“Xore Le se Tsênê Melekong”
‘Dulang le phakgame gomme le rapeleng ka go se kgaotše, gore le se tsene melekong.’—MATEO 26:41.
KGATELETŠO e be e tseneletše—go fapana le ge e le efe yeo a kilego a lebeletšana le yona pele. Jesu Kriste, e lego Morwa wa Modimo, o be a le kgaufsi le bofelo bja bophelo bja gagwe bja mo lefaseng. Jesu o ile a lemoga gore go se go ye kae o be a tlo swarwa, a ahlolelwa lehu gomme a kokotelwa koteng ya tlhokofatšo. O be a tseba gore phetho e nngwe le e nngwe ya gagwe e be e tlo kgoma leina la Tatagwe. Le gona Jesu o be a tseba gore go be go tlo tšewa phetho ka ditebelelo tša batho tša mabapi le bophelo. O ile a dira’ng ge a be a lebeletšane le kgateletšo ye ka moka?
2 Jesu o ile a ya serapeng sa Getsemane le barutiwa ba gagwe. E be e le lefelo leo Jesu a bego a le rata. Ge a le moo, o ile a ya kgojana le barutiwa ba gagwe. Ge a le noši, o ile a retologela go Tatagwe wa legodimong bakeng sa gore a mo nee matla, a mo tšhollela maikwelo a gagwe ka thapelo e tšwago pelong—e sego gatee feela eupša ka makga a mararo. Gaešita le ge a phethagetše, Jesu ga se a nagana gore a ka lebeletšana le kgateletšo ye ka boyena.—Mateo 26:36-44.
3 Le rena ka mo go swanago re ka tlase ga kgateletšo lehono. Mathomong a poroutšha ye, re ile ra hlahloba bohlatse bja gore re phela mehleng ya bofelo bja tshepedišo ye e kgopo ya dilo. Diteko le dikgateletšego tšeo di bakwago ke lefase la Sathane di a ata. Diphetho le ditiro tša yo mongwe le yo mongwe wa rena bao re ipolelago gore re hlankela Modimo wa therešo di kgoma leina la gagwe gomme di na le mafelelo a magolo ditebelelong tša rena ka noši tša bophelo lefaseng la gagwe le lefsa. Re rata Jehofa. Re nyaka go “tiišetša xo fihla bofelong”—bofelong bja bophelo bja rena goba bja tshepedišo ye, go sa šetšwe gore go tla eng pele. (Mateo 24:13) Eupša re ka boloka bjang maikwelo a rena a go akgofa ga nako le go dula re phakgame?
4 Ka go tseba gore barutiwa ga gagwe—bobedi morago kua le lehono—ba be ba tla ba ka tlase ga kgateletšo, Jesu o ile a kgothatša ka gore: ‘Dulang le phakgame gomme le rapeleng ka go se kgaotše, gore le se tsene melekong.’ (Mateo 26:41) Mantšu ao a bolela’ng go rena lehono? Ke moleko ofe woo o lebeletšanago le wona? Le gona o ka ‘dula bjang o phakgame’?
Ke Moleko wa Gore re Dire Eng?
5 Letšatši le letšatši ka moka ga rena re lebeletšana le moleko wa gore re wele “molabeng wa Diabolo.” (2 Timotheo 2:26, PK) Beibele e re lemoša gore Sathane o hlasela ka mo go kgethegilego barapedi ba Jehofa. (1 Petro 5:8; Kutollo 12:12, 17) Ka morero ofe? Ga se feela gore a re bolaye. Sathane ga a fenye ge e ba re e-hwa re botegela Modimo. Sathane o a tseba gore Jehofa, ka nako ya Gagwe e beilwego, o tla fediša lehu ka go diriša tsogo.—Luka 20:37, 38.
6 Sathane o nyaka go senya selo se sengwe se bohlokwa kudu go feta bophelo bja rena bja gona bjale—go botegela ga rena Modimo. Sathane o tlalelong ya go hlatsela gore a ka re aroša go Jehofa. Ka gona, ge e ba re ka gokeletšwa gore re se botege—go kgaotša go bolela ditaba tše dibotse goba go lahla ditekanyetšo tša Bokriste—seo e tla ba phenyo go Sathane! (Ba-Efeso 6:11-13) Ka gona “Moleki” o bea meleko ka pele ga rena.—Mateo 4:3.
7 “Makatika a forago” a Sathane a fapa-fapane. (Ba-Efeso 6:11, Jewish New Testament) A ka re leka ka gore re rate dilo tše di bonagalago, re be le poifo, re be le pelaelo goba re phegelele maipshino. Eupša wo mongwe wa mekgwa ya gagwe yeo e šomago o akaretša go nyama. E le yo a ikholago ka go diriša dibaka ka bohwirihwiri, o tseba gore go hloka kholofelo go ka re fokodiša, gwa re dira gore re hlaselege gabonolo. (Diema 24:10) Ke nakong ya ge re ‘robegile’ maikwelong moo ka mo go kgethegilego a re lekago gore re lahlele toulo.—Psalme 38:8.
8 Ge re dutše re nwelela gare-gare ga mehla ya bofelo, go bonagala dilo tšeo di bakago manyami di oketšega, gomme di a re hlasela. (Bona lepokisi le le rego “Tše Dingwe tša Dilo Tšeo di Bakago Manyami.”) Go sa šetšwe gore go bakwa ke eng, go nyama go ka re nola moko. ‘Go thakanela sebaka’ bakeng sa mediro yeo re swanetšego go e dira ya dilo tša moya—go akaretša go ithuta Beibele, go ba gona dibokeng tša Bokriste le go tšea karolo bodireding—e ka ba tlhohlo ge e ba re se na matla mmeleng, monaganong le maikwelong. (Ba-Efeso 5:15, 16) Gopola gore Moleki o nyaka o tlogela. Eupša ye ga se nako ya gore o goge maoto goba o lahlegelwe ke maikwelo a gago a go akgofa ga nako mabapi le mehla ye re phelago go yona! (Luka 21:34-36) O ka ganetša bjang moleko gomme wa dula o phafogile? Ela hloko ditšhišinyo tše nne tšeo di ka thušago.
‘Rapela ka go se Kgaotše’
9 Ithekge ka Jehofa ka thapelo. Gopola mohlala wa Jesu serapeng sa Getsemane. Ke’ng seo a ilego a se dira ge a be a le ka tlase ga kgateletšo e tseneletšego ya maikwelo? O ile a retologela go Jehofa bakeng sa thušo, a rapela ka go tšwa pelong moo e lego gore “dikudumêla tša xaxwe [di ile] tša ba byalo ka marotholodi a madi a rôthêlaxo fase.” (Luka 22:44) Nagana ka se. Jesu o be a tseba Sathane gabotse. Jesu o be a bone a le legodimong meleko ka moka yeo Sathane a e dirišago maitekong a gagwe a go tanya bahlanka ba Modimo. Lega go le bjalo, Jesu ga se a ka a nagana gore a ka fenya gabonolo selo le ge e le sefe seo Moleki a bego a ka se bea pele ga gagwe. Ge e ba Morwa yo a phethagetšego wa Modimo a ile a bona go nyakega ga gore a rapelele thušo ya Modimo le matla, ke mo go nyakegago kudu gakaakang gore rena re dire bjalo!—1 Petro 2:21.
10 Le gona gopola gore ka morago ga go kgothaletša barutiwa ba gagwe ‘go rapela ka go se kgaotše,’ Jesu o itše: “Môya o mafolofolo, ’me nama e a fôkôla.” (Mateo 26:41) Jesu o be a bolela ka nama ya mang? Ga go pelaelo gore o be a sa bolele ka ya gagwe; go be go se selo seo se fokolago nameng ya gagwe e phethagetšego e le motho. (1 Petro 2:22) Eupša boemo bja barutiwa ba gagwe e be e le bjo bo fapanego. Ka baka la go se phethagale ga leabela le ditshekamelo tša sebe, ba be ba tla nyaka thušo ka mo go kgethegilego gore ba ganetše moleko. (Ba-Roma 7:21-24) Ke ka baka leo a ba kgothaleditšego—gotee le Bakriste ka moka ba therešo bao ba bego ba tla ba latela—gore ba rapelele thušo ge ba lebeletšana le moleko. (Mateo 6:13) Jehofa o araba dithapelo tše bjalo. (Psalme 65:2) Bjang? Bonyenyane ka ditsela tše pedi.
11 Ya pele, Modimo o re thuša gore re tsebe meleko. Meleko ya Sathane e swana le melaba yeo e gašantšwego tseleng ya lefsifsi. Ge e ba o sa e bone, o ka tanywa. Ka go diriša Beibele le dikgatišo tšeo di theilwego Beibeleng, Jehofa o hlabiša seetša melabeng ya Sathane, ka go rialo a re thuša gore re pheme go wela molekong. Go theoša le nywaga, dipuku tšeo di gatišitšwego le mananeo a dikopano tša tikologo le tša selete di re lemošitše leboelela ka dikotsi tše bjalo ka go boifa batho, boitshwaro bjo bo gobogilego bja dikopano tša botona le botshadi, go rata dilo tše di bonagalago gotee le meleko e mengwe ya Sathane. (Diema 29:25; 1 Ba-Korinthe 10:8-11; 1 Timotheo 6:9, 10) Na ga o leboge Jehofa bakeng sa go re lemoša ka makatika a Sathane? (2 Ba-Korinthe 2:11) Ditemošo tše bjalo ka moka ke karabo go dithapelo tša gago tša go kgopela thušo ya go ganetša moleko.
12 Ya bobedi, Jehofa o araba dithapelo tša rena ka go re nea matla a go kgotlelela moleko. Lentšu la gagwe le re: “Modimo . . . a ka se kê a lesa la lekwa ka tše di kaxo Le palêla; xotee le molekô ó tlo fêla a bea sebaka sa xo tlo efoxa.” (1 Ba-Korinthe 10:13) Le ka mohla Modimo a ka se dumelele gore moleko e be o boima kudu moo e lego gore re tla hloka matla a moya a go o ganetša—ge e ba re tšwela pele go ithekga ka yena. O re direla bjang “sebaka sa xo tlo efoxa”? “Ba ba Mo kxopêlaxo ó ba nea Môya o mokxêthwa.” (Luka 11:13) Moya woo o ka re thuša go gopola melao ya motheo ya Beibele yeo e ka matlafatšago maikemišetšo a rena a go dira se se nepagetšego le go re thuša go dira diphetho tše bohlale. (Johane 14:26; Jakobo 1:5, 6) O ka re thuša go bonagatša dika tšona tšeo re di nyakago e le gore re fenye ditshekamelo tše di fošagetšego. (Ba-Galatia 5:22, 23) Le gona moya wa Modimo o ka šušumeletša badumedi-gotee le rena go ba ‘thušo e matlafatšago go rena.’ (Ba-Kolose 4:11, bapiša le NW.) Na ga o leboge gore Jehofa o arabela ka ditsela tše bjalo tše lerato dithapelong tša gago tša go kgopela thušo?
E-bang Bao ba Leka-lekanego Ditebelelong tša Lena
13 Gore re dule re phakgame, re swanetše go ba bao ba leka-lekanego ditebelelong tša rena. Ka baka la dikgateletšo tša bophelo, ka dinako tše dingwe ka moka ga rena re a lapa. Eupša re swanetše go gopola gore Modimo ga se a ka a holofetša gore re tla ba le bophelo bjo bo se nago mathata mo tshepedišong ye ya kgale. Gaešita le mehleng ya Beibele, bahlanka ba Modimo ba ile ba lebeletšana le mathata, go akaretša tlaišo, bodiidi, kgateletšego le bolwetši.—Ditiro 8:1; 2 Ba-Korinthe 8:1, 2; 1 Ba-Thesalonika 5:14; 1 Timotheo 5:23.
14 Le rena ka mo go swanago re na le mathata lehono. Re ka lebeletšana le tlaišo, re ka ba le mathata a tša ditšhelete, re ka tlaišwa ke kgateletšego, re ka babja le go tlaišega ka ditsela tše dingwe. Ge nkabe Jehofa a be a tla re šireletša ka mohlolo dikotsing ka moka, na leo e ka se be lebaka la motheo la gore Sathane a nyatše Jehofa? (Diema 27:11) Jehofa o dumelela gore bahlanka ba gagwe ba lekwe, mabakeng a mangwe go ba go fihla ntlheng ya gore ba bolawe pele ga nako ke baganetši.—Johane 16:2.
15 Ka gona, ke’ng seo Jehofa a se holofeditšego? Go etša ge re bontšhitše pejana, o holofeditše gore o tla dira gore re kgone go ganetša moleko le ge e le ofe woo re ka kopanago le wona, ge feela re ithekga ka yena ka mo go feletšego. (Diema 3:5, 6) Ka Lentšu la gagwe, moya wa gagwe le mokgatlo wa gagwe, o re šireletša moyeng, a re thuša go boloka tswalano ya rena le yena. Ge tswalano yeo e se ya senyega, gaešita le ge re ka hwa, re a fenya. Ga go selo le ge e le sefe—gaešita le lehu—seo se ka thibelago Modimo go putsa bahlanka ba gagwe bao ba botegago. (Ba-Hebere 11:6) Le gona lefaseng le lefsa leo le lego kgaufsi, Jehofa a ka se palelwe ke go phethagatša dikholofetšo tša gagwe ka moka tšeo di kgahlišago tša ditšhegofatšo bakeng sa bao ba mo ratago.—Psalme 145:16.
Gopolang Dikgang Tšeo di Akaretšwago
16 Gore re kgotlelele go fihla bofelong, re swanetše go gopola dikgang tše bohlokwa tšeo di akaretšwago go dumeleleng ga Modimo bokgopo. Ge e ba ka dinako tše dingwe mathata a rena a bonagala e le a imelago gomme re lekega go tlogela, re dira gabotse go ikgopotša gore Sathane o hlohlile go swanelega ga bobuši bja Jehofa. Le gona Mofori yo o belaetše boineelo le go botega ga barapedi ba Modimo. (Jobo 1:8-11; 2:3, 4) Dikgang tšeo gotee le tsela yeo Jehofa a kgethilego go di lokiša ka yona ke tše bohlokwa kudu go feta maphelo a rena ka noši. Go bjalo bjang?
17 Go dumelela ga Modimo mathata ka nakwana go butše sebaka sa gore ba bangwe ba amogele therešo. Nagana ka se: Jesu o ile a tlaišega e le gore re ka ba le bophelo. (Johane 3:16) Na ga re thabele seo? Eupša na re ikemišeditše go kgotlelela mathata ka lebakanyana le le šetšego e le gore ba bangwe le bona ba ka hwetša bophelo? Gore re kgotlelele go fihla bofelong, re swanetše go lemoga gore bohlale bja Jehofa bo feta bja rena kgole. (Jesaya 55:9) O tla fediša bokgopo ka nako yeo e swanetšego kudu e le gore go lokišwe dikgang tše ka mo go sa felego gotee le bakeng sa go holega ga rena ka mo go sa felego. Na ruri go na le tsela e phalago yeo? Modimo ga a hloke toka!—Ba-Roma 9:14-24.
“Batamêlang Modimo”
18 Gore re dule re e-na le maikwelo a go akgofa ga nako, re swanetše go dula re le kgaufsi le Jehofa. Le ka mohla o se ke wa lebala gore Sathane o dira sohle seo se lego matleng a gagwe go senya tswalano ya rena e botse le Jehofa. Sathane o nyaka gore re dumele gore bofelo bo ka se tsoge bo tlile le gore ga go na morero go boleleng ditaba tše dibotse goba go pheleng ka ditekanyetšo tša Beibele. Eupša ke “moaketši le rra-xo-moaketši.” (Johane 8:44) Re swanetše go ikemišetša ‘go lwa le Diabolo.’ Tswalano ya rena le Jehofa ke selo seo le ka mohla re sa swanelago go se tšeela fase. Beibele e re kgothaletša ka lerato gore: “Batamêlang Modimo, le Yêna a Le batamêlê.” (Jakobo 4:7, 8) O ka batamela bjang kgaufsi le Jehofa?
19 Go naganišiša ka thapelo ke gabohlokwa. Ge dikgateletšo tša bophelo di bonala di imela, tšhollela pelo ya gago go Jehofa. Ge o ka ba yo a kgopelago ka go lebanya, ke moo o tla hwetšago go le bonolo go bona karabo ya gagwe dikgopelong tša gago. Ga se ka mehla karabo e ka bago yeo ka go lebanya o bego o e naganne, eupša ge e ba kganyogo ya gago e le go mo godiša le go dula o mmotegela, o tla fana ka thušo yeo o e hlokago e le gore o kgone go kgotlelela ka katlego. (1 Johane 5:14) Ge o dutše o bona tlhahlo ya gagwe bophelong bja gago, o tla mmatamela kgaufsi le go feta. Go bala le go naganišiša ka dika tša Jehofa le ditsela tša gagwe, bjalo ka ge di utollwa ka Beibeleng, le gona ke gabohlokwa. Go naganišiša mo go bjalo go go thuša gore o mo tsebe gakaone, go šušumetša pelo ya gago gomme go godiša lerato la gago go yena. (Psalme 19:14) Le gona lerato leo, go feta selo le ge e le sefe se sengwe, le tla go thuša go ganetša moleko le go go thuša go dula o phakgame.—1 Johane 5:3.
20 Gore re dule re le kgaufsi le Jehofa, gape ke gabohlokwa gore re dule re le kgaufsi le badumedi-gotee le rena. Se se tla ahla-ahlwa karolong ya mafelelo ya poroutšha ye.
DIPOTŠIŠO TŠA THUTO
• Ke’ng seo Jesu a ilego a se dira ge a be a le ka tlase ga kgateletšo e kgolo pejana ga bofelo bja bophelo bja gagwe, gomme ke’ng seo a ilego a kgothaletša barutiwa ba gagwe go se dira? (Dir. 1-4)
• Ke ka baka la’ng Sathane a hlasetše barapedi ba Jehofa, gomme o re leka ka ditsela dife? (Dir. 5-8)
• Gore re lwantšhe moleko, ke ka baka la’ng re swanetše go rapela ka go se kgaotše (Dir. 9-12), go ba bao ba leka-lekanego ditebelelong tša rena (Dir. 13-15), go gopola dikgang tšeo di akaretšwago (Dir. 16-17) le go ‘batamela kgaufsi le Modimo’ (Dir. 18-20)?
[Lepokisi go letlakala 25]
Tše Dingwe tša Dilo Tšeo di Bakago Manyami
Boemo bja tša maphelo/go gola. Ge e ba re tlaišwa ke bolwetši bjo bo sa folego goba ge e ba botšofadi bo re lekanyetša go dira dilo tše itšego, re ka gateletšega ka gobane re sa kgone go dira mo go oketšegilego go hlankeleng Modimo.—Ba-Hebere 6:10.
Go nyama. Re ka nyama dipelong ge e ba re bona karabelo e nyenyane maitekong a rena a go bolela ka Lentšu la Modimo.—Diema 13:12.
Maikwelo a go se be le mohola. Ka baka la go swarwa gampe ka nywaga e mentši, motho a ka kgodišega gore ga a ratwe, gaešita le ke Jehofa.—1 Johane 3:19, 20.
Maikwelo a gobetšego. Ge e ba motho a kgopišitšwe kudu ke modumedi-gotee le yena, a ka gateletšega kudu moo e lego gore a ka lekega go kgaotša go tla dibokeng tša Bokriste goba go tšea karolo bodireding bja tšhemo.—Luka 17:1.
Tlaišo. Ba bangwe bao ba sego bodumeding bjo tee le wena ba ka go ganetša, ba go tlaiša goba ba go kwera.—2 Timotheo 3:12; 2 Petro 3:3, 4.
[Seswantšho go letlakala 26]
Jesu o re kgothaleditše go ‘rapelela thušo ka go se kgaotše’ bakeng sa go lwa le moleko