Kgaolo 7
Seo Modimo A Se Dirilego Bakeng Sa Go Phološa Batho
THAPAMENG e nngwe ya seruthwane mo e nyakilego go ba nywageng e 2 000 e fetilego, molaodi wa madira a Roma o ile a bogela banna ba bararo ba e-hwa lehu le le nanyago le le nyamišago. Lešole leo le ile la lemoga o tee wa bona ka mo go kgethegilego—e lego Jesu Kriste. Jesu o be a kokotetšwe ka dipikiri koteng. Leratadima la mosegare wa sekgalela le ile la fsifala ge motsotso wa lehu la gagwe o be o batamela. Ge a e-hwa, lefase le ile la šišinyega o šoro gomme lešole la bolela gore: “Ka kxonthe, motho yó e be e le Morwa wa Modimo.”—Mareka 15:39.
2 Morwa wa Modimo! Lešole leo le be le nepile. Le be le sa tšwa go bona tiragalo e bohlokwa kudu yeo e kilego ya direga lefaseng. Mabakeng a pejana, Modimo ka noši o be a ile a bitša Jesu Morwa wa gagwe yo a ratwago. (Mateo 3:17; 17:5) Ke ka baka la’ng Jehofa a dumeletše Morwa wa gagwe gore a hwe? Ka gobane ye e be e le tsela ya Modimo ya go phološa batho sebeng le lehung.
O KGETHILWE BAKENG SA MORERO O KGETHEGILEGO
3 Go etša ge re ithutile ka pukung ye nakong e fetilego, Jesu o be a le gona pele e e-ba motho. O bitšwa “Morwa mo-tswalwa-esi” wa Modimo ka gobane Jehofa o mmopile ka go lebanya. Ka morago ga moo Modimo o ile a diriša Jesu go tšweletša dilo tše dingwe ka moka. (Johane 3:18; Ba-Kolose 1:16) Jesu o be a rata batho ka mo go kgethegilego. (Diema 8:30, 31) Ga go makatše ge Jehofa a ile a kgetha Morwa wa gagwe yo a tswetšwego a nnoši gore a phethe morero o kgethegilego ge batho ba be ba tsena kahlolong ya lehu!
4 Ge a be a bolela kahlolo ya Adama, Efa le Sathane tšhemong ya Edene, Modimo o ile a bolela ka Mophološi wa nakong e tlago e le “peu.” Peu ye e be e tla tla e tloša madi-mabe ao Sathane Diabolo “noga ya kgale” a a bakilego. Ge e le gabotse, Peu e Holofeditšwego e be e tla pšhatlaganya Sathane le bohle ba ba mo latetšego.—Genesi 3:15; 1 Johane 3:8; Kutollo 12:9, PK.
5 Nywaga-kgolong ka moka, Modimo o ile a utolla mo gontši ganyenyane-ganyenyane mabapi le Peu yeo gape e bitšwago Mesia. Go etša ge go bontšhitšwe tšhateng e lego go letlakala 37, diporofeto tše dintši di ile tša nea ditaba ka botlalo mabapi le dibopego tše dintši tša bophelo bja gagwe lefaseng. Ka mohlala, o be a swanetše go kgotlelela tshwaro e sehlogo kudu e le gore a phethe karolo ya gagwe morerong wa Modimo.—Jesaya 53:3-5.
LEBAKA LEO KA LONA MESIA A BEGO A TLA HWA
6 Boporofeta bjo bo begilwego go Daniele 9:24-26 bo boletše e sa le pele gore Mesia—Motlotšwa wa Modimo—o be a tla phetha morero o mogolo. O be a tla tla lefaseng gore “xo fedišwê dikaroxô, xo lebalwê dibe, xo dirwê poêlanô, xo tšweletšwê tokô” ka mo go sa felego. Mesia o be a tla tloša kahlolo ya lehu go batho ba ba botegago. Eupša se o be a tla se dira bjang? Boporofeta bo hlalosa gore o be a tla “tlošwa,” goba a bolawa.
7 Ba-Isiraele ba kgale ba be ba tlwaetše kgopolo ya go dira poelano bakeng sa phošo. Borapeding bja bona ka tlase ga Molao wo Modimo a ba neilego wona ka Moše, ba be ba neela dihlabelo tša diphoofolo ka mehla. Tše di be di gopotša batho ba Isiraele gore batho ba nyaka selo se itšego sa go boelanya goba sa go bipa dibe tša bona. Moapostola Paulo o ile a hlalosa molao wa motheo ka boripana ka tsela ye: “Tebalêlô e be e se xôna, xe e se ka xo thšolla madi.” (Ba-Hebere 9:22) Bakriste ga ba ka tlase ga Molao wa Moše gotee le tšeo o di nyakago, tše bjalo ka dihlabelo. (Ba-Roma 10:4; Ba-Kolose 2:16, 17) Gape, ba a tseba gore dihlabelo tša diphoofolo di ka se kgone go lokišetša tebalelo ya sa ruri le e feletšego ya dibe. Go e na le moo, dibego tše tša dihlabelo di be di swantšhetša sehlabelo se bohlokwa ka go fetišiša—e lego sa Mesia goba Kriste. (Ba-Hebere 10:4, 10; bapiša le Ba-Galatia 3:24.) Lega go le bjalo, mo gongwe o ka botšiša gore, ‘Na ruri go be go nyakega gore Mesia a hwe?’
8 Ee, Mesia o be a swanetše gore a hwe ge e ba batho ba be ba tla phološwa. Gore re kwešiše lebaka, re swanetše go gopola tšhemong ya Edene gomme re leke go kwešiša bogolo bja se se lahlegetšego Adama le Efa ge ba be ba rabela go Modimo. Bophelo bjo bo sa felego bo be bo beilwe pele ga bona! Bjalo ka bana ba Modimo, gape ba be ba e-na le tswalano e lebanyago le yena. Eupša ge ba be ba gana pušo ya Jehofa, ba ile ba lahlegelwa ke seo ka moka gomme ba tlišetša moloko wa batho sebe le lehu.—Ba-Roma 5:12.
9 Go be go le bjalo ka ge eka batswadi ba rena ba pele ba dirišitše tšhelete e ntši ka go se šetše, ba itahlela sekolotong se segolo. Adama le Efa ba ile ba fetišetša sekoloto seo go bana ba bona. Ka ge re sa tswalwa re phethagetše ka go rialo re se na sebe, yo mongwe le yo mongwe wa rena o na le sebe gomme o a hwa. Ge re babja goba re bolela selo se se kgopišago seo re dumago eka re ka se gomiša, re lebeletšana le mafelelo a sekoloto sa rena sa leabela—go se phethagale ga motho. (Ba-Roma 7:21-25) Kholofelo ya rena e nnoši e ithekgile ka go hwetša gape se se lahlegetšego Adama. Lega go le bjalo, re ka se ke ra hwetša bophelo bjo bo phethagetšego bja motho. Ka ge batho ka moka ba ba sa phethagalago ba dira sebe, ka moka ga rena re hwetša lehu e sego bophelo.—Ba-Roma 6:23.
10 Ka gona, na go be go ka ananywa selo se sengwe bakeng sa bophelo bjo Adama a bo lahlilego? Tekanyetšo ya Modimo ya toka e nyaka teka-tekano, “bophelô bo lefyê ka bophelô.” (Ekisodo 21:23) Ka gona go be go swanetše go neelwa bophelo bakeng sa go lefa bophelo bjo bo lahlegilego. Ga se bophelo le ge e le bofe bjo bo bego bo ka swanela. Psalme 49:7, 8 e bolela ka batho ba ba sa phethagalago gore: “Motho a ka se kê a bá a lopolla ngwana wabô, a nthša sa xo mmoêlanya le Modimo. Sa xo rêkolola moy’a-motho se a hlôkwa.” Ka go rialo na boemo ke bjo bo ka hlobogwago? Ruri ga go bjalo.
11 Lelemeng la Sehebere, lentšu “topollo” le bolela tšhelete e lefšago bakeng sa go lopolla lethopša gomme le bile le bolela go leka-lekanya. Ke feela motho yo a nago le bophelo bjo bo phethagetšego yo a bego a ka neela se se lekanago le se se lahlegetšego Adama. Ka morago ga Adama, motho a nnoši yo a phethagetšego yo a ilego a belegwa lefaseng e be e le Jesu Kriste. Ka gona, Beibele e bitša Jesu “Adama wa mafêlêlô” gomme e re kgonthišetša gore Kriste ‘o ikgafile go ba selefa sa go lefela bohle.’ (1 Ba-Korinthe 15:45; 1 Timotheo 2:5, 6) Le ge Adama a fetišeditše lehu go bana ba gagwe, Jesu o fetišetša bophelo bjo bo sa felego. Ba-Korinthe ba Pele 15:22 e hlalosa gore: “Byale ka xe bohle bà e-hwa ka Adama, ba tlo phedišwa bohle ka Kriste.” Ka gona, Jesu o bitšwa ka mo go swanetšego gore ke “Tatê wa xo sa felexo.”—Jesaya 9:5, 6.
KAMOO TOPOLLO E LEFILWEGO KA GONA
12 Lehlabuleng la 29 C.E., Jesu o ile a ya go wa leloko la gabo e lego Johane go ya go kolobetšwa, ka go rialo a itliša go phetha thato ya Modimo. Tiragalong yeo Jehofa o ile a tlotša Jesu ka moya o mokgethwa. Ka gona Jesu o ile a ba Mesia goba Kriste, e lego yo a tloditšwego ke Modimo. (Mateo 3:16, 17) Ka gona Jesu o ile a tsena bodireding bja gagwe bja nywaga e meraro le seripa. O ile a sepela go phatša naga ya gabo a bolela ka Mmušo wa Modimo le go kgoboketša balatedi ba ba botegago. Lega go le bjalo, go se go ye kae go ganetšwa ga gagwe go ile gwa gola go etša ge go be go boletšwe e sa le pele.—Psalme 118:22; Ditiro 4:8-11.
13 Jesu o ile a pepentšha boikaketši bja baetapele ba bodumedi ka sebete gomme ba leka go mmolaya. Mafelelong ba ile ba loga maano-mabe ao a ilego a akaretša go eka, go swara mo go sa swanelago, tsheko yeo e sego ya molao le molato wa maaka wa go lwantšha mmušo. Jesu o ile a bethwa, a tshwelwa ka mare, a kwerwa le go bethwa ka sefepi se se bego se reretšwe go gagola nama ya gagwe. Ka morago mmuši wa Roma Pontio Pilato o ile a mo ahlolela lehu koteng ya tlhokofatšo. O ile a kokotelwa ka dipikiri paleng ya kota gomme a lekelela moo a otlologile. Mohemo o mongwe le o mongwe o be o le bohloko o šoro gomme a tšea diiri tše dintši gore a hwe. Tlaišegong yeo ka moka, Jesu o ile a kgomarela potego e phethagetšego go Modimo.
14 Ka gona, e be e le ka Nisani 14, 33 C.E. ge Jesu a be a neela bophelo bja gagwe e le “topollô ya ba bantši.” (Mareka 10:45; 1 Timotheo 2:5, 6) A le legodimong, Jehofa o be a kgona go bona Morwa wa gagwe yo a ratwago a tlaišega gomme a e-hwa. Ke ka baka la’ng Modimo a ile a dumelela selo se bohloko gakaalo gore se direge? O dirile bjalo ka gobane o ratile batho. Jesu o itše: “Xobane Modimo ó ratile lefase xakaakaa, a bá a le nea Morwa wa xaxwe e a tswetšwexo à nnoši, xore mang le mang e a mo dumetšexo a se kê a lahlêxa, a bê le bophelô byo bo sa felexo.” (Johane 3:16) Lehu la Jesu le bile le re ruta gore Jehofa ke Modimo wa toka e phethagetšego. (Doiteronomio 32:4) Ba bangwe ba ka ipotšiša lebaka leo ka lona Modimo a sa kago a nyefiša melao ya gagwe ya motheo ya toka yeo e bego e nyaka gore bophelo bo lefše ka bophelo gomme a hlokomologe mafelelo a tsela ya Adama ya sebe. Lebaka ke gore ka mehla Jehofa o kgomarela melao ya gagwe le go e phagamiša, gaešita le ge seo se mo nyaka mo gontši.
15 Gape, toka ya Jehofa e be e nyaka gore lehu la Jesu le be le mafelelo a thabišago. Le gona, na e be e tla ba toka go dumelela Jesu yo a botegago go robalela ruri lehung? Ruri go be go ka se be bjalo! Mangwalo a Sehebere a be a porofetile gore mmotegi wa Modimo o be a ka se robalele ruri ka lebitleng. (Psalme 16:10; Ditiro 13:35) O ile a robala lehung ka dikarolo tša matšatši a mararo, ke moka Jehofa Modimo a mo tsošetša bophelong e le sebopiwa se matla sa moya.—1 Petro 3:18.
16 Lehung la gagwe, Jesu o ile a gafela bophelo bja gagwe bja motho sa ruri. Ge a be a tsošetšwa bophelong legodimong, o ile a ba moya o neago bophelo. Go oketša moo, ge Jesu a be a rotogela lefelong le lekgethwa-kgethwa legohleng o ile a kopanywa gape le Tatagwe yo a ratwago gomme a tliša ka molao go Yena mohola wa bophelo bja gagwe bjo bo phethagetšego bja motho. (Ba-Hebere 9:23-28) Mohola wa bophelo bjoo bjo bohlokwa bjale o be o ka dirišwa bakeng sa batho ba ba kwago. Seo se bolela’ng go wena?
TOPOLLO YA KRISTE LE WENA
17 Ela hloko ditsela tše tharo tšeo sehlabelo sa Kriste sa topollo se go holago ka tšona gaešita le mo nakong ye. Ya pele, se tliša tebalelo ya dibe. Ka go dumela mading a Jesu a tšholotšwego re ‘bona topollo,’ ee, “tebalêlô ya dikaroxô.” (Ba-Efeso 1:7) Ka gona gaešita le ge e ba re dira sebe se segolo, re ka kgopela Modimo gore a re lebalele ka leina la Jesu. Ge e ba re itshola e le ka kgonthe, Jehofa o diriša mohola wa sehlabelo sa Morwa wa gagwe sa topollo go rena. Modimo o a re lebalela, a re nea tšhegofatšo ya letswalo le lebotse go e na le go re nea kotlo ya lehu yeo re ipakelago yona ka go dira sebe.—Ditiro 3:19; 1 Petro 3:21.
18 Ya bobedi, sehlabelo sa Kriste sa topollo se thea motheo bakeng sa kholofelo ya rena ya bokamoso. Moapostola Johane o ile a bona ponong gore “lešaba le lexolo la batho ba xo sexo motho e a kxônaxo xo ba bala” le be le tla phologa bofelo bjo bo nyamišago bja tshepedišo ye ya dilo. Ke ka baka la’ng le tla phologa ge Modimo a fediša ba bangwe ba bantši gakaakaa? Morongwa o ile a botša Johane gore lešaba le legolo le be le “hlatswitše mašela a [lona la] a taxafatša mading a Kwana” Jesu Kriste. (Kutollo 7:9, 14) Ge feela re dumela mading a Jesu Kriste a tšholotšwego gomme re phela ka go dumelelana le ditaelo tša Modimo, re tla hlweka mahlong a Modimo gomme ra ba le kholofelo ya bophelo bjo bo sa felego.
19 Ya boraro, sehlabelo sa topollo ke bohlatse bjo bo feletšego bja lerato la Jehofa. Lehu la Kriste le bontšhitše ditiro tše pedi tše dikgolo kudu tša lerato historing ya legohle: (1) lerato la Modimo ge a be a romela Morwa wa gagwe gore a tle a re hwele; (2) lerato la Jesu ge a be a ikgafa ka go rata e le topollo. (Johane 15:13; Ba-Roma 5:8) Ge e ba re bontšha tumelo e le ka kgonthe, lerato le le šoma go yo mongwe le yo mongwe wa rena. Moapostola Paulo o itše: “Morwa wa Modimo e a nthatilexo, a ikxafa ka ’baka la-ka.”—Ba-Galatia 2:20; Ba-Hebere 2:9; 1 Johane 4:9, 10.
20 Ka gona, anke re bontšheng tebogo ya rena bakeng sa lerato le le bontšhitšwego ke Modimo le Kriste ka go dumela sehlabelong sa Jesu sa topollo. Go dira bjalo go lebiša bophelong bjo bo sa felego. (Johane 3:36) Lega go le bjalo, phologo ya rena ga se lebaka le bohlokwa-hlokwa la bophelo bja Jesu le lehu la gagwe lefaseng. Aowa, selo seo a bego a tshwenyegile kudu ka sona e be e le kgang e kgolo kudu, e lego ya legohle. Go etša ge re tla bona kgaolong e latelago, kgang yeo e re kgoma ka moka ka gobane e bontšha lebaka leo ka lona Modimo a dumeletšego bokgopo le tlaišego gore di tšwele pele ka nako e telele gakaakaa lefaseng le.
HLAHLOBA TSEBO YA GAGO
Ke ka baka la’ng Jesu a ile a swanelwa ke go hwa gore a phološe batho?
Topollo e lefilwe bjang?
O holwa ke topollo ka ditsela dife?
[Study Questions]
1, 2. (a) Molaodi wa madira a Roma o ile a thoma go lemoga bjang yoo Morwa wa Modimo e lego yena? (b) Ke ka baka la’ng Jehofa a ile a dumelela Jesu gore a hwe?
3. Ke ka baka la’ng e be e le mo go swanetšego gore Morwa wa Modimo yo a tswetšwego a nnoši a kgethwe bakeng sa morero o kgethegilego mabapi le batho?
4, 5. Pele Jesu a e-tla lefaseng, Beibele e ile ya utolla eng mabapi le Peu yeo e lego Mesia?
6. Go ya ka Daniele 9:24-26, Mesia o be a tla phetha’ng gona bjang?
7. Ke ka baka la’ng ba-Juda ba be ba neela dihlabelo tša diphoofolo, gona tše di be di swantšhetša’ng?
8, 9. Ke selo sefe sa bohlokwa se se lahlegetšego Adama le Efa, gona ditiro tša bona di kgomile bana ba bona bjang?
10. Go be go nyakega’ng gore go rekollwe se se lahlegetšego Adama?
11. (a) Lentšu “topollo” le bolela’ng ka Sehebere? (b) Ke mang feela yo a bego a ka lopolla batho, gona ka baka la’ng?
12. Jesu o bile Mesia neng, gona o ile a phegelela tsela efe ya go phela ka morago ga moo?
13. Ke ditiragalo dife tše di ilego tša lebiša lehung la Jesu e le mmotegi?
14. Ke ka baka la’ng Modimo a ile a dumelela Morwa wa gagwe go tlaišega le go hwa?
15. Ka ge e ka be e bile go hloka toka go dumelela go ba gona ga Jesu gore go felele sa ruri, Jehofa o ile a dira’ng?
16. Jesu ge a boetše legodimong o ile a dira’ng?
17. Re ka holwa bjang ke tebalelo motheong wa sehlabelo sa Kriste sa topollo?
18. Sehlabelo sa Jesu se re nea kholofelo ka tsela efe?
19. Sehlabelo sa Kriste se hlatsela bjang gore yena le Tatagwe ba a go rata?
20. Ke ka baka la’ng re swanetše go ba le tumelo sehlabelong sa Jesu sa topollo?