Thabela Bophelo bja Lapa

Na malapa e ka ba a thabilego e le ka kgonthe?

Se se ka kgonega bjang?

Na o tseba malapa le ge e le afe ao a nago le botee le a thabilego bjalo ka ao o a bonago mo pampišaneng ye? Malapa kae le kae a phumega ka mo go feletšego. Tlhalo, go hlokega ga tšhireletšego ya mošomo, ditlalelo tša motswadi yo a se nago molekane, kgakanego—tše ka moka di tlaleletša bothateng. Setsebi sa tša bophelo bja lapa se llile ka gore: “Gona bjale, ditebelelo tša go senyega ga lapa ke selo se se tlwaetšwego ke mang le mang.”

Ke ka baka la’ng malapa lehono a hlasetšwe ke mathata a bjalo a magolo? Re ka thabela bjang bophelo bja lapa?

Kamoo Lapa le Thomilego ka Gona

Gore re arabe dipotšišo tše, re swanetše go tseba mathomo a lenyalo le lapa. Ka gobane ge e ba tše di bile le Mothomi—Mmopi—ditho tša lapa di swanetše go hwetša tlhahlo go yena, ka ge ka ntle le pelaelo a tla tseba kamoo re ka thabelago bophelo bja lapa ka mo go feletšego.

Se se kgahlišago, batho ba bantši ba dumela gore thulaganyo ya lapa ga e na Mothomi. The Encyclopedia Americana e re: “Diithuti tše dingwe di sekametše tabeng ya go nyakišiša mathomo a lenyalo ka dithulaganyo tša go sepela ka bobedi ka bobedi ga diphoofolo tšeo di lego ka tlase ga motho.” Lega go le bjalo, Jesu Kriste o boletše ka tlholo ya monna le mosadi. O tsopotše pego ya pele ya Beibele e le mothopo wa tsebišo gomme a re: “Se Modimo a se tlêmaxantšexo, motho a se kê a se aroxanya.”—Mateo 19:4-6.

Ka gona Jesu Kriste o nepile. Modimo yo bohlale o bopile batho ba mathomo gomme a rulaganyetša bophelo bja lapa bjo bo thabišago. Modimo o ile a kopanya batho ba pele ba babedi lenyalong gomme a re monna “ó tlo . . . xomarêla mosadi wa xaxwe; xomme e tlo ba nama e tee.” (Genesi 2:22-24) Ka gona, na e ka ba e le gore mathata a lapa lehono a tlišwa ke go phegelela mekgwa ya bophelo yeo e robago melao ye e beilwego ke Mmopi Lentšung la gagwe, Beibele?

Tsela ya go Iša Katlegong ke Efe?

Ka ge ka ntle le pelaelo o tseba, lefase la mehleng yeno le kgothaletša boithati le go ikwa motho a kgotsofetše ka boyena. Ramatlotlo o boditše sehlopha sa dialoga tša kholetše kua United States gore, “megabaru e lokile. O ka ba le megabaru gomme wa ba wa ikwa o kgotsofetše.” Eupja go phegelela mahumo a bonagalago ga go iše katlegong. Ge e le gabotse, go rata dilo tše di bonagalago ke e nngwe ya ditshošetšo e nnoši e kgolo yeo e tšhošetšago bophelo bja lapa ka gobane go šitišana le ditswalano tša batho le go tšeela batho nako le tšhelete tše dintši. Ka mo go fapanego, hlokomela kamoo diema tše pedi fela tša Beibele di re thušago ka gona go bona seo se lego bohlokwa bakeng sa go hwetša lethabo.

“Go kaone go ja merogo le batho bao o ba ratago go e na le go ja nama e bose kudu moo go nago le lehloyo.”

“Go kaone go ja legogo le le omeletšego la senkgwa o na le khutšo ya monagano go e na le go dira monyanya ntlong yeo e tletšego ka mathata.”

Diema 15:17; 17:1, “Today’s English Version.”

Ke tše matla, na ga go bjalo? Nagana feela gore lefase e be e tla ba le le fapanego gakaakang ge nkabe lapa le lengwe le le lengwe le kgomarela dilo tše tša bohlokwa! Beibele gape e nea tlhahlo e holago mabapi le kamoo ditho tša lapa di swanetšego go swarana ka gona. Ela hloko ditaelo tše sego kae tšeo e di neago.

Banna: ‘Ratang basadi ba lena bjalo ka mebele ya lena.’—Ba-Efeso 5:28-30.

E bonolo, fela e hola kudu! Beibele gape e laela monna go ‘nea mosadi wa gagwe tlhompho.’ (1 Petro 3:7) O dira se ka go mo nea tlhokomelo e kgethegilego, go akaretša kwelobohloko, kwešišo le go mmea pelo. Gape o lebelela dikakanyo tša gagwe e le tša bohlokwa gomme o a mo theetša. (Bapiša le Genesi 21:12.) Na ga o dumele gore lapa le lengwe le le lengwe le tla holega ge monna a swara mosadi wa gagwe ka tlhokomelo, bjalo ka ge le yena a be a tla nyaka go swarwa ka tsela yeo?—Mateo 7:12.

Basadi: ‘Boifang [“hlomphang,” NW] banna ba lena.’—Ba-Efeso 5:33.

Mosadi o tlaleletša lethabong la lapa ka go thuša monna wa gagwe go phethagatša boikarabelo bja gagwe bjo bogolo. Se ke seo se bego se rerilwe, ka ge Modimo a neetše mosadi gore e be “modiriši e a mo lebanexo.” (Genesi 2:18) Na o ka kgona go lemoga ditšhegofatšo tšeo di bago gona bophelong bja lapa ge mosadi a hlompha monna wa gagwe ka go thekga diphetho tša gagwe le ka go dirišana le yena go phetheng dipakane tša lapa?

Banyalani: “Banna le Basadi ba swanetše go botegelana.”—Ba-Hebere 13:4, TEV.

Ge ba dira bjalo, bophelo bja lapa bo thabiša e le ka kgonthe. Bohlotlolo gantši bo thuba lapa. (Diema 6:27-29, 32) Ka gona, Beibele e kgothatša ka bohlale gore: “Thabela mosadi wa gago gomme o thabe le mosetsana yo o mo nyetšego . . . Ke ka baka la’ng o swanetše go rata mosadi o mongwe?”—Diema 5:18-20, TEV.

Batswadi: ‘Rutang [bana ba lena] tsela ye [ba] swane-tšego go sepela ka yona.’—Diema 22:6, PK.

Ge batswadi ba ipha nako ya go ba gotee le bana ba bona gomme ba ba hlokomela, bophelo bja lapa ka ntle le pelaelo bo tla kaonefala. Ka gona, Beibele e kgothaletša batswadi gore ba rute bana ba bona melao ya motheo e lokilego ‘ge ba dutše ka ngwakong wa bona, le ge ba sepela tseleng, le ge ba ya go robala, le ge ba tsoga.’ (Doiteronomio 11:19) Beibele e bolela gape gore batswadi ba swanetše go bontšha gore ba rata bana ba bona ka go ba laya.—Ba-Efeso 6:4.

Bana: “Lena Bana! Kwang batswadi ba lena Moreneng.”—Ba-Efeso 6:1.

Ke therešo gore lefaseng le la go hloka molao ga se ka mehla go lego bonolo go hlompha batswadi ba gago. Lega go le bjalo, na ga o dumele gore ke bohlale go dira seo Mothomi wa lapa a re botšago sona? O tseba seo e lego se se kaone bakeng sa go dira bophelo bja rena bja lapa gore bo thabiše kudu. Ka gona leka ka matla go hlompha batswadi ba gago. Ikemišetše go široga diteko tše dintši tša lefase tša gore o dire seo e lego se sebe.—Diema 1:10-19.

Bophelo bja lapa bo tla holega go ya ka tekanyo yeo ka yona setho se sengwe le se sengwe sa lapa se dirišago keletšo ya Beibele ka yona. Lapa le ka se thabele feela bophelo bjo bo kaone gona bjale, eupja le tla ba le kholofelo ya bokamoso bjo bo kgahlišago lefaseng le lefsa le le holofeditšwego ke Modimo. (2 Petro 3:13; Kutollo 21:3, 4) Ka gona go dire mokgwa wa lapa go ithuta Beibele le le gotee! Malapa a dimilione lefaseng ka bophara a hweditše tlhahlo yeo e neilwego ka pukung Sephiri sa Lethabo la Lapa e le e holago e le ka kgonthe.

Ka ntle ga ge go bontšhitšwe, ditsopolo ka moka tša Beibele di tšwa Beibeleng ya Sepedi. Moo NW e bontšhitšwego go latela tsopolo, gona e bontšha gore phetolelo e dirilwe e e-tšwa go New World Translation of the Holy Scriptures—With References ya leleme la Seisemane, e lego kgatišo ya 1984. PK e emela Phetolelo ya Kgale.