Thuto 8

Bophelo bja Lapa bjo bo Kgahlišago Modimo

Boemo bja monna ka lapeng ke bofe? (1)

Monna o swanetše go swara mosadi wa gagwe bjang? (2)

Ke boikarabelo bofe bjo tate a nago le bjona? (3)

Karolo ya mosadi ka lapeng ke efe? (4)

Ke’ng seo Modimo a se nyakago go batswadi le go bana? (5)

Pono ya Beibele ka karogano le tlhalo ke efe? (6, 7)

1. Beibele e re monna ke hlogo ya lapa la gagwe. (1 Ba-Korinthe 11:3) Monna o swanetše go ba le mosadi o tee feela. Ba swanetše go nyalana ka tshwanelo ka molao.—1 Timotheo 3:2; Tito 3:1.

2. Monna o swanetše go rata mosadi wa gagwe go fo etša ge a ithata. O swanetše go mo swara ka tsela yeo Jesu a swarago balatedi ba gagwe ka yona. (Ba-Efeso 5:25, 28, 29) Ga a swanela go betha mosadi wa gagwe goba go mo tlaiša ka tsela le ge e le efe. Go e na le moo, o swanetše go mo hlompha le go mo godiša.—Ba-Kolose 3:19; 1 Petro 3:7.

3. Tate o swanetše go šoma ka matla gore a hlokomele lapa la gagwe. O swanetše go nea mosadi wa gagwe le bana dijo, diaparo le ntlo. Tate gape o swanetše go nea dinyakwa tša moya tša lapa la gagwe. (1 Timotheo 5:8) O etelela pele go thušeng lapa la gagwe go ithuta ka Modimo le merero ya Gagwe.—Doiteronomio 6:4-9; Ba-Efeso 6:4.

4. Mosadi o swanetše go ba mothuši yo botse wa monna wa gagwe. (Genesi 2:18) O swanetše go thuša monna wa gagwe go ruteng le go tlwaetšeng bana ba bona. (Diema 1:8) Jehofa o nyaka gore mosadi a hlokomele lapa la gagwe ka lerato. (Diema 31:10, 15, 26, 27; Tito 2:4, 5) O swanetše go hlompha monna wa gagwe kudu.—Ba-Efeso 5:22, 23, 33.

5. Modimo o nyaka gore bana ba kwe batswadi ba bona. (Ba-Efeso 6:1-3) O nyaka gore batswadi ba rute le go phošolla bana ba bona. Batswadi ba swanetše go tšea nako le bana ba bona gomme ba ithute Beibele le bona, ba hlokomela dinyakwa tša bona tša moya le tša maikwelo. (Doiteronomio 11:18, 19; Diema 22:6, 15) Batswadi le ka mohla ga se ba swanela go laya bana ba bona ka tsela e šoro le e sehlogo.—Ba-Kolose 3:21.

6. Ge balekane ba lenyalo ba e-na le mathata a go phedišana gotee, ba swanetše go leka go diriša keletšo ya Beibele. Beibele e re tutueletša go bontšha lerato le go ba bao ba lebalelago. (Ba-Kolose 3:12-14) Lentšu la Modimo ga le kgothaletše karogano e le tsela ya go rarolla mathata a manyenyane. Eupša mosadi a ka kgetha go tlogela monna wa gagwe ge e ba (1) monna ka manganga a gana go fepa lapa la gagwe, (2) monna e le yo šoro kudu mo e lego gore bophelo bja mosadi bo kotsing, goba (3) kganetšo ya monna e šoro kudu e dira gore mosadi a se ke a kgona go rapela Jehofa.—1 Ba-Korinthe 7:12, 13.

7. Balekane ba lenyalo ba swanetše go botegelana. Bootswa ke sebe malebana le Modimo le molekane wa yo mongwe. (Ba-Hebere 13:4) Dikopano tša botona le botshadi tša ka ntle ga lenyalo ke lona lebaka feela la Mangwalo bakeng sa tlhalo leo le dumelelago go nyala goba go nyalwa gape. (Mateo 19:6-9; Ba-Roma 7:2, 3) Jehofa o hloile ge batho ba hlala ka ntle ga mabaka a Mangwalo gomme ba nyalana le motho yo mongwe.—Maleaki 2:14-16.

[Pictures on page 16, 17]

Modimo o nyaka gore batswadi ba rute bana ba bona le go ba phošolla

[Seswantšho go letlakala 17]

Tate yo lerato o fepa lapa la gagwe nameng le moyeng