Thuto 3

O Swanetše go Ithuta ka Modimo

Gore o be mogwera wa Modimo, o swanetše go ithuta ka yena. Na bagwera ba gago ba tseba leina la gago le go le diriša? Ba dira bjalo. Modimo le yena o nyaka gore o tsebe leina la gagwe le go le diriša. Leina la Modimo ke Jehofa. (Psalme 68:4; Mateo 6:9) O swanetše go ithuta gape seo a se ratago le seo a sa se ratego. Go nyakega gore o tsebe bao e lego bagwera ba gagwe le bao e lego manaba a gagwe. Go tseba motho yo mongwe go tšea nako. Beibele o bolela gore ke gabohlale go ipeela nako ka thoko bakeng sa go ithuta ka Jehofa.—Ba-Efeso 5:15, 16.

Bagwera ba Modimo ba dira seo se mo kgahlišago. Nagana ka bagwera ba gago. Ge e ba o ba swara gampe e bile o dira dilo tšeo ba di hloilego, na ba ka tšwela pele e le bagwera ba gago? Ga go bjalo le gatee! Ka tsela e swanago, ge e ba o nyaka go ba bagwera ba Modimo, go nyakega gore o dire seo se mo kgahlišago.—Johane 4:24.

Ga se madumedi ka moka ao a lebišago go go ba le bogwera le Modimo. Jesu yo e lego mogwera wa kgaufsi-ufsi wa Modimo, o boletše ka ditsela tše pedi. Tsela e nngwe ke e petleke gomme e tletše batho. Tsela yeo e iša tshenyegong. Tsela e nngwe ke e tshesane le gona e na le batho ba mmalwa bao ba sepelago go yona. Tsela yeo e lebiša bophelong bjo bo sa felego. Se se bolela gore ge e ba o nyaka go ba le bogwera le Modimo, o swanetše go ithuta tsela e nepagetšego ya go mo rapela.—Mateo 7:13, 14.