Kgaolo 17
Hwetša Tšhireletšego Gare Ga Batho Ba Modimo
AKANYA ledimo le lešoro le sentše lefelo leo o dulago go lona. Legae la gago le sentšwe gomme dithoto tša gago ka moka di lahlegile. Dijo ga di hwetšagale. Boemo bo bonala bo se na kholofelo. Ka morago go fihla dikabo tše di sa letelwago tša tlhakodišo. Dijo le diaparo di newa ka bontši. O agelwa ntlo e mpsha. Ka kgonthe o be o tla leboga motho yo a dirilego gore ditokišetšo tše di hwetšagale.
2 Selo se se swanago se a direga lehono. Go swana le ledimo leo, borabele bja Adama le Efa bo bakile tshenyo e kgolo molokong wa batho. Legae la batho la Paradeise le ile la lahlega. Ga e sa le go tloga ka nako yeo, mebušo ya batho e paletšwe ke go šireletša batho ntweng, bosenying le go hlokeng toka. Bodumedi bo tlogetše ba bantši ba bolawa ke tlala ya dijo tše di agago tša moya. Lega go le bjalo, mo nakong ye ge re bolela ka kgopolo ya moya Jehofa Modimo o nea dijo, diaparo le lefelo la tšhireletšo. O dira seo bjang?
“MOLAKI E A BÔTÊXAXO YO BOHLALE”
3 Dikabo tša tlhakodišo di abja ka kakaretšo ka mokero o rulagantšwego, gomme Jehofa o diretše batho ba gagwe tokišetšo ya moya ka mo go swanago. Ka mohlala, ba-Isiraele e be e le “phuthêxô ya Morêna” ka nywaga e ka bago 1 500. Gare ga bona go be go e-na le ba ba bego ba hlankela e le mokero wa Modimo wa go ruta Molao wa gagwe. (1 Koronika 28:8; 2 Koronika 17:7-9) Lekgolong la pele la nywaga C.E., Jehofa o ile a tšweletša mokgatlo wa Bokriste. Diphuthego di ile tša bopša gomme tša šoma ka tlase ga tlhahlo ya sehlopha se bušago se se bego se bopilwe ke baapostola le banna ba bagolo. (Ditiro 15:22-31) Ka mo go swanago lehono, Jehofa o dirišana le batho ba gagwe ka sehlopha se se rulagantšwego. Re tseba bjang se?
4 Jesu o boletše gore nakong ya go ba gona ga gagwe a le matleng a Mmušo, “molaki e a bôtêxaxo yo bohlale” o be a tla hwetšwa a nea balatedi ba Gagwe “dijô ka lebaka la xôna.” (Mateo 24:45-47) Ge Jesu a be a bewa e le Kgoši ya legodimong ka 1914, ke bomang ba ba ipontšhitšego e le “molaki” yo? Ka kgonthe e be e se baruti ba Bojakane. Ba be ba fepa mehlape ya bona kudu-kudu ka diphatlalatšo tša maaka tšeo di bego di thekga mebušo ya ditšhaba tša bona Ntweng ya I ya Lefase. Eupša dijo tše di swanetšego le tšeo di newago ka lebaka la gona, di be di abja ke sehlopha sa Bakriste ba therešo ba ba bego ba tloditšwe ka moya o mokgethwa wa Modimo gomme e le karolo ya seo Jesu a se biditšego “mohlatswana o monyenyane.” (Luka 12:32) Bakriste ba ba ba tloditšwego ba ile ba bolela Mmušo wa Modimo go e na le mebušo ya batho. Ka baka leo, nywageng ka moka “dinku tše dingwê” tše dimilione tše di sekametšego go lokeng di ile tša tlatša “molaki” yo a tloditšwego go lateleng bodumedi bja therešo. (Johane 10:16) Modimo o hlahla batho ba gagwe ba ba rulagantšwego ka go diriša “molaki e a bôtêxaxo” le Sehlopha sa gagwe se Bušago sa mehleng yeno go dira gore dijo tša moya, diaparo le lefelo la tšhireletšo di hwetšwe ke bohle ba ba kganyogago go hwetša ditokišetšo tše.
“DIJÔ KA LEBAKA LA XÔNA”
5 Jesu o itše: “Motho xa a phele ka boxôbê fêla; ó phela ka mantšu ohle a a tšwaxo molomong wa Modimo.” (Mateo 4:4) Lega go le bjalo, ka manyami batho ba bantši kudu ga ba theetše dipolelo tša Modimo. Go etša ge moporofeta wa Jehofa Amosi a boletše e sa le pele, go na le “tlala mo faseng, e sexo tlala ya boxôbê, e sexo lenyôra la meetse; [ke] xo lla xo kwa Lentšu la Morêna.” (Amosi 8:11) Gaešita le batho bao e lego ba bodumedi kudu ba bolaišwa tlala ya moya. Lega go le bjalo, thato ya Jehofa ke gore “batho bohle ba phološwê ba fihlêlê tsebô [e nepagetšego, NW] ya therešô.” (1 Timotheo 2:3, 4) Ka mo go swanetšego, o nea dijo tša moya ka bontši. Eupša di ka hwetšwa kae?
6 Historing ka moka, Jehofa o abetše batho ba gagwe dijo tša moya e le sehlopha. (Jesaya 65:13) Ka mohlala, baperisita ba Isiraele ba ile ba kgoboketša banna, basadi le bana gore ba rutwe Molao wa Modimo e le sehlopha. (Doiteronomio 31:9, 12) Bakriste ba lekgolong la pele la nywaga ba ile ba rulaganya diphuthego ka tlase ga tlhahlo ya sehlopha se bušago gomme ba swara diboka bakeng sa go ruta le go kgothatša bohle. (Ba-Roma 16:5; Filemone 1, 2) Dihlatse tša Jehofa di latela mohlala wo. O laletšwa ka borutho gore o ye dibokeng tša tšona ka moka.
7 Ee, o ka ba o šetše o ithutile mo gontši thutong ya gago ya motho ka noši ya Beibele. Mohlomongwe motho yo mongwe o go thušitše. (Ditiro 8:30-35) Eupša tumelo ya gago e ka swantšhwa le semela se se tlago go pona gomme sa hwa ge e ba se sa newe tlhokomelo e swanetšego. Ka gona, o swanetše go hwetša phepo e swanetšego ya moya. (1 Timotheo 4:6) Diboka tša Bokriste di nea lenaneo le le tšwelago pele la thuto e reretšwego go go fepa moyeng le go go thuša go tšwela pele o gola tumelong ge o dutše o gola tsebong ya go tseba Modimo.—Ba-Kolose 1:9, 10.
8 Diboka di phetha morero o mongwe o bohlokwa. Paulo o ngwadile gore: “A re hlôkômêlaneng seng sa rena, re išanê leratong le medirong e botse. Re se ngalê phuthêxô ya xešo [“go bokana ga rena gotee,” NW].” (Ba-Hebere 10:24, 25) Lentšu la Segerika le le fetoletšwego e le ‘go išana’ le ka ba la bolela “go loutša.” Seema sa Beibele se re: “Thsipi e kxaritša thsipi; le mahlô a batho a a kxaritšana.” (Diema 27:17) Ka moka ga rena re nyaka go ‘loutšwa’ ka mo go sa kgaotšego. Dikgateletšo tša letšatši le letšatši tše di tšwago lefaseng di ka kubiša tumelo ya rena. Ge re e-ya dibokeng tša Bokriste re a kgothatšana. (Ba-Roma 1:11, 12) Ditho tša phuthego di latela keletšo ya moapostola Paulo ya go ‘dula di eletšana le go agana,’ gomme dilo tše bjalo di loutša tumelo ya rena. (1 Ba-Thesalonika 5:11) Go ba gona ka mehla dibokeng tša Bokriste go bile go bontšha gore re rata Modimo gomme go re nea dibaka tša go mo reta.—Psalme 35:18.
“LE APARÊ LERATÔ”
9 Paulo o ngwadile gore: “Le aparê leratô, yôna tlêmô ya botlalô.” (Ba-Kolose 3:14) Jehofa o re lokišeditše seaparo se ka lešoko. Ka tsela efe? Bakriste ba ka bontšha lerato ka gobane ke se sengwe sa dienywa tše di tšwago go Modimo sa moya wa Jehofa o mokgethwa. (Ba-Galatia 5:22, 23) Jehofa ka noši o bontšhitše lerato le legolo kudu ka go romela Morwa wa gagwe yo a tswetšwego a nnoši e le gore re be le bophelo bjo bo sa felego. (Johane 3:16) Pontšho ye e phagamego ya lerato e re neile mohlala wa go bontšha seka se. Moapostola Johane o ngwadile gore: “Xe Modimo a re ratile ka mokxwa woo, xôna xo swanetše xe re ratana.”—1 Johane 4:11.
10 Go ba gona ga gago dibokeng Holong ya Mmušo go tla go nea sebaka se sebotse sa go bontšha lerato. O tla gahlana le batho ba ba fapa-fapanego kudu moo. Ga go pelaelo gore o tla ikwa o gogelwa go ba bantši ba bona di sa tloga fase. Ee, dimelo di a fapana gaešita le gare ga ba ba hlankelago Jehofa. Mohlomongwe nakong e fetilego o be o fo phema batho ba ba bego ba se na dikgahlego goba mekgwa e swanago le ya gago. Lega go le bjalo, Bakriste ba swanetše go ‘rata mokgatlo ka moka wa barwarre.’ (1 Petro 2:17, NW) Ka gona, ipeele pakane ya go tlwaelana le ba ba lego Holong ya Mmušo—gaešita le batho bao nywaga ya bona, semelo, morafo goba maemo a tša thuto a ka bago a fapana le a gago. Go bonala o tla hwetša gore yo mongwe le yo mongwe o na le seka se itšego se se rategago seo a se bontšhago kudu.
11 Go fapana ga dimelo ka phuthegong ga se gwa swanela go go kgopiša. Ka mohlala, anke o akanye dikoloi tše dintši di sepela ka thoko ga gago tseleng. Ga di sepele ka lebelo le le swanago ka moka ga tšona, le gona ga di boemong bjo bo swanago ka moka ga tšona. Tše dingwe di sepetše dimaele tše dintši, eupša tše dingwe di sa tšwa go thoma go sepela bjalo ka wena. Lega go le bjalo, ka moka ga tšona di sepela tseleng go sa šetšwe diphapano tše. Go bjalo le ka batho ba ba bopago phuthego. Ga se bohle ba ba bago le dika tša Bokriste ka lebelo le le swanago. Go feta moo, ga se bohle ba ba lego boemong bjo bo swanago bja mmele goba bja maikwelo. Ba bangwe ba be ba dutše ba rapela Jehofa ka nywaga e mentši; ba bangwe ba sa tšwa go thoma. Lega go le bjalo, ka moka ga bona ba sepela tseleng e yago bophelong bjo bo sa felego, “[e le] ba xo bapêlana, kxopolô è le e tee, kêlêlô è le e tee.” (1 Ba-Korinthe 1:10) Ka gona, lebelela dika tše di tiilego go e na le mafokodi a ba ba lego ka phuthegong. Go dira bjalo go tla thabiša pelo ya gago, ka gobane o tla lemoga gore ka kgonthe Modimo o gare ga batho ba. Le gona, mo ruri ke moo o nyakago go ba gona.—1 Ba-Korinthe 14:25.
12 Ka ge batho ka moka ba sa phethagala, ka dinako tše dingwe motho yo mongwe ka phuthegong a ka bolela goba a dira selo se se go kgopišago. (Ba-Roma 3:23) Morutiwa Jakobo o ngwadile ka mo go kwalago gore: “Re ba xo foša xa-ntši ka moka xa rena. Xe xo ka ba le e a sa fošexo ka leleme, yêna-eo ké monna yo bolô-ka-tlalô.” (Jakobo 3:2) O tla arabela bjang ge e ba motho yo mongwe a go kgopiša? Seema sa Beibele se re: “Molemoxi xa a na sebefedi; bokwala bya xaxwe ké xe a sa latiše phošô.” (Diema 19:11) Go ba le temogo go bolela go bona modung wa boemo, go kwešiša mabaka a motheo a dirilego motho gore a bolele goba a dire dilo ka tsela e itšego. Bontši bja rena re diriša temogo e kgolo ge re fahlelela diphošo tša rena ka noši. Ke ka baka la’ng re sa e dirišetše go kwešiša le go bipa go se phethagale ga ba bangwe?—Mateo 7:1-5; Ba-Kolose 3:13.
13 Le ka mohla o se ke wa lebala gore re swanetše go lebalela ba bangwe ge e ba rena ka noši re tla lebalelwa ke Jehofa. (Mateo 6:9, 12, 14, 15) Ge e ba re phegelela therešo, re tla swara ba bangwe ka tsela e lerato. (1 Johane 1:6, 7; 3:14-16; 4:20, 21) Ka gona ge e ba o e-ba le bothata le motho ka phuthegong, lwantšha go boloka sekgopi. Ge e ba o apere lerato, o tla katanela go rarolla bothata gomme o ka se ke wa dika-dika go kgopela tshwarelo ge e ba o bakile sekgopi.—Mateo 5:23, 24; 18:15-17.
14 Diaparo tša rena tša moya di swanetše go akaretša dika tše dingwe tše di tswalanago kgaufsi le lerato. Paulo o ngwadile gore: “Aparang kxauxêlô le botho le boikokobetšô le bolêta le xo se fêle pelo.” Dika tše, di apešitšwe ke lerato ke karolo ya “motho e mofsa” yo a boifago Modimo. (Ba-Kolose 3:10, 12) Na o tla dira boiteko bja go ikapeša ka tsela ye? Kudu-kudu ge e ba o ikapeša lerato la borwarre o tla ba le leswao le le hlaolago barutiwa ba Jesu, ka gobane o itše: “Seo bohle ba tl’o xo tseba ka sôna xe Le le barutiwa ba-ka, ké xe Le na le leratanô.”—Johane 13:35.
LEFELO LA TŠHIRELETŠEGO
15 Gape, phuthego e šoma e le lefelo la tšhireletšo, e lego setšhabelo se se šireletšago moo o ka ikwago o šireletšegile gona. Ka go yona o tla hwetša batho ba dipelo tše di botegago ba ba katanelago go dira se se nepagetšego mahlong a Modimo. Bontši bja bona ba lahlile mekgwa e swanago e mebe le ditshekamelo tšeo o ka bago o katanela go di fenya. (Tito 3:3) Ba ka go thuša ka gobane re botšwa gore re ‘hlatlolane merwalo.’ (Ba-Galatia 6:2) Ka tlwaelo, go phegelela tsela e išago bophelong bjo bo sa felego ke boikarabelo bja gago ka noši ka mo go feletšego. (Ba-Galatia 6:5; Ba-Filipi 2:12) Lega go le bjalo, Jehofa o lokišeditše phuthego ya Bokriste e le tsela e botse ya thušo le thekgo. Go sa šetšwe kamoo mathata a gago e ka bago a nyamišago ka gona, o ka hwetša mothopo o bohlokwa—phuthego e lerato e tlago go ba ka lehlakoreng la gago dinakong tša mathata goba tša ge o nyaka thušo.—Bapiša le Luka 10:29-37; Ditiro 20:35.
16 Gare ga ba ba tlago go go thekga ke “dimpho tše e lego banna” (NW)—bagolo ba ba kgethilwego ba phuthego goba balebeledi, ba ba dišago mohlape ka go rata le ka phišego. (Ba-Efeso 4:8, 11, 12; Ditiro 20:28; 1 Petro 5:2, 3) Jesaya o porofetile mabapi le bona gore: “E tlo ba monna mo-ka-seêma-phefong, maôbô-puleng, nokana-lesehleng, moriti wa lentswê-lexolo naxeng ya lenyôra.”—Jesaya 32:2.
17 Ge Jesu a be a le lefaseng, bolebeledi bjo lerato bja baetapele ba bodumedi bo be bo hlaela ka mo go nyamišago. Boemo bja batho bo ile bja mo kgoma ka mo go tseneletšego, gomme o be a nyaka go ba thuša kudu-kudu moyeng. Jesu o ile a ba kwela bohloko ka gobane “ba be ba lapile, bà lahlexile wa dinku tše di se naxo modiši.” (Mateo 9:36) Se se hlalosa gabotse gakaakang bothata bja mehleng yeno bja ba bantši ba ba kgotlelelago mathata a setlago pelo go se na motho yo ba ka retologelago go yena bakeng sa thekgo ya moya le khomotšo! Eupša batho ba Jehofa ba hwetša thušo ya moya ka gobane o holofeditše gore: “Ke tlo di beêla badiši, ’me bôná ba tlo di diša, di se hlwê di boifa di thšoxa, xwa se bê le e hlôkwaxo.”—Jeremia 23:4.
18 Tseba bagolo ba ba kgethilwego ka phuthegong. Ba na le phihlelo e kgolo ya go diriša tsebo ya go tseba Modimo ka gobane ba fihleletše ditshwanelego tša balebeledi tše di hlalositšwego ka Beibeleng. (1 Timotheo 3:1-7; Tito 1:5-9) O se ke wa dika-dika go ya go yo mongwe wa bona ge e ba o nyaka thušo ya go fenya mokgwa goba tshekamelo e lwantšhanago le tšeo Modimo a di nyakago. O tla hwetša gore bagolo ba latela keletšo ya Paulo e rego: “Le tsošê ba dipelo tše di tapilexo; Le thekxetšê bafokodi; Le se kê la fêlêla motho pelo.”—1 Ba-Thesalonika 2:7, 8; 5:14.
THABELA TŠHIRELETŠEGO GOTEE LE BATHO BA JEHOFA
19 Gaešita le ge re phela gare ga maemo a sa phethagalago mo nakong ye, Jehofa o re nea dijo tša moya, diaparo le lefelo la tšhireletšo. Ee, re swanetše go letela lefase le lefsa la Modimo le le holofeditšwego e le gore re thabele mehola ya paradeise ya kgonthe. Eupša bao e lego karolo ya mokgatlo wa Jehofa ba thabela tšhireletšego ya paradeise ya moya mo nakong ye. Hesekiele o porofetile mabapi le bona gore: “Ba tlo dula bà iketlile, xò se na e a ba thšošaxo.”—Hesekiele 34:28; Psalme 4:8.
20 Re ka leboga gakaakang gore Jehofa o dira ditokišetšo tše lerato tša moya ka Lentšu la gagwe le mokgatlo wa gagwe! Batamela batho ba Modimo. O se ke wa boela morago ka go boifa seo bagwera goba meloko ba tlago go se nagana ka wena ge o amogela tsebo ya go tseba Modimo. Ba bangwe ba ka fo se amogele ka ge o kopanela le Dihlatse tša Jehofa gomme o e-ya dibokeng Holong ya Mmušo. Eupša Modimo o tla go bušetša ka tekanyo e kgolo selo le ge e le sefe seo o se gafago ka baka la borapedi bja gagwe. (Maleaki 3:10) Go feta moo, Jesu o itše: “Xa xo e a tloxetšexo lapa, xoba bana babô, xoba dikxaetšedi, xoba tat’axwe, xoba mm’axwe, xoba mosadi, xoba bana, xoba mašemo, è le ka ’baka la-ka le ka ’baka la Ebangedi, e a se tl’o xo boêlwa ke lekxolo ka se tee sa tšôna, è sa le bophelong byono, a hwetša malapá, le bana babô, le dikxaetšedi, le bô-mm’axwe, le bana, le mašemo, le tšôna ditlaišexô; ’me mehleng e tl’o xo tla ó tlo hwetša bophelô byo bo sa felexo.” (Mareka 10:29, 30) Ee, o ka hwetša bogwera bjo bo thabišago le tšhireletšego ya moya gare ga batho ba Modimo go sa šetšwe seo o se tlogetšego goba o swanelwago ke go se kgotlelela.
HLAHLOBA TSEBO YA GAGO
“Molaki e a bôtêxaxo yo bohlale” ke mang?
Jehofa o dirile tokišetšo efe bakeng sa go re fepa moyeng?
Ba ba lego ka phuthegong ya Bokriste ba ka re thuša bjang?
[Study Questions]
1, 2. Boemo bja batho bo swana bjang le bja batho ba ba lego lefelong le le sentšwego ke ledimo?
3. Jehofa o nea batho ditokišetšo bjang, go etša ge go bontšhitšwe ke mehlala efe?
4. “Molaki e a bôtêxaxo yo bohlale” o ipontšhitše e le mang mehleng yeno, gona ditokišetšo tša Modimo tša moya di dirwa gore di hwetšwe bjang?
5. Go na le boemo bofe bja moya lefaseng lehono, eupša Jehofa o dira’ng ka se?
6. Jehofa o fepile batho ba gagwe bjang moyeng mehleng e fetilego?
7. Go ba gona ka mehla dibokeng tša Bokriste go tswalana bjang le tsebo le tumelo?
8. Ke ka baka la’ng re kgothaletšwa go ya dibokeng tša Dihlatse tša Jehofa?
9. Jehofa o beile bjang mohlala ka go bontšha lerato?
10. Re ka holwa bjang ke “mokgatlo ka moka wa barwarre”?
11. Ke ka baka la’ng o sa swanela go kgopišwa ke dimelo tše di fapa-fapanego gare ga batho ba Jehofa?
12, 13. (a) Ge e ba motho yo mongwe ka phuthegong a go kgopiša o ka dira’ng? (b) Ke ka baka la’ng e le gabohlokwa go se boloke sekgopi?
14. Re swanetše go apara dika dife?
15. Phuthego e swana bjang le lefelo la tšhireletšo?
16. Bagolo ba phuthego ba nea thušo efe?
17. (a) Jesu o be a nyaka go nea thušo ya mohuta mang ka mo go kgethegilego? (b) Modimo o ile a holofetša go direla batho ba gagwe tokišetšo efe?
18. Ke ka baka la’ng re swanetše go ya go mogolo ge e ba re nyaka thušo ya moya?
19. Jehofa o tšholletše ditšhegofatšo dife go ba ba tsomago tšhireletšego ka gare ga mokgatlo wa gagwe?
20. Jehofa o tla re bušetša bjang bakeng sa selo le ge e le sefe seo re ka se gafago bakeng sa borapedi bja gagwe?