Dikeletšo Tšeo di Dirago Gore re Thabele Bophelo ka Lapeng

Banna, Ratang Basadi ba Lena

“Banna ba swanetše go rata basadi ba bona bjalo ka mebele ya bona. Yo a ratago mosadi wa gagwe o a ithata, gobane ga go na motho yo a kilego a hloya mmele wa gagwe; eupša o a o fepa le go o babalela.”—BAEFESO 5:28, 29.

Monna ke hlogo ya lapa. (Baefeso 5:23) Eupša monna yo botse ga a kgadimole ba lapa la gagwe e bile ga a ba gapeletše go dira dilo. O tšeela mosadi wa gagwe godimo, o hlokomela dinyakwa tša gagwe e bile o a mo naganela. O leka ka matla go dira gore mosadi wa gagwe a dule a thabile e bile ga a dule a nyaka gore go dirwe tšeo yena a di nyakago. (Bafilipi 2:4) O botša mosadi wa gagwe gore o ikwa bjang le gore o nagana eng e bile o theetša seo mosadi wa gagwe a se bolelago. Ga a ‘galefele mosadi wa gagwe o šoro’ e bile ga a mo roge goba a mo hlaba ka mantšu.—Bakolose 3:19.

Basadi, Hlomphang Banna ba Lena

“Mosadi o swanetše go ba le tlhompho e tseneletšego go monna wa gagwe.” —BAEFESO 5:33.

Ge mosadi a hlompha monna wa gagwe e bile a thekga diphetho tša gagwe, o dira gore ka lapeng go be le khutšo. Ge monna wa gagwe a dira phošo, ga a mo nyatše eupša o dula a theošitše maswafo e bile a mo hlompha. (1 Petro 3:4) Ge a nyaka go boledišana le monna wa gagwe ka bothata bjo bo itšego, o kgetha nako ya maleba e bile o boledišana le yena ka tlhompho.—Mmoledi 3:7.

Tshepagalela Molekane wa Gago

‘Monna o tla kgomarela mosadi wa gagwe gomme bona e tla ba nama e tee.’—GENESI 2:24.

Ge monna le mosadi ba nyalana, e ba bagwera ba bagolo. Ka gona, banyalani ba swanetše go šoma ka thata gore ba tiiše lenyalo la bona ka go dula ba boledišana go tšwa pelong le go direlana dilo tše dibotse. Le gona ba swanetše go tshepagalelana ka gore ba se be le thobalano le motho yo mongwe. Motho yo a sa botegelego molekane wa gagwe o mo kweša bohloko kudu. Le gona go se botege go ka thuba lapa.—Baheberu 13:4.

Batswadi, Tlwaetšang Bana ba Lena

“Tlwaetša [ngwana] go ya ka tsela yeo a swanetšego go sepela ka yona; le ge a tšofetše, a ka se e lahle.”—DIEMA 22:6.

Modimo o file batswadi mošomo wa go tlwaetša bana ba bona. Batswadi ba swanetše go ruta bana ba bona gore ba itshware bjang ba be ba ba beele mohlala o mobotse. (Doiteronomio 6:6, 7) Ge ngwana a sa kwe, motswadi yo bohlale ga a galefe ka mo go feteletšego. O ‘akgofela go kwa, a diega go bolela a ba a diega go galefa.’ (Jakobo 1:19) Ge motswadi a bona gore ngwana o swanetše go phošollwa, ga a mo phošolle a galefile eupša o mo phošolla ka lerato.

Bana, Ekwang Batswadi ba Lena

“Bana, kwang batswadi ba lena . . . ‘Godiša tatago le mmago.’”—BAEFESO 6:1, 2.

Bana ba swanetše go kwa batswadi ba bona le go ba hlompha kudu. Ge bana ba hlompha batswadi ba bona, ba dira gore ka lapeng go be le lethabo. Bana bao ba šetšego ba godile ba bontšha gore ba hlompha batswadi ba bona ka go ba hlokomela. Ba ka ba bontšha gore ba a ba hlokomela ka go netefatša gore magae a bona a boemong bjo bobotse le ka go ba thuša ka ditšhelete.—1 Timotheo 5:3, 4.