Dihlodi tše Lesomepedi

Baisiraele ba ile ba tloga Thabeng ya Sinai, ba feta lešokeng la Parane gomme ba ya lefelong leo le bitšwago Kadeshe. Ge ba fihla moo, Jehofa a re go Moshe: ‘Roma banna ba 12 go tšwa molokong o mongwe le o mongwe gore ba ye go hlola naga ya Kanana, e lego naga yeo ke tlago go e nea Baisiraele.’ Ka gona Moshe a kgetha banna ba 12 gomme a re go bona: ‘Eyang le hlole naga ya Kanana gomme le bone ge e ba re ka kgona go lema go yona. Le bone ge e ba batho ba moo ba na le matla goba re ka kgona go ba fenya, le bone le ge e ba ba dula ditenteng goba metseng.’ Banna bao ba 12, bao gare ga bona go bego go na le Joshua le Kalebe, ba tloga ba ya Kanana.

Ka morago ga matšatši a 40, banna bao ba ile ba boa ba swere mago, digarenate le diterebe. Ke moka ba re go Moshe: ‘Naga yeo o re romilego go yona ke e botse, eupša batho ba gona ba a tšhoša e bile metse ya bona e na le maboto a magolo.’ Eupša Kalebe a re: ‘Re ka ba fenya. A re yeng gona bjale!’ Na o a tseba gore ke ka baka la eng Kalebe a boletše bjalo? Ke ka baka la gore yena le Joshua ba be ba bota Jehofa. Eupša banna bale ba bangwe ba lesome ba re: ‘Aowa! Batho ba naga yela ba a tšhoša, ba swana le makgema! Ge re be re eme kgauswi le bona, o be okare re ditšie.’

Ge Baisiraele ba ekwa seo, ba nyama. Ke moka ba thoma go lla ba re: ‘A re kgetheng moetapele yo mongwe re boeleng Egipita. Re ka se no ya Kanana gore re yo bolawa.’ Joshua le Kalebe ba re: ‘Tshepang Jehofa gomme le se ke la tšhoga. O tla re šireletša.’ Eupša Baisiraele ba se theetše. Ba ile ba ba ba nyaka go bolaya Joshua le Kalebe!

Jehofa o ile a dira eng? O ile a re go Moshe: ‘Baisiraele ke ba diretše dilo tše dintši, eupša ga ba nyake go nkwa. Bjale ke tlo dira gore ba dule mo lešokeng mengwaga e 40, e bile ba tlo hwela moo. Ke feela bana ba bona, Joshua le Kalebe bao ba tlago go fihla nageng yeo ke ba tshepišitšego yona.’