Borutho le Maikwelo

MAIKWELO ke karolo ya motheo ya bophelo bja motho. Ge motho a bontšha maikwelo a gagwe, o utolla seo se lego pelong ya gagwe, mohuta wa motho yo e lego yena ka gare, kamoo a ikwago ka gona ka maemo le batho. Ka baka la diphihlelo tšeo di kwešago bohloko maphelong a bona—mabakeng a mangwe e le ka baka la ditutuetšo tša setlogo—batho ba bantši ba fihla maikwelo a bona. Eupša Jehofa o re kgothaletša gore re hlagolele dika tše di swanetšego mothong wa ka gare ke moka re bolele ka mo go swanetšego ka seo se lego mothong wa ka gare.—Ba-Roma 12:10; 1 Ba-Thes. 2:7, 8.

Ge re bolela, mantšu ao re a dirišago a ka sepedišana ka mo go swanetšego le maikwelo. Eupša ge e ba mantšu a rena a sa bolelwe ka go dumelelana le maikwelo, bao ba re kwago ba ka belaela go botega ga rena. Ka lehlakoreng le lengwe, ge e ba mantšu a bolelwa ka maikwelo a swanetšego, polelo ya rena e ka ba e botse le yeo e ipiletšago mo e lego gore e ka kgoma dipelo tša bao ba theeditšego.

Go Bontšha Borutho. Maikwelo a borutho gantši a tswalanywa le dikgopolo tšeo di lego mabapi le batho. Ka go rialo, ge re bolela ka dika tša Jehofa tšeo di dirago gore re mo rate le ge re bolela tebogo ya rena ka go loka ga Jehofa, modumo wa rena wa lentšu o swanetše go ba o borutho. (Jes. 63:7-9) Le gona ge re bolela le magagabo rena, mokgwa wa rena wa go bolela gape o swanetše go fetiša borutho bjo bo ipiletšago.

Molephera o tla go Jesu gomme o mo kgopela gore a mo fodiše. Anke o akanye ka modumo wa Jesu wa lentšu ge a re: “Ke rata fao; fôla.” (Mar. 1:40, 41) Anke o akanye gape ka tiragalo yeo go yona mosadi yo a bego a swere ke bolwetši bja ngope ka nywaga e 12 a ilego a khukhuna ka morago ga Jesu gomme a kgoma morumo wa kobo ya gagwe. Ge a lemoga gore o bonwe, mosadi o ile a itšweletša a tšhogile a wela pele ga maoto a Jesu, gomme a bolela pele ga batho ka moka lebaka leo ka lona a ilego a kgoma kobo ya Jesu le kamoo a ilego a fodišwa ka gona. Anke o nagane ka mokgwa wo Jesu a bolelago le yena: “Beta pelo, morwedi wa-ka Tumêlô ya xaxo e Xo phološitše. Sepela Ò rotše pelo.” (Luka 8:42b-48) Borutho bjoo Jesu a ilego a bo bontšha dinakong tšeo bo kgoma dipelo tša rena go ba go fihla le lehono.

Ge re kwela batho bohloko go etša Jesu gomme re nyaka go ba thuša e le ka kgonthe, se se ipontšha ka tsela yeo re bolelago le bona ka yona. Go bontšhwa mo go bjalo ga borutho ke ga kgonthe e sego mo go feteletšego. Borutho bja rena bo ka dira phapano e kgolo mabapi le kamoo batho ba arabelago ka gona. Bontši bja dilo tšeo re di bolelago ge re le bodireding bja tšhemo bo re nea sebaka sa go bontšha borutho bjo bo bjalo, kudu-kudu ge re nea mabaka, re kgothatša, re eletša le go kwela bohloko.

Ge e ba o e-na le maikwelo a borutho go ba bangwe, a bontšhe sefahlegong sa gago. Ge o bontšha borutho, batheetši ba gago ba gogelwa kgaufsi le wena bjalo ka ge eka ba gogelwa mollong bošegong bjo bo tonyago. Ge e ba sefahlego sa gago se sa bontšhe go ba yo borutho, batheetši ba gago ba ka se ke ba kgodišega gore o na le taba le bona e le ka kgonthe. Borutho bo ka se ke bja aparwa bjalo ka seikgakantšho—e swanetše go ba bja kgonthe.

Lentšu la gago le lona le swanetše go kwagala le e-na le borutho. Ge e ba o e-na le lentšu le lekoto la magašwa, gona go tla ba thata go bontšha borutho polelong ya gago. Eupša ge nako e dutše e e-ya le ka maikemišetšo a matla, o ka kgona. Selo se sengwe seo se ka go thušago mokgweng wo wa go bolela, ke go gopola gore ditumanoši tšeo di bitšwago ka go kgaoletša di thatafatša polelo. Ithute go kwagatša medumo e bonolo mantšung. Se se tla thuša go bontšha borutho polelong ya gago.

Lega go le bjalo, sa bohlokwa kudu ke go lebiša tlhokomelo ya gago go seo se kgahlišago. Ge e ba dikgopolo tša gago di theilwe e le ka kgonthe go bao o bolelago le bona gomme o e-na le kganyogo e tšwago pelong ya go ba botša selo se sengwe seo se ka ba holago, maikwelo ao a tla bontšhwa ka tsela yeo o bolelago ka yona.

Polelo e newago ka mafolofolo e a tutuetša, eupša go nyakega le maikwelo. Ka mehla ga se mo go lekanego go tutuetša monagano; re swanetše gore re tutuetše le pelo.

Go Bontšha Maikwelo a Mangwe. Maikwelo a bjalo ka pelaelo, poifo le kgateletšego a ka bontšhwa ke motho yo a gateletšegilego. Lethabo ke maikwelo ao a swanetšego go bonagala kudu maphelong a rena le ao re a bontšhago ka bolokologi ge re bolela le ba bangwe. Ka lehlakoreng le lengwe, maikwelo a mangwe a swanetše go laolwa. Ga a sepedišane le semelo sa Bokriste. (Ba-Ef. 4:31, 32; Ba-Fil. 4:4) Maikwelo a mehuta ka moka a ka bontšhwa ka mantšu ao re a kgethago, modumo wa rena wa lentšu, matla ao re bolelago ka ona, ponagalo ya sefahlego le boitšhišinyo.

Beibele e nea pego ya maikwelo ka moka a fapa-fapanego a batho. Ka dinako tše dingwe e fo umaka maikwelo. Ka dinako tše dingwe e laodiša ka ditiragalo goba ya tsopola dipolelo tšeo di utollago maikwelo. Ge o bala taba e bjalo ka go hlaboša, e tla ba le tutuetšo e kgolo go wena le go bao ba go theeditšego, ge e ba lentšu la gago le bontšha maikwelo ao. Gore o dire bjalo o swanetše go ipea boemong bja batho bao o balago ka bona. Lega go le bjalo, polelo ga se papadi ya sefaleng, ka gona ela hloko gore o se ke wa ba yo a feteletšago. Dira gore ditemana e be tše tutuetšago megopolo ya bao ba theeditšego.

Ke tše di Swanetšego Taba. Bjalo ka ge go le bjalo ka mafolofolo, borutho bjo o bo bontšhago polelong ya gago le maikwelo a mangwe di ithekgile kudu ka seo o se bolelago.

Bula Mateo 11:28-30, gomme o ele hloko seo e se bolelago. Ke moka o bale ka tsela yeo Jesu a ilego a sola ba-mangwalo le Bafarisei ka gona, go etša ge e begilwe go Mateo kgaolo 23. Re ka se ke ra nagana a bolela mantšu a a bogale a kahlolo ka go lepologa.

Ke mohuta ofe wa maikwelo wo o naganago gore o a nyakega bakeng sa taba e swanago le yeo e lego go Genesi kgaolo 44, mabapi le kgopelo ya Juda legatong la moratho wa gagwe Benyamini? Ela hloko maikwelo ao a bontšhitšwego go Gen 44 temana 13, sešupo seo se lego go Gen 44 temana 16 sa kamoo Juda a ilego a ikwa ka gona mabapi le seo se bakilego kotsi, le kamoo Josefa ka noši a ilego a arabela ka gona, go etša ge go begilwe go Genesi 45:1.

Ka go rialo, go sa šetšwe ge e ba re bala goba re bolela, gore re dire se ka katlego ga se ra swanela go nagana ka mantšu le dikgopolo feela eupša gape re swanetše go nagana ka maikwelo ao a sepedišanago le tšona.