Diphuthego tša go Agana ka Lerato le Botee

Mo gongwe o ka ba o kile wa ba gona dibokeng tše dingwe tša phuthego tša Dihlatse tša Jehofa kgaufsi le mo o dulago gona. Go be go e-na le batho bao ba tšwago dibopegong ka moka tša bophelo, dihlopha tša malapa, batho bao ba nyetšego le bao ba sa nyalago, ba bagolo le ba banyenyane. Ka moka ba be ba le batee borapeding bja bona gomme ba be ba thabišwa ke go thuša ba bangwe.

Thulaganyong lege e le efe moo batho ba bantši ba ratago go dira ba le batee, ruri go swanetše go ba le yo a ba hlokomelago. Modimo ke Modimo wa thulaganyo; ka gona, thulaganyo yeo e swanetše go bonala ka phuthegong ya batho ba gagwe. Go swana le lekgolong la pele la nywaga, le lehono banna ba Bakriste bao ba swanelegago, bao ba gotšego ka tsebo le bao ba nago le phihlelo ba kgethwa gore e be bagolo goba balebeledi. Ba ba hlokomela phuthego gomme ba hlokomela tšeo e di nyakago moyeng. Ba thušwa ke banna ba bangwe bao ba botegago bao ba tsebjago e le bahlanka ba bodiredi. Banna ba ga ba hwetše moputso goba thušo e nngwe ya tša ditšhelete eupja ba dira ka go ithapa, gomme gantši ba dira modiro wa boiphedišo e le gore ba lebeletšane le ditshenyagalelo tša bona.—1 Ba-Korinthe 14:33, 40; Ba-Filipi 1:1; 1 Timotheo 3:8, 9.

Ba ba kgethwa bjang? Ba swanetše go ba bahlanka bao ba botegago ba Modimo bao ba bontšhago ditshwanelo tše itšego tša Mangwalo. Tše dingwe tša tše ke: go ba le ‘mekgwa e mebotse, go ba mophafogi, wa bothakga, yo a ratago baeng, yo a tsebago go ruta le yo a nago le tlhaologanyo; e se ke ya ba yo a ratago tšhelete; a laole ba lapeng la gabo gabotse; e se ke ya ba modumedi e mofsa; e be monna wa tumo e botse go ba-ntle’; ‘a kgomarele thuto ya lentšu le le tiilego ge e le mabapi le go kgona go ruta.’—1 Timotheo 3:1-15; Tito 1:7-9.

Banna ba ga ba kgethwe ke phuthego ka go bouta gore ba be modirong, e lego moo ba bantši ba bona mo gongwe gantši e ka bago Bakriste ba bafsa. Go e na le se, ba bolelelwa ke banna bao ba gotšego ka tsebo le bao ba nago le phihlelo bao e lego bagolo le bao ba lemogago kamoo bao go naganwago ka bona ba fihlelelago tšeo di nyakegago tša Mangwalo ka gona. Ka gona go kgethwa ga bagolo le bahlanka ba bodiredi go dirwa ka tlase ga tlhokomelo ya Sehlopha se Bušago sa Dihlatse tša Jehofa gomme se se dirwa ka go latela mohlala wo o beilwego ke phuthego ya Bokriste ya lekgolong la pele la nywaga.

Bagolo ba goba balebeledi ga ba bope sehlopha sa baruti; ga ba buše ba bangwe. Go etša ge Jesu a boletše, bohle bao ba etago pele e swanetše go ba bahlanka ba bohle. Ka phuthegong ya Dihlatse tša Jehofa bagolo e tloga e le badiri-gotee bakeng sa Mmušo wa Modimo.—Mateo 20:26, 27; 23:8-11; Ba-Roma 12:8; 1 Ba-Korinthe 3:5; 4:1, 2; Ba-Kolose 4:11; 1 Ba-Thesalonika 5:12-14.

Ka ge e le balebeledi, ke bona ba hlokomelago thuto yeo e newago dibokeng gomme ba eta pele modirong wa boboledi. Morero o mogolo wa phuthego ke go bolela ka ditaba tše di lokilego tša Mmušo tšhemong ka moka yeo e abetšwego yona. Balebeledi ba bile ba dira e le badiši gomme ba etela ditho tša phuthego go di kgothatša ge go nyakega.—Mateo 24:14; Ditiro 1:8; 1 Ba-Thesalonika 2:11, 12; 5:14, 15; 2 Timotheo 2:24-26; Ba-Hebere 13:17; Jakobo 5:13-16; 1 Petro 5:1-4.

Bagolo ba bile ba na le boikarabelo bja go sola le go laya mang le mang yo mo gongwe a ka bago a latela tsela e fošagetšego le yo mo gongwe a ka bago a bea kotsing go seka moyeng le boitshwarong gotee le go bea botee bja phuthego kotsing.—1 Ba-Korinthe 5:4, 5, 7, 11-13; Tito 1:9; 2:15; 3:10, 11.

Go ba ka mehla le phuthego go tla go dira gore o hwetše bagwera ba ba botse gotee le mehola e mentši ya moya.—Psalme 35:18; 84:10.

• Ke bomang bao ba hlokomelago ditaba tša phuthego e nngwe le e nngwe?

• Balebeledi ba kgethwa motheong ofe?

• Boikarabelo bja bona ke bofe?

[Pictures on page 13]

Balebeledi ba ruta phuthego, ba eta pele ka go bolela ka ntlo le ntlo, ba kgothatša ka diketelo tša bodiši, gomme ba nea keletšo le tsholo ge e ba di nyakega