotsi e kgolo ya Ntwa ya Nywaga e Mene ya 1914–1918 . . . e bontšhitše naga ya ka Bodikela gore e ka se ke ya šireletša tlhabologo bošilong bja yona goba kgapeletšong e mpe. Moya wa ka Bodikela le ka mohla ruri ga se wa ka wa tsoga gape tshenyong yeo.”
Madimabe a moloko wo a swawa ka seo se fetago moya o senyegilego kudu. Jesu o porofetile ka gore: “Sethšaba se tlo tsoxêla sethšaba; mmušô o tlo tsoxêla mmušô; xomme xo tlo ba le ditlala le dinkhu, le dithšišinyêxô kua le kua.” Gape o boletše e sa le pele ka leuba la malwetši. (Mateo 24:7, 8; Luka 21:11) Go feta moo, Beibele e bolela gore “mehleng ya bofêlô” ya tshepedišo ya Sathane ya dilo, ba bantši e tla ba “ba xo ithata, ba mexabaru, . . . ba xo se kwe batswadi, . . . babata-sekxoro.” Batho gape e tla ba “baikxanthši, ba xo iphsina ba lahlile Modimo.”—2 Timotheo 3:1-5.
Dintwa, leuba la malwetši, go hlaelela ga dijo, ditšhišinyego tša lefase le go fetoga o šoro ditekanyetšong tša boitshwaro—dilo tše bjalo ka moka di diragetše ka tekanyo yeo e sa lekanywego ga e sa le go tloga ka 1914, go fo etša ge Beibele e boletše e sa le pele. Di bontšha gore lenaba le le galefilego la Modimo le batho—Sathane Diabolo—le rakilwe legodimong gomme gona bjale le swanetše go bontšha bogale bja lona tikologong ya lefase. Eupša Beibele gape e bontšha gore Sathane a ka se ke a dumelelwa gore a tšwele pele a laola ka lebaka le le telele. O šaletšwe ke “lebakanyana” feela go ba go fihla ge Haramagedone e fihla, ge Modimo a fediša tshepedišo ya lefase yeo Sathane a e laolago.
Ke’ng seo se tla diregago ka Sathane nakong yeo? Moapostola Johane o ngwadile gore: “Ka bôna Morongwa à fofa lexodimong á swere sekxonyu sa Sekoti, a swere le kêtanê e kxolo ka seatla. A swara Nôxa-kxolo, Nôxa yela ya mehleng, e lexo yêna Diabolo le Sathane, a e tlêma xore e fetšê nywaxa e sekete è tlemilwe. A e lahlêla Sekoting, a e kxonyeletša moo, a tiiša ka seká sa leswaô.” (Kutollo 20:1-3) A go imollwa mo gokaakang bakeng sa batho ba tlaišegago!
Go Thaba ka Tlase ga Pušo ya Mmušo
Ge Sathane a tla be a se sa le gona, Mmušo wa Modimo ka tlase ga Jesu Kriste o tla laola ka gohle ditabeng tša batho. Go e na le gore go be le mebušo e mentši lefaseng, mmušo o tee feela wa legodimong o tla ba gona gore o buše godimo ga polanete yohle. Ntwa e tla ba selo sa nakong e fetilego, gomme khutšo e tla ba gona kae le kae. Ka tlase ga pušo ya Mmušo wa Modimo, bohle ba tla dula gotee ka borwarre bjo lerato.—Psalme 72:7, 8; 133:1; Daniele 2:44.
Jesu o tla itlhatsela e le mmuši wa mohuta mang? Ge a be a le lefaseng, o bontšhitše lerato le le tseneletšego bakeng sa batho. Jesu ka kwelobohloko o ile a nea bao ba swerwego ke tlala dijo. O ile a fodiša ba ba babjago, difofu tša boela tša bona, dimuma tša boela tša bolela le digole tša sepela. Jesu o ile a ba a tsošetša le ba ba hwilego bophelong gape! (Mateo 15:30-38; Mareka 1:34; Luka 7:11-17) Mehlolo yeo e be e le diponelo-pele tša dilo tše di kgahlišago tšeo a tlago go di dira e le Kgoši. E tla ba mo go thabišago gakaakang go ba le mmuši yo bjalo yo a holago!
Bao ba ikokobeletšago bogoši bja Jehofa ba tla thabela ditšhegofatšo tše di sa felego. Mangwalo a holofetša gore: “Ké mo xo tl’o xo budollwa mahlô a difofu, xwa thibollwa ’tsêbê tša difoa. Ke mo dixôlê di tl’o xo taboxa bo-ka thsêpê, xwa tlo hlalala ’leme la semuma.” (Jesaya 35:5, 6) Ge a šupa pele letšatšing leo le legolo, moapostola Johane o ngwadile gore: “Ka kwa lentšu le lexolo lè e-tšwa lexodimong lè re: Šoo ngwakô wa Modimo mo xare xa batho; ó tlo axa le bôná, ya ba sethšaba sa xaxwe. ’Me Yêna mong Modimo ó tlo ba le bôná è le Modimo wa bôná. ’Me Yêna Modimo ó tlo phomola mexôkxô ka moka mahlong a bôná; le lehu le ka se hlwê le e-ba xôna; le xe e le manyami le dillô le bohloko, di ka se hlwê di e-ba xôna; xobane tša pele di fetile.”—Kutollo 21:3, 4.
Dilo tše dibotse tšeo di tlišwago ka bogoši bja Jehofa Modimo ka Morwa wa gagwe Jesu Kriste, e tla ba go lefša mo go fetago tlaišego le ge e le efe yeo re ka bago re ile ra ba le yona tshepedišong ya gona bjale ya dilo yeo e laolwago ke Sathane Diabolo. Lefaseng le le holofeditšwego la Modimo, batho ba ka se ke ba tshwenyega ka gore, ‘Ke mang yo ge e le gabotse a ikarabelelago?’ (2 Petro 3:13) Batho ba ba kwago ba tla thaba le go bolokega lefelong la lefaseng la Babuši ba lerato ba lefelong la moya, e lego Jehofa le Kriste. Ke ka baka la’ng re sa amogele kholofelo ya go ba gare ga balata ba bona?
[Seswantšho go letlakala 7]
Batho ba tla bolokega tikologong ya lefaseng ya Mmušo wa Modimo
[Picture Credit Line on page 4]
NASA photo