E-kwang Bao ba Etelelago Pele
“E-kwang bao ba etelelago pele gare ga lena gomme le ikokobetše, ka gore ba diša meoya ya lena ka ge e le bao ba tlago go ikarabela.”—BA-HEBERE 13:17, “NW.”
1. Re holwa bjang ke modiro wa balebeledi ba Bakriste?
JEHOFA o neile phuthego ya gagwe balebeledi ‘mehleng ye ya bofelo.’ (Daniele 12:4) Ba etelela pele bakeng sa go hlokomela bao ba swanago le dinku, gomme bookamedi bja bona ke bjo bo lapološago. (Jesaya 32:1, 2) Go feta moo, bolebeledi bjo lerato bja bagolo bao ba swarago mohlape wa Modimo ka boleta bo šireletša go Sathane le go tshepedišo ye e mpe ya dilo.—Ditiro 20:28-30; 1 Petro 5:8; 1 Johane 5:19.
2. Ba bangwe ba ile ba lebelela moapostola Paulo bjang, eupja ke kgopolo efe ye e swanetšego mabapi le bagolo?
2 Eupja o lebelela bagolo bjang? Na ka pelong ya gago o re: ‘Nka se ke ka ya go mogolo o mongwe phuthegong ye ge ke e-na le bothata, ka gore ga go na yo ke mmotago gare ga bona’? Ge e ba o ikwa ka tsela yeo, na o ka ba o gatelela ka kudu go se phethege ga bona? Kua Korinthe ya bogolo-golo, ba bangwe ba ile ba bolela ka moapostola Paulo gore: “Mangwalo a gagwe a na le matla, eupja yena ka noši o a fokola gomme polelo ya gagwe e a nyatšega.” Lega go le bjalo, Modimo o ile a abela Paulo bodiredi gomme a mo diriša e le “moapostola wa ba-ntle.” (2 Ba-Korinthe 10:10, NW; Ba-Roma 11:13; 1 Timotheo 1:12) Ka gona, go holofelwa gore o ikwa bjalo ka kgaetšedi yo a ilego a re: “Re na le sehlopha se se kaone kudu sa bagolo lefaseng. Ba be ba hwetšagala bakeng sa go thuša ge go nyakega.”
Ke ka Baka La’ng o Swanetše go ba Kwa?
3. Ge e ba Morena a tla ba le moya wo re o bontšhago, ke bjang re swanetšego go lebelela balebeledi ba lego ka tlase ba Bakriste?
3 Ka ge badiši ba lego ka tlase ba Bakriste ba kgethilwe ke Modiši o Mogolo Jehofa Modimo, o nagana gore o nyaka ge re ba lebelela bjang? Ka kgonthe, Modimo o letetše gore re latele tlhahlo e theilwego Beibeleng yeo e amogelwago ka balebeledi ba nago le lerato ka tlase ga Sehlopha se Bušago sa Dihlatse tša Jehofa. Ge go le bjalo ‘Morena o tla ba le moya wo re o bontšhago,’ ra ba le khutšo gomme ra agega moyeng.—2 Timotheo 4:22; bapiša le Ditiro 9:31; 15:23-32.
4. Rena ka noši re ka diriša bjang Ba-Hebere 13:7?
4 Paulo o ile a kgothatša: “Xopolang baruti ba lena ba ba Le boditšexo Lentšu la Modimo, Le bônê pheletšô ya tsela ya bôná, Le etšê bôná ka tumêlô.” (Ba-Hebere 13:7) Gare ba Bakriste ba pele, baapostola e be e le bona bao ba etelelago pele. Lehono, re bona bao ba bopago Sehlopha se Bušago sa Dihlatse tša Jehofa, balebeledi ba bangwe bao ba tloditšwego, le banna ba “lešaba le lexolo” bao ba etelelago pele gare ga rena. (Kutollo 7:9) Gaešita lege re sa kgothaletšwe go ekiša modumo wa mantšu a bona, mokgwa wa go ema goba mekgwa e mengwe ya bona, re swanetše go dira gore boitshwaro bja rena e be bjo bobotse ka go ekiša tumelo ya bona.
5. Lefaseng lehono, ke bomang bao ba rwešitšwego boikarabelo bjo bogolo bja go hlokomela phuthego ya Bokriste, gomme ba swanetšwe ke’ng?
5 Lefaseng lehono, boikarabelo bjo bogolo bja go hlokomela dinyakwa tša rena tša moya bo rwešitšwe “molaki e a botêxaxo yo bohlale.” Moemedi wa gagwe e lego Sehlopha se Bušago o etelela pele le go sepediša modiro wa lefase ka bophara wa go bolela ka Mmušo. (Mateo 24:14, 45-47) Kudu-kudu bagolo ba ba tloditšwego ka moya ba swanetše go lebelelwa e le babuši, ka gobane Ba-Hebere 13:7 e ka fetolelwa ka tsela ye: “Gopolang bao ba le bušago.” (Kingdom Interlinear) Ka ge go e-na le diphuthego tše fetago 60 000 le bagoeledi ba Mmušo ba fetago 3 500 000, bagolo ba 12 bao ba bopago Sehlopha se se Bušago ba ‘dira mo gontši modirong wa Morena.’ (1 Ba-Korinthe 15:58) Ka baka la kabelo ya bona yeo ba e neilwego ke Modimo, ba swanetšwe ke tirišano ya rena e tletšego go fo swana le ge Bakriste ba pele ba ile ba dirišana le sehlopha se bušago sa lekgolong la pele la nywaga.—Ditiro 15:1, 2.
6. Ke dilo dife tše dingwe tšeo di dirwago ke bagolo bakeng sa go hola batho ba Jehofa?
6 Balebeledi ba kgethilwe ka moya bakeng sa go hlokomela dinyakwa tša moya tša phuthego. (Ditiro 20:28) Ba hlokomela gore molaetša wa Mmušo o bolelwa tšhemong ya phuthego ya lefelong la gabo bona. Le gona banna ba ba swanelegago go ya ka Mangwalo ba nea tlhahlo ya moya ka tsela e lerato. Ba nea kgothatšo, ba homotša, ba ba ba nea bohlatse go banababo bona ba moya le dikgaetšedi, e le gore ba sepele ka tsela e kgahlišago Modimo. (1 Ba-Thesalonika 2:7, 8, 11, 12) Gaešita lege o mongwe a ka tšhoga a tšere mogato o fošagetšego, banna ba ba leka go mo retolla “ka môya o bonôlô.”—Ba-Galatia 6:1.
7. Paulo o neile keletšo efe go Ba-Hebere 13:17 (NW)?
7 Dipelo tša rena di tutueletšega go dirišana le balebeledi ba bjalo ba nago le lerato. Se ke se se swanetšego, bjalo ka ge Paulo a ngwadile gore: “E-kwang bao ba etelelago pele gare ga lena gomme le ikokobetše, ka gore ba diša meoya ya lena ka ge e le bao ba tlago go ikarabela; gore ba dire se ka lethabo e sego ka go belaela, ka gore se se ka le kweša bohloko.” (Ba-Hebere 13:17, NW) Re swanetše go kwešiša keletšo ye bjang?
8, 9. (a) Go ya ka Ba-Hebere 13:17 (NW), ke ka baka la’ng re swanetše go kwa bao ba etelelago pele? (b) Go kwa ga rena le go ikokobetša go ka ba le mafelelo afe a mabotse?
8 Paulo o re kgothaletša go kwa bao ba re bušago moyeng. Re swanetše gore re “ikokobetše” e le gore re ipee ka tlase ga badiši ba ba lego ka tlase. Ka baka la’ng? Ka gore ‘ba diša meoya ya rena,’ goba bophelo bja rena bjo bo neetšwego go Modimo. Ba “diša” bjang? Modirišopego o šomago wo o lego ka lebaka la bjale wa lediri la Segerika a·gru·pneʹo mo o bolela gore bagolo “ba itima boroko.” Se se re gopotša mohlapetši yo a itimago boroko bakeng sa go šireletša mohlape wa gagwe dikotsing tša bošego. Bagolo ka dinako tše dingwe ba lala ba sa robala ba rapelela mohlape wa Modimo goba ba nea thušo ya moya go badumedi-gotee le bona. Re swanetše go leboga tirelo ya bona e botegago gakaakang! Ka kgonthe, ga re nyake go swana le batho “ba sa boifexo Modimo” ba mehleng ya Juda bao ba bego ba ‘gana go bušwa gomme ba goboša ba letago,’ e lego bagolo ba Bakriste bao Modimo a ba neilego letago goba tlhompho.—Juda 3, 4, 8.
9 Jehofa a ka se ke a thaba ge e ba re palelwa ke go kwa le go ikokobeletša balebeledi ba Bakriste. Se le gona e tla ba morwalo go bona gomme se ka re gobatša moyeng. Ge e ba re sa swarišane le bona, bagolo mo gongwe ba ka hlokomela mediro ya bona ka go belaela, mohlomongwe ka go nyama mo go ka feleletšago ka gore re felelwe ke lethabo modirong wa rena wa Bokriste. Eupja go kwa ga rena le boikokobetšo di tšweletša boitshwaro bjo bobotse gotee le go matlafatša tumelo ya rena. ‘Morena o na le moya wo re o bontšhago,’ gomme lethabo le a ata ge go e-na le maemong a bjalo a go swarišana, a khutšo le botee.—2 Timotheo 4:22; Psalme 133:1.
10. Go ya ka 1 Timotheo 5:17, ke ka baka la’ng bao ba okamelago gabotse ba swanelwa ke go newa tlhompho?
10 Go ba ga rena ba kwago le ba ikokobetšago go bagolo ba phuthego ga go bolele gore re ba ba ratago go kgahliša batho. Seo e ka ba se se sa dumelelanego le mangwalo, ka gobane bahlanka ba Bakriste ba lekgolong la pele la nywaga ba ile ba botšwa gore ba kwe beng ba bona, ‘e sego ka go ba hlankela mahlong ka mokgwa wa ba-kgahla-batho; eupja ba ba hlankele ka pelo e botegago, ka go boifa Jehofa.’ (Ba-Kolose 3:22; Ba-Efeso 6:5, 6) Balebeledi ‘bao ba okamelago ka tsela e botse le bao ba dirago ka matla polelong le thutong’ ba swanetšwe ke tlhompho kudu-kudu ka gobane thuto ya bona e theilwe Lentšung la Modimo. Go bjalo ka ge Paulo a ngwadile gore: “Ba baxolo ba xo êmêla phuthêxô xa-botse, a ba xodišwê xobedi, xa-xolo bao ba xo itapiša ka xo bolêla le ka xo ruta. Xobane mangwalô a re: Pholo xe e fóla O se kê wa e tlêmêlêla molomo; a buša a re: Modiri ó swanetšwe ke moputso.”—1 Timotheo 5:17, 18.
11. Mogolo a ka hwetša bjang ‘tlhompho e lego gabedi’, eupja o swanetše go phema eng?
11 Mantšu a Paulo a sa tšwago go tsopolwa a bontšha gore e ka ba mo go swanetšego go nea thušo ya dilo tše di bonagalago go bao ba hlokomelago dikgahlego tša ba bangwe tša moya. Lega go le bjalo, se ga se bolele gore bagolo ba swanetše go amogela moputso, le gona ‘tlhompho e lego gabedi’ ka kgonthe ga se selo se sengwe seo mogolo a se gapeletšago. Se ka tšwa go ditho tša phuthego ka go ithatela, eupja le ka mohla ga se a swanela go diriša kabelo ya gagwe bakeng sa go hwetša matla goba mahumo a dilo tše di bonagalago. Ga se a swanela go inyakela botumo goba go gwerana kudu-kudu le bao ba nago le sa bona e le gore a holege ka dilo tše di bonagalago le go hlokomologa ba bangwe. (Diema 25:27; 29:23; Juda 16) Go e na le moo, molebeledi o swanetše go diša mohlape wa Modimo ‘ka go ithapa, e sego ka go rata moputso, eupja ka go rata.’—1 Petro 5:2.
12. Re ka thušwa go kwa bao ba etelelago pele gare ga rena ka go gopola’ng?
12 Re tla thušwa go kwa le go hlompha bao ba etelelago pele ge e ba re gopola gore Modimo ke yena a beilego bagolo. (Ba-Efeso 4:7-13) Ka ge banna ba ba kgethilwe ka moya gomme phuthego ya Modimo e e-na le karolo e bohlokwa bophelong bja Dihlatse tša Jehofa, ka kgonthe re nyaka go bontšha tebogo ya rena le tlhompho bakeng sa dithulaganyo tša pušo ya legodimo. Go feta moo, re ka thuša ba bafsa go hlagolela kgopolo ye ge e ba re bea mohlala o mobotse wa go kwa le go ikokobeletša bao ba etelelago pele gare ga rena.
Ke ka Baka La’ng re Swanetše go Leboga Modiro wa Bona?
13. (a) Ke dikgopolo dife tšeo di lwantšhanago tšeo di lego mabapi le boetapele tše di lego gona lefaseng le ka phuthegong ya Modimo? (b) Re na le mabaka afe a kwalago a go bota banna bao ba etelelago pele gare ga rena? (c) Go e na le go godiša go se phethege ga bagolo bao ba šomago ka matla, re swanetše go dira’ng?
13 Lefaseng, go na le mokgwa wa go gana boetapele. Go bjalo ka ge mofahloši o mongwe a itše: “Tekanyo e golago ya thuto e kaonefaditše bokgoni bja batho mo e lego gore balatedi ba ntšha diphošo kudu moo go ba etelela pele go sa kgonegego.” Eupja moya wa go ipuša ga o buše ka gare ga phuthego ya Modimo, ka gona re na le mabaka a kwalago a go bota banna bao ba etelelago pele gare ga rena. Ka mohlala, bao ba fihlelelago tšeo di nyakegago tša Mangwalo ke bona feela ba kgethwago e le bagolo. (1 Timotheo 3:1-7) Ba rutwa go ba le botho, go ba le lerato le go ba ba thušago, eupja e le bao ba kgomaretšego ka go tia ditekanyetšo tša go loka tša Jehofa. Bagolo ba kgomarela therešo ya Mangwalo, gomme ‘ba ya ka thuto ya lentšu le le tiilego gore ba kgone go eletša batho ka thuto e se nago phokolo.’ (Tito 1:5-9) Ee, ga se ra swanela go godiša go se phethege ga bona ka gobane ka moka ga rena ga se ra phethega. (1 Dikxoši 8:46; Ba-Roma 5:12) Go e na le go ikwa re ferekane ka baka la go hlaelelwa ga bona le go tšea keletšo ya bona gabohwefo, anke re lebogeng gomme re amogele tlhahlo ya bagolo e theilwego Beibeleng e le ye e tšwago go Modimo.
14. Go ya ka 1 Timotheo 1:12, mogolo a swanetše go lebelela bodiredi bjo a bo abetšwego bjang?
14 Paulo, monna yo a nago le tebogo o itše: “Ke leboxa Jesu Kriste Mong wa rena xe a mphile matla à nkhweditše kè bôtêxa, a mpea modirong wó.” (1 Timotheo 1:12) Bodiredi bjoo goba tirelo, bo be bo akaretša modiro wa go bolela le go hlankela badumedi-gotee. Gaešita lege molebeledi a neilwe kabelo ya go dira e le modiši ka moya o mokgethwa, se ga se a swanela go mo dira gore a ikwe a phagametše ba bangwe, ka gore yena ka noši ke karolo ya mohlape wa Modimo wa batho ba swanago le dinku. (1 Petro 5:4) Go e na le seo, o swanetše go leboga gore Hlogo ya phuthego e lego Jesu Kriste o ile a mmona a swanelega go ka hlankela ditho tša mohlape le gore Modimo o mo dirile yo a swanelegago ka go mo nea tekanyo ya tsebo, bohlale le kwešišo. (2 Ba-Korinthe 3:5) Ka ge mogolo a e-na le lebaka la go leboga ditokelo tša gagwe tše a di neilwego ke Modimo, ditho tše dingwe tša phuthego di swanetše go leboga bodiredi bjo goba tirelo.
15. Moko wa keletšo ya Paulo go 1 Ba-Thesalonika 5:12, 13 ke ofe?
15 Dihlatse tša Jehofa di leboga phuthego yeo Modimo a e agilego mehleng ye ya bofelo, gomme phuthego yeo e re tutueletša go hlompha bagolo. Re swanetše go thabela go dirišana ka botlalo le dithulaganyo tšeo ba di dirago bakeng sa go re hola. Paulo o itše: “Bana bešo, re a Le kxopêla, tsebang bao ba ba Le swaretšexo modirô; ba e lexo baxolo ba lena Moreneng ba xo Le eletša. Le ba xodišê sa ruri ka leratô, ka ’baka la modirô woo wa bôná.” (1 Ba-Thesalonika 5:12, 13) Go diriša keletšo ye go tliša lethabo le tšhegofatšo ya Jehofa.
Akgofela go Diriša Keletšo
16, 17. Ke keletšo efe yeo bagolo ba ka e neago mabapi le lenyalo, gomme mafelelo a go e latela e tla ba afe?
16 Paulo o ile a kgothaletša Tito ‘go eletša le go kgothatša ka matla.’ (Tito 2:15) Ka mo go swanago, baemedi ba Modimo lehono ba re lebiša melaong ya motheo le melaong ya Beibele. Go na le mabaka a kwalago a go amogela kgothatšo yeo e newago ka mehla ya go diriša keletšo le tlhahlo tšeo di tšwago phuthegong ya Jehofa le go bagolo ba kgethilwego.
17 Ka mohlala: Bagolo mo gongwe ba ka kgothaletša Mokriste go latela keletšo ya Beibele ya go nyala ‘feela Moreneng.’ (1 Ba-Korinthe 7:39; Doiteronomio 7:3, 4) Ba ka bolela gore go nyalana le motho yo a sego a kolobetšwa go ka lebiša mathateng a magolo, bjalo ka ge Kgoši Salomo a ile a dira sebe se segolo ka go nyala basadi ba šele bao ba ilego ba lebiša pelo ya gagwe medimong ya maaka le go arogeng go Jehofa. (1 Dikxoši 11:1-6) Bagolo mo gongwe ba ka hlalosa gape gore Esera o ile a laela banna ba ba-Juda go raka basadi ba bona ba bahetene, gomme Nehemia a re bao ba nyalanago le batho ba ba sa dumelago ‘ba dira bobe bjo bogolo ka go hlanogela Modimo.’ (Nehemia 13:23-27; Esera 10:10-14; bona Morokami wa March 1, 1983, letlakala 31; November 15, 1986, matlakala 26-30.) Ditšhegofatšo gotee le kgotsofalo ya go kgahliša Jehofa di tla ka go diriša dikeletšo tše bjalo tša Mangwalo tšeo di newago ke bagolo ba nago le lerato.
18. Go ya ka seo Paulo a se ngwadilego go 1 Ba-Korinthe 5:9-13, re swanetše go itshwara bjang ge e ba setho sa lapa se kgaotšwe?
18 Le gona ke mo go swanetšego go hlompha diphetho tša boahlodi tša bagolo. Paulo o ile a botša Bakriste ba kua Korinthe gore ‘ba se ke ba ikopanya le motho yo ba rego ke ngwanabo bona moka e le seotswa, wa megabaru, wa medimo e šele, wa maroga, letagwa goba mohlakodi, le gore ba se ke ba ja le motho wa mohuta woo.’ Ba be ba swanetše ‘go tloša motho o mobe gare ga bona.’ (1 Ba-Korinthe 5:9-13) Eupja o be o tla itshwara bjang ge e ba o mongwe wa metswalo ya gago a kgaotšwe? Lege go ka nyakega go kopana le yena mo go lekanyeditšwego bakeng sa go hlokomela ditaba tša lapa, segwera ka moka sa moya gotee le motswalo yo a kgaotšwego se swanetše go kgaotšwa. (Bona Morokami wa April 15, 1988, matlakala 26-31.) Ka kgonthe, go botegela Modimo le phuthego ya gagwe go swanetše go re tutueletša go hlompha diphetho tša boahlodi tša balebeledi.
19. Ke’ng seo re swanetšego go se dira ge bagolo ba re bontšha gore re tšere tsela e fošagetšego ya moya?
19 Ga go bonolo go dula re le tseleng e yago bophelong. Gore re dire bjalo, re swanetše go latela tlhahlo yeo e newago Lentšung la Modimo ka bao ba rwadišitšwego boikarabelo bja bodiši ka phuthegong ya gagwe. (Mateo 7:13, 14) Ge e ba re be re sepela ka koloi go tloga motseng o mongwe go ya go o mongwe gomme ra fapoga mo go sa swanelago, go be go tla nyakega mogato wa go phošolla tsela yeo re e tšerego. Go sego bjalo, re be re ka se fihle mo re yago gona. Ka mo go swanago, ge e ba bagolo ba re bontšha gore re tšere ka tsela e fošagetšego ya moya, mo gongwe ka go fereyana le motho yo e sego modumedi, gona re swanetše go diriša keletšo ya bona ya Mangwalo ka pela. Ye e ka ba tsela e nngwe ya go bontšha gore ka kgonthe re “bôta Modimo.”—Diema 3:5, 6.
Tlhompho Gaešita le Dilong tše Nyenyane
20. Ke go ipotšiša dipotšišo dife mo go ka re thušago go bontšha tlhompho bakeng sa tlhahlo ya bagolo gaešita le dilong tše nyenyane?
20 Re swanetše go bontšha tlhompho bakeng sa tlhahlo ya bagolo gaešita le dilong tše nyenyane. Ka gona mo gongwe re ka ipotšiša: ‘Na ke bontšha moya wa tirišano ge bagolo ba re kgopela go etela molwetši goba go tlwaetša motho o mofsa bodireding bja tšhemo? Na ke amogela dikabelo tša diboka ka pela le go di lokišeletša gabotse? Na ke a amogela ge bagolo ba nea tlhahlo mabapi le go ipeela ditulo dikopanong, mokgwa wa rena wa go apara, bjalo bjalo? Na ke bontšha moya wa tirišano ge ba re kgopela go thuša go hlwekiša Holo ya Mmušo, go bega tirelo ya rena ka pela, goba go fihla ka nako dibokeng?’
21. Go hlompha ga rena bagolo go ka re gopotša mantšu afe a Jesu?
21 Balebeledi ba phuthego ba leboga tirišano ya rena, gomme e feleletša ka mehola e mentši. Ge e le gabotse, go bontšha ga rena tlhompho le tirišano gaešita le dilong tše nyenyane go ka re gopotša mantšu a Jesu: “Mmotexi-dinyaneng, le ka tše kxolo ó a bôtêxa.” (Luka 16:10) Ka kgonthe, re nyaka go lebelelwa re le ba botegago.
Tšwelang Pele le Amogela Bolebeledi bjo Lerato
22. Ke mehola efe yeo e tlišwago ke bolebeledi bjo lerato bja molaki yo a botegago le bagolo ba phuthego?
22 Mehola yeo e tlišwago ke bolebeledi bjo lerato bja molaki yo a botegago le bagolo ba phuthego e bontšha gore tšhegofatšo e humilego ya Jehofa e godimo ga phuthego ya gagwe ya lefaseng. Go feta moo, tlhahlo e bohlale ya bagolo e kopanya bokgoni bja bona gotee le go godiša botee magareng ga rena. Le gona e feleletša ka boiteko bjo atlegago bja go tšwetša pele dikgahlego tša Mmušo. Ka kgonthe, mafelelo a mangwe a mabotse a go amogela ga rena ka tebogo bolebeledi bja bao ba etelelago pele ke gore Modimo o šegofatša modiro wa rena wa go bolela le go dira barutiwa. (Mateo 28:19, 20) Le gona go dirišana ga rena le bagolo go re lokišeletša bophelo bjo bo sa felego tshepedišong e mpsha ya dilo.
23. Go ya ka 1 Johane 5:3, re swanetše go tutueletšega go dira’ng?
23 Ka ge re rata Jehofa, go mo kwa ga se modiro o thata. Moapostola Johane o ngwadile gore: “Xobane leratô la xo rata Modimo ké xe re e-ya ka melaô ya xaxwe; xomme melaô ya xaxwe xa se e thata.” (1 Johane 5:3) Bakriste ba botegago ba kwa ditaelo tša Jehofa ka lethabo gomme ba tutueletšega go dirišana le bao a ba abetšego bolebeledi ka phuthegong. Re leboga gakaakang go ba ka gare ga phuthego ya Modimo le go ba le ‘dineo tše bjalo tša banna’! (Ba-Efeso 4:8) Ka gona, ka kholofelo e tletšego ya gore Modimo o hlahla batho ba gagwe, anke ka dinako tšohle re kweng bao ba nago le tokelo ya go etelela pele gare ga Dihlatse tša Jehofa.
Ditlhaloso tša Gago ke Dife?
◻ Ke ka baka la’ng re swanetše go kwa bao ba etelelago pele gare ga rena?
◻ Re swanetše go ba le kgopolo efe mabapi le tirelo yeo e dirwago ke bagolo bao ba šomago ka matla?
◻ Ke ka baka la’ng re swanetše akgofela go diriša keletšo yeo e newago ke bagolo?
◻ Ke mehola efe yeo e tlišwago ke go amogela ga rena ka tebogo bolebeledi bjo lerato?
[Seswantšho go letlakala 24]
Na o dirišana le bagolo ka go amogela dikabelo tša diboka, ka go thuša go hlwekiša Holo ya Mmušo, ka go bega modiro wa gago wa tšhemo ka pela le ka ditsela tše dingwe?
[Seswantšho go letlakala 23]
Paulo o be a thabela go bolela ditaba tše di lokilego le go direla badumedi-gotee le yena. Bjalo ka mogolo, na o leboga ditokelo tša gago tše o di filwego ke Modimo?