Kgaolo 11
Go Dumelelana ga Beibele ka Moka ga Yona
Akanya ka bokgobapuku bja dipuku tše 66 tšeo di ngwadilwego ke batho ba sa swanego ba ka bago 40 ka nako ya nywaga e 1 600. Maleme a mararo a ile a dirišwa ke bangwadi bao ba bego ba dula mafelong a mantšinyana. Bangwadi ka moka ba be ba e-na le dika, bokgoni le ditlogo tše di sa swanego. Eupja ge dipuku tšeo ba di ngwadilego mafelelong di be di kgoboketšwa gotee, ruri go ile gwa direga gore di bope puku e tee e kgolo yeo e latelago sehlogo se tee sa motheo go tloga mathomong go ya mafelelong. Go thata go akanya ka seo, na ga go bjalo? Lega go le bjalo, Beibele ke bjona bokgobapuku bjoo.
1. (Akaretša matseno.) Ke go dumelelana gofe mo go lemogegago mo go hlatselago therešo ya gore Beibele e buduletšwe ke Modimo?
GA GO moithuti e a botegago yo a ka se kego a kgahlišwa ke therešo ya gore gaešita lege Beibele e le kgoboketšo ya dipuku tše sa swanego, fela ke puku e tee e momaganego. Ke yeo e momaganego ka gore go tloga mathomong go ya mafelelong, e godiša borapedi bja Modimo o tee feela yo dika tša gagwe le ka mohla di sa kago tša fetoga, gomme dipuku tša yona ka moka di godiša sehlogo se tee se segolo. Go dumelelana mo ga yona ka moka ke bohlatse bjo matla bja gore Beibele ka kgonthe ke Lentšu la Modimo.
2, 3. Ke boporofeta bofe bjo bo boletšwego kua Edene bjo bo neilego lebaka la go ba le kholofelo, gomme ke maemo afe a lebišitšego tabeng ya go bolelwa ga boporofeta bjo?
2 Sehlogo sa motheo sa Beibele se tšweletšwa dikgaolong tša mathomo tša puku ya yona ya mathomo, e lego Genesi. Moo re bala gore batswadi ba rena ba pele, Adama le Efa ba ile ba bopja ba phethagetše gomme ba bewa tšhemong ya paradeise, Edene. Lega go le bjalo, Efa o ile a batamelwa ke noga yeo e ilego ya belaela go nepagala ga melao ya Modimo gomme ya mo kunkureletša ka maaka a bohwirihwiri tseleng ya sebe. Adama o ile a mo latela gomme le yena a se kwe Modimo. Mafelelo e bile afe? Bobedi bja bona ba ile ba rakwa Edene ba ahlolelwa lehu. Rena lehono re tlaišwa ke mafelelo a borabele bjoo bja mathomo. Ka moka ga rena re abetše sebe le lehu go batswadi ba rena ba pele.—Genesi 3:1-7, 19, 24; Ba-Roma 5:12.
3 Lega go le bjalo, Modimo nakong yeo ya masetla-pelo o ile a bolela boporofeta bjo bo neilego lebaka la go ba le kholofelo. Boporofeta bo ile bja bolelwa go noga, eupja bo ile bja bolelwa Adama le Efa ba e-kwa e le gore ba ka bo botša bana ba bona. Seo Modimo a se boletšego ke se: “Le xôna ke bea lehlôyô xare xa xaxo le mosadi, le xare xa peu ya xaxo le peu ya xaxwe. Yôna e tlo Xo phšatla hlôxo; ’me wêna O tlo e loma serêthê.”—Genesi 3:15; Ba-Roma 8:20, 21.
4. Ke dibopiwa dife tšeo di boletšwego boporofeteng bja Jehofa kua Edene, gomme di be di tla swarana bjang nywaga-kgolong ka moka?
4 Ela hloko dibopiwa tše nne tšeo di boletšwego temaneng ye ya sehlogo: noga le peu ya yona gotee le mosadi le peu ya gagwe. Dibopiwa tše e be e tla ba tšona dithwadi ditiragalong tša nywaga e dikete yeo e bego e sa e-tla. Lehloyo leo le tšwelago pele le be le tla ba gona magareng ga mosadi le peu ya gagwe ba le ka lehlakoreng le lengwe le noga le peu ya yona ka go le lengwe. Lehloyo le be le tla akaretša ntwa e tšwelago pele magareng ga borapedi bja therešo le bja maaka, boitshwaro bjo bo lokilego le bokgopo. Lebakeng le lengwe, noga e be e tla hwetša se se bonalago eka ke katlego ge e loma serethe sa peu ya mosadi. Lega go le bjalo, mafelelong peu ya mosadi e be e tla pšhatla hlogo ya noga, gomme Modimo ka noši o be a tla godišwa ge mehlala ka moka ya borabele bjo bja mathomo e tlošitšwe.
5. Re tseba bjang gore Efa e be e se mosadi wa boporofeta bjoo?
5 Mosadi le noga ke bomang? Dipeu tša bona ke bomang? Ge Efa a be a e-ba le morwa wa pele Kaine, o ile a bolela gore: “Ke bone monna ka Morêna.” (Genesi 4:1) Mohlomongwe o be a nagana gore ke yena mosadi wa boporofeta le gore morwa yo o be a tla ba yena peu. Lega go le bjalo, Kaine o bile le moya o mobe wa go swana le wola wa noga. O ile a fetoga mmolai, a bolaya monnagwe Abele. (Genesi 4:8) Ka mo go kwalago, boporofeta bo be bo e-na le tlhaloso e tseneletšego ya seswantšhetšo yeo e bego e le Modimo a nnoši yo a ka e hlalosago. Seo o ile a tloga a se dira ganyenyane-ganyenyane. Dipuku ka moka tše 66 tša Beibele di tlaleletša ka tsela e itšego tabeng ya go utolla seo se bolelwago ke se, e lego boporofeta bja pele ka Beibeleng.
Noga ke Mang?
6-8. Ke mantšu afe a Jesu ao a re thušago go hlaola matla ao a bego a tutuetša noga? Hlalosa.
6 Sa pele, noga yeo go boletšwego ka yona go Genesi 3:15 ke mang? Pego e bolela gore noga ya kgonthe e ile ya tla go Efa kua Edene, eupja dinoga tša kgonthe ga di kgone go bolela. Go swanetše go ba go bile le matla a mangwe ao a hlohleleditšego noga, ao a e dirilego gore e dire seo e se dirilego. Matla ao e be e le afe? E bile feela go fihla lekgolong la pele la nywaga la Mehla e Tlwaetšwego ya rena ge Jesu a be a dira bodiredi bja gagwe lefaseng, moo go tsebja ga matla ao go ilego gwa utollwa.
7 Lebakeng le lengwe, Jesu o be a bolela le baetapele ba bangwe ba bodumedi bja ba-Juda bao ba bego ba ipona e le ba lokilego ba ba bego ba ikgantšha ka gore ke barwa ba Aborahama. Lega go le bjalo, ba ile ba ganetša ka go tia therešo yeo e bego e bolelwa ke Jesu. Ka gona Jesu o itše go bona: “Lena le tšwa go tata-weno diabolo gomme le rata go dira dikganyogo tša tata-weno. Yena e be e le mmolai wa batho go tloga mathomong, gomme ga a eme therešong, gobane ga go therešo go yena. Ge a bolela maaka o bolela tša gagwe, gobane ke yena moaketši le tatago yo e lego wa maaka.”—Johane 8:44, Phetolelo ya Kgale.
8 Mantšu a Jesu e be e le a matla gomme a opa kgomo lenaka. O hlalositše Diabolo e le “mmolai” le “tatago yo e lego wa maaka.” Ka gona, maaka a mathomo ao a ngwadilwego e bile ao a boletšwego ke noga kua Edene. Motho yo a boletšego maaka ao ruri e be e le “tatago yo e lego wa maaka.” Go feta moo, maaka ao a feleleditše ka lehu la Adama le Efa, e lego seo se dirilego moaketši yoo wa kgale mmolai. Ka gona, go molaleng gore matla ao a bego a hlohleletša noga kua Edene e be e le Sathane Diabolo, le gore Jehofa ge e le gabotse o be a bolela le Sathane boporofeteng bjoo bja kgale.
9. Sathane o bile gona bjang?
9 Ba bangwe ba ile ba botšiša: Ge e ba Modimo a lokile, gona ke ka baka la’ng a ile a bopa sebopiwa se bjalo se e lego Diabolo? Mantšu a Jesu gape a re thuša go araba potšišo yeo. Jesu o itše ka Sathane “Yena e be e le mmolai wa batho go tloga mathomong.” Ka gona ge Sathane a be a fora Efa, e be e le ge a thoma go ba Sathane—leina leo le tšwago lentšung la Sehebere leo le bolelago “moganetši.” Modimo ga se a ka a bopa Sathane. Morongwa yo a bego a kile a botega o ile a dumelela kganyogo e fošagetšego gore e mele pelong ya gagwe mo a ilego a fetoga Sathane.—Doiteronomio 32:4; bapiša le Jobo 1:6-12; 2:1-10; Jakobo 1:13-15.
Peu ya Noga
10, 11. Jesu le moapostola Johane ba re thuša bjang go tseba peu ya Noga?
10 Lega go le bjalo, go thwe’ng ka ‘peu [goba bana] ya noga’? Mantšu a Jesu gape a re thuša go rarolla karolo ye ya bothata. O itše go baetapele ba bodumedi ba ba-Juda: “Lena le tšwa go tata-weno diabolo, gomme le rata go dira dikganyogo tša tata-weno.” Ba-Juda ba e be e le ditlogolwana tša Aborahama go etša kamoo ba bego ba ikgantšha ka gona. Eupja boitshwaro bja bona bjo kgopo bo ba dirile bana ba moya ba Sathane, yena mothomi wa sebe.
11 Moapostola Johane ge a ngwala go ya bofelong bja lekgolo la pele la nywaga, o hlalosa ka mo go kwagalago bao e lego peu ya Noga, yena Sathane. O a ngwala: “Mo-dira-sebe ké wa Diabolo; xobane Diabolo ó dira sebe xo tloxa mathomong. . . . Ké xôna moo xo bônaxalaxo ba e lexo bana ba Modimo, le ba e lexo bana ba Diabolo. E a sa yexo ka tokô, xa a’ tswalwa ke Modimo, bo-ka le eo a sa ratexo ngwan’abô.” (1 Johane 3:8, 10) Ka ntle le pelaelo, peu ya Noga e be e dutše e le gona historing ka moka ya batho!
Peu ya Mosadi ke Mang?
12, 13. (a) Jehofa o utolletše Aborahama bjang gore peu ya mosadi e be e tla tšwelela gare ga ditlogolo tša gagwe? (b) Ke bomang bao ba hweditšego kholofetšo e lego mabapi le Peu?
12 Ka gona, ‘peu [goba bana] ya mosadi’ ke mang? Ye ke e nngwe ya dipotšišo tša bohlokwa kudu yeo e kilego ya botšišwa, ka gobane ke peu ya mosadi yeo e tla feleletšago ka go pšhatla hlogo ya Sathane le go fediša mediro e mebe ya borabele bja mathomo. Morago kua lekgolong la nywaga la bo-20 B.C.E., Modimo o ile a utollela monna yo a bego a botega Aborahama kwešišo e kgolo mabapi le go tsebja ga motho yo. Ka baka la tumelo e kgolo ya Aborahama, Modimo o ile a dira lelokelelo la dikholofetšo go yena mabapi le bana bao a bego a tla ba belegelwa. E nngwe ya tše e dirile gore go be molaleng gore ‘peu ya mosadi’ yeo e bego e tla ‘pšhatla hlogo ya noga’ e be e tla tšwelela gare ga bana ba Aborahama. Modimo o mmoditše gore: “Bana ba xaxo e tlo ba beng ba dikxôrô tša manaba a bôná. Xomme dithšaba ka moka tša lefase di tlo šexofala ka peu ya xaxo, ka ’baka la xobane O kwele lentšu la-ka.”—Genesi 22:17, 18.
13 Ge nywaga e dutše e feta, kholofetšo ya Jehofa go Aborahama e ile ya boeletšwa go morwa wa Aborahama Isaka le go motlogolo wa gagwe Jakobo. (Genesei 26:3-5; 28:10-15) Mafelelong, ditlogolwana tša Jakobo di ile tša fetoga meloko e 12, gomme o mongwe wa meloko ye e lego wa Juda o ile wa amogela kholofetšo e kgethegilego: “Molamó wa boxoši ó ka se tloxé xo Juda; lepara la mmuši xa le tloxe mo ’naong tša xaxwe, xo bê xo tlê Mokhutšiši. Xomme Yêna-eo ditšhaba di tlo mo kwa.” (Genesi 49:10) Go molaleng gore Peu e be e swanetše go tšwelela molokong wa Juda.
14. Ke setšhaba sefe seo se ilego sa rulaganywa gore se itokišeletše Peu e tlago?
14 Bofelong bja lekgolo la nywaga la bo-16 B.C.E., meloko e 12 ya Isiraele e ile ya rulaganywa gore e be setšhaba sa batho ba kgethegilego ba Modimo. Go dira se, Modimo o ile a dira kgwerano e tiilego le bona gomme a ba nea molao. Lebaka le legolo la se e be e le go lokišeletša batho bakeng sa Peu e tlago. (Ekisodo 19:5, 6; Ba-Galatia 3:24) Go tloga nakong yeo go ya pele, bonaba bja Sathane malebana le Peu ya mosadi bo ile bja bonwa ka lehloyo la ditšhaba malebana le batho ba kgethilwego ba Modimo.
15. Ke tšhupetšo efe ya mafelelo yeo e ilego ya newa ge e le mabapi le lapa leo le bego le tla tšweletša Peu magareng ga ditlogolo tša Aborahama?
15 Tšhupetšo ya mafelelo ge e le mabapi le lapa leo le bego le tla tšweletša Peu e ile ya newa lekgolong la nywaga la bo-11 B.C.E. Ka nako yeo, Modimo o ile a bolela le kgoši ya bobedi ya Isiraele e lego Dafida gomme a mo holofetša gore Peu e tla tla ka lešika la gagwe le gore sedulo sa bogoši sa Yo se be se tla hlongwa ‘ka go tia go iša mehleng ya neng le neng.’ (2 Samuele 7:11-16) Go tloga moo go ya pele, Peu e be e ka šupja ka mo go swanetšego e le morwa wa Dafida.—Mateo 22:42-45.
16, 17. Jesaya o hlalositše bjang ditšhegofatšo tšeo Peu e bego e tla di tliša?
16 Nywageng e ilego ya latela, Modimo o ile a tsoša baporofeta gore ba nee tsebišo e oketšegilego e buduletšwego mabapi le Peu e tlago. Ka mohlala, lekgolong la seswai la nywaga B.C.E., Jesaya o ngwadile gore: “Xobane re tswaletšwe ngwana, re neilwe morwa, yo pušo e lexo lexetleng la xaxwe. Leina la xaxwe ké: Matete, Moeletši, Modimo yo matla, Tatê wa xo sa felexo, Kxoši ya kaxišô. Mmušô wó ké wa kênêlô, wa khutšô ye e sa felexo mo sedulong sa Dafida le mmušong wa xaxwe.”—Jesaya 9:5, 6.
17 Jesaya o porofetile gape ka Peu ye gore: “Ó tlo ahlolêla babôtlana ka xo se hlaole motho, bahlaki ó tlo ba êmêla ka xo loka; lefase ó tlo le ôtla ka kxati ya molomo w’axwe . . . Phiri e tlo dula le kwanyana; nkwê e tlo hutama le putšanyana; namane le tau le pholo di tlo dula felô xotee, . . . Xo ka se hlwê xo dirwa dibe, xo ka se hlwê xo senywa mo xo fêla dithabeng tše kxêthwa tša-ka, xobane xo tseba Morêna xo tlo tlala ’fase lohle bo-ka meetse xe a nabile lewatleng.” (Jesaya 11:4-9) A ditšhegofatšo tše di humilego gakaakang tše peu ye e bego e tla di tliša!
18. Ke tsebišo efe e nngwe mabapi le Peu yeo Daniele a ilego a e ngwala?
18 Lekgolong la botshelela la nywaga pele ga Mehla e Tlwaetšwego ya rena, Daniele o ile a ngwala boporofeta bjo bongwe mabapi le Peu. O boletše e sa le pele nako yeo ka yona yo e kego ke morwa wa motho a bego a tla tšwelela legodimong gomme a bolela gore “a neêlwa boxoši le kxodišô le mmušô; dithšaba ka moka le merafô le maleme ya ba bahlanka ba xaxwe.” (Daniele 7:13, 14) Ka gona Peu e tlago e be e tla ja bohwa bja Mmušo wa legodimo, gomme taolo ya gagwe ya bogoši e be e tla aparela lefase ka moka.
Bothata bo Rarolotšwe
19. Bjalo ka ge go utolotšwe ke morongwa, ruri ke karolo efe yeo Maria a bego a tla e tšea tabeng ya go tla ga Peu?
19 Go tsebja ga Peu mafelelong go ile gwa utollwa ge go thoma Mehla e Tlwaetšwego ya rena. Ka ngwaga wa 2 B.C.E., morongwa o ile a tšwelela go ngwanenyana o mofsa wa mo-Juda e a bitšwago Maria, yo e bego e le setlogolo sa Dafida. Morongwa o mmoditše gore o be a tla belega ngwana yo a kgethegilego kudu gomme morongwa o itše: “Yêna-eo e tla ba e moxolo, ó tlo bitšwa Morwa wa Yo-xodimo-dimo; ’me Morêna ó tlo mo nea sedulô sa Dafida tat’axwe. Ó tlo buša moloko wa Jakobo xo iša mehleng ya neng le neng; ’me boxoši bya xaxwe bo ka se kê bya ba le bofêlô.” (Luka 1:32, 33) Ka gona go letela ga nako e telele “peu” bjale go be go fihla bofelong.
20. Peu e holofeditšwego ke mang, gomme ke molaetša ofe wo a ilego a o botša ba-Isiraele?
20 Ka ngwaga wa 29 C.E. (e lego nako yeo e boletšwego kgale kudu e sa le pele ke Daniele), Jesu o ile a kolobetšwa. Ka gona moya o mokgethwa o ile wa theogela go yena, gomme Modimo a mmolela e le Morwa wa gagwe. (Daniele 9:24-27; Mateo 3:16, 17) Nywaga e meraro le seripa ka morago ga moo, Jesu o ile a nea bohlatse go ba-Juda, a goeletša a re: “Sokoloxang, xobane mmušô wa maxodimo o batametše.” (Mateo 4:17) Ka nako yeo, o ile a phethagatša diporofeto tše dintši tše tšwago Mangwalong a Sehebere mo go bego go se na lebaka la go belaela gore ka kgonthe e be e le Peu e holofeditšwego.
21. Bakriste ba pele ba ile ba kwešiša eng ge e le ka go tsebja ga Peu?
21 Bakriste ba pele ba kwešišitše se gabotse. Paulo o ile a hlalosetša Bakriste ba kua Galatia gore: “Tše Aborahama a di boditšwexo è le kholofedišô, di lebane peu ya xaxwe. Xa xo thwe: Dipeu, e ke ké tše ntši. Xo bolêlwa Peu e tee, xe xo thwe: Ka Peu ya xaxo. ’Me yôna Peu yeo ké Kriste.” (Ba-Galatia 3:16) Jesu e be e swanetše go ba ‘Kgoši ya Khutšo’ e boletšwego e sa le pele ke Jesaya. Ka morago ga ge a be a tla ba Mmušong wa gagwe mafelelong, gona toka le toko di be di tla ba gona lefaseng ka bophara.
Ka Gona, Mosadi ke Mang?
22. Mosadi yo go bolelwago ka yena boporofeteng bja Jehofa kua Edene ke mang?
22 Ge e ba Jesu e le Peu, gona mosadi yo go bego go bolelwa ka yena morago kua Edene ke mang? Ka ge matla a bego a tutuetša noga e be e le sebopiwa sa moya, gona ga se ra swanela go makatšwa ke gore mosadi le yena ke wa moya e sego motho wa nama. Moapostola Paulo o boletše ka “mosadi” wa legodimong ge a be a re: “Eupja Jerusalema wa godimo o hunologile gomme ke mmago rena.” (Ba-Galatia 4:26, NW) Mangwalo a mangwe a bontšha gore ‘Jerusalema yo wa godimo’ o šetše a bile gona ka nywaga e dikete. Ke phuthego ya legodimong ya Jehofa ya dibopiwa tša moya, yeo go yona Jesu a tšwilego go phethagatša karolo ya ‘peu ya mosadi.’ Ke feela “mosadi” wa mohuta wo wa moya yoo a bego a ka kgotlelela bonaba bja ‘noga ya kgale’ ka nywaga e dikete.—Kutollo 12:9; Jesaya 54:1, 13; 62:2-6.
23. Ke ka baka la’ng go utolla mo go tšwelago pele ga seo se bolelwago ke boporofeta bja Jehofa bja Edene e le mo go kgahlišago?
23 Kakaretšo ye e kopana ya go tšwelela ga boporofeta bjoo bja kgale go Genesi 3:15 ke bohlatse bjo matla bja go dumelelana gabotse ga Beibele. Ke mo go lemogegago e le ka kgonthe gore boporofeta bo ka kwešišwa ge feela re tšea ditiragalo le dipolelo tše tšwago lekgolong la bo-20, la bo-11, la bo-8 le la bo-6 la nywaga B.C.E. re di bea gotee le dipolelo le ditiragalo tše tšwago lekgolong la pele la nywaga la Mehla e Tlwaetšwego ya rena. Se se be se ka se ke sa direga ka sewelo. Go swanetše go ba go be go e-na le letsogo leo le hlahlago se ka moka.—Jesaya 46:9, 10.
Seo se se se Bolelago go Rena
24. Go tsebja ga Peu go bolela’ng go rena?
24 Se sohle se bolela’ng go rena? Ee, Jesu ke ‘peu e kgolo ya mosadi.’ Boporofeta bjoo bja kgale go Genesi 3:15 bo boletše e sa le pele gore serethe sa gagwe se be se tla ‘longwa’ ke Noga, gomme se se diragetše ge Jesu a e-hwa koteng ya tlhokofatšo. Go longwa mo ga se ga ka mo go sa felego. Ka gona seo se bonagetšego eka ke go atlega ga Noga gatee-tee se ile sa fetoga go fenywa ga yona ge Jesu a be a tsošwa. (Bjalo ka ge re bone Kgaolong 6, go na le bohlatse bjo matla bja gore se se ile sa diragala e le ka kgonthe.) Lehu la Jesu e ile ya ba motheo bakeng sa phološo ya batho ba dipelo tše lokilego, ka gona Peu e ile ya thoma go ba tšhegofatšo go etša ge Modimo a be a holofeditše Aborahama. Eupja go thwe’ng ka diporofeto tša gore Jesu o be a tla buša godimo ga tikologo ya gagwe ka moka ya lefase a le Mmušong wa legodimong?
25, 26. Ke kgang efe yeo e bego e akaretšwa bonabeng bjo bo lego magareng ga ‘peu ya mosadi’ le Noga, bjalo ka ge bo hlalositšwe go Kutollo?
25 Ponong ya boporofeta ya seswantšho e ngwadilwego go Kutollo kgaolo 12, go thoma ga Mmušo wo go swantšhetšwa ke go belegwa ga ngwana wa mošemanyana legodimong. Mmušong wo, Peu e holofeditšwego e tšea bogoši ka leina la Mikaele, leo le bolelago gore “Ke Mang yo a Swanago le Modimo?” O bontšha gore ga go na motho yo a ka belaelago ka tshwanelo bogoši bja Jehofa, ge a raka ‘noga ya kgale’ a e rakela ruri go tšwa legodimong. Re a bala: “Nôxa e kxolo yeo ya rakwa; yôna ye ba rexo ké Diabolo le Sathane, motimetši wa lefase ka moka la batho. Ya lahlêlwa lefaseng.”—Kutollo 12:7-9.
26 Se se feleleditše ka kimollo bakeng sa magodimo, eupja tlalelo lefaseng. Mokgoši wa phalafala o ile wa kwala o re, “Phološô byale e tšweletše, le matla, le boxoši bya Modimo wa rena, le xo kxôna xa Motlotšwa wa xaxwe.” Go tšwela pele re a bala: “Thabang-xê, lena Maxodimo, le ba ba axilexo xôna. Ba madi-mabe ké lena ba Le axilexo lefaseng le lewatleng, xobane Diabolo ó theoxetše xo lena à tuka boxale ka kudu; ó tseba xe a sa šaletšwe ke lebakanyana fêla.”—Kutollo 12:10, 12.
27. Boporofeta bjo bo lego mabapi le go rakwa ga Sathane magodimong bo phethagaditšwe neng? Re tseba bjang?
27 Na re ka bolela nako ye boporofeta bjo bo bego bo tla phethega ka yona? Ruri yeo e bile potšišo ye e ilego ya rotošwa ke barutiwa ge ba be ba botšiša Jesu mabapi le ‘pontšho ya go ba gona ga gagwe le ya go fela ga tshepedišo ya dilo’—bjalo ka ge re boletše seo go Kgaolo 10. (Mateo 24:3) Bjalo ka ge re bone, bohlatse bja gore go ba gona ga Jesu matleng a Mmušo wa legodimo go thomile ka 1914 ke bjo bogolo kudu. Go tloga ka nako yeo, re bone e le ka kgonthe ‘madimabe lefaseng’!
28, 29. Ke diphetogo dife tše dikgolo mo ponagalong ya lefase tšeo di sa dutšego di le ka pele, gomme re tseba bjang gore di tla direga kapejana?
28 Eupja ela hloko: Mokgoši woo wa legodimong o tsebišitše gore Sathane o “šaletšwe ke lebakanyana fêla.” Ka gona boporofeta bjola bja mathomo bjo bo lego go Genesi 3:15 bo lebile seremong sa bjona se se sa fošego. Noga, peu ya gagwe, mosadi le peu ya gagwe ka moka ga tšona di tsebilwe. Peu e ile ya ‘longwa serethe,’ eupja ya fola. Kapejana, go pšhatlwa ga Sathane (le peu ya gagwe) go tla thoma ka tlase ga Kgoši ya Modimo yeo e bušago mo nakong ye, e lego Kriste Jesu.
29 Se se tla akaretša diphetogo tše dikgolo ponagalong ya lefase. Bao ba ipontšhago e le peu ya Sathane ba tla tlošwa gotee le yena. Mopsalme o porofetile gore: Xo se xokae e mobe ó tlo ba a ile; O tlo bôxa lešope, yêna à se xôna.” (Psalme 37:10) A phetogo e kgolo gakaakang yeo se e tlago go ba sona! Ka morago, go tla phethagatšwa mantšu a mangwe a mopsalme: “Ba bolêta e tla ba bôná beng ba naxa; ba tlo thaba ka botlalô bya moláô.”—Psalme 37:11.
30. Ke ka baka la’ng babelaedi bao ba belaelago go budulelwa ga Beibele gaešita le go ba gona ga Modimo e le batho ba sa kwagalego?
30 Ka tsela ye, ‘Kgoši ya Khutšo’ mafelelong e tla tliša khutšo bathong. Ye ke kholofetšo ya Beibele, bjalo ka ge re bone go Jesaya 9:5, 6. Mehleng ye ya go belaela dilo ka moka, ba bantši ba hwetša kholofetšo e bjalo e le e sa kwagalego. Eupja ke boemo bofe bjo bongwe bjo motho a bo holofetšago? Ga bo gona! Ka lehlakoreng le lengwe, kholofetšo ye e boletšwe ka mo go kwalago ka Beibeleng, gomme Beibele ke Lentšu le le sa palelwego la Modimo. Ka kgonthe ke babelaedi bao e lego ba ba sa kwagalego. (Jesaya 55:8, 11) Ba hlokomologa Modimo, yo a buduletšego Beibele le yo e lego motho wa kgonthe o mogolo kudu go feta bohle.
[Seswantšho go letlakala 151]
Boporofeta bja mathomo bja Beibele bo neile motho yo a wetšego sebeng lebaka la kholofelo
[Seswantšho go letlakala 154]
Lekgolong la nywaga la bo-20 B.C.E., Jehofa o boditše Aborahama gore Peu e holo-feditšwego e be e tla tšwa gare ga ditlogolo tša gagwe
[Seswantšho go letlakala 155]
Lekgolong la nywaga la bo-11 B.C.E., Kgoši Dafida o ile a lemoga gore Peu e be e tla tšwa lešikeng la gagwe la bogoši
[Seswantšho go letlakala 156]
Lekgolong la nywaga la seswai B.C.E., Jesaya o boletše e sa le pele ditšhegofatšo tšeo Peu e bego e tla di tliša
[Seswantšho go letlakala 157]
Lekgolong la nywaga la botshelela B.C.E., Daniele o boletše e sa pele gore Peu e be e tla buša mmušong wa legodimo
[Seswantšho go letlakala 159]
Kgaufsi le mathomong a lekgolo la pele la nywaga C.E., Maria o ile a lemoga gore Jesu, ngwana e a bego a tla mmelega o be a tla gola gore e be Peu