Tsela E Išago Go Boeleng Sekeng

KA MORAGO ga tlhaselo ya pelo, ke ga tlhago gore motho a tšhoge le go tshwenyega. Na ke tla ba le tlhaselo e nngwe? Na ke tla golofala goba ka thibelwa ke bohloko le go lahlegelwa ke matla le mafolofolo?

John, yo go boletšwego ka yena sehlogong sa bobedi o be a holofetše gore ge nako e dutše e sepela, go se iketle mo a go kwago letšatši le letšatši le sehlabi sa mo kgareng di be di tla kokobela. Eupša ka morago ga dikgwedi tše mmalwa, o itše: “Go fihla ga bjale ga se tša kokobela. Seo gotee le go lapa kapejana le go betha ka lebelo ga pelo ya-ka, di ntira gore ke dule ke ipotšiša gore, ‘Na ke kgaufsi le go hwetša tlhaselo e nngwe?’”

Jane yo a tšwago United States, yo e bego e le mohlologadi wa mofsa nakong ya ge a hlaselwa ke pelo, o dumetše ka gore: “Ke be ke nagana gore ke be nka se phele goba gore ke be ke tla ba le tlhaselo e nngwe ke moka ka hwa. Ke ile ka thoma go tšhoga ka ge ke be ke e-na le bana ba bararo ba ke swanetšego go ba hlokomela.”

Hiroshi wa Japane o laodišitše ka gore: “Ke ile ka tšhoga ge ke botšwa gore pelo ya-ka e be e ka se sa hlwa e šoma go etša ge e be e šoma pele; lebelo leo e bego e pompa ka lona le be le theogile ka tekanyo ya 50 lekgolong. Ke be ke nyaka ke kgodišegile gore ke tla swanelwa ke go fokotša e mengwe ya mediro ya-ka ke le modiredi wa Dihlatse tša Jehofa ka gobane ke be ke kgona go dira tekanyo ya ka tlase ga seripa-gare sa yeo ke bego ke e dira.”

Ge motho a lebeletšane le go ba le matla a lekanyeditšwego, a ka thoma go hlaselwa ke kgateletšego le maikwelo a go hloka mohola. Marie, mo-Australia wa nywaga e 83 yo a ineetšego ka nako e tletšego modirong wa boboledi wa Dihlatse tša Jehofa o ile a lla ka gore: “Go se kgone ga-ka go ba mafolofolo go etša pele go nnyamišitše. Go e na le gore ke thuše ba bangwe, gona bjale ke be ke nyaka thušo.” Afrika Borwa, Harold o hlalositše ka gore: “Ke ile ka se kgone go šoma lebaka la dikgwedi tše tharo. Selo se segolo-golo seo ke bego ke se kgona ka nako yeo e be e fo ba go sepela-sepela ka serapaneng. Seo se be se ferekanya!”

Go ile gwa nyakega go buiwa bakeng sa go hlomesetša megala-tšhika ka morago ga gore Thomas wa Australia a hlaselwe ke pelo ka lekga la bobedi. O itše: “Ga ke kgone go kgotlelela bohloko gabotse, gomme go buiwa mo go gogolo e be e nyaka e le selo se boima go ka nagana ka sona.” Jorge wa Brazil o hlalositše mabapi le ditla-morago tša go buiwa pelo ka gore: “Ka baka la boemo bja-ka bja tša ditšhelete bjo bo teka-tekago, ke be ke boifa gore ke be ke tla tlogela mosadi wa-ka a nnoši gomme a se na thušo. Ke be ke ikwa gore ke be nka se phele nako e telele.”

Go Boela Sekeng

Ke’ng seo se thušitšego ba bantši gore ba boele sekeng le go dira gore maikwelo a bona a boele a tsepame? Jane o boletše gore: “Ge ke be ke ikwa ke tšhogile, ka mehla ke be ke e-ya go Jehofa ka thapelo gomme ke lahlela merwalo ya-ka go yena ke moka ke e tlogela moo.” (Psalme 55:22) Thapelo e thuša motho gore a be le matla le khutšo ya monagano tšeo di nyakegago ge a lebeletšane le dipelaelo.—Ba-Filipi 4:6, 7.

John le Hiroshi ba ile ba tšea karolo mananeong a go bušetša motho bophelong bjo bobotse. Dijo tše di agago le boithobollo di ile tša matlafatša dipelo tša bona, mo e lego gore bobedi bja bona ba ile ba boela ba thoma go šoma. Le gona ba boletše gore go boela ga bona sekeng monaganong le maikwelong go bakilwe ke matla a matlafatšago a moya wa Modimo.

Thomas o ile a hwetša sebete sa go lebeletšana le go buiwa ka thekgo e tšwago go banababo ba Bakriste. O itše: “Pele ga go buiwa, mogolo o ile a tla go nketela gomme a rapela le nna. Ka kgopelo e tšwago pelong, o ile a kgopela Jehofa gore a mmatlafatše. Bošegong bjoo ke ile ka naganišiša ka thapelo ya gagwe gomme ka ikwa ke šegofaditšwe kudu ka go ba le bagolo ba swanago le yena bao kwelobohloko ya bona ka boyona e lego karolo ya mogato wa go fodiša dinakong tša go ferekana maikwelong.”

Anna yo a tšwago Italy, o ile a lebeletšana ka katlego le kgateletšego ka tsela ye: “Ge ke nyamile, ke nagana ka ditšhegofatšo ka moka tšeo ke šetšego ke di amogetše ke le yo mongwe wa bahlanka ba Modimo le ka ditšhegofatšo tšeo di tlago go tla ka tlase ga Mmušo wa Modimo. Se se nthuša gore ke boele ke be le khutšo.”

Marie o leboga thušo ya Jehofa. Lapa labo le ile la mo ema nokeng gomme o re: “Banabešo ba moya le dikgaetšedi, bao yo mongwe le yo mongwe wa bona a nago le morwalo wo a swanetšego go o rwala ba ile ba dira nako ya go nketela, ba nteletša mogala goba ba romela dikarata. Ke be nka dula bjang ke nyamile ka lerato le ka moka leo ke le bontšhwago?”

Ga go na Dipelo tše di Lewago ke Bodutu

Go itšwe pelo e folago ga se ya swanela go ba pelo e lewago ke bodutu. Thekgo ya lapa le ya bagwera e kgatha tema e kgolo le e kgothatšago mogatong wa go boela sekeng ga bao dipelo tša bona di swanetšego go lokišwa ka tsela ya kgonthe le ya seswantšhetšo.

Michael wa Afrika Borwa o hlalositše ka gore: “Go thata go hlalosetša ba bangwe gore go itlhoboga go bjang. Eupša ge ke tsena ka Holong ya Mmušo, go kgomega moo banabešo ba go bontšhago ke mo go ruthetšago pelo kudu le mo go ntirago gore ke be kaone.” Henry wa Australia le yena o ile a matlafatšwa ke lerato le le tseneletšego le kwešišo tšeo di bontšhitšwego ke phuthego ya gabo. O itše: “Ruri ke be ke nyaka mantšu ao a bonolo a kgothatšo.”

Jorge o lebogile go kgomega mo go tseneletšego mo ba bangwe ba go bontšhitšego ka go thuša lapa la gagwe ka tša ditšhelete go fihlela a kgona go šoma. Olga wa Sweden le yena ka mo go swanago o lebogile thušo e holago yeo e neilwego yena le lapa labo ke banababo rena ba bantši ba moya le dikgaetšedi. Ba bangwe ba be ba mo ela mabenkeleng mola ba bangwe ba be ba hlwekiša ntlo ya gagwe.

Gantši balwetši ba pelo ba swanelwa ke go fokotša go tšea ga bona karolo medirong yeo ba bego ba e rata kudu. Sven wa Sweden o laodišitše ka gore: “Ka dinako tše dingwe ke swanelwa ke go dula ke sa tšee karolo bodireding ge boemo bja leratadima e le bjo bo nago le phefo kudu goba bjo bo tonyago kudu, ka ge bo baka go hunyela ga megala-tšhika. Ke leboga kwešišo yeo bontši bja Dihlatse-gotee le nna bo e bontšhago tabeng ye.” Le gona ge a sa kgone go tsoga malaong, Sven o kgona go theetša diboka ka gobane banababo ka lerato ba mo gatišetša tšona. “Ba dula ba ntsebiša ka seo se diregago ka phuthegong gomme se se ntira gore ke ikwe ke swana le motšea-karolo.”

Marie yo a sa tsogego malaong o ikwa a šegofaditšwe ka ge batho bao a ithutago le bona Beibele ba e-tla go yena. Ka tsela ye o kgona go tšwela pele a bolela ka bokamoso bjo bo kgahlišago bjoo a lebeletšego pele go bjona. Thomas o leboga go kgomega moo a go bontšhwago: “Bagolo e bile bao ba bontšhago go naganela kudu gomme ba fokoditše palo ya dikabelo tšeo ba nneago tšona.”

Malapa a Nyaka Thekgo

Tsela e ka imela ditho tša lapa go etša kamoo e imelago mohlaselwa ka gona. Ba hlaselwa ke kgateletšego e kgolo le poifo. Ge a bolela mabapi le go tshwenyega ga mosadi wa gagwe, Alfred wa Afrika Borwa o itše: “Ge ke boa gae ke e-tšwa sepetlele, mosadi wa-ka o be a fela a ntsoša gantši bošego go bona ge e ba ke sa dutše ke le gabotse, gomme o be a phegelela gore ke etele ngaka dikgweding tše dingwe le tše dingwe tše tharo bakeng sa tlhahlobo.”

Diema 12:25, (PK) e bolela gore “manyami a pelo a imeletša motho fase.” Carlo wa Italy o bolela gore ga e sa le go tloga mola a hlaselwago ke pelo, mosadi wa gagwe yo lerato le yo a neago thekgo “o wetše kgateletšegong.” Lawrence yo a tšwago Australia o itše: “E nngwe ya dilo tšeo di swanetšego go hlokomelwa ke go bona gore molekane wa gago o a hlokomelwa. Kgateletšego e ka ba e kgolo kudu godimo ga molekane.” Ka gona, re swanetše go dula re nagana ka dinyakwa tša bohle ka lapeng, go akaretša le bana. Boemo e ka ba bjo bo imelago kudu maikwelong le mmeleng.

James yo go boletšwego ka yena sehlogong sa rena sa bobedi, o ile a thoma go homola ka morago ga go hlaselwa ga tatagwe ke pelo. O itše: “Ke ile ka ikwa gore ke be nka se sa hlwa ke thaba gape ka ge ke be ke nagana gore motsotsong wa ge ke thoma go dira bjalo, go be go tla direga selo se sebe.” Go botša tatagwe ka poifo yeo a nago le yona le go katanela go hloma poledišano e botse le ba bangwe go ile gwa thuša go imolla pelaelo ya gagwe. Nakong yeo James o ile a dira selo se sengwe se itšego seo se ilego sa kgoma bophelo bja gagwe kudu. O itše: “Ke ile ka oketša thuto ya-ka ya motho ka noši ya Beibele le go lokišeletša diboka tša rena tša Bokriste.” Ka morago ga dikgwedi tše tharo o ile a neela bophelo bja gagwe go Jehofa gomme a bontšha seo ka go kolobetšwa meetseng. O re: “Ga e sa le go tloga nakong yeo, ke hlagoletše tswalano ya kgaufsi kudu le Jehofa. Ruri ke na le mo gontši mo nka mo lebogelago gona.”

Ka morago ga tlhaselo ya pelo, motho o hwetša nako ya go hlahloba bophelo lefsa. Ka mohlala, pono ya John ka dilo e ile ya fetoga. O itše: “O bona go ba lefeela ga go phegelela dilo tša lefase le go lemoga kamoo lerato la lapa le la bagwera le lego bohlokwa ka gona le kamoo re lego bohlokwa ka gona go Jehofa. Tswalano ya-ka le Jehofa, lapa la-ka le banabešo ba moya le dikgaetšedi gona bjale e etišwa pele kudu.” Ge a nagana ka bohloko bja phihlelo ya gagwe, o okeditše ka gore: “Ga ke bone nka kgona go lebeletšana le boemo bjo ka katlego ka ntle le kholofelo ya rena ya nako yeo ka yona dilo tše di tlago go lokišwa. Ge dilo di ntira gore ke gateletšege, ke nagana ka bokamoso, gomme seo se diregago gona bjale se bonala se se bohlokwa gakaalo.”

Ge ba le gare ba feta lethabong le manyaming a tsela e išago go boeleng sekeng, baphologi ba ba tlhaselo ya pelo ba tsemile kholofelo ya bona ka mo go tiilego Mmušong woo Jesu Kriste a re rutilego gore re o rapelele. (Mateo 6:9, 10) Mmušo wa Modimo o tla tlišetša batho bophelo bjo bo sa felego boemong bja phethagalo lefaseng la paradeise. Ka nako yeo bolwetši bja pelo le magole a mangwe ka moka di tla be di tlošeditšwe sa ruri. Lefase le lefsa le sa tla. Ruri, boemo bjo bo thabišago kudu bja bophelo bo sa tla!—Jobo 33:25; Jesaya 35:5, 6; Kutollo 21:3-5.

[Seswantšho go letlakala 1]

Thekgo ya lapa le ya bagwera e kgatha tema e kgothatšago mogatong wa go boela sekeng