Kgaolo ya Boraro

Swarelela ka go Tia Lentšung la Modimo

1. (a) Isiraele ya bogologolo e ile ya bona bjang go rereša ga lentšu la Modimo? (b) Ke ka baka la’ng seo e le se se kgahlišago go rena?

“LENA a nkê Le lemoxeng ka pelo ka moka le ka môya ka moka, xe xo sa ka xwa hlaêla le setee sa tše botse tše Morêna Modimo wa lena a Le boletšexo ka tšôna; ka moka di tšweletše.” (Jošua 23:14-16) Se ke seo Jošua a ilego a se botša banna ba bagolo ba Isiraele ka morago ga ge ba dutše Nageng ya Kholofetšo. Ee, dikholofetšo tša Jehofa di ile tša ipontšha e le tše ka botwago. Pego yeo—le Beibele ka moka—di ile tša bolokelwa rena e le gore “re hwetšê kholofêlô.”—Ba-Roma 15:4.

2. (a) Ke ka kwešišo efe Beibele e ‘buduletšwego ke Modimo’? (b) Re na le boikarabelo bofe ka go tseba gore Beibele e buduletšwe ke Modimo?

² Gaešita le ge bangwadi ba ka bago 40 ba batho ba ile ba dirišwa bakeng sa go ngwala Beibele, Jehofa ka noši ke Mongwadi wa yona. Na se se bolela gore o ile a laela e le ka kgonthe go ngwalwa ga selo sengwe le se sengwe seo se lego ka gare ga yona? Ee. O dirile se ka moya wa gagwe o mokgethwa o matla, matla a gagwe a šomago. Moapostola Paulo o ile a bolela ka go rereša gore: “Xobane Mangwalô ka moka [“a buduletšwe,” NW] ké ma-hebetšwa-ke-Modimo . . . xore motho wa Modimo e bê yo boló-ka-tlalô, a kxonišwê xo dira medirô e botse ka moka.” Kae le kae batho bao ba kgodišegilego ka seo ba theetša Beibele gomme ba phela maphelo a bona ka go dumelelana le dithuto tša yona.—2 Timotheo 3:16, 17; 1 Ba-Thesalonika 2:13.

Thuša ba Bangwe go e Kwešiša le go e Hlompha

3. Tsela e phalago tšohle ya go thuša ba bantši bao ba sa kgolwego gore Beibele ke Lentšu la Modimo ke efe?

³ Ba bantši bao re bolelago le bona ga ba na tumelo yeo re nago le yona ya gore Beibele ke Lentšu la Modimo. Re ka ba thuša bjang? Gantši, tsela e kaone kudu ke go bula Beibele gomme re ba bontšhe seo e se huperego. “Lentšu la Modimo ké le le phelaxo, ké le matla; ka boxale le phala thšoša efe le efe ya maxale a mabedi . . . le tseba xo fênyêka diakanyô le kxopolô tša pelo.” (Ba-Hebere 4:12) “Lentšu la Modimo” ga se histori e hwilego; le a phela! Dikholofetšo tša Beibele di gatela pele ka mo go sa ganetšegego go ya phethegong. Tutuetšo ya kgonthe yeo e tšwago pelong ya motho, ke e matla kudu go feta selo le ge e le sefe seo rena ka noši re ka se bolelago.

4. Ke ditlhaloso dife tša ditherešo tša Beibele tšeo di fetotšego maikwelo a batho ba bangwe mabapi le Beibele, gomme ka baka la’ng?

⁴ Go fo bona leina la Modimo ka Beibeleng go dirile gore ba bantši ba e lebeledišiše ka mo go tseneletšego. Ba bangwe ba ile ba dira phetho ya go ithuta Beibele ge ba be ba bontšhwa seo e se bolelago ka morero wa bophelo, lebaka leo ka lona Modimo a dumeletšego bokgopo, seo se bolelwago ke ditiragalo tša mehleng yeno goba kholofelo ya bophelo bjo bo sa felego lefaseng la paradeise. Dinageng tšeo mekgwa ya bodumedi e baketšego batho gore ba tlaišwe kudu ke meoya e mebe, tlhaloso ya Beibele ya mabapi le seo se bakago se le kamoo go ka hwetšwago ka gona kimollo e tsošitše kgahlego ya batho. Ke ka baka la’ng dintlha tše di kgahliša batho ba botegago? Ka gobane Beibele ke wona mothopo o nnoši wa tsebišo e botegago ditabeng tše bjalo ka moka tše bohlokwa.—Psalme 119:130.

5. (a) Ge batho ba bolela gore ga ba dumele Beibele, mo gongwe mabaka e ka ba afe? (b) Re ka thuša batho ba bjalo bjang?

⁵ Lega go le bjalo, go thwe’ng ge e ba batho ba re botša gore ga ba dumele Beibele? Na seo se swanetše go fediša poledišano? E sego ge e ba ba ikemišeditše go diriša tlhaologanyo. E ka ba e le gore ba lebelela Beibele e le puku ya Bojakane. Pego ya bjona ya boikaketši le ya go tsena-tsena dipolitiking gotee le dikgopelo tša bjona tša ka mehla tša ditšhelete, di ka tlaleletša tabeng ya go se arabele ga bona gabotse Beibeleng. Ke ka baka la’ng o sa botšiše ge e ba go le bjalo? Go ahlola ga Beibele ditsela tša lefase tša Bojakane, gotee le dintlha tša go bontšha go se swane mo go lego gona magareng ga Bojakane le Bokriste bja therešo, go ka tsoša kgahlego ya bona.—Mika 3:11, 12; Mateo 15:7-9; Jakobo 4:4.

6. (a) Ke eng seo se go kgodišago wena ka noši gore Beibele ke Lentšu la Modimo? (b) Ke ditsela dife tše dingwe tša go nea mabaka tšeo di ka dirišwago bakeng sa go thuša batho go lemoga gore Beibele ka kgonthe e tšwa go Modimo?

⁶ Go ba bangwe, poledišano e opago kgomo lenaka ya bohlatse bja gore Beibele e buduletšwe ke Modimo e ka ba e thušago. Ke eng seo se go kgonthišetšago ka mo go kwagalago gore Beibele e tšwa go Jehofa Modimo? Na ke seo Beibele ka boyona e se bolelago ka mathomo a yona? Goba na ke taba ya gore Beibele e hupere diporofeto tše dintši tšeo di bontšhago tsebo e tletšego ka bokamoso, diporofeto tšeo di swanetšego go ba di e-tšwa mothopong o phagametšego motho? (2 Petro 1:20, 21) Na mo gongwe e ka ba e le go dumelelana mo go makatšago ga dikagare tša Beibele, gaešita le ge e ngwadilwe ke banna ba 40 lebakeng la nywaga e fetago 1 600? Goba na ke go nepagala ga yona ga tša thutamahlale mo go fapanego le ga dipuku tše dingwe tša mehleng yeo? Goba na ke go botega ga bangwadi ba yona? Goba na ke go šireletšwa ga yona ge e be e lebane le maiteko a šoro a go e fediša? Selo le ge e le sefe seo wena ka noši o hweditšego e le se se kgahlišago le sona se ka dirišwa bakeng sa go thuša batho ba bangwe.a

Go Bala ga Rena Beibele

7, 8. (a) Ke eng seo re swanetšego go ba re se dira ka Beibele? (b) Ke eng seo re se nyakago go tlaleletša go baleng ga rena ka noši Beibele? (c) Wena ka noši o hweditše bjang kwešišo ya merero ya Jehofa?

⁷ Go tlaleletša tabeng ya go thuša ba bangwe go dumela Beibele, rena ka noši re swanetše go fetša nako re e bala ka mehla. Na o dira seo? Gare ga dipuku ka moka tšeo di kilego tša tšweletšwa, ye e bohlokwa kudu-kudu. Go ba gona se ga se bolele gore ge e ba re e bala rena ka noši, ga re sa nyaka selo se sengwe. Mangwalo a re lemoša malebana le go ikarola. Ga se ra swanela go nagana gore re tla tseba selo se sengwe le se sengwe ka go itirela nyakišišo. Thuto ya motho ka noši le go ba gona ka mehla dibokeng tša batho ba Modimo di a nyakega ge e ba re tla ba Bakriste ba leka-lekanego.—Diema 18:1; Ba-Hebere 10:24, 25.

⁸ Mabapi le se, Beibele e re botša ka mohlankedi wa mo-Ethiopia yo a bego a bala boporofeta bja Jesaya. Morongwa o ile a romela moebangedi wa Mokriste Filipi go botšiša monna yo gore: “Afa tše O di balaxo O a di kwa?” Mo-Ethiopia o ile a araba ka boikokobetšo gore: “Xomme nka kxôna bya’ng xe ke se na wa xo nthlahla tseleng?” O ile a kgopela Filipi gore a mo hlalosetše temana ya Lengwalo. Ee, Filipi e be e se feela mmadi wa Beibele yo a ipotilego yo a ilego a neela dikgopolo tša gagwe ka Mangwalo. O ile a kgomarela kgokagano ya kgaufsi le mokgatlo o bonagalago wa Modimo. Ka gona, o be a ka kgona go thuša mo-Ethiopia gore a holwe ke thuto yeo Jehofa a bego a dira gore e hwetšagale ka mokgatlo woo. (Ditiro 6:5, 6; 8:5, 26-35) Ka mo go swanago, lehono ga go le o tee yo a hwetšago kwešišo e nepagetšego ya merero ya Jehofa ka noši. Ka moka ga rena re nyaka thušo yeo Jehofa ka lerato a e neago ka mokgatlo wa gagwe o bonagalago.

9. Ke lenaneo lefe la go bala Beibele leo le ka re holago ka moka ga rena?

⁹ Bakeng sa go re thuša go kwešiša Beibele, mokgatlo wa Jehofa o aba ditaba tše dibotse kudu tša Mangwalo ka dikgatišo tše di fapa-fapanego. Go oketša moo, go rulaganyeditšwe lenaneo la ka mehla la mmalo wa Beibele mabapi le Sekolo sa Bodiredi sa Pušo ya Modimo seo se swarwago diphuthegong ka moka tša Dihlatse tša Jehofa lefaseng ka bophara. Re ka hwetša mehola e megolo ka go hlahloba Mangwalo a Makgethwa ka noši. (Psalme 1:1-3; 19:7, 8) Dira maiteko a kgethegilego a go bala Beibele ka mehla. Gaešita le ge o sa kwešiše selo se sengwe le se sengwe ka mo go tletšego, go hwetša ga gago moko wa Mangwalo e tla ba mo go holago kudu. Ka mohlala, ge e ba o bala feela matlakala a mane goba a mahlano ka letšatši, o ka fetša Beibele mo e ka bago ka ngwaga.

10. (a) O dira neng mmalo wa gago wa Beibele? (b) Ke bomang gape bao ba swanetšego go akaretšwa ge go balwa Beibele, gona ke ka baka la’ng go dira bjalo ka mehla go le bohlokwa?

¹⁰ O ka dira neng mmalo wa gago wa Beibele? Ge e ba o beela ka thoko gaešita le metsotso e 10 goba e 15 ka letšatši bakeng sa wona, o tla holega kudu. Ge e ba go se bjalo, bonyenyane rulaganyetša nako ya ka mehla bakeng sa wona beke e nngwe le e nngwe gomme o kgomarele lenaneo leo. Ge e ba o nyetše, wena le molekane wa gago le ka thabela go balelana Beibele ka go hlaboša lentšu. Ge e ba go na le bana bao ba godilego ka mo go lekanego go ka bala, ba ka šiedišana ka go balela godimo. Go bala Beibele e swanetše go ba mokgwa wa bophelo ka moka go swana le go ja dijo. Bjalo ka ge o tseba, ge e ba mekgwa ya motho ya go ja e fokola, bophelo bja gagwe bjo bobotse bo tla fokola. Ka mo go swanago, bophelo bja rena bjo bobotse bja moya, le gona bophelo bja rena bjo bo sa felego, bo ithekgile ka go fepša ga rena ka mehla ka “mantšu ohle a a tšwaxo molomong wa Modimo.”—Mateo 4:4.

Maikemišetšo a Rena

11. Maikemišetšo a rena e swanetše go ba afe ge re bala Beibele?

¹¹ Maikemišetšo a rena e swanetše go ba afe ge re bala Beibele? Pakane ya rena ga se ya swanela go fo ba feela go akaretša palo e itšego ya matlakala. Maikemišetšo a rena e swanetše go ba go tseba Modimo gakaone e le gore re ka oketša lerato la rena la go mo rata le go mo rapela ka mokgwa o amogelegago. (Johane 5:39-42) Boemo bja rena bja kgopolo e swanetše go ba bjo bo swanago le bja mongwadi wa Beibele yo a boletšego gore: “Morêna, ntsebišê ditsela tša xaxo, O nthutê mebila ya xaxo.”—Psalme 25:4.

12. (a) Ke ka baka la’ng go hwetša “tsebo e nepagetšego” go le bohlokwa, gomme ke maiteko afe ao a tlogago a nyakega ge go balwa e le gore go hwetšwe tsebo yeo? (b) Ke ka go diriša dikgopolo dife tše nne moo re kgonago go hlahloba ka tsela e holago seo re se balago ka Beibeleng? (Bona lepokisi go letlakala 30.) (c) Bontšha dintlha tše ka go araba dipotšišo tšeo di neilwego serapeng se. Lebelela mangwalo ao a bontšhitšwego eupša a sa tsopolwa.

¹² Ge re dutše re amogela thuto go tšwa go Jehofa, re swanetše go kganyoga go hwetša “tsebo e nepagetšego.” Ka ntle le yona, re ka diriša bjang ka mo go swanetšego Lentšu la Modimo maphelong a rena goba go le hlalosa ka mo go nepagetšego go ba bangwe? (Ba-Kolose 3:10, NW; 2 Timotheo 2:15) Go hwetša tsebo e nepagetšego go nyaka gore re bale ka kelohloko, gomme ge e ba karolo e nngwe e le thata, re tla swanelwa ke go e bala makga a fetago letee e le gore re hwetše mogopolo wa yona. Gape re tla holega ge e ba re tšea nako re naganišiša ka taba, re nagana ka yona go tšwa ka mahlakoreng a fapa-fapanego. Ditsela tše nne tše bohlokwa tšeo go ka naganwago ka tšona di bontšhitšwe go letlakala 30. Dikarolo tše dintši tša Mangwalo di ka hlahlobja ka mo go holago ka go diriša tsela e tee goba tše oketšegilego tša dikgopolo tše. Ge o dutše o araba dipotšišo matlakaleng a latelago, o tla bona kamoo seo se lego bjalo ka gona.

(1) Gantši karolo ya Lengwalo yeo o e balago e ka go botša se sengwe ka mohuta wa motho yoo Jehofa a lego yena. Ka mohlala, go Psalme 139:13, 14, re ithuta ka go ba le kgahlego mo gogolo ga Modimo ka ngwana yo a sešogo a belegwa: “Ke loxilwe ke Wene mmeleng wa mmê. Ke a Xo leboxa x’O mpopile wa matete-tete; medirô y’axo ké mehlôlô; le môya wa-ka o hlatha tše kxolo.” Mediro ya Jehofa ya tlholo ke e makatšago gakaakang! Tsela yeo batho ba dirilwego ka yona e hlatsela lerato la gagwe le legolo go rena.

Mabapi le seo se boletšwego go Johane 14:9, 10, ge re bala ka tsela yeo Jesu a ilego a dirišana le ba bangwe ka yona, ruri re bona kamoo Jehofa ka boyena a tlago go gata mogato. Re dutše re gopola ka seo, re ka phetha ka go re’ng ka Jehofa go tšwa dipegong tše di begilwego go Luka 5:12, 13 le Luka 7:11-15?

(2) Nagana kamoo pego e tswalanago ka gona le sehlogo sa Beibele: go hlatselwa ga bogoši bja Jehofa le go kgethagatšwa ga leina la gagwe ka Mmušo ka tlase ga Jesu Kriste, Peu e holofeditšwego.

Sehlogo sa Beibele se gateletšwe bjang ke Hesekiele le Daniele? (Hesekiele 38:21-23; Daniele 2:44; 4:17; 7:9-14)

Beibele e hlaola Jesu bjang ka mo go kwagalago e le Peu e holofeditšwego? (Ba-Galatia 3:16)

Kutollo e hlalosa bjang seremo se segolo sa sehlogo sa Mmušo? (Kutollo 11:15; 12:7-10; 17:16-18; 19:11-16; 20:1-3; 21:1-5)

(3) Ipotšiše kamoo wena ka noši o ka dirišago seo o se balago. Ka mohlala, go Ekisodo go fihla go Doiteronomio re bala mabapi le go goboga boitshwarong ga ba-Isiraele le borabele bja bona. Re ithuta gore mekgwa yeo le ditiro di ile tša ba le ditla-morago tše mpe. Ka gona, re swanetše go tutueletšega go kgahliša Jehofa ka go se ekiše mohlala o mobe wa Isiraele. “Tšeo ka moka di direxetše bao xore e bê xo lemoša; di ngwadilwe xore e bê xo eletša rena ba re fihletšwexo ke bofêlô bya mabaka.”—1 Ba-Korinthe 10:11.

Pego e lego mabapi le go bolaya ga Kaine Abele e na le thuto efe go rena? (Genesi 4:3-12; Ba-Hebere 11:4; 1 Johane 3:10-15; 4:20, 21)

Na keletšo ya Beibele go Bakriste bao ba nago le kholofelo ya legodimong e šoma gape le go bao ba nago le kholofelo ya bophelo bjo bo sa felego lefaseng? (Numeri 15:16; Johane 10:16)

Gaešita le ge re le boemong bjo bobotse ka phuthegong ya Bokriste, ke ka baka la’ng re swanetše go ela hloko kamoo re dirišago keletšo ya Beibele yeo re šetšego re e tseba ka mo go tletšego kudu? (2 Ba-Korinthe 13:5; 1 Ba-Thesalonika 4:1)

(4) Nagana kamoo o ka dirišago ka gona seo o se balago bakeng sa go thuša ba bangwe. Batho ka moka ba tshwenyegile ka mathata a tša maphelo, ka gona re ka bala le bona seo Jesu a se dirilego go bontšha seo a tlago go se dira ka tekanyo e kgolo ge a le matleng a Mmušo: “Mašaba a mantši a batho a tla xo Yêna; ba tla bà na le dihlotša, le difofu, le dimuma, le dixôlê, le ba bangwê ba bantši . . . Yêna a ba fodiša.”—Mateo 15:30.

Ke bomang bao ba ka thušwago ke pego ya tsogo ya morwedi wa Jairo? (Luka 8:41, 42, 49-56)

13. Ke mehola efe yeo re ka e lebelelago go tšwa lenaneong leo le sa kgaotšego la go bala Beibele le go ithuta le mokgatlo wa Jehofa?

¹³ Mmalo wa Beibele e ka ba o putsago gakaakang ge re ela hloko dintlha tše nne tše di bontšhitšwego ka mo godimo! Go bolela therešo, go bala Beibele ke tlhohlo. Eupša go ka re hola bophelo ka moka, ka gobane ge re dutše re bala Mangwalo, re tla tia moyeng. Go bala Beibele ka mehla go tla re batametša kgaufsi le Tatago rena yo lerato Jehofa, le go bana babo rena ba Bakriste. Go tla re thuša go kwa keletšo ya go ‘swarelela ka go tia lentšung la bophelo.’—Ba-Filipi 2:16.

[Mongwalo wa ka tlase]

Poledišano ya Tlhahlobo

• Ke ka baka la’ng Beibele e ile ya ngwalwa le go bolokwa go fihlela mehleng ya rena?

• Re ka thuša bjang ba bangwe go kwešiša le go hlompha Beibele?

• Ke ka baka la’ng go bala Beibele ka mehla ga motho ka noši e le mo go holago? Ke ka go diriša dikgopolo dife tše nne moo re tlago go hlahloba ka mo go holago seo re se balago?

[Lepokisi/Seswantšho go letlakala 30]

GE O BALA KAROLO YA BEIBELE, ELA HLOKO

Seo e go botšago sona ka Jehofa e le motho

Kamoo e tswalanago ka gona le sehlogo sa kakaretšo sa Beibele

Kamoo e swanetšego go kgoma bophelo bja gago ka noši

Kamoo o ka e dirišago ka gona bakeng sa go thuša ba bangwe