Pono ya Beibele

Na Mathata a Gago ke Kotlo e Tšwago go Modimo?

Mosadi yo a lego nywageng ya gagwe ya magareng ya bo-50, ka morago ga go kwa gore o na le bolwetši bja kankere, o bolela gore: “Ke nagana gore Modimo o a nkotla.” Ge a naganišiša ka bobe bjoo a bo dirilego nywageng ya pejana, o phetha ka gore, “Ye e swanetše go ba e le tsela ya Modimo ya go mpotša gore ke dirile sebe.”

BATHO ba bantši ge ba lebane le mathata, ba nagana gore Modimo o ba otla ka baka la bobe bjoo ba bo dirilego nakong e fetilego. Ge ba welwa ke mathata a mantši go sa letelwa, ba ka no lla ba re: “Ke ka baka la’ng se se diragalela nna? Ke dirile’ng?” Na re swanetše go phetha ka gore mathata a rena ke pontšho ya go se amogelwe ke Modimo? Na ruri mathata a rena ke kotlo e tšwago go Modimo?

Barapedi ba Botegago ba ile ba Lebeletšana le Mathata

Ela hloko seo Beibele e se bolelago mabapi le monna yo a bitšwago Jobo. Gatee-tee ka ntle le temošo, o ile a lahlegelwa ke lehumo la gagwe. Se se latelago, bana ba gagwe ba lesome ba ile ba bolawa ke ledimo. Gatee-tee ka morago ga moo, o ile a hlaselwa ke bolwetši bjo bo fokodišago le bjo bo šišimišago. (Jobo 1:13-19; 2:7, 8) Mathata a bjalo a ile a dira gore Jobo goeletše ka gore: “’Atla sa Modimo se nkôtlile.” (Jobo 19:21) Go swana le batho ba bantši lehono, go molaleng gore Jobo o be a nagana gore Modimo o be a mo otla.

Lega go le bjalo, Beibele e re utollela gore pele ga ge diteko tša Jobo di ka thoma, Modimo o ile a mo hlalosa e le ‘motho wa bothakga le wa go loka, le wa go boifa Modimo, le wa go ila bobe.’ (Jobo 1:8) Go ya ka mantšu a a bontšhago gore o amogelwa ke Modimo, go molaleng gore mathata a Jobo e be e se kotlo e tšwago go Modimo.

Ke therešo gore Beibele e tletše ka dipego

tša batho ba lokilego bao ba ilego ba lebeletšana le mathata. Gaešita le ge e be e le mohlanka yo botegago wa Modimo, Josefa o ile a kgotlelela go ba kgolegong ka nywaga e mentši a se na molato. (Genesi 39:10-20; 40:15) Mokriste yo a botegago Timotheo o be a ‘fela a tlelwa ke bolwetši.’ (1 Timotheo 5:23) Gaešita le Jesu Kriste yo a sa kago a dira sebe, o ile a swarwa gampe pele a ka hwa lehu le bohloko. (1 Petro 2:21-24) Ka gona, ke mo go fošagetšego go nagana gore mathata e swanetše go ba e le pontšho ya gore ga re kgahliše Modimo. Eupša ge e ba Modimo a sa ikarabele bakeng sa mathata a rena, gona ke mang yo a ikarabelago ka ona?

Sebaki sa Mathata a Rena

Beibele e bontšha gore Sathane Diabolo ke yena a bakilego mathata a Jobo. (Jobo 1:7-12; 2:3-8) Go feta moo, e bontšha gore Sathane ke mothopo o mogolo wa mathata a rena lehono ge e re: “Go madimabe lefase le lewatle, gobane Diabolo o theogetše go lena a galefile kudu, ka ge a tseba gore o na le nako e kopana.” (Kutollo 12:12) Bjalo ka “mmuši wa lefase le,” Sathane o ile a tutuetša batho ba bantši go dira dilo tše mpe tšeo di ilego tša feleletša ka mathata a magolo le pelo e bohloko.—Johane 12:31; Psalme 37:12, 14.a

Lega go le bjalo, ga se ra swanela go kitimela go bea Diabolo molato bakeng sa mathata le ge e le afe ao re lebeletšanago le ona. Ka baka la sebe sa leabela le go se phethagale, re na le tshekamelo ya go dira diphetho tše sego bohlale tšeo di ka re bakelago mathata. (Psalme 51:5; Baroma 5:12) Ka mohlala, akanya ka monna yo a kgethago go se je ka mo go swanetšego e bile a sa khutše ka mo go lekanego. Ge e ba se se feleletša ka mathata a magolo a tša maphelo, na o swanetše go bea Diabolo molato? Aowa, monna yo o fo ba a hwetša ditla-morago tše bohloko ka baka la diphetho tša gagwe tše sego bohlale. (Bagalatia 6:7) Boemong bjo bjalo, go fo ba bjalo ka ge seema sa Beibele se bolela, ge se re: “Motho ó senyetšwa tsela ke bošilo by’axwe.”—Diema 19:3.

Mafelelong, re swanetše go lemoga gore dilo tše dintši tšeo di re diragalelago tše sa kgahlišego e fo ba e le ditla-morago tša “nako le ditiragalo tšeo di sa letelwago.” (Mmoledi 9:11 NW) Nagana ka motho yo a ikhwetšago a le ledimong le legolo la pula. Gore o tla koloba ganyenyane goba o tla koloba ka mo go feletšego, go ka fo ithekga ka gore o tla be a le kae ge pula e thoma go na. Ka mo go swanago, ‘dinakong tše tše di hlobaetšago tšeo go lego thata go lebeletšana le tšona,’ maemo a sa kgahlišego a ka fetoga ka bjako gomme a ba mathata a magolo. (2 Timotheo 3:1-5) Taba ya gore re ka kgomega go fihla bokgoleng bofe gantši e ithekgile ka nako le maemo, tšeo re ka bago le taolo e nyenyane go tšona goba ra se be le yona. Ka gona, na se se bolela gore re tla dula re e-na le mathata?

Kgaufsinyana Mathata ka Moka a tla Fela

Go a thabiša gore kgaufsinyana Jehofa Modimo o tla fediša mathata ka moka. (Jesaya 25:8; Kutollo1:3; 21:3, 4) Ge re sa letile, o bontšha gore o tloga a tshwenyegile ka rena ka go re “ruta” le ka go re nea “khomotšo e tšwago Mangwalong” e le gore re ka kgona go lebeletšana le diteko gona bjale ka ge re lebeletše pele bokamosong bjoo bjo bo kgahlišago bjo bo letšego ka pele. (Baroma 15:4; 1 Petro 5:7) Ka nako yeo, bao Modimo a bonago ba lokile ba tla phela ka mo go sa felego lefaseng le lefsa, leo le se nago mohuta le ge e le ofe wa bothata.—Psalme 37:29, 37.

[Mongwalo wa tlase]

NA O ILE WA IPOTŠIŠA?

◼ Na ke badiri ba bobe feela bao ba lebeletšanago le mathata?—Jobo 1:8.

◼ Na re ka bea Diabolo molato bakeng sa mathata a rena ka moka?—Bagalatia 6:7.

◼ Na mathata a tla dula a le gona?—Kutollo 21:3, 4.

[Ntlhakgolo go letlakala 30]

“Nako le ditiragalo tšeo di sa letelwago di ba wela ka moka.”—Mmoledi 9:11