Dihlodi tše 12

BONA dienywa tše banna ba ba di rwelego. Bona kamoo lešihla le la diterebe e lego le legolo ka gona. Go be go nyakega banna ba babedi gore ba le rwale ka kota. Le gona bona mago le digarenate. Dienywa tše tše dibotse di be di etšwa kae? Di be di etšwa nageng ya Kanana. Gopola gore Kanana ke moo go kilego gwa dula Aborahama, Isaka le Jakobo. Eupša ka baka la ge go ile gwa ba le tlala moo, Jakobo le lapa la gagwe ba ile ba hudugela Egipita. Ga bjale mo e ka bago nywaga e 216 ka morago, Moshe o etelela Baisiraele pele go ba bušetša Kanana. Ba fihlile lefelong la lešokeng leo le bitšwago Kadeshe.

Nageng ya Kanana go be go dula batho ba babe. Ka gona Moshe o ile a roma dihlodi tše 12, a re go tšona: ‘Eyang le yo bona gore ke batho ba bakae bao ba dulago nageng yeo le gore ba na le matla gakaakaang. Le bone ge e ba naga yeo e nonne go ka tšweletša dimela. Le gona le tleng le tše dingwe tša dienywa tša naga yeo.’

Ge dihlodi tše di boetše Kadeshe, di ile tša re go Moshe: ‘Ruri ke naga e botse.’ E le go hlatsela se, di ile tša bontšha Moshe tše dingwe tša dienywa tša moo. Eupša tše 10 tša dihlodi tše di ile tša re: ‘Batho bao ba dulago moo ke ba batelele le ba matla. Ba tla re bolaya ge e ba re ka leka go tšea naga ya bona.’

Baisiraele ba ile ba tšhoga ge ba ekwa se. Ba re: ‘Go be go tla ba kaone ge nkabe re ile ra ikhwela nageng ya Egipita goba ra ikhwela gona mo lešokeng. Re tla bolawa ntweng gomme basadi ba rena le bana ba rena ba tla thopša. A re ikgetheleng moetapele o mongwe legatong la Moshe, re boeleng Egipita!’

Eupša tše pedi tša dihlodi tše di be di bota Jehofa gomme di ile tša leka go homotša setšhaba. Maina a tšona e be e le Joshua le Kalebe. Ba ile ba re: ‘Le se ke la boifa. Jehofa o na le rena. Go tlo ba bonolo gore re tšee naga yeo.’ Eupša setšhaba ga se sa ka sa theetša. E bile se be se nyaka go bolaya Joshua le Kalebe.

Se se ile sa galefiša Jehofa kudu gomme a re go Moshe: ‘Ga go le o tee wa batho bao ba nago le nywaga e 20 go ya godimo yo a tlago go tsena nageng ya Kanana. Ba bone mehlolo yeo ke e dirilego Egipita le lešokeng eupša ba sa dutše ba sa mpote. Ka gona, ba tla ralala lešokeng nywaga e 40 go fihlela ge wa mafelelo go bona a ehwa. Ke Joshua le Kalebe feela bao ba tlago go tsena nageng ya Kanana.’