Kgaolo ya Bone
Motho Yoo Baporofeta ka Moka ba mo Hlatsetšego
1. Ditaba tša go ba gona ga Jesu pele e e-ba motho di bontšha’ng ka tswalano ya gagwe le Jehofa?
“XOBANE Tate ó rata Morwa ’me ó mo laetša tše a di diraxo tšohle.” (Johane 5:20) A tswalano e borutho gakaakang yeo Morwa a ilego a e thabela le Tatagwe, Jehofa! Go batamelana kgaufsi ga tswalano yeo go thomile nakong ya go bopša ga gagwe, nywaga-kete e sa balegego pele a ka belegwa e le motho. E be e le Morwa a nnoši wa Modimo, yena a nnoši yo a bopilwego ke Jehofa ka go lebanya. Dilo tšohle tše di lego legodimong le lefaseng di hlodilwe ka yena Morwa yoo wa leitšibulo yo a rategago kudu. (Ba-Kolose 1:15, 16) Gape o ile a hlankela e le Lentšu la Modimo goba Mmoleledi, Yoo ka yena thato ya Modimo e ilego ya tsebišwa ba bangwe. Yena yo e lego Morwa yoo Modimo a bego a mo rata kudu, o ile a ba motho Jesu Kriste.—Diema 8:22-30; Johane 1:14, 18; 12:49, 50.
2. Diporofeto tša Beibele di ile tša bolela ka Jesu go fihla bokgoleng bofe?
2 Pele ga ge Morwa wa Modimo wa leitšibolo a belegwa ka mohlolo e le motho, go be go šetše go begilwe diporofeto tše dintši kudu tše di buduletšwego mabapi le yena. Moapostola Petro o ile a hlatsela go Koronelio gore: “Ké Yêna yo baporofeta ka moka ba mo šupaxo.” (Ditiro 10:43) Karolo ya Jesu e ile ya bontšhwa ka Beibeleng go fihla bokgoleng bjoo morongwa a boditšego moapostola Johane gore: “Xobane bohlatse bya Jesu ke Môya wa xo porofeta.” (Kutollo 19:10) Diporofeto tšeo di ile tša mo šupa gabotse e le Mesia. Di ile tša lebiša tlhokomelo dikarolong tše di fapa-fapanego tšeo a tlago go di kgatha bakeng sa go phethagatša merero ya Modimo. Tše ka moka di swanetše go re kgahliša kudu lehono.
Seo Diporofeto di se Utolotšego
3. (a) Boporofeteng bjo bo lego go Genesi 3:15, ke bomang bao ba swantšhetšwago ke noga, “mosadi” le ‘peu ya noga’? (b) Ke ka baka la’ng ‘go pšhatlwa ga hlogo ya noga’ e tlago ba mo go kgahlišago kudu go bahlanka ba Jehofa?
3 Boporofeta bjo bjalo bja mathomo bo boletšwe ka morago ga borabele kua Edene. Jehofa o itše go noga: “Ke bea lehlôyô xare xa xaxo le mosadi, le xare xa peu ya xaxo le peu ya xaxwe. Yôna e tlo Xo phšatla hlôxô; ’me wêna O tlo e loma serêthê.” (Genesi 3:15) Boporofeta bjoo ka kgonthe bo be bo lebišitšwe go Sathane, yena yo a emelwago ke noga. “Mosadi” ke mokgatlo wa Jehofa wa legodimong wo o botegago ka go se kwanantšhe, wo go yena o swanago le mosadi yo a botegago. ‘Peu ya noga’ e akaretša barongwa ka moka le batho bao ba bonagatšago moya wa Sathane le bao ba ganetšago Jehofa le batho ba Gagwe. Go ‘pšhatlwa ga noga hlogo’ go bolela go senyetšwa ruri ga lerabele Sathane, yo a ilego a seba Jehofa gomme a tliša manyami a magolo bathong. Eupša ke eng seo se šupšago ke karolo e kgolo ya “peu” yeo e tlago go e pšhatla? Ka nywaga-kgolo e mentši, seo se ile sa dula e le “sephiri se sekgethwa.”—Ba-Roma 16:20, 25, 26, bapiša le NW.
4. Ke bjang lešika la Jesu le ilego la mo hlaola e le Peu e holofeditšwego?
4 Ka morago ga nywaga e ka bago e 2 000 ya histori ya motho, Jehofa o ile a neela ditaba tše oketšegilego. O ile a bontšha gore Peu e be e tla tšwelela lešikeng la Aborahama. (Genesi 22:15-18) Lega go le bjalo, lešika leo le bego le iša Peung le be le ka se ithekge ka moloko wa nama, eupša ka kgetho ya Modimo. Go sa šetšwe lerato la Aborahama la go rata morwa wa gagwe Išimaele yo a bego a belegwe ke Hagara, Jehofa o ile a bolela gore: “Kxwêranô ya-ka yôna ke e tiišetša Isaka, e a tl’o xo bêlêxwa ke Sara.” (Genesi 17:18-21) Ka morago kgwerano yeo e ile ya tiišwa e sego go morwa wa leitšibulo wa Isaka e lego Esau, eupša go Jakobo yo go yena go tšweletšego meloko e 12 ya Isiraele. (Genesi 28:10-14) Ge nako e dutše e e-ya, go ile gwa bontšhwa gore Peu e be e tla belegwa molokong wa Juda, lešikeng la Dafida.—Genesi 49:10; 1 Koronika 17:3, 4, 11-14.
5. Ge Jesu a be a thoma bodiredi bja gagwe bja lefaseng, ke eng seo se ilego sa dira gore go be molaleng gore e be e le Mesia?
5 Ke ditšhupo dife tše dingwe tšeo di neilwego ge e le mabapi le go hlaolwa ga Peu? Mo e ka bago nywaga e fetago 700 e sa le pele, Beibele e ile ya bitša Betlehema gore ke lefelo la go belegelwa ga Peu e holofeditšwego ya motho. Gape e ile ya utolla gore Peu e be e šetše e le gona “boxolo-xolo bya neng le neng,” ga e sa le go tloga ge legodimo le hlolwa. (Mika 5:1) Nako e nepagetšego ya go tšwelela ga gagwe lefaseng e le Mesia e ile ya bolelwa e sa le pele ka moporofeta Daniele. (Daniele 9:24-26) Le gona, ge Jesu a be a tlotšwa ka moya o mokgethwa, ge e le gabotse a e-ba Motlotšwa wa Jehofa, lentšu la Modimo ka noši go tšwa legodimong le ile la mo hlaola e le Morwa wa Gagwe. (Mateo 3:16, 17) Peu e be e utolotšwe! Ka gona, Filipi o be a ka bolela ka kgodišego gore: “Yola, yo Mošê a ngwadilexo tša xaxwe le bôná baporofeta, re mo hweditše; ké Jesu.”—Johane 1:45.
6. (a) Go ya ka Luka 24:27, ke eng seo balatedi ba Jesu ba ilego ba tla ba se lemoga? (b) Karolo e kgolo ya ‘peu ya mosadi’ ke mang, gomme ke eng seo se bolelwago ke go pšhatla ga gagwe hlogo ya noga?
6 Ka morago ga moo, balatedi ba Jesu ba ile ba thoma go lemoga gore bontši bja diporofeto tšeo di bego di šupile yena di ile tša dirwa karolo ya Mangwalo a buduletšwego. (Luka 24:27) Go ile gwa thoma go ba molaleng kudu gape gore Jesu ke karolo e kgolo ya ‘peu ya mosadi,’ yena yo a tlago go pšhatla hlogo ya noga, a fediša Sathane gore a se hlwe a e-ba gona. Dikholofetšo ka moka tša Modimo le dilo tšohle tšeo re di hlologetšego e le ka kgonthe, di tla phethagatšwa ka Jesu.—2 Ba-Korinthe 1:20.
7. Go tlaleletša go tsebja ga Yo go bolelwago ka yena diporofetong, ke eng se sengwe seo go lego bohlokwa go se lemoga?
7 Go tseba se go swanetše go re kgoma bjang? Beibele e re botša ka mo-Ethiopia yo a bego a bala e nngwe ya diporofeto tše di lego mabapi le Molopolodi le Mesia yo a tlago. A maketše, o ile a botšiša moebangedi Filipi gore: “Moporofeta O ra mang xe a r’yalo?” Eupša molaki ga a ka a tlogela taba gona moo ge a šetše a hweditše karabo. Ka morago ga go theetša ka šedi tlhaloso yeo Filipi a e neilego, monna o ile a lemoga gore tebogo ya go leboga boporofeta bjo bjoo bo phethagaditšwego e nyaka go gata mogato ka lehlakoreng la gagwe. O ile a kwešiša gore o swanetše go kolobetšwa. (Ditiro 8:32-38; Jesaya 53:3-9) Na re arabela ka tsela e swanago?
8. (a) Boiteko bja Aborahama bja go neela ka Isaka bo be bo swantšhetša’ng? (b) Ke ka baka la’ng Jehofa a boditše Aborahama gore ditšhaba ka moka di be di tla itšhegofatša ka Peu, gomme se se šoma bjang go rena lehono?
8 Gape, nagana ka pego e kgomago maikwelo ya maiteko a Aborahama a go neela Isaka, morwa wa gagwe a nnoši ka Sara. (Genesi 22:1-18) Seo se be se swantšhetša e sa le pele seo Jehofa a bego a tla se dira—go neela Morwa wa gagwe e a tswetšwego a nnoši: “Xobane Modimo ó ratile lefase xakaakaa, a bá a le nea Morwa wa xaxwe e a tswetšwexo à nnoši, xore mang le mang e a mo dumetšexo a se kê a lahlêxa, a bê le bophelô byo bo sa felexo.” (Johane 3:16) Se se re nea kholofelo ya gore go fo etša ge Jehofa a neetše Morwa wa gagwe e a tswetšwego a nnoši bakeng sa go phethagatša morero wa Gagwe, gape O tla “re nea tšohle ka Yêna.” (Ba-Roma 8:32) Ke eng seo se nyakegago ka lehlakoreng la rena? Bjalo ka ge go begilwe go Genesi 22:18, Jehofa o boditše Aborahama gore ditšhaba ka moka di tla itšhegofatša ka Peu, “ka ’baka la xobane [Aborahama] O kwele lentšu la [Modimo].” Le rena re swanetše go kwa Jehofa le Morwa wa gagwe: “E a dumêlaxo Morwa, ó na le bophelô byo bo sa felexo. E a sa mo dumelexo, a ka se kê a bá a bo bôna; se se tl’o xo dula sè mo okametše ké boxale bya Modimo.”—Johane 3:36.
9. Ke eng seo re tlago go se dira ge e ba re leboga kholofelo ya bophelo bjo bo sa felego yeo e dirilwego gore e kgonege ka sehlabelo sa Jesu?
9 Ge e ba re leboga kholofelo ya bophelo bjo bo sa felego yeo e dirilwego gore e kgonege ka sehlabelo sa Jesu, re tla nyaka go dira dilo tšeo Jehofa a re boditšego tšona ka Jesu. Tše di tswalana le lerato la rena la go rata Modimo le baagišani ba rena. (Mateo 22:37-39) Jesu o bontšhitše gore lerato la rena la go rata Jehofa le tla re tutueletša go ruta ba bangwe ‘go boloka tšohle [tše Jesu] a [re] laetšego tšona.’ (Mateo 28:19, 20) Le gona, re nyaka go abelana lerato leo le bahlanka-gotee le rena ba Jehofa ka gore ka mehla re ‘bokane gotee’ le bona. (Ba-Hebere 10:25; Ba-Galatia 6:10) Le gona, ka go kwa Modimo le Morwa wa gagwe, ga se ra swanela go nagana gore ba nyaka phethego go rena. Ba-Hebere 4:15 e bolela gore Jesu bjalo ka Moperisita wa rena yo Mogolo a ka “re kwêla bohloko xe re fôkôla.” Seo ke se kgothatšago gakaakang, kudu-kudu ge re batamela Modimo ka thapelo ka Kriste bakeng sa go kgopela thušo ya go fenya mafokodi a rena!—Mateo 6:12.
Bontšha Tumelo go Kriste
10. Ke ka baka la’ng go se na phološo ka ntle le Jesu Kriste?
10 Ka morago ga go hlalosa lekgotleng le legolo la ba-Juda kua Jerusalema gore boporofeta bja Beibele bo phethagaditšwe go Jesu, moapostola Petro o ile a phetha ka matla gore: “Xa xo phološô xo e mongwê; le xôna ka tlase xa lexodimo xa xo Leina le lengwê le batho ba le neilwexo, le re kaxo phološwa ka lona.” (Ditiro 4:12) Ka ge bana ba Adama ka moka e le badiradibe, lehu la bona ga le na mohola wo o ka dirišwago e le topollo bakeng sa motho le ge e le ofe. Eupša Jesu e be e le yo a phethagetšego, gomme bophelo bja gagwe bo be bo na le mohola wa sehlabelo. (Psalme 49:6-9; Ba-Hebere 2:9) O ile a neela go Modimo topollo yeo mohola wa yona o bego o lekana tlwaa le bophelo bjo bo phethagetšego bjo Adama a bo lahlilego. (1 Timotheo 2:5, 6) Se se re buletše tsela ya go hwetša bophelo bjo bo sa felego lefaseng le lefsa la Modimo.
11. Hlalosa kamoo sehlabelo sa Jesu se ka re holago kudu ka gona.
11 Le gona, topollo e re buletše tsela ya go amogela mehola e mengwe gaešita le mo nakong ye. Ka mohlala, gaešita le ge re le badiradibe, sehlabelo sa Jesu se dira gore go kgonege gore re be le letswalo le le hlwekilego ka baka la tebalelo ya sebe. Se se feta kgole seo se bego se fihlelelwa ke ba-Isiraele ka dihlabelo tša diphoofolo tšeo Molao wa Moše o bego o di nyaka. (Ditiro 13:38, 39; Ba-Hebere 9:13, 14; 10:22) Lega go le bjalo, go ba le tebalelo e bjalo, go nyaka gore ka potego re lemoge kamoo re nyakago sehlabelo sa Kriste kudu ka gona: “Xe re ka re: Xa re na sebe, re a iphora, ’me therešô xa e xôna mo xo rena. Xe re ipolêla dibe tša rena, xôna ka xe Yêna è le wa pôtêxô le tokô, ó re lebalêla dibe a re hlatswa bokxôpô ka moka.”—1 Johane 1:8, 9.
12. Ke ka baka la’ng go inwa meetseng e le selo se bohlokwa bakeng sa go hwetša letswalo le lebotse pele ga Modimo?
12 Badiradibe ba ka bontšha bjang tumelo go Kriste le sehlabelong sa gagwe? Lekgolong la pele la nywaga ge batho ba be ba e-ba badumedi, ba be ba bontšha seo phatlalatša. Bjang? Ba be ba kolobetšwa. Ka baka la’ng? Ka gobane Jesu o be a laetše gore barutiwa ba gagwe ka moka ba kolobetšwe. (Mateo 28:19, 20; Ditiro 8:12; 18:8) Motho a ka se dika-dike ge pelo ya gagwe ka kgonthe e tutuetšwa ke tokišetšo e lerato yeo Jehofa a e dirilego ka Jesu. O tla dira diphetogo le ge e le dife tše di nyakegago bophelong bja gagwe, a ineele go Modimo ka thapelo gomme a bontšhe boineelo bja gagwe ka go kolobetšwa meetseng. Ke ka go bontšha tumelo ka tsela ye mo a ‘kgopelago letswalo le lebotse go Modimo.’—1 Petro 3:21.
13. Ke eng seo re swanetšego go se dira ge e ba re lemoga gore re dirile sebe, gona ka baka la’ng?
13 Go ba gona, gaešita le ka morago ga kolobetšo, ditshekamelo tša sebe di tla iponagatša. Ka gona re swanetše go dira’ng? Moapostola Johane o itše: “Bana ba-ka! Ke Le ngwalêla ditaba tšé, xore Le se kê la dira dibe. Xe xo ka ba le e a diraxo dibe, xôna re na le Morapeledi xo Tata wešo, Jesu Kriste Yêna Moloki. Ké Yêna seloba sa dibe tša rena xomme xa se sa tša rena fêla; ké Yêna seloba sa dibe tša lefase ka moka.” (1 Johane 2:1, 2) Na se se bolela gore go sa šetšwe seo re se dirago, ge e ba re rapela Modimo bakeng sa tebalelo, dilo tšohle di tla loka? Ga se gore go bjalo. Senotlelo se se išago tebalelong ke boitsholo bja kgonthe. Go ka ba gwa nyakega thušo go bao ba godilego, bao ba nago le phihlelo ka phuthegong ya Bokriste. Re swanetše go amogela go fošagala ga seo se dirilwego le go ikwa re itshola e le ka kgonthe ka sona e le gore re tle re dire boiteko bja kgonthe bja go phema go se bušeletša. (Ditiro 3:19; Jakobo 5:13-16) Ge e ba re dira se, re ka kgonthišega ka thušo ya Jesu le ka go boelanywa ga rena le Jehofa ka kgaugelo.
14. (a) Hlalosa tsela e bohlokwa yeo ka yona sehlabelo sa Jesu se re hotšego ka yona. (b) Ke eng seo re tlago go se dira ge e ba re e-na le tumelo e le ka kgonthe?
14 Sehlabelo sa Jesu se butše tsela bakeng sa bophelo bjo bo sa felego legodimong bakeng sa “mohlatswana o monyenyane,” karolo ya bobedi ya peu yeo go boletšwego ka yona go Genesi 3:15. (Luka 12:32; Ba-Galatia 3:26-29) Gape se butše tsela bakeng sa bophelo bjo bo sa felego lefaseng la paradeise bakeng sa batho ba bangwe ba dimilione tše dikete. (Psalme 37:29; Kutollo 20:11, 12; 21:3, 4) Bophelo bjo bo sa felego ke “neô ya kxauxêlô ya Modimo . . . ka Jesu Kriste Mong ’a rena.” (Ba-Roma 6:23; Ba-Efeso 2:8-10) Ge e ba re e-na le tumelo mphong yeo le tebogo bakeng sa mokgwa wo e dirilwego gore e kgonege, re tla dira gore e bonagatšwe. Go lemoga kamoo Jehofa a dirišitšego Jesu ka gona ka mo go makatšago bakeng sa go phethagatša thato ya Gagwe le kamoo go lego bohlokwa ka gona go rena ka moka gore re latele dikgato tša Jesu kgaufsi, re tla dira bodiredi bja Bokriste o mongwe wa mediro e bohlokwa kudu maphelong a rena. Tumelo ya rena e tla bonagatšwa ke kgodišego yeo re botšago ba bangwe ka mpho ye e botse kudu e tšwago go Modimo.—Ditiro 20:24.
15. Go ba le tumelo go Jesu Kriste go na le mafelelo afe a kopanyago?
15 A mafelelo a mabotse le a kopanyago ao tumelo e bjalo e nago le ona! Ka yona re batametšwa kgaufsi kudu le Jehofa, go Morwa wa gagwe le go yo mongwe le yo mongwe ka gare ga phuthego ya Bokriste. (1 Johane 3:23, 24) Go re dira gore re thabe gore Jehofa ka botho o neile Morwa wa gagwe “leina le le fetaxo maina ohle, Xore Leineng la Jesu xo khunamê matôlô ohle a ba lexo kwa lexodimong le mo lefaseng le ka tlase xa lefase; Maleme ohle a dumêlê a re: Jesu Kriste ké Yêna Morêna, ’me ya tlo ba xo rêta Modimo Tat’axwe.”—Ba-Filipi 2:9-11.
Poledišano ya Tlhahlobo
• Ge Mesia a be a tšwelela, ke ka baka la’ng go tsebja ga gagwe go be go le molaleng go bao ka kgonthe ba bego ba dumela Lentšung la Modimo?
• Dilo tše dingwe tšeo re swanetšego go di dira bakeng sa go bontšha tebogo sehlabelong sa Jesu ke dife?
• Sehlabelo sa Jesu se šetše se re hotše ka ditsela dife? Se se re hola bjang ge re rapela Jehofa bakeng sa tebalelo ya dibe?
[Seswantšho go letlakala 36]
Jesu o boditše balatedi ba gagwe gore ba swanetše go ruta ba bangwe go boloka melao ya Modimo