Kgaolo 8

Baphologi ba Tšwa Ditšhabeng Tšohle

1. Ke kholofetšo efe e dirilwego go Aborahama yeo e bontšhago gore go amogela ga Modimo “meloko ka moka” ya batho go a kgonega?

JEHOFA o kgahlišwa kudu ke batho ba ditšhaba tšohle le merafe yohle. O dirile tokišetšo e le gore malapa ka moka a lefase a tle a thabele go amogelwa ke yena le go šegofatšwa ke yena. Jehofa go Aborama (Aborahama), setlogolwana sa Seme morwa wa Noage, o itše: “Tloxêla lefase lé la xeno, le metswalô ya xaxo, le ngwakô wa tat’axo; O yê naxeng ye ke tl’o xo Xo laetša yôna. Xobane ke tlo Xo dira sethšaba se sexolo; ke tlo Xo šexofatša ka xodiša leina la xaxo; ’me wêna O tlo ba thšexofatšô. Ke tlo šexofatša ba ba Xo šexofatšaxo, ka roxa ba ba Xo roxaxo; ’me meloko ka moka ya lefase e tlo šexofatšwa ka wêna.” (Genesi 12:1-3; Ditiro 7:2-4) “Meloko ka moka,” ruri seo se akaretša le ka rena lehono go sa šetšwe setšhaba seo re tswetšwego go sona goba leleme leo re le bolelago.—Psalme 65:2.

2. (a) Go swana le Aborahama, ruri re swanetše go ba le seka sefe? (b) Aborahama o ile a nea bohlatse bjang bja seka se, go etša ge go bontšhitšwe go Ba-Hebere 11:8-10?

² Motho yeo Jehofa a ilego a bolela kholofetšo ye go yena e be e le monna wa tumelo, go etša kamoo le rena re swanetšego go ba le tumelo ge e ba re tla ba le karolo tšhegofatšong e tšwago go Modimo yeo e holofeditšwego mo. (Jakobo 2:23; Ba-Hebere 11:6) Tumelo ya Aborahama e be e se feela yeo e lego ya bofora, eupja e be e sepedišana le mediro. E ile ya mo dira gore a huduge Mesopotamia gomme a ye lefaseng la kgole leo le ka mohla a bego a se a ka a le bona. “Ke ka tumêlô xe a diilêla naxeng yeo a e holofeditšwexo, xwa ba byalo ka e ke xa se naxa ya xaxwe,” gomme a se ke a dula motseng lege e le ofe wa mebušo yeo e bego e le moo. “Xobane ó be a letetše motse [Mmušo wa Modimo] wo o tl’o xo thêwa wa tia, woo mothei le moaxi wa wôna e lexo Modimo.”—Ba-Hebere 11:8-10.

3. Ke moleko ofe o thata wa tumelo woo Aborahama a ilego a feta tlase ga wona mabapi le Isaka?

³ Ge Aborahama a e-na le nywaga e 100 gomme Sara mosadi wa gagwe a e-na le e 90, Jehofa o ile a ba šegofatša ka mohlolo ka morwa, e lego Isaka. Aborahama o ile a feta molekong o mogolo wa tumelo le go kwa Modimo ge e le mabapi le morwa yo. Jehofa o ile a laela Aborahama gore a tšee Isaka yoo ka nako yeo e bego e le lesogana gore a ye lefaseng la Moria gomme a ye go mo dira sehlabelo moo. Aborahama ka go dumela gore Modimo a ka kgona go bušetša morwa wa gagwe bophelong ka tsogo, ruri o ile a tšwela pele ka go kwa. (Ba-Hebere 11:17-19) Isaka ka go kwa tatagwe, o be a šetše a tlemilwe a beilwe aletareng gomme Aborahama o be a swere thipa ka seatla sa gagwe yeo a bego a tla mmolaya ka yona, ge morongwa wa Jehofa a šwahlela. Moleko o be o fihlile ntlheng yeo e bego e lekane go hlatsela gore Aborahama o be a ka se ke a tima Modimo selo. Ka gona, Modimo o ile a tiiša kgwerano ya gagwe le Aborahama ka ge Beibele e bolela:

4. Lebakeng leo, ruri ke kholofetšo efe e nngwe e bohlokwa yeo Modimo a ilego a e dira mabapi le batho ba ditšhaba ka moka?

⁴ “[Jehofa] o re: Ke ênnê ka Nna, ka xe ke bone se O se dirilexo, Ò sa ka wa ntima morwa wa xaxo e lexo o tee. Ka re: Ke tlo Xo sexofatša xaxolo ’me bana ba xaxo ke tlo ba atiša xaxolo byalo ka dinaledi tša lexodimong, le byalo ka lešabašaba la lebopong la lewatlê. ’Me bana ba xaxo e tlo ba beng ba dikxôrô tša manaba a bôná. Xomme dithšaba ka moka tša lefase di tlo šexofala ka peu ya xaxo, ka ’baka la xobane O kwele lentšu la-ka.”—Genesi 22:15-18.

5. (a) Ke’ng seo se bego se swantšhetšwa ke go ikemišetša ga Aborahama go dira Isaka sehlabelo? (b) Batho ba “roxa” bjang Aborahama o Mogolo ka go phethagatša Genesi 12:3, gomme ka mafelelo afe? (c) Re ka mo “šexofatša” bjang?

⁵ Ge re lemoga gore Aborahama o Mogolo ke Jehofa le gore Isaka o be a swantšhetša Jesu Kriste, gona re ka thoma go lemoga kamoo ditiragalo tše e lego tša bohlokwa ka gona go rena. Ge e le gabotse, seo se bolelago bokamoso bja rena, ke kamoo re itshwarago ka gona malebana le Jehofa Modimo. Tebelelo ya bophelo bjo bo sa felego ke yeo e kgonegago go rena ka gobane Modimo o neile e le ka kgonthe Morwa wa gagwe yo a tswetšwego a nnoši e le sehlabelo sa dibe tša rena, go etša ge go bontšhitšwe ke go lekwa ga Aborahama gore a dire Isaka sehlabelo. (Johane 3:16) Mang le mang yo a phegelelago go “roxa” Jehofa, a mo nyatša goba a nyenyefatša merero ya gagwe e lerato, ruri o tla ba thogakong yeo e tlago go bolela tshenyego ya gagwe ya ka mo go sa felego. (Bapiša le 1 Samuele 3:12-14; 2:12.) Eupja, ge e ba re le batho bao ba lebogago, gona re tla “šexofatša” Aborahama o Mogolo. Bjang? Ka go dumela e le ka kgonthe gore dilo tše di botse ka moka di tšwa go Jehofa, go akaretša le mpho e se ya swanelago ya bophelo ka Morwa wa gagwe. Le gona, re tla botša ba bangwe ka go loka ga Jehofa le dika tše dikgolo tša bogoši bja gagwe. (Jakobo 1:17; Psalme 145:7-13) Ka tsela ye, re ipea lenakeng la bao ba tlago go amogela ka mehla le mehla ditšhegofatšo tše di tšwago go yena.

“PEU” E HOLOFEDITŠWEGO YA ABORAHAMA

6. (a) Ke mang yo e lego “peu” ya pele ya Aborahama? (b) Re ka hwetša bjang tšhegofatšo yeo e tlago ka yena?

⁶ Jehofa o rerile mmušo wa go loka wa legodimo e le karolo ya thulaganyo ya gagwe ya go šegofatša batho. Jesu o ile a belegwa e le setlogolwana sa Aborahama, e le ngwana goba “peu” ya gagwe e bohlokwa kudu, gomme ke godimo ga gagwe moo Jehofa a beilego bogoši. (Ba-Galatia 3:16; Mateo 1:1) Ka gona, ka ge go bontšhitšwe ka keno ya Modimo go Aborahama, ruri ke ka Jesu Kriste moo batho ba tšwago ditšhabeng ka moka tša lefase ba tlago go šegofatšwa. Na o dira seo se nyakegago e le gore o tle o ikhweletše tšhegofatšo yeo? Ka mohlala, na tsela ya gago ya bophelo e bontšha gore o leboga kamoo sehlabelo sa bophelo bja Jesu e lego sa bohlokwa ka gona go wena? Na o ikokobetša e le ka kgonthe taolong ya gagwe ka ge e le Kgoši?—Johane 3:36; Ditiro 4:12.

7. (a) Ke bomang gape bao ba akaretšwago ‘peung ya Aborahama’? (b) Re tseba bjang gore ga se bohle bao ba direlago Modimo ka go botega bao ba tlago go ya legodimong?

⁷ Moapostola Johane o ile a newa pono ya boporofeta ya ditiragalo tša legodimo tšeo go tšona a bonego ba bangwe bao ba nago le Jesu Kriste Thabeng ya Sione ya legodimo. Le bona ke karolo ya “peu ya Aborahama.” Ka ge go boletšwe go Kutollo 14:1-5, ruri ba ‘rekolotšwe lefaseng’ gomme ba dira palo ya 144 000. (Ba-Galatia 3:26-29) Ba akaretša bomang? Beibele e bontšha gabotse gore le ka mohla ga se ya ka ya ba morero wa Modimo gore a iše batho ka moka bao ba lokilego legodimong. (Mateo 11:11; Ditiro 2:34; Psalme 37:29) Tokelo e kgolo ya go ba le kabelo gotee le Kriste Mmušong wa legodimo e lekanyeditšwe feela go “mohlatswana o monyenyane,” bao e tlago go ba magoši le baperisita gotee le yena ka nywaga e sekete.—Luka 12:32; Kutollo 5:9, 10; 20:6.

8. Go kgethwa ga “mohlatswana o monyenyane” go thomile neng, gomme go tšwela pele ka nako e kaakang?

⁸ Go kgethwa ga ‘mohlatswana woo o monyenyane’ go ile gwa tšwela pele bjang? Taletšo e bohlokwa ya go ba le kabelo Mmušong wa legodimo e ile ya thoma ka go lebišwa go ba-Isiraele ba tlhago. Eupja ka baka la go hloka tumelo ga bona, ga se ba ka ba tšweletša palo e tletšego ya 144 000. Ka gona, ka morago go ile gwa laletšwa ba-Samaria le batho ba ditšhaba ka moka. (Ditiro 1:8) Baji ba bohwa ba pele ba Kriste ba ile ba tlotšwa ka moya o mokgethwa ka Pentekoste ya 33 Mehleng ya Rena. Go kgethwa ga sehlopha se go tšwela pele go fihlela ge ba 144 000 ba ka swawa ke Modimo e le bao a ba amogelago. Ka morago, go elwa hloko gore go kgobokanywe batho bao ba tlago go phela lefaseng e le balata ba lebogago ba mmušo wa legodimo.

9. (a) Ke dipolelo dife ka Beibeleng tšeo di dirišwago go sehlopha se sa legodimo? (b) Ke bomang bao ba bego ba swantšheditšwe ke ba-Isiraele ba tlhago?

⁹ Bao e lego baji ba bohwa ba Mmušo wa legodimo gotee le Kriste ba bolelwa Mangwalong e le “bahlaolwa,” “bakxêthwa,” e lego batho bao ba ‘tloditšwego ke Modimo.’ (2 Timotheo 2:10; 1 Ba-Korinthe 6:1, 2; 2 Ba-Korinthe 1:21) Le gona ba hlaloswa ba le gotee e le “monyalwa” wa Kriste. (Kutollo 21:2, 9; Ba-Efeso 5:22-32) Ge ba lebelelwa ka ditsela tše dingwe, ruri ba bitšwa ‘banababo’ Kriste, “baji ba bohwa . . . le Kriste” le “bana” ba Modimo. (Ba-Hebere 2:10, 11; Ba-Roma 8:15-17; Ba-Efeso 1:5) Go sa šetšwe setšhaba se ba tšwago go sona, ruri ba bolelwa gabotse ka tsela ya moya e le “ba-Isiraele ba Modimo.” (Ba-Galatia 6:16; Ba-Roma 2:28, 29; 9:6-8) Ge Jehofa a be a fediša kgwerano ya gagwe ya Molao le ba-Isiraele ba nama, ruri o ile a tliša ba-Isiraele ba moya kgweranong e mpsha gotee le yena. Eupja go dirišana ga gagwe le ba-Isiraele ba nama nakong ya ge ba be ba sa le tlase ga Molao, go dirile mohlala wa dilo tšeo di bego di sa e-tla. (Ba-Hebere 10:1) Ka gona, ke bomang bao ba bego ba swantšhetšwa ke setšhaba sa Isiraele ya nama, seo se bego se kgethilwe ke Modimo go ba ‘baruiwa ba gagwe’? Ditherešo di šupa ba-Isiraele ba moya bao Modimo a ba kgethilego go buša le Kriste legodimong. (Bapiša Ekisodo 19:5, 6 le 1 Petro 1:3, 4 le 2:9.) Bona gotee le Kriste ba dira sedirišwa seo ka sona ditšhegofatšo di tlago go tlišwa go ba bangwe bohle bao ba kwago gare ga batho. Go lemoga se ke gona mo go dirago gore Beibele e kwešišege.

BAO BA ŠEGOFATŠWAGO KA “PEU”

10. Ke bomang bao ba swantšhetšwago ke barapedi bao e bego e se ba-Isiraele ba Jehofa?

¹⁰ Nakong ya ge Modimo a be a dirišana ka tsela e kgethegilego le setšhaba sa Isiraele, ruri o ile a ba a direla batho bao e bego e se ba setšhaba seo ditokišetšo tša lerato, e lego bao dipelo tša bona di bego di ba šikinyetša go ba le karolo borapeding bja therešo le ba-Isiraele. Pegong ya Beibele go bolelwa taba e tsebjago kudu ka bona. Na le bona ba na le bao ba ba swantšhetšago ba mehleng yeno? Ee, ba na le bona e le ka kgonthe. Ba swantšha ka ditsela tše dintši batho bao e sego ba-Isiraele ba moya, eupja e le bao ba thabelago tebelelo e kgahlišago ya bophelo bjo bo sa felego e le balata ba lefase ba Mmušo wa Modimo. Ba ke bao Modimo a boletšego ka bona go Aborahama, ge a be a re batho ba “dithšaba ka moka tša lefase” ba tla itšhegofatša ka “peu” ya gagwe.—Genesi 22:18; Doiteronomio 32:43.

11. (a) Ke polelo efe yeo e ilego ya dirwa ka sehlopha se ge go be go kgakolwa tempele ya Salomo? (b) “Ba mathokô” ba ‘diilela go Jehofa’ bjang mehleng ya rena, go etša ge go boletšwe e sa le pele go Jesaya 56:6, 7?

¹¹ Ka mehla e bile morero wa Modimo gore batho ka moka ba be gotee borapeding bja therešo. Ka mo go swanetšego, ge go be go kgakolwa tempele e agilwego ke Salomo kua Jerusalema, ruri kgoši e ile ya rapela gore Jehofa a kwe dithapelo tša baeng bao ba bego ba rata go ba borapeding bjo bo amogelwago gotee le ba-Isiraele. (2 Koronika 6:32, 33) Modimo go Jesaya 56:6, 7 o holofeditše ka gore: “’Me ba mathokô ba xo diilêla xa [Jehofa], ’me ba mo dirêla, ba rata ’ina la [Jehofa] ’me ya ba balata ba [Jehofa], . . . Ke tlo ba tliša fá thabeng e kxêthwa ya-ka, ka ba thabiša Ntlong ya-ka ya thapêlô; . . . xobane ’ina la Ntlo ya-ka e tlo ba lé: Ngwakô wa thapêlô wa dithšaba tšohle.” Ge go lebelelwa moya o bontšhwago mo, ruri “ba mathokô” ba mehleng yeno ba kgoboketšwa ba e-tšwa ditšhabeng ka moka e sego fela ka go ba babogi ba sa elego dilo hloko, eupja ka go ba batho bao ba ‘diilelago ga Jehofa.’ Ba dira se ka go neela maphelo a bona go yena, ba bontšha se ka go kolobetšwa meetseng gomme ba mo direla ka mokgwa wo o bontšhago lerato la bona la go rata ‘leina la Jehofa’ gotee le dilo ka moka tšeo le di emelago.—Mateo 28:19, 20.

12. Molao wa Moše o bontšha bjang ge e ba bao ba holofelago go ba balata ba lefase ba Mmušo wa Modimo ba swanetše go bapa le melao e phagamego yeo e dirišwago go ba-Isiraele ba moya?

¹² Ga se gore go bona go nyakega potego e nyenyane go fetwa ke yeo e nyakegago go bao e lego Bakriste ba tloditšwego. Jehofa tlase ga Molao wa Moše, o be a nyaka gore “modiiledi” yo a bago borapeding bja therešo a phele ka molao o swanago wo o bego o tlema ba-Isiraele. (Numeri 15:15, 16) Tswalano magareng a bona e be e ka se ke ya ba yeo ya go kgotlelelana feela, eupja e be e tla ba ya lerato la kgonthe. (Lefitiko 19:34) Ka mokgwa o swanago, bao ba swantšheditšwego ke badiiledi ba rata go dira gore maphelo a bona a dumelelane e le ka kgonthe le melao ya Jehofa le go dira ba le gotee ka lerato le mašaledi a ba-Isiraele ba moya.—Jesaya 61:5.

13. Ke ditaba dife tše di lego go Jesaya 2:1-4 tšeo re swanetšego go di ela hloko, ge e ba re rata go phologela ‘lefaseng le lefsa’?

¹³ Jehofa ka moporofeta wa gagwe Jesaya, o hlalositše mašaba a ikemišeditšego a batho ba tšwago ‘ditšhabeng ka moka’ bao lehono ba tlago ntlong ya legohle ya Jehofa ya borapedi. O boletše e sa le pele gore “Merafo-rafo e tlo ya xôna è re: A re yeng, re rotoxêlê thabeng ya [Jehofa], Ngwakong wa Modimo wa Jakobo, a re rutê ’tsela tš’axwe.” Ka baka la se, ruri ba ‘rutše ditšhoša tša bona megoma’ gomme ga ba sa “ithuta xo hlabana” gaešita lege ba le lefaseng le le hlagaditšwego ke ntwa. (Jesaya 2:1-4) Na o ipona lešabeng leo le thabilego? Na o na le karolo kganyogong ya bona ya go rata go ithuta melao ya Jehofa, go diriša ye bophelong bja gago gomme wa lesa go holofela dibetša tša ntwa? Modimo o holofeditše gore lešaba le legolo leo le tlago go phegelela tsela ye, le tla ‘tšwa tlaišegong e kgolo’ e le baphologi ba phologelago ‘lefaseng le lefsa’ la gagwe la khutšo.—Kutollo 7:9, 10, 14; Psalme 46:8, 9.