KAROLO 7

Modimo o Phološa Baisiraele

Jehofa o otla Egipita, Moše o etelela Baisiraele pele ge ba e-tšwa nageng yeo. Modimo o nea Baisiraele Molao a diriša Moše.

BAISIRAELE ba dutše nywaga e mentši Egipita, ba atlega e bile ba ata. Lega go le bjalo, go ile gwa thoma go buša Farao yo mongwe. Mmuši yo o be a sa tsebe Josefa. Ka ge e be e le mogateledi yo sehlogo yo a bego a boifa go ata ga Baisiraele, o ile a ba dira makgoba gomme a laela gore maitšibulo a bona ka moka a bašemane a lahlelwe ka Nokeng ya Nile. Eupša mma yo mongwe yo a nago le sebete o ile a šireletša lesea la gagwe gomme a le uta ka sešegong gare ga mahlaka-noka. Morwedi wa Farao o ile a hwetša lesea leo gomme a le rea leina la Moše, ke moka a le godišetša ka lapeng la bogoši Egipita.

Ge Moše a be a e-na le nywaga e 40, o ile a tsena mathateng ge a be a šireletša lekgoba la Moisiraele go monei-mošomo wa Moegipita. Moše o ile a tšhabela nageng ya kgole moo a ilego a dula gona e le motšhabi. Ge Moše a be a e-na le nywaga e 80, Jehofa o ile a mo romela Egipita gore a ye pele ga Farao gomme a mmotše gore a lokolle batho ba Modimo.

Farao o ile a gana a tiišitše. Ka gona, Modimo o ile a otla Egipita ka dikotlo tše lesome. Nako e nngwe le e nngwe ge Moše a be a e-tla go Farao gore a mo nee sebaka sa go phema kotlo e latelago, Farao o ile a gana, a nyatša Moše gotee le Modimo wa gagwe, Jehofa. Mafelelong, kotlo ya lesome e ile ya bolaya maitšibulo ka moka nageng—ka ntle le a malapa ao a ilego a kwa Jehofa gomme a tlotša dikosene tša ona ka madi a kwana ya sehlabelo. Morongwa wa Modimo yo a bego a tlile go bolaya maitšibulo o ile a feta malapeng ao. Ka morago ga moo, Baisiraele ba be ba gopola phološo ye e kgahlišago ka go bina monyanya wa ngwaga le ngwaga o bitšwago Paseka.

Ka ge a be a lahlegetšwe ke morwa wa gagwe wa leitšibulo, Farao o ile a laela Moše le Baisiraele ka moka gore ba tšwe Egipita. Gatee-tee ba ile ba rulaganya gore batho ba sepele. Eupša Farao o ile a fetoša monagano wa gagwe. O ile a ba lelekiša a e-na le bahlabani ba bantši le dikoloi tša ntwa. Go be go bonala Baisiraele ba kgakgetšwe lebopong la Lewatle le Lehwibidu. Jehofa o ile a aroganya Lewatle le Lehwibidu gomme a dumelela Baisiraele gore ba fete mmung o omilego, meetse a ba tsentše gare! Ge Baegipita ba tsena ka lewatleng ka lebelo, Modimo o ile a dira gore meetse a kopane ka lebelo gomme a khupetša Farao le madira a gagwe.

Ka morago, ge Baisiraele ba be ba le Thabeng ya Sinai, Jehofa o ile a dira kgwerano le bona. A diriša Moše e le mmoelanyi, Modimo o ile a nea Baisiraele melao yeo e bego e tla ba hlahla le go ba šireletša mo e ka bago karolong e nngwe le e nngwe ya bophelo. Ge feela Baisiraele ba be ba amogela pušo ya Modimo ka potego, Jehofa o be a tla ba le bona gomme a dire gore setšhaba seo e be tšhegofatšo ditšhabeng tše dingwe.

Lega go le bjalo, bontši bja Baisiraele ka mo go nyamišago bo ile bja bontšha go hloka tumelo go Modimo. Ka baka leo, Jehofa o ile a dira gore moloko woo o ralale lešokeng ka nywaga e 40. Ke moka, Moše o ile a laela Jošua yo a lokilego gore a etelele setšhaba pele. Mafelelong, Baisiraele ba be ba le kgaufsi le go tsena nageng yeo Modimo a bego a e holofeditše Aborahama.

—E theilwe go Ekisodo; Lefitiko; Numeri; Doiteronomio; Psalme 136:10-15; Ditiro 7:17-36.

◼ Go tlile bjang gore Moše a dirišwe ke Modimo go phološa Baisiraele?

◼ Ke ka baka la’ng Baisiraele ba be ba bina Paseka?

◼ Modimo o ile a phološa Baisiraele bokgobeng Egipita bjang?

[Lepokisi go letlakala 10]

Molao O Mogolo Kudu

Go ka direga gore Melao e Lesome, yeo e ngwadilwego go Ekisodo 20:1-17, ke e tsebjago kudu gare ga melao e ka bago e 600 yeo Modimo a e neilego Baisiraele a diriša Moše. Lega go le bjalo, ge Jesu Kriste a be a botšišwa gore ke molao ofe gare ga melao ka moka ya Modimo wo e lego wa bohlokwa kudu, o kgethile o rego: “O rate Jehofa Modimo wa gago ka pelo ya gago ka moka le ka moya wa gago ka moka le ka monagano wa gago ka moka le ka matla a gago ka moka.”—Mareka 12:28-30; Doiteronomio 6:5.

[Seswantšho go letlakala 10]

Genesi

● Ekisodo

● Lefitiko

● Numeri

● Doiteronomio

Jošua

Baahlodi

Ruthe

1 Samuele

2 Samuele

1 Dikxoši

2 Dikxoši

1 Koronika

2 Koronika

Esera

Nehemia

Esitere

Jobo

Dipsalme

Diema

Mmoledi

Sefela sa Difela

Jesaya

Jeremia

Dillo tša Jeremia

Hesekiele

Daniele

Hosea

Joele

Amosi

Obadya

Jona

Mika

Nahume

Habakuku

Tsefanya

Hagai

Sakaria

Maleaki

Mateo

Mareka

Luka

Johane

Ditiro

Baroma

1 Bakorinthe

2 Bakorinthe

Bagalatia

Baefeso

Bafilipi

Bakolose

1 Bathesalonika

2 Bathesalonika

1 Timotheo