Sathane Diabolo

Tlhaloso: Sebopiwa sa moya seo e lego lenaba le legolo la Jehofa Modimo, le la bao ka moka ba rapelago Modimo wa therešo. Leina Sathane le ile la newa go sona ka baka la go iphetola moganetši wa Jehofa. Sathane le gona o tsebja e le Diabolo, ka gobane ke yena mosebi o mogolo wa Modimo. Sathane o hlaloswa e le noga ya kgale, fela ka gobane a ile a diriša noga Edene go fora Efa, gomme ka lona lebaka le “noxa” ya thoma go emela “mofori.” Pukung ya Kutollo, go bolelwa ka seswantšhetšo ka drakone e metšago go dirišwa le go Sathane.

Re ka tseba bjang ge e ba motho o bjalo wa moya a le gona e le ka kgonthe?

Beibele ke mothopo o mogolo wa bohlatse. Moo o bolelwa leboelela ka leina (Sathane ga-52, gomme ga-33 e le Diabolo). Bohlatse bja hlatse e bonego ka mahlo ge e le ka go ba gona ga Sathane, le bjona bo ngwadilwe moo. Ke mang yo e bego e le hlatse e bonego ka mahlo? Jesu Kriste yo a ilego a phela legodimong pele ga ge a ka tla lefaseng, o boletše leboelela ka yeo o mobe ka leina.—Luka 22:31; 10:18; Mat. 25:41.

Seo Beibele e se bolelago ka Sathane Diabolo ke seo se kwalago. Bobe bjo batho ba wetšego go bjona ke bjo bogolo kudu go feta mahloko a batho a akaretšwago. Go hlalosa ga Beibele mathomo a Sathane le mediro ya gagwe go bontšha gabotse lebaka leo ka lona go bile go sa šetšwe kganyogo ya batho ba bantši ya go phela ka khutšo, ruri batho ba aparetšwego ke lehloyo, bošoro le dintwa ka nywaga e dikete-kete, le lebaka leo tše di fihlilego boemong bjoo mo nakong ye bo bonagalago bo ka fediša batho ka moka.

Ge e ba ruri go be go se na Diabolo, gona go amogela seo Beibele e se bolelago ka yena go be go ka se ke gwa tliša mehola ya neng le neng mothong. Lega go le bjalo, mabakeng a mantši moo batho ba kilego ba itswakanya le boloi goba ya ba ba bangwe ba dihlopha tšeo di dirago bonoge, ba bega gore ka nako yeo ba be ba tlaišega kudu ka baka la go kwa “mantšu” a tšwago methopong e sa bonagalego e lego ao a “bolelwago” ke batho ba ba phagametšego motho, le tše dingwe. Kimollo ya kgonthe e ile ya hwetšwa ge ba ithuta seo Beibele e se bolelago ka Sathane le batemona ba gagwe, gomme ba diriša keletšo ya Beibele ya go gana mediro ya bonoge gomme ba kgopela thušo ya Jehofa ka thapelo.—Bona matlakala 95-100, tlase ga hlogo ya ditaba ya “Bonoge.”

Go dumela gore Sathane o gona ga go bolele go amogela kgopolo ya gore o na le dinaka, mosela o motelele le foroko e hlabago, le gore o beša batho diheleng tša mollo. Beibele ga e nee tlhaloso e bjalo ka Sathane. Se ke seo se bego se naganwa ke baswantšhi ba nywaga ya magareng bao ba bego ba tutuetšwa ke diswantšho tša Pan modimo wa nonwane wa ba-Gerika le ke Inferno e ngwadilwego ke sereti sa Motaliana Dante Alighieri. Beibele go e na le go ruta dihele tša mollo, ruri e bolela gabotse gore “xo bahu xa xo se se tsebyaxo.”—Mmo. 9:5.

Na Sathane mo gongwe ke bobe feela bjo bo lego ka gare ga batho?

Jobo 1:6-12 le 2:1-7 di bolela ka go boledišana ga Jehofa Modimo le Sathane. Ge e ba Sathane e be e le bobe bjo bo lego mothong, gona bobe tabeng ye bo be bo tla ba bo le ka go Jehofa. Eupja seo ke se se ganetšanago e le ka kgonthe le seo Beibele e re botšago sona ka Jehofa e le Yo ‘go sego bokgopo go yena.’ (Ps. 92:16, PK Ps 92:15, NW; Kut. 4:8) Go hlokomelwa gabotse gore lengwalo la Sehebere le diriša lentšu has·Sa·tanʹ (Sathane) ditabeng tšeo di lego go Jobo, go bontšha gore polelo e lebišwa go motho yo e lego moganetši o mogolo wa Modimo.—Bona le Sakaria 3:1, 2, mongwalo wa ka tlase kgatišong ya Ditšhupetšo ya NW.

Luka 4:1-13 e bega gore Diabolo o ile a ikemišetša go leka Jesu gore a dire taelo ya gagwe. Taba e anega dipolelo tšeo di boletšwego ke Diabolo gotee le dikarabo tšeo di neilwego ke Jesu. Na Jesu moo o be a lekwa ke bobe bjo bo bego bo le ka go yena? Kgopolo e bjalo ga e dumelelane le go hlalosa ga Beibele Jesu e le yo a se nago sebe. (Ba-Heb. 7:26; 1 Pet. 2:22) Gaešita lege go Johane 6:70 lentšu la Segerika la di·aʹbo·losʹ le dirišwa go hlalosa seka se sebe seo se bego se itšweleditše go Judase Isikariothe, fela go Luka 4:3 lentšu ho di·aʹbo·los (Diabolo) le a dirišwa e le go šupa motho yo a itšego.

Na go belaela Diabolo ke feela maano a dirišwago maitekong a go široga boikarabelo bja maemo a mabe?

Batho ba bangwe ba belaela Diabolo ka seo bona ka noši ba se dirago. Beibele ka go fapana le se e bontšha gore batho gantši ke bona ba swanetšwego ke go belaelwa ka baka la bobe bjo bo ba welago, go sa šetšwe ge e ba bo e-tšwa diatleng tša batho ba bangwe goba e le ka baka la boitshwaro bja bona. (Mmo. 8:9; Ba-Gal. 6:7) Fela, Beibele ga e re tlogele re se na tsebo ge e le ka go ba gona gotee le maano a lenaba le le phagametšego motho leo le tlišitšego mahloko a magolo gakaakaa bathong. E bontšha kamoo re ka tšwago ka gona matleng a gagwe.

Sathane o tšwa kae?

Mediro ya Jehofa ka moka e phethagetše; ga se mothopo wa bokgopo; ka gona ga se a ka a bopa motho lege e le ofe yo e lego o mobe. (Doit. 32:4; Ps. 5:4) Motho yo a ilego a fetoga Sathane mathomong e be e le morwa yo a phethagetšego wa moya wa Modimo. Ge Jesu a be a bolela gore Diabolo “mo xo yêna therešô xa e yo’,” ruri o be a bontšha gore ka nako e nngwe motho yoo o be a kile a ba ‘wa therešo.’ (Joh. 8:44) Eupja ka ge go le bjalo ka dibopiwa ka moka tša Modimo tše bohlale, ruri morwa yo wa moya o be a neilwe gore a ikgethele. O ile a senya khunologo ya gagwe ya go ikgethela, a dumelela maikwelo a go itira yo bohlokwa gore a mele pelong ya gagwe, a thoma go duma borapedi bjo e bego e le bja Modimo feela, gomme a gokeletša Adama le Efa gore ba theetše yena go e na le go kwa Modimo. Ka yona tsela ye ya gagwe, o ile a itira Sathane, e lego leina le le bolelago “lenaba.”—Jak. 1:14, 15; bona le letlakala 395, tlase ga hlogo ya ditaba ya “Sebe.”

Ke ka baka la’ng Modimo a se a ka a senya Sathane gatee-tee ka morago ga ge a rabetše?

Dikgang tše dikgolo di be di rotošitšwe ke Sathane: (1) Go loka le tshwanelo ya bogoši bja Jehofa. Na Jehofa o be a amoga batho khunologo yeo e bego e tla thuša lethabong la bona? Na go kgona ga batho go laola ditaba tša bona ka katlego le go tšwela pele ga bona ba phela, go be go ithekgile e le ka kgonthe ka go kwa ga bona Modimo? Na Jehofa e be e le yo a sa botegego tabeng ya go nea molao wo o boletšego gore go se kwe go be go tla ba tlišetša lehu? (Gen. 2:16, 17; 3:3-5) Na Jehofa ruri o be a e-na le tshwanelo ya go buša? (2) Potego ya dibopiwa tše di hlalefilego go Jehofa. Ka go hlanoga ga Adama le Efa, ruri potšišo e ile ya botšišwa: Na bahlanka ba Jehofa ba ile ba mo kwa e le ka kgonthe ka baka la go mo rata goba na ka moka ga bona mo gongwe ba be ba ka fularela Modimo gomme ba latela tlhahlo ye e bego e newa ke Sathane? Kgang ye ya morago e ile ya tšweletšwa gape ke Sathane mehleng ya Jobo. (Gen. 3:6; Jobo 1:8-11; 2:3-5; bona le Luka 22:31.) Dikgang tše di be di ka se ke tša lokišwa feela ka go bolaya marabele.

Ga se gore Modimo o be a swanetšwe ke go itlhatselela se sengwe. Eupja gore dikgang tše le ka mohla di se ke tša šuhla gape khutšo le katlego ya legohle, ruri Jehofa o dumeletše nako e lekanego ya gore di lokišwe ka ntle le pelaelo lege e le efe. Gore Adama le Efa ba hwile ka morago ga go se kwe ga bona Modimo, ruri go ile gwa ba molaleng ka nako e swanetšego. (Gen. 5:5) Eupja ditaba tše dintši di be di sa swanetšwe ke go lokišwa. Modimo o dumeletše Sathane gotee le batho gore ba leke mebušo ya mehuta yohle yeo e lego ya bona. Ga go le o tee wo o tlišitšego lethabo la neng le neng. Modimo o lesitše batho gore ba tšwele pele ba phegelela ditsela tša bophelo tšeo di hlokomologago melao ya Gagwe ya go loka. Dienywa ke tšeo di hlatsago se. Beibele e bolela ka go nepa ge e re: “Monna mo a yaxo xa’ ikiše, le xe a xata a tiiša.” (Jer. 10:23) Modimo ka nako e swanago, o neile bahlanka ba gagwe sebaka sa gore ba hlatsele go botega ga bona go yena ka mediro ya bona ya go mo kwa ka go rata, gomme se ba se dira ba dutše ba lebane le dikgoketšo le tlaišo yeo e hlohleletšwago ke Sathane. Jehofa o kgothatša bahlanka ba gagwe, ka gore: “Ngwan’a-ka! Hlalefa, O nthabišê pelo, ke tsebê se nkaxo fetola sôna xe ba nnyatša.” (Die. 27:11) Bao ba ipontšhago ba botega ba buna mehola e megolo mo nakong ye, gomme ba na le kholofelo ya bophelo bjo bo sa felego ba phethagetše. Ba tla diriša bophelo bjo bo bjalo ka go dira thato ya Jehofa, yeo ba ratago e le ka kgonthe dika tša gagwe le ditsela tša gagwe.

Sathane o na le matla gakaakang lefaseng la lehono?

Jesu Kriste o mmoletše e le “mmuši wa lefase,” e lego yena yeo batho ka kakaretšo ba mo kwago ka go latela dikgothatšo tša gagwe tša gore ba hlokomologe melao ya Modimo. (Joh. 14:30; Ba-Ef. 2:2) Beibele le gona e mmitša “modimo wa tshepedišo ye ya dilo,” yo a hlompšhago ka mediro ya bodumedi ya batho bao ba kgomaretšego tshepedišo ye ya dilo.—2 Ba-Kor. 4:4, NW; 1 Ba-Kor. 10:20.

Diabolo ge a be a ikemišeditše go leka Jesu Kriste, o ile “a mo iša thabeng e telele, a mmonthša mebušô ka moka ya lefase ka sekxanyana sa lebaka. A bolêla a re: Boxoši byó ka moka le borêna bya byôna ke tlo fa Wêna; ka xobane bo xafetšwe nna; ke bo nea yo nkaxo rata xo mo nea. Byale xe O ka lothša nna, ka moka e tlo ba tša xaxo.” (Luka 4:5-7) Kutollo 13:1, 2 e utolla gore Sathane o nea ‘matla, sedulo sa bogoši le bogoši bjo bogolo’ tshepedišong ya lefase ya bopolitiki ya pušo. Daniele 10:13, 20 e utolla gore Sathane o na le magošana a batemona a okametšego mebušo e megolo ya lefase. Ba-Efeso 6:12 e bolela ka ba e le ‘mebušo, ba matla, babuši ba lefase le la lefsifsi le meoya ya bobe e lego sebakeng sa godimo.’

Ga go makatše ge 1 Johane 5:19, e re: ‘Lefase ka moka le rapaletše matleng a yo mobe.’ Eupja matla a gagwe ke a lebakanyana fela, gomme a dumeletšwe feela ke Jehofa yo e lego Modimo Ra-matla-ohle.

Sathane o tla dumelelwa ka nako e kaakang go aroša batho?

Bakeng sa bohlatse bja gore mo nakong ye re phela mehleng ya bofelo ya tshepedišo e mpe ya dilo ya Sathane, hle bona matlakala 160-163, tlase ga “Dinako,” le hlogo ya ditaba e kgolo ya “Mehla ya Bofelo.”

Tokišetšo ya go imollwa tutuetšong e mpe ya Sathane e hlaloswa ka polelo ya seswantšhetšo ka tsela ye: “Ka bôna Morongwa à fofa lexodimong á swere sekxonyu sa Sekoti, a swere le kêtanê e kxolo ka seatla. A swara Nôxa-kxolo, Nôxa yela ya mehleng, e lexo yêna Diabolo le Sathane, a e tlêma xore e fetšê nywaxa e sekete è tlemilwe. A e lahlêla Sekoting, a e kxonyeletša moo, a tiiša ka seká sa leswaô, xore e se hlwê e aroša dithšaba, xo bê xo fetê nywaxa e sekete. Xe yôna e fetile ó tlo hunollwa, a fetša lebakanyana à hunoloxile.” (Kut. 20:1-3) Go tla latela’ng? “Diabolo wa xo ba fora, a lahlêlwa bodibeng bya mollô le thsêbêla.” (Kut. 20:10) Se se bolela’ng? Kutollo 21:8 e a araba: “Ké lôna lehu la bobedi.” O tla ba a fedišeditšwe sa ruri!

Na ‘go lahlelwa sekoting’ ga Sathane go bolela gore o tla ba a tswaleletšwe lefaseng la lešoka, moo go se nago motho yo a ka mo lekago ka nywaga e 1 000?

Batho ba bangwe ba šupa Kutollo 20:3 (yeo e tsopotšwego matlakaleng 392, 393) e le yeo e thekgago kgopolo ye. Ba bolela gore “sekoti” goba “sekoti se segolo kudu” (KJ), se emela lefase leo e lego lešoka. Na go bjalo? Kutollo 12:7-9, 12, (KJ) e bontšha gore Sathane ka nako e nngwe pele ga ge a ka lahlelwa sekoting, o ile a “rakwa” legodimong gomme a lahlelwa lefaseng moo a tlišago madimabe a magolo bathong. Ka gona, ge Kutollo 20:3 (KJ) e bolela gore Sathane o ‘lahletšwe . . . sekoting se segolo kudu,’ ruri ga se a tlogelwa feela moo a bego a šetše a le gona, e lego go ba yo a sa bonagalego eupja a tswaleletšwe sebakeng sa lefase. O išwa kgole kudu le moo ‘e le gore a se hlwe a aroša ditšhaba, go be go fete nywaga e sekete.’ Hlokomela gore Kutollo 20:3 e bolela gore bofelong bja nywaga e sekete, ke Sathane e sego ditšhaba yo a tlago go hunollwa sekoting. Nakong ya ge Sathane a hunollwa, ruri batho bao ba kilego ba dira ditšhaba tšeo ba tla ba ba šetše ba le gona.

Jesaya 24:1-6 le Jeremia 4:23-29 ka dinako tše dingwe di a bolelwa gore go thekgwe tumelo ye. Tše di re: “Bônang, Morêna ó hlobodiša naxa, ó a e thosanya, . . . Naxa e tlo hlobodišetšwa ruri è thunthanyetšwe ruri, xobane taba yeo e boletšwe ke [Morêna].” “Xe ke bôna naxa, Šé e xobelane, xa e sa n’e selô; . . . Ke a bôna; ke hwetša xò se motho; . . . Xobane Morêna ó re: Naxa yohle e tlo ba lešope; . . . metse yohle e faletše, xa e sa dula motho.” Diporofeto tše di bolela’ng? Di bile le phethagatšo ya tšona ya pele godimo ga Jerusalema le lefase la Juda. Jehofa ge a be a phetha kahlolo ya gagwe, o ile a dumelela ba-Babele gore ba gatakele naga. E ile ya feleletša ka go šala e le lerope le go senyega. (Bona Jeremia 36:29.) Eupja Modimo ka nako yeo ga se a ka a hlokiša lefase ka moka baagi ba lona, gomme a ka se ke a dira bjalo le mo nakong ye. (Bona matlakala 232-235, tlase ga “Lefase,” gotee le hlogo ya ditaba e kgolo ya “Legodimo.”) Lega go le bjalo, o tla senya e le ka kgonthe moswantšhetši wa mehleng yeno wa Jerusalema e sa botegego, e lego Bojakane bjoo bo gobošago leina la Modimo ka boitshwaro bja bjona bjo e sego bjo bokgethwa, gotee le go senya batho ka moka ba phuthego e bonagalago ya Sathane.

Go e na le gore le dule e le lerope nakong ya Pušo ya Kriste ya Nywaga e Sekete le nakong ya ge Sathane a le sekoting, ruri lefase ka moka e tla ba paradeise. (Bona “Paradeise.”)