Kgaolo 16
Kamoo O Ka Batamelago Modimo Ka Gona
MOSEPEDI wa go boga naga yo a etetšego naga ya ka Bohlabela o be a tlabilwe ke ditirelo tša bodumedi tšeo a di bonego tempeleng ya ma-Buddha. Gaešita le ge diswantšho e be e se tša Maria goba Kriste, bontši bja ditirelo di be di swana le tša kereke ya gabo gae. Ka mohlala, o ile a lemoga go dirišwa ga dirosari le go opelwa ga dithapelo. Ba bangwe le bona ba ile ba dira dipapišo tše bjalo. E ka ba ka Bohlabela goba ka Bodikela, ditsela tšeo ka tšona ba ba ineetšego ba lekago go batamela Modimo goba dilo tšeo ba di rapelago ke tše di swanago ka mo go tlabago.
2 Ba bantši ba leka go batamela Modimo ka mo go kgethegilego ka go mo rapela. Thapelo e hlalositšwe e le “tiro ya go boledišana ga motho le selo se sekgethwa—Modimo, medimo, tikologo ya ka kua ga legohle goba matla a phagametšego tlhago.” (The New Encyclopædia Britannica) Lega go le bjalo, ba bangwe ge ba batamela Modimo ka thapelo ba nagana feela ka seo ba ka se hwetšago go seo. Ka mohlala, monna o kile a botšiša yo mongwe wa Dihlatse tša Jehofa gore: “Ge o nthapelela, na mathata ao ke nago le ona ka lapeng la-ka, modirong le a-ka a tša maphelo a tla rarollega?” Go bonala monna yo a be a nagana bjalo, eupša ba bantši ba a rapela gomme ba hwetša gore mathata a bona a tšwela pele. Ka gona re ka botšiša gore, ‘Ge e le gabotse ke ka baka la’ng re swanetše go batamela Modimo?’
LEBAKA LEO KA LONA RE SWANETŠEGO GO BATAMELA MODIMO
3 Thapelo ga se tirelo e se nago morero, goba gore e fo ba tsela yeo go ka hwetšwago selo se sengwe ka yona. Lebaka le legolo la go batamela Modimo ke go ba le tswalano ya kgaufsi le yena. Ka gona dithapelo tša rena di swanetše go lebišwa go Jehofa Modimo. Mopsalme Dafida o itše: “Morêna ó kxaufsi le bohle ba mmitšaxo.” (Psalme 145:18) Jehofa o re laleletša gore re tsene tswalanong ya khutšo le yena. (Jesaya 1:18) Ba ba arabelago taletšong ye ba dumelelana le mopsalme yo a itšego: “Xe e le nna ke natefêlwa ke xo ba kxaufsi le Modimo.” Ka baka la’ng? Ka gobane ba ba batamelago Jehofa Modimo ba tla ba le lethabo la kgonthe le khutšo ya monagano.—Psalme 73:28.
4 Ke ka baka la’ng re swanetše go rapela Modimo gore a re thuše ge e ba a ‘tseba tše re di hlokago re sešo ra mo kgopela’? (Mateo 6:8; Psalme 139:4) Thapelo e bontšha gore re dumela go Modimo gomme re mo lebelela e le Mothopo wa “’neô tšohle tše botse, le ’mphô tšôhle di tletšexo.” (Jakobo 1:17; Ba-Hebere 11:6) Jehofa o thabela dithapelo tša rena. (Diema 15:8) O thabela go kwa dipolelo tša rena tše di nago le morero tša tebogo le theto, go fo swana le ge tate a thabela go kwa ngwana wa gagwe yo monyenyane a bolela mantšu a tšwago pelong a tebogo. (Psalme 119:108) Mo go nago le tswalano e botse ya tate le ngwana go na le poledišano e borutho. Ngwana yo a ratwago o nyaka go bolela le tatagwe. Go bjalo ge go tliwa tswalanong ya rena le Modimo. Ge e ba re tloga re leboga seo re ithutago sona ka Jehofa le lerato leo a le bontšhitšego bakeng sa rena, re tla ba le kganyogo e matla ya go itlhalosa go yena ka thapelo.—1 Johane 4:16-18.
5 Ge re batamela Modimo Yo Godimo-dimo, re swanetše go ba ba ba hlomphago gaešita le ge go sa nyakege gore re tshwenyege ka go fetišiša ka mantšu a lebanego ao re a dirišago. (Ba-Hebere 4:16) Re ka batamela Jehofa ka dinako tšohle. Ke tokelo e kgolo gakaakang gore re ka ‘tšhollela dipelo tša rena’ go Modimo ka thapelo! (Psalme 62:8) Go leboga Jehofa go lebiša tswalanong e borutho le yena, e swanago le yeo monna yo a botegago Aborahama a bilego le yona e le mogwera wa Modimo. (Jakobo 2:23, PK) Eupša ge re rapela Morena yo a Phagamego wa legohle, re swanetše go itumelelanya le tšeo a di nyakago bakeng sa go mmatamela.
TŠE DI NYAKEGAGO BAKENG SA GO BATAMELA MODIMO
6 Na go nyakega tšhelete gore re batamele Modimo? Batho ba bantši ba lefa baruti gore ba ba rapelele. Ba bangwe ba bile ba dumela gore dithapelo tša bona di tla kwewa go ya ka tekanyo ya moneelo wo ba o neelago. Lega go le bjalo, Lentšu la Modimo ga le bolele gore go nyakega mpho ya tšhelete gore re batamele Jehofa ka thapelo. Ditokišetšo tša gagwe tša moya le ditšhegofatšo tša tswalano le yena thapelong di hwetšagala ka ntle le tefo.—Jesaya 55:1, 2.
7 Ka gona, go nyakega’ng? Boemo bjo bo swanetšego bja pelo ke selo se sengwe se se nyakegago. (2 Koronika 6:29, 30; Diema 15:11) Re swanetše go ba le tumelo ka dipelong tša rena go Jehofa Modimo e le “Mokwi wa dithapêlô” le “moputsi wa ba ba mo tsomago.” (Psalme 65:2; Ba-Hebere 11:6, PK) Gape, re swanetše go ba le pelo e kokobetšego. (2 Dikxoši 22:19; Psalme 51:17) Go se sengwe sa diswantšho tša gagwe, Jesu Kriste o bontšhitše gore molekgetho yo a ikokobeditšego yo a nago le boemo bjo bo kokobetšego bja pelo ge a be a batamela Modimo o ile a itlhatsela e le yo a lokilego kudu go feta Mofarisei yo a ikgogomošago. (Luka 18:10-14) Ge re batamela Modimo ka thapelo, eka re ka gopola gore “Morêna ó nyênya baipoti bohle.”—Diema 16:5.
8 Ge e ba re kganyoga gore Modimo a arabe dithapelo tša rena, re swanelwa ke go itlhatswa boitshwaro ka moka bja sebe. Ge morutiwa Jakobo a be a kgothaletša ba bangwe gore ba batamele Modimo, o ile a oketša ka gore: “Hlapang diatla, lena Badira-dibe! Hlapišang dipelo, lena ba pelo-pedi.” (Jakobo 4:8) Gaešita le bafoši ba ka tsena tswalanong ya khutšo le Jehofa ge e ba ba itshola gomme ba tlogela tsela ya bona ya pele ya go phela. (Diema 28:13) Jehofa a ka se ke a re kwa ge e ba re itira feela eka re hlwekišitše tsela ya rena. Lentšu la Modimo le re: “Xobane mahlô a Morêna a bôna baloki; ’tsêbê tša xaxwe di kwa xe ba lla. Xomme sefahloxô sa Morêna se lebile ba xo dira bobe.”—1 Petro 3:12.
9 Beibele e re: “Ruri mo ’faseng xa xo motho-moloki mo-dira-tše-boló e a sa direxo sebe.” (Mmoledi 7:20) Ka go rialo o ka botšiša gore: ‘Bjale re ka batamela Jehofa Modimo bjang?’ Beibele e araba ka gore: “Xe xo ka ba le e a diraxo dibe, xôna re na le Morapeledi xo Tata wešo, Jesu Kriste Yêna Moloki.” (1 Johane 2:1) Le ge re le badira-dibe, re ka batamela Modimo ka tokologo ya polelo ka Jesu Kriste, yo a hwilego e le topollo bakeng sa rena. (Mateo 20:28) Ke yena mokero o nnoši wo re ka batamelago Jehofa Modimo ka wona. (Johane 14:6) Ga se ra swanela go nagana gore mohola wa sehlabelo sa Jesu sa topollo o tla fo šoma gomme ra dira sebe ka boomo. (Ba-Hebere 10:26) Lega go le bjalo, ge e ba re dira sohle seo re ka se kgonago go phema se sebe eupša re dira phošo ka dinako tše dingwe, re ka itshola gomme ra kgopela Modimo gore a re lebalele. Ge re mmatamela ka pelo e kokobetšego o tla re kwa.—Luka 11:4.
DIBAKA TŠA GO BOLELA LE MODIMO
10 Jesu Kriste o be a lebelela tswalano ya gagwe le Jehofa e le e bohlokwa kudu. Ka gona, Jesu o ile a rulaganyetša nako ya go bolela le Modimo thapelong ka sephiring. (Mareka 1:35; Luka 22:40-46) Re dira gabotse ge re ekiša mohlala wa Jesu gomme ra rapela Modimo ka mehla. (Ba-Roma 12:12) Ke mo go swanetšego go thoma letšatši ka mantšu a thapelo, gomme pele re e-ya go robala re ka leboga Jehofa ka mo go swanetšego bakeng sa modiro wa letšatši. Mosegare, kgonthišetša gore o batamela Modimo “ka mabaka ohle.” (Ba-Efeso 6:18) Re ka ba ra rapela ka setu ka dipelong tša rena re tseba gore Jehofa o kgona go re kwa. Go bolela le Modimo ka sephiring go re thuša go tiiša tswalano ya rena le yena gomme go rapela Jehofa letšatši le letšatši go re thuša gore re batamele kgaufsi kudu le yena.
11 Gape, Jehofa o theetša dithapelo tše di rapelwago bakeng sa dihlopha tša batho. (1 Dikxoši 8:22-53) Re ka batamela Modimo re le lapa, hlogo ya lapa e etelela pele. Se se matlafatša tlemo ya lapa gomme Jehofa e ba motho wa kgonthe go bana ge ba e-kwa batswadi ba bona ba rapela Modimo ka boikokobetšo. Go thwe’ng ge e ba motho yo mongwe a emela sehlopha thapelong, mohlomongwe sebokeng sa Dihlatse tša Jehofa? Ge e ba re le gare ga batheetši, anke re theetšeng ka šedi e le gore mafelelong a thapelo re ka bolela ka pelo ka moka gore “Amene,” yeo e bolelago gore “A go be bjalo.”—1 Ba-Korinthe 14:16.
DITHAPELO TŠEO JEHOFA A DI KWAGO
12 Ba bangwe ba ka ba ba nagana gore Modimo ga a arabe dithapelo tša bona gaešita le ge ba mo rapela ka Kriste. Lega go le bjalo, moapostola Johane o itše: “Ó a re kwa xe re kxopêla se se amanaxo le thatô ya [Modimo].” (1 Johane 5:14) Ka gona-ge, re swanetše go kgopela se se dumelelanago le thato ya Modimo. Ka ge a kgahlegela katlego ya rena ya moya, selo le ge e le sefe se se kgomago boemo bja rena bja moya ke taba e swanetšego yeo e ka rapelelwago. Re swanetše go ganetša teko ya go lebiša tlhokomelo ka mo go feletšego go dinyakwa tša nama. Ka mohlala, gaešita le ge e le mo go swanetšego go rapelela temogo le matla a go lebeletšana le bolwetši, go tshwenyega ka boemo bja tša maphelo ga se gwa swanela go pipetša dikgahlego tša moya. (Psalme 41:1-3) Mosadi yo mongwe wa Mokriste ge a be a lemogile gore o be a tshwenyegile kudu ka boemo bja gagwe bja tša maphelo, o ile a kgopela Jehofa gore a mo thuše go ba le pono e nepagetšego ka bolwetši bja gagwe. Ka baka leo, mathata a gagwe a tša maphelo e ile ya ba taba e nyenyane kudu gomme a ikwa gore o neilwe “matla a fetišago a tlhago.” (2 Ba-Korinthe 4:7, NW) Kganyogo ya gagwe ya go ba thušo ya moya go ba bangwe e ile ya gola gomme a ba mogoeledi wa Mmušo wa nako e tletšego.
13 Re ka akaretša’ng dithapelong tša rena e le gore Jehofa a thabele go di kwa? Jesu Kriste o rutile barutiwa ba gagwe tsela ya go rapela. Thapelong ya mohlala e begilwego go Mateo 6:9-13 o neile thulaganyo ya ditaba tšeo re ka di rapelelago ka mo go swanetšego. Selo seo re swanetšego go tshwenyega kudu ka sona dithapelong tša rena ke sefe? Leina la Jehofa Modimo le Mmušo wa gagwe di swanetše go tla pele. Go kgopela dinyakwa tša rena tša dilo tše di bonagalago go nepagetše. Gape ke gabohlokwa go kgopela tebalelo ya dibe tša rena le go lopollwa melekong le go yo kgopo, Sathane Diabolo. Jesu o be a sa nyake gore re opele thapelo ye goba re e boeletše gantši-ntši, re e bolele ka hlogo ka ntle le go nagana ka seo e se bolelago. (Mateo 6:7) E be e tla ba tswalano ya mohuta mang ge e ba ngwana a diriša mantšu a swanago nako le nako ge a bolela le tatagwe?
14 Ka ntle le ditopo le dithapelo tše di tšwago pelong, re swanetše go rapela dithapelo tša theto le tebogo. (Psalme 34:1; 92:1; 1 Ba-Thesalonika 5:18) Re ka rapelela le ba bangwe. Dithapelo tše di lego mabapi le banababo rena ba moya le dikgaetšedi ba ba tshwenywago goba ba ba tlaišwago di bontšha go ba kgahlegela ga rena, gomme Jehofa o thabela go re kwa re bolela go kgomega mo go bjalo. (Luka 22:32; Johane 17:20; 1 Ba-Thesalonika 5:25) Ge e le gabotse, moapostola Paulo o ngwadile gore: “A Le se kê la belaêla selô. Mo xo kaxo ba le tše Le di nyakaxo, Le di tlišê pele xa Modimo ka kxopêlô le ka thapêlô e naxo le teboxô. Xomme khutšô ya Modimo, ye e fetaxo thlaoloxanyô yohle, a e bolokê dipelo tša lena le ’kxopolô tša lena xo Kriste Jesu.”—Ba-Filipi 4:6, 7.
PHEGELELA THAPELONG
15 Le ge o hwetša tsebo mabapi le Modimo, o ka nagana gore dithapelo tša gago ka dinako tše dingwe ga di arabje. Se se ka ba se le bjalo ka gobane e ka ba e se nako ya Modimo ya go araba thapelo e itšego. (Mmoledi 3:1-9) Jehofa a ka dumelela boemo gore bo tšwele pele ka nakwana, eupša o araba dithapelo gomme o tseba nako e kaone ya go dira bjalo.—2 Ba-Korinthe 12:7-9.
16 Go phegelela ga rena thapelong go utolla kgahlego ya rena e tšwago pelong go seo re se botšago Modimo. (Luka 18:1-8) Ka mohlala, re ka kgopela Jehofa gore a re thuše go fenya bofokodi bjo itšego. Ka go phegelela thapelong le go gata mogato ka go dumelelana le ditopo tša rena, re bontšha go botega ga rena. Re swanetše go lebanya le go botega ditopong tša rena. Ke gabohlokwa ka mo go kgethegilego go rapela ka mo go tseneletšego ge re lekwa. (Mateo 6:13) Ge re dutše re rapela mola re leka go laola dikganyogo tša rena tša sebe, re tla bona kamoo Jehofa a re thušago ka gona. Se se tla aga tumelo ya rena gomme sa matlafatša tswalano ya rena le yena.—1 Ba-Korinthe 10:13; Ba-Filipi 4:13.
17 Ka go hlagolela kgopolo ya borapedi ge re neela Jehofa Modimo tirelo e kgethwa, re tla lemoga gore ga re mo hlankele ka matla a rena. Ke Jehofa a dirago dilo. (1 Ba-Korinthe 4:7) Go lemoga se go tla re thuša go ba ba ikokobeditšego gomme gwa humiša tswalano ya rena le yena. (1 Petro 5:5, 6) Ee, re na le mabaka a kwalago a go phegelela thapelong. Dithapelo tša rena tše di tšwago pelong le tsebo ya rena e bohlokwa ya kamoo re ka batamelago Tatago rena wa legodimong ka gona di tla dira gore bophelo bja rena e be bja lethabo e le ka kgonthe.
GO BOLEDIŠANA LE JEHOFA GA SE GWA SEKAMELA KA LEHLAKORENG LE TEE
18 Ge e ba re nyaka gore Modimo a kwe dithapelo tša rena, re swanetše go theetša seo a se bolelago. (Sakaria 7:13) Ga a sa romela melaetša ya gagwe ka baporofeta ba ba buduletšwego ke Modimo, gomme ga a diriše ditsela tša moya. (Doiteronomio 18:10-12) Eupša re ka theetša Modimo ka go ithuta Lentšu la gagwe Beibele. (Ba-Roma 15:4; 2 Timotheo 3:16, 17) Go fo swana le ge re ka hlagolela go rata dijo tša nama tšeo di re loketšego, re kgothaletšwa go ‘hlolosela lebese le le sa tswakwago la lentšu.’ Hlagolela go rata dijo tša moya ka go bala Lentšu la Modimo letšatši le letšatši.—1 Petro 2:2, 3; Ditiro 17:11.
19 Naganišiša ka seo o se balago ka Beibeleng. (Psalme 1:1-3; 77:11, 12) Seo se bolela go naganišiša ka taba. Mo gongwe o ka swantšha se le go šila dijo. O ka šila dijo tša moya ka go tswalanya seo o se balago le dilo tšeo o šetšego o di tseba. Ela hloko kamoo taba e kgomago bophelo bja gago ka gona, goba o nagane ka seo e se utollago mabapi le dika tša Jehofa le ditirišano tša gagwe. Ka gona o ka ja dijo tša moya tšeo Jehofa a di lokišetšago ka thuto ya motho ka noši. Se se tla go batametša kgaufsi kudu le Modimo gomme sa go thuša go lebeletšana le mathata a letšatši le letšatši.
20 O ka batamela Modimo le ka go theetša Lentšu la gagwe ge le ahla-ahlwa dibokeng tša Bokriste, go fo swana le ge ba-Isiraele ba ile ba theetša ka šedi ge ba be ba kgobokanetše go kwa go balwa ga Molao wa Modimo phatlalatša. Barutiši ba nakong yeo ba be ba dira gore go bala ga bona Molao go be le morero, ka go rialo ba thuša batheetši ba bona go kwešiša le gore ba tutueletšege go diriša seo ba se kwelego. Se se ile sa lebiša lethabong le legolo. (Nehemia 8:8, 12) Ka gona itlwaetše go ba gona dibokeng tša Dihlatse tša Jehofa. (Ba-Hebere 10:24, 25) Se se tla go thuša go kwešiša ke moka wa diriša tsebo ya go tseba Modimo bophelong bja gago, gomme se tla go tlišetša lethabo. Go ba karolo ya borwarre bja Bokriste bja lefase ka bophara go tla go thuša go dula o le kgaufsi le Jehofa. Go etša ge re tla bona, o ka hwetša tšhireletšego ya kgonthe gare ga batho ba Modimo.
HLAHLOBA TSEBO YA GAGO
Ke ka baka la’ng o swanetše go batamela Jehofa?
Dilo tše dingwe tše di nyakegago bakeng sa go batamela Modimo ke dife?
O ka akaretša’ng dithapelong tša gago?
Ke ka baka la’ng o swanetše go phegelela thapelong?
O ka theetša Jehofa bjang lehono?
[Study Questions]
1. Go bonala go swana gofe madumeding a mantši?
2. Thapelo e hlalositšwe bjang, gona ke ka baka la’ng batho ba bantši ba rapela?
3. Dithapelo tša rena di swanetše go lebišwa go mang, gona ka baka la’ng?
4, 5. (a) Ke ka baka la’ng go le bohlokwa go rapela Modimo? (b) Re ka aga tswalano ya mohuta mang le Modimo ka thapelo?
6, 7. Gaešita le ge Modimo a sa nyake go lefša gore a kwe dithapelo tša rena, o nyaka’ng go rena ge re rapela?
8. Ge e ba re nyaka gore Modimo a arabe dithapelo tša rena re swanetše go itlhatswa eng?
9. Re swanetše go batamela Jehofa ka mang, gona ka baka la’ng?
10. Re ka ekiša bjang Jesu ge go tliwa thapelong, gona tše dingwe tša dinako tša go rapela ka sephiring ke dife?
11. (a) Ke ka baka la’ng malapa a swanetše go rapela a le gotee? (b) Go bolela’ng ge o re “Amene” mafelelong a thapelo?
12. (a) Ke ka baka la’ng Modimo a sa arabe dithapelo tše dingwe? (b) Ke ka baka la’ng re sa swanela go lebiša tlhokomelo ka mo go feletšego go dinyakwa tša motho ka noši ge re rapela?
13. Go etša ge go bontšhitšwe go Mateo 6:9-13, ke ditaba dife tše dingwe tše di swanetšego tšeo re ka di akaretšago dithapelong tša rena?
14. Ka ntle le ditopo, ke dithapelo dife tšeo re swanetšego go di rapela?
15. Ke eng seo re swanetšego go se gopola ge e ba dithapelo tša rena di bonala di sa arabje?
16. Ke ka baka la’ng re swanetše go phegelela thapelong, gona go dira se go ka kgoma bjang tswalano ya rena le Modimo?
17. Re tla holwa bjang ke kgopolo ya borapedi ge re hlankela Modimo?
18. Re ka theetša Modimo bjang?
19. Go naganišiša ka seo o se balago ka Beibeleng go hola ka eng?
20. Go ba gona dibokeng tša Bokriste go re thuša bjang go batamela Modimo?